ကျောက်မျက်နှင့် လက်မှုပစ္စည်းများကို ပုဂ္ဂလိက အသင်းထောက်ခံချက်ဖြင့် ပြည်ပသယ်ယူခွင့်ပြုမည်

မြန်မာနိုင်ငံ အမှတ်တရ ပစ္စည်း ထုတ်လုပ်ဖြန့်ဖြူး ရောင်းချသူများ အသင်းဝင်ဆိုင်များမှ
ဝယ်ယူထားသော ကျောက်မျက်ရတနာအပါအဝင် အခြားသော အဖိုးတန် အမှတ်တရ
ပစ္စည်းများကို မြန်မာနိုင်ငံ လေဆိပ်နှင့်နိုင်ငံတကာ နယ်စပ်ဝင်ပေါက်များမှ တရားဝင်
ယူဆောင်ခွင့် ပြုမည်ဟု ဟိုတယ်နှင့် ခရီးသွားလာရေးလုပ်ငန်းဝန်ကြီးဌာန အသင်း ဥက္ကဋ္ဌ
ဦးသန်းဝင်းက မြန်မာတိုင်း(မ်)ကိုပြောသည်။

''ဒေါ်လာတစ်ထောင်အောက် ဖြစ်မယ်၊ ရှေးဟောင်းပစ္စည်းမဟုတ်ဘူး၊ အရိုင်းထည် မဟုတ်ဘူး
ဆိုတဲ့ ပစ္စည်းတွေကို ရောင်းချခွင့်ပြုတဲ့ ဘောက်ချာ (cash memory) ထုတ်မယ်။ အဲဒီပစ္စည်းတွေကို
ထွက်ခွာရာ ဒေသမှာရှိတဲ့ အကောက်ခွန်က ပစ္စည်းနဲ့ ဘောက်ချာ တိုက်စစ်ဆေးပြီး မှန်ကန်တယ်ဆို
သယ်ယူခွင့် ရမှာဖြစ်တယ်''ဟု ဦးသန်းဝင်းက ပြောသည်။

မြန်မာနိုင်ငံတွင် ကျောက်မျက်ဌာနနှင့် လယ်ယာစိုက်ပျိုးရေးနှင့် ဆည်မြောင်းဝန်ကြီးဌာန
လက်အောက်ရှိ သမဝါယမ ဌာနမှ ထုတ်ပေးသော ဘောက်ချာများဖြင့်သာ လေဆိပ်နှင့်
နယ်စပ်ဖြတ်ကျော်ခွင့် ရှိပြီး အဆိုပါ ဘောက်ချာများကို အမှတ် တရပစ္စည်းထုတ်လုပ် ဖြန့်ဖြူး
ရောင်းချသူများကတစ်ဆင့် ပြန်လည်ငှားရမ်း၊ ဝယ်ယူအသုံးပြုနေရခြင်းဖြစ်သည်ဟု ၄င်းက
ပြောသည်။

''၁၉၉၆ ခုနှစ် မြန်မာ့ခရီးသွားနှစ် ကတည်းက သမဝါယမ အဖွဲ့ဝင်တွေကို ပေးတဲ့ ဘောက်ချာ
cash memories  ရှိတယ်။အဲဒီဘောက်ချာနဲ့ ခွင့်ပြုထားတဲ့ ပစ္စည်းတွေကို ရောင်းမယ်ဆိုရင်
ဝန်ကြီးဌာနကို အမြတ်ထဲက တစ်ရာခိုင်နှုန်း ပြန်ပေးရတယ်။ ကျောက်မျက်ကို ၁ဝ ရာခိုင်နှုန်း
အမြတ်ပေးဆောင်ရတယ်။ ပန်းပုတစ်ရုပ် သယ်မယ်ဆိုရင် သစ်တောထွက် ပစ္စည်းဖြစ်သွားတဲ့
အတွက် ထောက်ခံချက်တွေ အဆင့်ဆင့်ယူရတယ်''ဟု ဦးသန်းဝင်းက ပြောသည်။

ဟိုတယ်နှင့် ခရီးသွားလာရေးလုပ်ငန်းဝန်ကြီးဌာန၊ အခြားသော ဆက်စပ်ဌာနများနှင့်
အသင်းအဖွဲ့များသည် ပြီးခဲ့သည့် မတ် ၂၅ ရက်နေ့တွင် မြန်မာနိုင်ငံ အမှတ်တရပစ္စည်း
ထုတ်လုပ်ဖြန့်ဖြူးရောင်းချသူများ အသင်းသို့  cash memories  ဖြင့် အမှတ်တရပစ္စည်းများ
ရောင်းချခွင့် ပြုထားပြီး ဖြစ်သည်ဟု ဦးသန်းဝင်းက ပြောသည်။

''ခွင့်ပြုလိုက်ပြီဆိုတဲ့ အဆင့်ပဲရှိသေးတယ်။ဘယ်လိုဆိုင်တွေကို (cash memories) ပြန်ပေးမလဲ။
နိုင်ငံခြားသားတွေ အလာများတဲ့ ဆိုင်မျိုးကိုပဲ ပေးမလား မဆုံးဖြတ်ရသေးဘူး။ ကျွန်တော်တို့
အသင်းမှာ အသင်းဝင် ၂၆,ဝဝဝ ကျော်ရှိတယ်။ ဘောက်ချာအတိုင်း ရောင်းချတဲ့ အမြတ်ငွေထဲက
မြန်မာနိုင်ငံ ခရီးသွားလုပ်ငန်း ဖွံ့ဖြိုးတိုးတက်ရေးအတွက် ရန်ပုံငွေ ပြန်ပေးရမယ်''ဟု ၄င်းက
ပြောသည်။

အသင်းစည်းကမ်းချက်အရ ပြန်ပေးရမည့် ရန်ပုံငွေ ရာခိုင်နှုန်းကို သမဝါယမ ဌာနက
သတ်မှတ်သည့် ၁ ရာခိုင်နှုန်းနှင့် ကျောက်မျက်ဌာနက ၁ဝ ရာခိုင်နှုန်းအကြားဝယ်ယူသူ
မနစ်နာရမည့် ရာခိုင်နှုန်းမျိုး ပြန်လည်သတ်မှတ်မည်ဟု ဦးသန်းဝင်းက ပြောသည်။

လက်ရှိအခြေအနေအရ အမှတ်တရပစ္စည်း ထုတ်လုပ်ဖြန့်ဖြူးရောင်းချသူများသည်
ကျောက်မျက်နှင့်သက်ဆိုင် သောပစ္စည်းများအတွက် အမြတ်ငွေထဲက ၁ဝ ရာခိုင်နှုန်း ဝန်ကြီး
ဌာနသို့ ပြန်လည်ပေးဆောင်ရပြီး သမဝါယမက သတ်မှတ်ထားသည့် ပစ္စည်းများအတွက်
၁ ရာခိုင်နှုန်းပေးဆောင်ရသည်။ ထို့ကြောင့် ဝယ်ယူသူများသည် ပုံမှန်ဈေး နှုန်းထက် ၁ဝ
ရာခိုင်နှုန်းအထိ ပိုမိုပေးဆောင်နေရသောကြောင့် အသင်းအနေနှင့် တရားဝင် ဘောက်ချာ
ထုတ်ခွင့် ရရှိရှိပါက ၁ဝ ရာခိုင်နှုန်းထက် နည်းသော ရာခိုင်နှုန်းတစ်ခုသတ်မှတ်မည်ဟု
ဦးသန်းဝင်းက ပြောသည်။

''အရွက်ငါးဆယ် ပါတဲ့ ဘောက်ချာကိုအသင်းဝင်တိုင်းကို ခြောက်လတစ်ခါ ဖြန့်ဝေမယ်။
ဒီဘောက်ချာရှိရင် ကျန်တဲ့ ဌာနထောက်ခံချက် ယူစရာမလိုတော့ဘူး။ အကောက်ခွန်ကို
ဖြတ်လို့ရပြီ'' ဟု ၄င်းက ပြောသည်။

သမဝါယမဌာနနှင့် ကျောက်မျက်ဌာနဘောက်ချာတို့ဖြင့် ပြည်ပထွက်ခွာရာတွင် ပစ္စည်း
သယ်ယူခွင့် ရှိပြီး မြန်မာနိုင်ငံ အမှတ်တရပစ္စည်း ထုတ်လုပ်ဖြန့်ဖြူး ရောင်းချသူများ အသင်းက
ရောင်းချသည့် ဘောက်ချာဖြင့် လေဆိပ်က ထွက်ခွာ၍မရ သောကြောင့် ဝန်ကြီးဌာနနှင့်
သက်ဆိုင်ရာဌာန လူကြီးချင်း ညှိနှိုင်းဆောင်ရွက်ပေးခြင်း ဖြစ်သည်ဟု မြန်မာနိုင်ငံ
ခရီးသွားလုပ်ငန်းအဖွဲ့ချုပ် ဥက္ကဋ္ဌ ဦးရန်ဝင်းက မြန်မာတိုင်း(မ်)ကိုပြောသည်။

''အဓိကတော့ အသင်းဝင်ထားတဲ့ သူတွေရမယ်။ ဒီစာရွက်က ပေါက်ကရ ရေးလို့မရဘူး။
နိုင်ငံတော်ကို အခွန်ပေးဆောင်ရမှာဖြစ်တယ်။ ဝယ်သူကလည်း လေဆိပ်ရောက်ရင်
ဒီဘောက်ချာ ပြရမယ်။ အဲဒီအတွက် အသင်းက ရန်ပုံငွေ ယူခိုင်းတယ်ဆိုတာ မြန်မာနိုင်ငံ
ခရီးသွားလုပ်ငန်း ဖွံ့ဖြိုးတိုးတက်ရေးမှာ အသုံးပြုဖို့ဖြစ်တယ်''ဟုဦးရန်ဝင်းက ပြောသည်။

ဤအကြောင်းအရာနှင့် ပက်သက်၍ ထင်မြင်ချက်ပေးလိုပါက ...
[email protected] သို့ ပေးပို့နိုင်ပါသည်။


အကြည့်အများဆုံး - စီးပွားရေးသတင်း

အကြည့်အများဆုံး - အိမ်ခြံမြေကဏ္ဍ