ရော်ဘာ ဈေးကောင်းရရေး ပုဂ္ဂလိကကုမ္ပဏီ တည်ထောင်ရန် ပြင်ဆင်နေ

ပြည်တွင်းထုတ် ရော်ဘာများကို နိုင်ငံခြားတင်ပို့ရန် ပြင်ဆင်ဆောင်ရွက်နေစဉ်။မြန်မာတိုင်း(မ်)ပြည်တွင်းထုတ် ရော်ဘာများကို နိုင်ငံခြားတင်ပို့ရန် ပြင်ဆင်ဆောင်ရွက်နေစဉ်။မြန်မာတိုင်း(မ်)

မကြာသေးမီနှစ်များအတွင်း ဆက်တိုက် နီးပါးဈေးကောင်းမရသည့် ပြည်တွင်းထုတ်ရော်ဘာသည်
အရေအသွေးမပြည့်မီမှုနှင့် ခိုင်မာသည့်ဘုံဈေးကွက်မရှိခြင်းတို့ကြောင့် ဖြစ်သည်ဟုလုပ်ငန်းရှင်များက
သုံးသပ်ထားပြီး ယင်းပြဿသာနာအား ဖြေရှင်းရန် ထားဝယ်ခရိုင်ရှိ ရော်ဘာလုပ်ငန်းရှင်များက ပုဂ္ဂလိကကုမ္ပဏီတစ်ခုထူထောင်ရန် ပြင်ဆင်နေသည်ဟုတနင်္သာရီတိုင်း ဒေသကြီး ရော်ဘာစိုက်ပျိုး
ထုတ်လုပ်သူများအသင်းဥက္ကဋ္ဌ ဦးယုစိန်က ပြောသည်။

ကမ္ဘာ့ရော်ဘာဈေး ကျဆင်းမှု၏ အကျိုးသက်ရောက်မှုများအပြင် ပြည်တွင်း လုပ်ငန်းရှင်များ၏ နိုင်ငံတကာ
အရေ အသွေးကို ပြည့်မီအောင်ထုတ်လုပ်နိုင်မှု မရှိခြင်းတို့ကြောင့် တနင်္သာရီတိုင်း ဒေသကြီးအတွင်းရှိ
ရော်ဘာလုပ်ငန်းရှင် များက လုပ်ငန်းကိုစွန့်ခွာကာ ပြောင်းလဲ လုပ်ကိုင်လာခြင်းက
စိုးရိမ်ဖွယ်ဖြစ်လာနေသည်ဟု ဦးယုစိန်က ပြောသည်။

"ထားဝယ်ခရိုင်တစ်ခုတည်းတင် စိုက်ဧက ၁၃၀,၀၀၀ ကျော်တယ်။ ကျွန်တော့်ခြံအပါအ၀င်
ဘယ်သူမှလည်း အဆင့်အတန်းမီရော်ဘာမထုတ်နိုင်ဘူး။ ခြံရှင်ငယ်တွေကလည်း တစ်နေ့လုပ်အားခ
၆,၀၀၀ တောင်မပေးနိုင်တော့လို့ လုပ်ငန်း နားထားရတယ်။ ရော်ဘာခြံလုပ်သားတွေကလည်း
ဒီမှာအခြေအနေမကောင်းတော့ တဲ့အတွက် ထိုင်းမှာရွှေ့ပြောင်းလုပ်သား တွေအဖြစ် သွားလုပ်ကုန်ကြပြီ" ဟု
၎င်းကပြောသည်။ ပီပြင်သောဈေးကွက်ဖော်ဆောင်ရန်နှင့် နိုင်ငံတကာအဆင့်မီ ရော်ဘာပြားများ
ထုတ်နိုင်ရန် ထားဝယ်ခရိုင်ရှိ ရော်ဘာ လုပ်ငန်းရှင် ၂၀ ဦးက မတည်၍ ကနဦး ရင်းနှီးမြှုပ်နှံမှုအဖြစ်
ထားဝယ်ရော်ဘာ ကုမ္ပဏီလီမိတက်ကို မြန်မာကျပ်ငွေ သန်း ၃,၀၀၀ ဖြင့် ပုဂ္ဂလိကကုမ္ပဏီအဖြစ် ထူထောင်သွားမည်ဖြစ်ပြီး ရော်ဘာသန့်စင်စက်ရုံတည်ထောင်ရန် မြေနေရာကို ၀ယ်ယူရန်
ပြင်ဆင်နေသည်ဟု ဦးယုစိန်က ပြောသည်။ "စက်ရုံဆောက်ဖို့ကို ထားဝယ်မှာပဲမြေရှာနေတယ်။
ရော်ဘာလုပ်ငန်းရှင်တွေ ရော်ဘာ အ၀ယ်ဒိုင်တွေနဲ့ သယ်ယူ ပို့ဆောင်ရေးလုပ်ငန်းရှင်တွေ အားလုံး ပူးပေါင်းလုပ်ဆောင်မယ်။ ပြည်တွင်းပြည်ပ က ၀ယ်လက်တွေနဲ့ ချိတ်ဆက်ရောင်းချမယ်။ ပြည်တွင်းက
ရော်ဘာပြားတွေဝယ်ပြီး စနစ်တကျပြုပြင်ပြီးမှ ပြန်လည် ရောင်းချမှာပါ။ အခုလာမယ့် ရော်ဘာ
အစေးခြစ်ရာသီ အောက်တိုဘာအမီ စက်ရုံဖွင့်နိုင်ဖို့ မှန်းထားတယ်" ဟု ၎င်းက ပြောသည်။

ရော်ဘာသည် ယခင်အစိုးရလက်ထက် ကပင် စတင်ဖော်ဆောင်နေသည့် နိုင်ငံအဆင့်
အမျိုးသားပို့ကုန် ဗျူဟာအတွက် အဓိကပို့ကုန်အဖြစ်ပါဝင်နေပြီး ပြီးခဲ့သည့် နိုဝင်ဘာတွင်လည်း မြန်မာနိုင်ငံ၏ ရော်ဘာစိုက်ပျိုးထုတ်လုပ်မှု အများဆုံး ရှိရာ မွန်ပြည်နယ် မော်လမြိုင်မြို့တွင် ရော်ဘာဘုံဈေးကွက် ဖော်ဆောင်ရန် ပြင်ဆင်မှုများ ရှိခဲ့သည်။

မြန်မာနိုင်ငံတွင် ဒုတိယအများဆုံး ရော်ဘာစိုက်ပျိုးထုတ်လုပ်နေသည့် တနင်္သာရီတိုင်းဒေသကြီးတွင်
အဆိုပါ ပုဂ္ဂလိကကုမ္ပဏီက တည်ထောင်မည့် ရော်ဘာသန့်စင်စက်ရုံအတွက် ရင်းနှီး မြှုပ်နှံမှုအားလုံးကို
ပြည်တွင်းလုပ်ငန်းရှင် များကသာ ထည့်ဝင်မည်ဖြစ်ပြီး နည်းပညာ ပိုင်းနှင့်
နိုင်ငံတကာဈေးကွက်ထိုးဖောက်မှု ကို ဂျပန်နိုင်ငံမှ နိုင်ငံတကာ လူ့စွမ်းအားအရင်းအမြစ်နှင့်
စက်မှုလုပ်ငန်းများဖွံ့ဖြိုး တိုးတက်ရေး အေဂျင်စီနှင့် စီးပွားရေး ကုန်သွယ်ရေးနှင့် စက်မှုလုပ်ငန်းဝန်ကြီး
ဌာနတို့က ကူညီသွားမည်ဟု ဦးယုစိန်က ပြောသည်။

မြန်မာနိုင်ငံ ရော်ဘာစိုက်ပျိုးထုတ်လုပ် တင်ပို့ရောင်းချသူများအသင်း၏ ညီနောင် အသင်းဖြစ်သည့်
အတွက် မကြာခင် အသင်းချုပ်က ကူညီဖော်ဆောင်မည့် ရော်ဘာဘုံဈေးကွက်နှင့် ချိတ်ဆက်နိုင်ရန်
တနင်္သာရီတိုင်းဒေသကြီး၏ ကနဦး ပြင်ဆင်မှုလည်းဖြစ်သည်ဟု သိရသည်။ အများပိုင်ကုမ္ပဏီအဖြစ်
ထူထောင်ရန် ရည်ရွယ်ထားသော်လည်း ပြောင်းလဲလိုက် သည့် မူဝါဒအရ အခက်အခဲရှိနေရာ
ပုဂ္ဂလိက ကုမ္ပဏီအဖြစ် စတင်လည်ပတ်ရခြင်းဖြစ်သည်။

ရော်ဘာဘုံဈေးကွက် ဖြစ်ပေါ်လာပါက ရော်ဘာစိုက် တောင်သူများအတွက် အားသာချက်များပြီး
နေ့စဉ်ပေါက်ဈေးနှင့် အညီ တောင်သူများက လေလံစနစ်ဖြင့် ရောင်းချနိုင်ပြီး အရည်အသွေးကိုထိန်းသွား နိုင်မည်ဟု မြန်မာနိုင်ငံ ရော်ဘာစိုက်ပျိုး ထုတ်လုပ်တင်ပို့ရောင်းချ
သူများအသင်းမှ အထွေထွေအတွင်းရေးမှူး ဦးခိုင်မြင့်က ပြောသည်။

"ဒီဘုံဈေးကွက်ဖြစ်လာလို့ ရော်ဘာဈေးတွေ ကောင်းလာ မယ်လို့မဆိုလိုဘူး။ ဒါဟာ ပြည်တွင်းက
လုပ်ငန်းရှင်တွေ ဘာမှမတတ်နိုင်တဲ့ ကိစ္စပဲ။ ကမ္ဘာ့ဈေးနဲ့ပဲ တိုက်ရိုက် သက်ဆိုင်တယ်။ ရေနံဈေးကျ
တာတွေလည်း သက်ရောက်မှုရှိတယ်။ ဒါပေမဲ့ အရည်အသွေး ပြည့်မီလာမှာဖြစ်လို့ ခုလိုမျိုးကမ္ဘာ့ဈေးထက်
တစ်တန်ကို ဒေါ်လာ ၄၀၀ လောက်နည်းနေတာမျိုး မဖြစ်တော့ဘူး။ လက်ရှိ RSS3 အမျိုး အစားရော်ဘာက
တစ်တန်ကို ကမ္ဘာ့ဈေး ကန်ဒေါ်လာ ၁,၇၀၀ ရပေမဲ့ ပြည်တွင်းက ၁,၃၀၀ ပဲရတယ်။ အရေအသွေးလည်း
ပြည့်မီရမယ်။ အမြောက်အမြားလည်း ထုတ်နိုင်ရမယ်။ ဒါမှနိုင်ငံတကာကို တင်ပို့ဖို့အတွက်
အဆင်ပြေမယ်" ဟု ၎င်းကပြောသည်။ လက်ရှိတွင်လည်း အသင်းချုပ်နှင့် စိုက်ပျိုးရေးဦးစီးဌာန၊
စက်မှုသီးနှံဌာနတို့ က စီးပွားကူးသန်းဝန်ကြီးဌာနနှင့် ပူးပေါင်း ၍ ရော်ဘာစိုက်ပျိုးမှုမှသည်
တင်ပို့မှုအထိ လွှမ်းခြုံသည့် ဥပဒေတစ်ခုကိုရေးဆွဲရန် ပြင်ဆင်နေပြီး နိုင်ငံတကာမှဥပဒေများ
ကိုလေ့လာနေသည်ဟု ဦးခိုင်မြင့်က ပြောသည်။

"အချိန်တစ်နှစ်လောက်တော့ ယူရမယ်။ ဥပဒေက အလောသုံးဆယ် ရေးဆွဲပြီးမှ မှားနေရင်
မှားတဲ့အတိုင်း လိုက်လုပ်ရတော့မှာဖြစ်တဲ့အတွက် ထုတ်လုပ်သူတွေကို အထောက်အပံ့
ဖြစ်စေမယ့်ဥပဒေမျိုးရေးဆွဲနိုင်ဖို့လိုတယ်" ဟု ၎င်းကပြောသည်။

ဤအကြောင်းအရာနှင့် ပက်သက်၍ ထင်မြင်ချက်ပေးလိုပါက ...
[email protected] သို့ ပေးပို့နိုင်ပါသည်။


အကြည့်အများဆုံး - စီးပွားရေးသတင်း

အကြည့်အများဆုံး - အိမ်ခြံမြေကဏ္ဍ