မြန်မာနိုင်ငံတိုးတက်ပြောင်းလဲမှုတွင် လျှပ်စစ်ဓာတ်အား ချွေတာသုံးစွဲရေးမှာ အရေးပါသည့် ကဏ္ဍဖြစ်လာ

မြန်မာနိုင်ငံ၏ တိုးတက်ပြောင်းလဲလာခြင်း နှင့်အတူ လျှပ်စစ်စွမ်းအင် ချွေတာသုံးစွဲ ရေးမှာလည်း
အရေးကြီးကြောင်း ထိုင်းနိုင်ငံ လျှပ်စစ်စွမ်းအင်ချွေတာ သုံးစွဲရေးစီမံကိန်း လုပ်ကိုင်နေသည့်
အစိုးရလက်အောက်ခံ အဖွဲ့ဖြစ်သော Provinial Electricity Authority PEA ၏ ဒုတိယဥက္ကဋ္ဌ
Mr.Niwat Chayakul  က ပြောသည်။

"မြန်မာနိုင်ငံက အချိန်တိုအတွင်းတိုးတက်ပြောင်းလဲလာနေပါတယ်။ တင်း ကျပ်မှုတွေ
ဖြေလျှော့လာတာနဲ့ အတူ စီးပွားရေးလုပ်ငန်းတွေဟာလည်းတိုးတက်လာနေပါတယ်။
ဒါကြောင့် စီးပွားရေး လုပ်ငန်းတွေနဲ့ နိုင်ငံတွင်း စွမ်းအင်သုံးစွဲမှု မှာ ချွေတာတဲ့နည်းလမ်းတွေကို
လုပ်ကိုင်သွားမယ်ဆိုရင် ကုန်ကျစရိတ်သက်သာ ပြီး ပိုမိုဖွံ့ဖြိုးမှုအတွက် တွန်းအားပေးနိုင် မှာပါ"ဟု
Mr.Niwat Chayaku က ပြောသည်။ ပြည်တွင်းသုံးစွဲသူများနှင့် စီးပွားရေးလုပ်ငန်းများသည်
အလင်းရရှိရေးအတွက် လျှပ်စစ်ဓာတ်အားအသုံးချမှုကို လျှော့ချလိုက်ခြင်းက ကုန်ကျစရိတ်ကို
သက်သာစေမည့်အပြင် နိုင်ငံ၏ လျှပ်စစ်ဓာတ်အား ပေးဝေမှုများကိုလည်း ပိုမိုဖြန့်ကြက်နိုင်မည်
ဖြစ်ရာ ဖွံ့ဖြိုးမှုကိုတွန်းအားပေးစေနိုင်သည့် အချက်ဖြစ်လာမည်ဟုလည်း ၎င်းက ရှင်းလင်း
ပြောသည်။

ထိုင်းနိုင်ငံတွင် ၎င်းအစီအစဉ် ဖြင့် မူလလျှပ်စစ်ဓာတ်အား ထုတ်လုပ်မှု ပမာဏဖြင့် ပေးဝေမှုတွင်
၅၀ ရာခိုင်နှုန်း အထိ တိုးမြှင့်ပေးနိုင်ခဲ့သည်ဟုလည်း ဆက် လက်ပြောသည်။ မြန်မာနိုင်ငံတွင်
ယခု ၂၀၁၅ ခုနှစ်အထိ လျှပ်စစ်မီး လုံးဝမရရှိသေးသည့် လူဦးရေ ပမာဏသည် တိုင်းပြည်လူဦးရေ၏
၂၅ ရာခိုင်နှုန်းကျော်အထိ ရှိနေဆဲဖြစ်သည်ဟုလည်း စွမ်းအင်ဝန်ကြီးဌာနက ထုတ်ပြန် ထားခြင်းလည်း
ဖြစ်သည်။ သို့ဖြစ်ရာ ၎င်း အချက်သည် လျှပ်စစ်စွမ်းအင်ချွေတာမှုဖြင့် ပြောင်းလဲဆောင်ရွက်ခြင်းသည်
မြန်မာ နိုင်ငံအတွက် အရေးပါသည့် အချက်ဖြစ်နေသည်ဟုလည်း UMFCCI ၏ ဒုတိယဥက္ကဋ္ဌ
ဦးသက်လွင်တိုးက အဆိုပါ သတင်းစာရှင်းလင်းပွဲတွင်ပြောသည်။ " တိုးတက်ပြီးနိုင်ငံတွေမှာတော့
လျှပ်စစ် ကိုစတင်တီထွင်ခဲ့တဲ့ သောမတ်အယ်ဒီဆင် ကို ဂုဏ်ပြုတဲ့အနေနဲ့ သူ့ရဲ့မွေးနေ့မှာ
လျှပ်စစ်မီးကို ခတ္တဖြတ်တောက်မှု လုပ်ကြ ပါတယ်။ ဒီလိုဂုဏ်ပြုမှုမျိုးဆိုရင်တော့ မြန်မာနိုင်ငံမှာက
နေ့တိုင်းဖြစ်နေပါတယ် ။ အဲဒါကြောင့် သုံးစွဲနေသူတွေက စွမ်းအင်ချွေတာမှုကို လုပ်လာမယ်ဆိုရင်တော့
ဒီလိုကိစ္စမျိုး တွေကိုလည်း အနည်းငယ်လျော့ကျစေမှာ ပါ" ဟု ဦးသက်လွင်တိုးက ပြောသည်။

မြန်မာအစိုးရအဖွဲ့ကလည်း ပြည်တွင်း၌ လျှပ်စစ်မီး တိုးမြှင့်ပေးဝေနိုင်ရေးအတွက် ကမ္ဘာ့ဘဏ်အဖွဲ့နှင့်
ပူးပေါင်း ဆောင်ရွက် နေလျက်ရှိသည်။ ထို့အတူ မေလကုန်ပိုင်းအတွင်းကလည်း သီလ၀ါ
အထူးစီးပွားရေးဇုန်အတွင်း လျှပ်စစ် မဂ္ဂါဝပ် ၄၀၀ ထုတ်လုပ်နိုင်သည့် သဘာဝဓာတ်ငွေ့သုံးလျှပ်စစ်
ဓာတ်အားပေးစက်ရုံကို တည်ထောင်သွားရန်အတွက်လည်း ပြည်တွင်းပုဂ္ဂလိက ကုမ္ပဏီနှင့်
ဂျပန်နိုင်ငံ မာရူဘီနီ ကုမ္ပဏီတို့ မေလကုန်ပိုင်းတွင် လက်မှတ်ရေးထိုးမှုများရှိခဲ့သည် ။

ထိုသို့ဆောင်ရွက်မှုများ ရှိနေသော် လည်း ပြည်တွင်းရှိ လျှပ်စစ်ဓာတ်အားပေးဝေနေသည့်
လျှပ်စစ်ကြိုးများမှာ ဟောင်းနွမ်း မှုများကြောင့် လေလွင့်ဓာတ်အားများစွာ ဖြစ်နေလျက်ရှိသည်ဟုလည်း
စွမ်းအင်ဝန်ကြီး ဌာန အရာရှိတစ်ဦးက မီဒီယာများကို ပြောထားဖူးသည်။ အဖွဲ့သည် ထိုင်းနိုင်ငံတွင်
လျှပ်စစ်ဓာတ်အား ချွေတာရေးအတွက် တစ်နိုင်ငံ လုံးရှိ လမ်းမီးဓာတ်တိုင်များတွင် မီးသီးများ
အစားထိုးတပ်ဆင်ခြင်းနှင့် စက်မှုလုပ်ငန်းများတွင်လည်း မီးများကို အစားထိုးသုံးစွဲသွားရေးအတွက်
ဆောင်ရွက်ခြင်းဖြင့် လုပ် ဆောင်ခဲ့ရသည်ဟု Mr.Niwat Chayakul ကပြောသည်။ ၎င်းစီမံကိန်းအတွက်
၂၀၁၂ ခုနှစ်မှ စတင်ဆောင်ရွက်ခဲ့ခြင်းဖြစ်ရာ သုံးနှစ်အတွင်း လျှပ်စစ်သုံးစွဲမှုကို ယူနစ် ၁၉ သန်းအထိ
လျှော့ချနိုင်ခဲ့သည်ဟု ပြောသည်။

ထိုင်းနိုင်ငံ၏ ခရိုင်တစ်ခုတည်းတွင် ပင် ဘုရားကျောင်းများ၌ ယင်းစနစ်ကျင့်သုံး ခဲ့သဖြင့် တစ်နှစ်ကို
လျှပ်စစ်ယူနစ် ၂၃,၇၆၀ လျှော့ချနိုင်ကာ ထိုင်းဘတ်ငွေ တစ်သိန်းတစ်သောင်းကျော်
ကုန်ကျသက်သာခဲ့သည်ဟု ပြောသည်။

ဤအကြောင်းအရာနှင့် ပက်သက်၍ ထင်မြင်ချက်ပေးလိုပါက ...
[email protected] သို့ ပေးပို့နိုင်ပါသည်။


အကြည့်အများဆုံး - စီးပွားရေးသတင်း

အကြည့်အများဆုံး - အိမ်ခြံမြေကဏ္ဍ