တောင်ငူမြို့ စက်မှုဇုန်စီမံကိန်းဆောက်လုပ်ရေး နှစ်ဆန်းစတင်မည်

တောင်ငူစက်မှုဇုန်စီမံကိန်း ဥက္ကဋ္ဌ ဦးခင်မောင်အေးကို တွေ့ရစဉ်။ုံတင်ရတနာထွန်း/မြန်မာတိုင်း(မ်)တောင်ငူစက်မှုဇုန်စီမံကိန်း ဥက္ကဋ္ဌ ဦးခင်မောင်အေးကို တွေ့ရစဉ်။ုံတင်ရတနာထွန်း/မြန်မာတိုင်း(မ်)

တောင်ငူမြို့တွင် ပထမဆုံး တည်ဆောက်မည့် စက်မှုဇုန်စီမံကိန်းကို ၂၀၁၆ နှစ်ဆန်းတွင်
စတင်သွားမည်ဟု တောင်ငူစက်မှုဇုန်စီမံကိန်း ဥက္ကဋ္ဌ ဦးခင်မောင်အေးက ပြောသည်။

ယင်းမှာ ပဲခူးတိုင်းဒေသကြီး၊ တောင်ငူမြို့ မိုင်တိုင် ၁၅၀ နှင့် ၁၅၁ အနီးတွင် မြေဧက
တစ်ထောင်ကျော်ပေါ်၌ တည်ဆောက်ရန်လျာထားထားသည်။

"စက်မှုဇုန်အနေနဲ့အကောင်အထည်ဖော်ဖို့ မြေဧက တစ်ထောင် ကျော်ကို ၀ယ်ယူပြီးပါပြီ။
ဒီစက်မှုဇုန်စီမံကိန်း ကို ဒီဇင်ဘာလကုန်မှာ စတင်ဖို့ မှန်းထားပါတယ်။ ဒီဇင်ဘာလကုန်မှာ
မစတင်နိုင်ခဲ့ရင် တော့ ဇန်န၀ါရီလဆန်းပိုင်းမှာ စက်မှုဇုန် စီမံကိန်း စတင်မှာသေချာ
ပါတယ်" ဟု ၎င်းက ပြောသည်။

ဦးခင်မောင်အေးသည် သမ၀ါမယဘဏ် ၏ ဥက္ကဋ္ဌ၊ တော်ဝင်ကေတုမတီ(တောင်ငူ)
ဟိုတယ်နှင့် အခြားဆောက်လုပ်ရေးလုပ်ငန်း များ၊ မော်တော်ကားဆိုင်ရာလုပ်ငန်းများနှင့်
တူးဖော်ရေးလုပ်ငန်းများ လုပ်ကိုင်နေသော ကောင်းမြန်မာအောင်ကုမ္ပဏီ (ကေအမ်အေ
ကုမ္ပဏီ)၏ ဥက္ကဋ္ဌနေရာများတွင် တာဝန်ယူ ထားသည်။ "စက်မှုဇုန်စတင်ဖို့ အခုအချိန်မှာ
ဥပဒေ ဘောင်ထဲက လုပ်ထုံးလုပ်နည်းနဲ့ ခွင့်ပြုချက် လည်း ရပြီးပြီ။ နောက်ဆုံးအဆင့်
အနေနဲ့ မြန်မာနိုင်ငံရင်းနှီးမြှုပ်နှံမှု ကော်မရှင်ကို တင်ပြဖို့နဲ့ အစိုးရအဖွဲ့ကို တင်ပြဖို့ပဲလိုတော့
တယ်။ အဲဒီက ခွင့်ပြုချက်ရတာနဲ့ အကောင်အထည်ဖော်လို့ရပြီ"ဟု ၎င်းက ပြောသည်။

တောင်ငူစက်မှုဇုန် စီမံကိန်းအတွက် ယခုအချိန်တွင် ကိုရီးယား၊ ဂျပန်၊ စင်ကာပူ၊ထိုင်ဝမ်၊
တရုတ်နိုင်ငံမှ လာရောက်ရင်းနှီး မြှုပ်နှံမည့် လုပ်ငန်းရှင်များနှင့် ချိတ်ဆက်ဆောင်ရွက်လျက်
ရှိကြောင်း ဦးခင်မောင်အေး က ပြောသည်။ ယင်းအတွက် မြန်မာငွေကျပ် ဘီလျံ ၂၀ မှ
ဘီလျံ ၅၀ အထိ ရင်းနှီးမြှုပ်နှံသွား မည်ဖြစ်ပြီး အများပိုင်ကုမ္ပဏီများ၊ ပြည်တွင်းဘဏ်များနှင့်
နိုင်ငံတကာချေးငွေများလည်း လိုအပ်ကြောင်း တောင်ငူစက်မှုဇုန်စီမံကိန်းဥက္ကဋ္ဌက
ပြောသည်။ ထိုစက်မှုဇုန်တွင် လူဦးရေတစ်သိန်း ကျော် အလုပ်အကိုင်အခွင့်အလမ်း
ရရှိနိုင်မည်ဖြစ်ပြီး ဒေသခံများ အလွယ်တကူပါဝင် နိုင်မည့် လုပ်ငန်းများနှင့် ပတ်ဝန်းကျင်
မထိခိုက်မည့် လုပ်ငန်းများကိုသာ ရွေးချယ် လုပ်ကိုင်သွားမည်ဟု ၎င်းကပြောသည်။
"အလုပ်အကိုင်အခွင့်အလမ်း အားနည်းလို့ တစ်နိုင်ငံလုံး ဒီလိုဖြစ်နေကြတယ်။ ဒီလိုပြဿနာကို
စိုက်ပျိုးရေးလေးလုပ်ရုံနဲ့ ဖြေရှင်း လို့ မရဘူး။ စက်မှုဇုန်တွေ အကောင်အထည် ဖော်ရမယ်။
စက်မှုဇုန်တိုင်းကိုတော့ လက်မခံ ပါဘူး။ ဒေသကို မထိခိုက်မယ့် ပတ်ဝန်းကျင် မညစ်ညမ်း
မယ့် နေထိုင်သူတွေကို အကျိုးရှိ မယ့် စက်မှုဇုန်မျိုးကိုပဲ ဖွင့်မယ်"ဟု ဦးခင်မောင်အေးကပြောသည်။

တောင်ငူစက်မှုဇုန်ကို ကုန်းဆန်ပြီး စိုက်ပျိုး ရေမရသောကြောင့် စိုက်ပျိုး၍မရသော
လယ်ယာမြေများနှင့် မြေလွတ်မြေရိုင်းများ ပေါ်တွင် တည်ဆောက်သွားမည်ဖြစ်ပြီး
ဒေသခံများ အလုပ်အကိုင်အခွင့်အလမ်းများ ရရှိရန် ရည်ရွယ်ကြောင်းလည်း ၎င်းက
ပြော သည်။ "တောင်ငူမှာ စီးပွားရေးက စိုက်ပျိုးရေးကို အမှီပြုနေရတော့ စိုက်ပျိုးရေး
မဖြစ်ထွန်းတာ နဲ့ စီးပွားရေးက ချက်ချင်းကျတာပဲ။ တောင်ငူ ဒေသခံ တစ်သိန်းလောက်က
ထိုင်းနယ်စပ်၊တရုတ်ပြည်နယ်စပ်၊ စင်ကာပူ၊မလေးရှားစတဲ့ တခြားနေရာတွေမှာသွားပြီး
အလုပ်လုပ်နေ ရတယ်။ မိန်းကလေးတွေတောင် ပါတယ်။ သူတို့ကြည့်လိုက်ရင်
အလုပ်ကြမ်းလုပ်ရ တာများတယ်"ဟု ၎င်းကပြောသည်။

စက်မှုဇုန်စီမံကိန်းစတင်ရန် မြေယာများ ၀ယ်ယူနေသည့်အချိန်တွင် ဒေသခံအချို့၏
ကန့်ကွက်မှုများရှိခဲ့သော်လည်း ယခုအချိန် တွင် မကျေနပ်မှုများအားလုံးကို ပြေလည်အောင်
တွေ့ဆုံဖြေရှင်းနိုင်ခဲ့ကြောင်း ၎င်းက ပြောသည်။ "အခုတော့ မြေယာပြဿနာတွေ မရှိတော့
ဘူး။ အရင်တုန်းကတော့ နားလည်မှုလွဲခဲ့ ကြတယ်။ တကယ်တေ့တေ့ဆိုင်ဆိုင်ဆွေးနွေး
ကြည့်တော့ ဘာပြဿနာမှ မရှိတော့ဘူး။ ဒေသခံတွေက လက်ခံကြပါတယ်"ဟု စီမံကိန်း
ဥက္ကဋ္ဌက ပြောသည်။

စက်မှုဇုန်တည်ဆောက်သော မြေဧက ၁,၀၀၀ကို ၀ယ်ယူရာတွင် ယခင်က တစ်ဧကလျှင်
ကျပ် ၁၀,၀၀၀ အောက်သာရှိခဲ့သော်လည်း စက်မှုဇုန်တည်ဆောက်မည်ဆိုသည့်
သတင်းကြောင့် တစ်ဧကကျပ်သိန်း၂၀ မှ ကျပ်သိန်း ၃၀ ကျော်အထိ ပေးချေခဲ့ရသည်။
"စက်မှုဇုန်နေရာက အရင်က တစ်ဧက ကျပ် ၁၀,၀၀၀နဲ့တောင် ၀ယ်မယ့်သူမရှိဘူး။ စိုက်ပျိုးလို့
မရတဲ့မြေတွေ။ အခုစက်မှုဇုန်လုပ် မယ်လည်းဆိုရော နောက်ပိုင်းမှာ မြေတွေက ဈေးတွေ
တအားမြင့်လာကြတယ်"ဟု ၎င်း က ပြောသည်။ ပဲခူးတိုင်းဒေသကြီးအတွင်း ပဲခူးစက်မှုဇုန်
နှင့် i-land စက်မှုဇုန်များကိုလည်း ယခုအချိန် တွင် အကောင်အထည်ဖော်လျက်ရှိပြီး
ပြည်တွင်း၊ ပြည်ပလုပ်ငန်းရှင်များက လုပ်ငန်းများ စတင်ရန် ဆောင်ရွက်လျက်ရှိသည်။

ဤအကြောင်းအရာနှင့် ပက်သက်၍ ထင်မြင်ချက်ပေးလိုပါက ...
comment.myanmar@mmtimes.com သို့ ပေးပို့နိုင်ပါသည်။


အကြည့်အများဆုံး - စီးပွားရေးသတင်း

အကြည့်အများဆုံး - အိမ်ခြံမြေကဏ္ဍ