မြန်မာနိုင်ငံကို ဂျပန်က ဒေါ်လာ ၈၂၄ သန်း ချေးမည်

ဆင်းရဲမွဲတေမှုလျှော့ချရေးအတွက် ဒေသဆိုင်ရာဖွံ့ဖြိုးမှုစီမံကိန်း၊ ရန်ကုန်-မန္တလေး ရထားလမ်း
ပြုပြင်ထိန်းသိမ်းရေးစီမံကိန်း၊ ရန်ကုန်တိုင်းဒေသကြီး ရေပေးဝေရေးစနစ်စီမံကိန်း၊ မြို့ကြီးများ၏
လျှပ်စစ်မီးဖြန့်ဖြူးမှုစနစ် တိုးတက်ကောင်းမွန်ရေးစီမံကိန်း၊ လယ်ယာကဏ္ဍနှင့် ကျေးလက်ဒေသ
ဖွံ့ဖြိုးတိုးတက်ရေး စီမံကိန်းငါးခုအတွက်ဖြစ်သည်။

ဂျပန်နိုင်ငံက မြန်မာနိုင်ငံသို့စီမံကိန်းငါးခုအတွက် ဂျပန်ယန်းငွေ ၉၃ ဒသမ ၉၇ ဘီလျံ (ကန်ဒေါ်လာ
၈၂၄ သန်း) တန်ဖိုးရှိ ODA ချေးငွေပေးအပ်သွားမည်ဟု မြန်မာနိုင်ငံဆိုင်ရာ ဂျပန်သံရုံးက ယခု
တစ်ပတ်အတွင်း သတင်းထုတ်ပြန်ခဲ့သည်။

ထိုသို့ပေးအပ်ရန်အတွက် နေပြည်တော်တွင် မြန်မာနိုင်ငံဆိုင်ရာဂျပန်သံအမတ်ကြီး မစ္စတာတတဲရှိ
ဟိဂုချိ (Mr Tateshi Higuchi) နှင့် စီမံကိန်းနှင့်ဘဏ္ဍာရေးဝန်ကြီးဌာန၊ ဒုတိယဝန်ကြီး ဦးမောင်
မောင်ဝင်းတို့က ၂ဝ၁၇ ခုနှစ်၊ ယခုတစ်ပတ်အတွင်း စာချွန်လွှာ လက်မှတ်ရေးထိုးခဲ့သည်။

ဂျပန်နိုင်ငံက ချေးငွေပေးအပ်မည့် စီမံကိန်းငါးခုထဲတွင် ဆင်းရဲမွဲတေမှုလျှော့ချရေးအတွက် ဒေသ
ဆိုင်ရာဖွံ့ဖြိုးမှုစီမံကိန်း (Phase II) အတွက် ဒေါ်လာသန်း ၂၁ဝ တန်ဖိုးရှိ ဂျပန်ယန်းငွေ ၂၃ ဒသမ
၉၇၉ ဘီလျံပေးအပ်မည်ဖြစ်သည်။

ရန်ကုန်-မန္တလေးရထားလမ်း ပြုပြင်ထိန်းသိမ်းရေးစီမံကိန်းအတွက် ဂျပန်ယမ်းငွေ ၂၅ ဘီလျံ (ကန်
ဒေါ်လာ ၂၁၉ သန်းတန်ဖိုးရှိ)၊ ရန်ကုန်တိုင်းဒေသကြီး ရေပေးဝေရေးစနစ်စီမံကိန်းအတွက် ဂျပန်
ယန်းငွေ ၂၅ ဘီလျံ (ကန်ဒေါ်လာ ၂၁၉ သန်း)၊ မြို့ကြီးများ၏ လျှပ်စစ်မီးဖြန့်ဖြူးမှုစနစ် တိုးတက်
ကောင်းမွန်ရေးစီမံကိန်းအတွက် ဂျပန်ယန်းငွေ ၄ ဒသမ ၈၅၆ ဘီလျံ (ကန်ဒေါ်လာ ၄၃ သန်း) နှင့်
လယ်ယာကဏ္ဍနှင့် ကျေးလက်ဒေသဖွံ့ဖြိုးတိုးတက်ရေးစီမံကိန်းအတွက် ဂျပန်ယန်းငွေ ၁၅ ဒသမ
၁၃၅ ဘီလျံ (ကန်ဒေါ်လာ ၁၃၃ သန်း) တို့တွင် သုံးစွဲနိုင်ရေးအတွက် ချေးငွေပေးအပ်သွားမည်ဟု
ထုတ်ပြန်ချက်တွင် ဖော်ပြထားသည်။

ဆင်းရဲမွဲတေမှု လျှော့ချရေးအတွက် ဒေသဆိုင်ရာဖွံ့ဖြိုးမှုစီမံကိန်း (Phase II) သည် ကျေးလက်
ဒေသ၏ လမ်းပန်းဆက်သွယ်ရေး၊ လျှပ်စစ်မီးရရှိရေး၊ ရေရရှိရေးအတွက် အခြေခံအဆောက်အအုံ
များ တည်ဆောက်ရန်ဖြစ်ပြီး ကျေးလက်ဒေသများတွင် လူမှုစီးပွားဘ၀ဖွံ့ဖြိုးတိုးတက်ရေးအတွက်
အထောက်အကူပြုရန်ဖြစ်သည်။ ယခု စီမံကိန်းသည် ဆင်းရဲမွဲတေမှုလျှော့ချရေးနှင့် ကျေးလက်
ဒေသများ ဖွံ့ဖြိုးရေးစီမံကိန်း (Phase II) ကို ဆက်လက်ဆောင်ရွက်သောစီမံကိန်းဖြစ်ပြီး ကျေး
လက်ဒေသနေပြည်သူများ၏ လူမှုဘဝ တိုးတက်လာမည်ဖြစ်ပြီး ကျေးလက်ဒေသများတွင် ဖွံ့ဖြိုး
တိုးတက်ရေးနှင့် ဆင်းရဲမွဲတေမှု လျှော့ချရေးကိုလည်း အထောက်အကူဖြစ်စေမည်ဖြစ်သည်။

ရန်ကုန်-မန္တလေး ရထားလမ်းပြုပြင်ထိန်းသိမ်းရေးစီမံကိန်းသည် ရန်ကုန်မြို့နှင့်တောင်ငူမြို့အကြား
ရထားသံလမ်းများပြုပြင် ထိန်းသိမ်းခြင်း၊ ခေတ်မီကိရိယာများဖြင့် အသစ်ပြောင်းလဲတပ်ဆင်ခြင်း၊
ရထားတွဲအသစ်များ ဝယ်ယူခြင်း ဆောင်ရွက်နိုင်ရန်အတွက်ဖြစ်သည်။ အဆိုပါစီမံကိန်းဖြင့် ပိုမို
လုံခြုံစိတ်ချ၍ မြန်နှုန်းမြင့်ရထားခရီးစဉ်များ ဖြစ်လာစေပြီး သယ်ယူပို့ဆောင်ရေးစွမ်းဆောင်ရည် ပိုမို
မြင့်မားစေပြီး စီးပွားရေးဖွံ့ဖြိုးမှုအတွက် အထောက်အကူဖြစ်စေရန် ရည်ရွယ်ကြောင်း သိရသည်။

ထို့ပြင် နောက်ထပ်စီမံကိန်းဖြစ်သည့် ရန်ကုန်တိုင်းဒေသကြီး ရေပေးဝေရေးစနစ်စီမံကိန်းမှာ
ရန်ကုန်မြို့တော်သို့ ကုက္ကိုဝမြစ်ရေတင် ရေပေးဝေရေးစနစ်အတွင်းရှိ ရေပေးဝေရေးလုပ်ငန်းများ
ပြုပြင်ထိန်းသိမ်းခြင်း ဆောင်ရွက်ရန်အတွက်ရည်ရွယ်ကာ ရေပေး ရေးစနစ် ပိုမိုကောင်းမွန်စေပြီး
ဒေသခံပြည်သူများ လူမှုဘဝပိုမိုမြင့်မားစေရန် အထောက်အကူပြုမည်ဖြစ်ကြောင်း အဆိုပါထုတ်
ပြန်ချက်တွင် ပါဝင်သည်။

မြို့ကြီးများ၏ လျှပ်စစ်မီးဖြန့်ဖြူးမှုစနစ် တိုးတက်ကောင်းမွန်ရေးစီမံကိန်းကို ကျေးလက်ဒေသများရှိ
မြို့ကြီးများတွင် လျှပ်စစ်မီးကြိုးများ သွယ်တန်းမှုကို ပြုပြင်ထိန်းသိမ်းခြင်းနှင့် အဆင့်မြှင့်တင်ခြင်း
လုပ်ငန်းဆောင်ရွက်ရန်ဖြစ်သည်။ စီမံကိန်းကြောင့် မြို့ကြီးများရှိ လျှပ်စစ်ဓာတ်အားဖြန့်ဖြူးမှုပိုမို
ကောင်းမွန်စေမည်ဖြစ်ပြီး စီးပွားရေးဖွံ့ဖြိုးတိုးတက်ရေးနှင့် ဒေသခံပြည်သူများ၏ လူနေမှုအဆင့်
အတန်းမြင့်မားရေးအတွက် အထောက်အကူပြုမည်ဖြစ်သည်။

လယ်ယာကဏ္ဍနှင့် ကျေးလက်ဒေသ ဖွံ့ဖြိုးတိုးတက်ရေးစီမံကိန်းသည် မြန်မာ့တောင်သူလယ်သမား
များထံသို့ မြန်မာ့စိုက်ပျိုးရေးဖွံ့ဖြိုးဘဏ်မှတဆင့် ကာလလတ်၊ ကာလရှည်ချေးငွေများ ထုတ်ပေးနိုင်
ရန်နှင့် ဘဏ်၏လုပ်ငန်းစွမ်းရည် မြှင့်တင်ပေးရန်ရည်ရွယ်ကြောင်း၊ ယင်းစီမံကိန်းဖြင့် လယ်ယာ လုပ်ငန်းများနှင့် ဒေသဖွံ့ဖြိုးရေးတို့အကြား ငွေကြေးဆိုင်ရာလုပ်ငန်းများ လွယ်ကူချောမောလာစေပြီး
လယ်ယာထုတ်ကုန် ပိုမိုဖွံ့ဖြိုးတိုးတက်လာကာ မြို့ပြနှင့် ကျေးလက် ဒေသများအကြား ဟန်ချက်ညီ
စွာ ဖွံ့ဖြိုးတိုးတက်ပြီး လယ်ယာကဏ္ဍနှင့် လယ်ယာငွေကြေးကဏ္ဍများခေတ်မီ တိုးတက်လာနိုင်မည်
ဖြစ်ကြောင်း သိရသည်။

အဆိုပါစီမံကိန်းများအတွက် ချေးငွေကို အတိုးနှုန်း နှစ်စဉ် သုည ဒသမ ဝ၁ ရာခိုင်နှုန်းဖြင့် ချေးငွေ
ကာလနှစ် ၄ဝ (ဆိုင်းငံ့ကာလ ၁ဝ နှစ်အပါအဝင်) သတ်မှတ်၍ လက်မှတ်ရေးထိုးခဲ့ခြင်းဖြစ်သည်။

ဤအကြောင်းအရာနှင့် ပက်သက်၍ ထင်မြင်ချက်ပေးလိုပါက ...
[email protected] သို့ ပေးပို့နိုင်ပါသည်။


အကြည့်အများဆုံး - စီးပွားရေးသတင်း

အကြည့်အများဆုံး - အိမ်ခြံမြေကဏ္ဍ