ကမ္ဘောဇဘဏ်လီမိတက်အား မြန်မာနိုင်ငံ၏ ပထမဆုံး နိုင်ငံတကာ ဘဏ်ကိုယ်စားလှယ်ရုံးအဖြစ် ထိုင်းနိုင်ငံတွင် ဖွင့်လှစ်ခွင့်ပြု

ဓာတ်ပုံ - KBZ BANKဓာတ်ပုံ - KBZ BANK

မြန်မာနိုင်ငံ၏ အကြီးဆုံးပုဂ္ဂလိကဘဏ်ဖြစ်သော က္ဘောဇဘဏ်အား မြန်မာနိုင်ငံ၏
ပထမဆုံးနိုင်ငံတကာဘဏ် ကိုယ်စားလှယ်ရုံးအဖြစ် ထိုင်းနိုင်ငံဗဟိုဘဏ်က ဧပြီ ၂၈ ရက်တွင်
တရားဝင်လိုင်စင် ခွင့်ပြုလိုက်ကြောင်း ပြန်ကြားရေးဝန်ကြီးဌာန၏ လူမှုကွန်ရက်စာမျက်နှာတွင်
ဖော်ပြထားသည်။

ရန်ကုန်မြို့ရှိ မြန်မာနိုင်ငံတော်ဗဟိုဘဏ်နှင့် ထိုင်းသံရုံးတို့၏ ထောက်ခံချက်ဖြင့် ငွေကြေးနှင့်
ဘဏ်လုပ်ငန်း ဝန်ဆောင်မှုကဏ္ဍတွင် ကမ္ဘောဇဘဏ်၏ နိုင်ငံတကာစံနှုန်းများနှင့်အညီ ဦးဆောင်
လုပ်ကိုင်ဆောင်ရွက်နေမှုတို့ကို ထိုင်းဗဟိုဘဏ်သို့ တင်ပြခဲ့ရာ ခွင့်ပြုချက်ရရှိလိုက်ခြင်းကြောင့်
ကမ္ဘောဇဘဏ်အနေဖြင့် ထိုင်းနိုင်ငံနှင့် နိုင်ငံအတွင်းရှိ စီးပွားရေးလုပ်ငန်းရှင်များနှင့် စပ်လျဉ်းသော
စီးပွားရေးနှင့် ငွေကြေးဆိုင်ရာ အချက်အလက်များ စုဆောင်းတင်ပြခြင်း၊ မြန်မာနိုင်ငံ၌ စီးပွားရေး
ဆက်သွယ်ဆောင်ရွက်မည့် ထိုင်းစီးပွားရေး လုပ်ငန်းရှင်များအား ဆက်သွယ်ညှိနှိုင်းဆောင်ရွက်ပေးခြင်း၊
ကမ္ဘောဇဘဏ်၏ နိုင်ငံခြားဘဏ်လုပ်ငန်းများအား ပံ့ပိုးမှုများပြုလုပ်ပေးခြင်းအပါအဝင် ဘဏ်လုပ်ငန်း၊
ငွေကြေးနှင့် စီးပွားရေးဆိုင်ရာလုပ်ငန်းများကို ဆောင်ရွက်သွားနိုင်မည်ဖြစ်သည်။

ရှိပြီးသော အတွေ့အကြုံဗဟုသုတများကို အခြေခံ၍ ကုန်သွယ်မှုပိုင်းတွင်သာမက မြန်မာနိုင်ငံတွင်း
ဝင်ရောက်လာမည့် ထိုင်းစီးပွားရေး လုပ်ငန်းများအတွက်လည်း အကြံပြုဝန်ဆောင်မှု လုပ်ငန်းများကို
ဆောင်ရွက်ပေးနိုင်ကြောင်း ကမ္ဘောဇဘဏ် အကြီးတန်း အုပ်ချုပ်မှုဒါရိုက်တာ ဦးသန်းချိုက
ပြောကြားသည်။

မြန်မာနိုင်ငံသည် ထိုင်းနိုင်ငံ၏ သတ္တမအကြီးဆုံး ကုန်သွယ်မှု မိတ်ဖက်နိုင်ငံအဖြစ်လည်းကောင်း၊
ထိုင်းနိုင်ငံသည် မြန်မာနိုင်ငံ၏ ဒုတိယအကြီးဆုံး ကုန်သွယ်မှု မိတ်ဖက်နိုင်ငံ အဖြစ်လည်းကောင်း
ရပ်တည်ပြီး ခိုင်မာသည့် ကုန်သွယ်မှု ဆက်ဆံရေးဖြင့် ဆက်သွယ်ဆောင်ရွက်လျက် ရှိပြီး ပြီးခဲ့သည့်
ငါးနှစ်တာကာလအတွင်း မြန်မာနှင့် ထိုင်း ကုန်သွယ်မှုတန်ဖိုးသည် ပျမ်းမျှအားဖြင့် အမေရိကန်
ဒေါ်လာ သန်း ၆၈ဝဝ ရှိခဲ့သည်။

ဘဏ်ခွဲအဆင့် ဖွင့်လှစ်ခွင့်သာ ရရှိပါက ထိုင်းနိုင်ငံရှိ များစွာသော မြန်မာရွှေ့ပြောင်းအလုပ်သမားများ
(ခန့်မှန်းခြေ သုံးသန်းခန့်) အတွက်လည်း ငွေကြေးဝန်ဆောင်မှုဆိုင်ရာ လုပ်ငန်းများကို
ဆောင်ရွက်ပေးနိုင်မည် ဖြစ်သည်။

ဤအကြောင်းအရာနှင့် ပက်သက်၍ ထင်မြင်ချက်ပေးလိုပါက ...
[email protected] သို့ ပေးပို့နိုင်ပါသည်။


အကြည့်အများဆုံး - စီးပွားရေးသတင်း

အကြည့်အများဆုံး - အိမ်ခြံမြေကဏ္ဍ