ကျောက်စိမ်းနှင့် သစ်များအပါအဝင် တရားမဝင်ကုန်ပစ္စည်း ခန့်မှန်းချေ ကျပ်သန်း ၂,ဝဝဝ ကျော်ဖိုး ဖမ်းမိ

 

တရားမဝင်ကုန်သွယ်မှု ပပျောက်ရေးအတွက် လက်ရှိအစိုးရလက်ထက်တွင် ဖွင့်လှစ်ထားသော
ရေပူအမြဲတမ်းစစ်ဆေးရေးဂိတ်မှ စတင်ဆောင်ရွက်ချိန်မှစ၍ နှစ်လကျော်ကာလအတွင်း
ကျောက်စိမ်းနှင့် သစ်များ အပါအဝင်ခန့်မှန်းတန်ဖိုး ကျပ်သန်းပေါင်း ၂,၂၆၆ သန်းကျော်
ဖမ်းဆီးရရှိထားကြောင်း အဆိုပါစခန်း၏ တရားဝင်ထုတ်ပြန်စာရင်းများတွင် တွေ့ရသည်။

နိုင်ငံအတွင်း အိမ်သုံးပစ္စည်း၊ စားသောက်ကုန်ပစ္စည်း၊ လျှပ်စစ်ပစ္စည်းများကို အဓိကတရားမဝင်
ဝင်ရောက်လာပြီး မြန်မာနိုင်ငံက တရားမဝင် ပြန်ထွက်သည့် ကုန်စည်များမှာ ကျောက်စိမ်း၊
သစ်နှင့် သစ်တောထွက်ပစ္စည်းများ တရားမဝင်အဓိကထွက်ရှိမှုကို ဖမ်းဆီးရရှိခဲ့ကြောင်း ရေပူ
အမြဲတမ်းစစ်ဆေးရေး စခန်း၏ အဖွဲ့ခေါင်းဆောင် ဦးတက်ထွန်းအောင်က ပြောသည်။

''တန်ဖိုးကြီးတာကတော့ ကျွန်းတွေနဲ့ ဟိုတလောက ဖမ်းမိတဲ့ ကျောက်စိမ်းတုံးတွေဆိုရင်
တန်းဖိုးအများကြီးရှိတယ်လို့ သိရပါတယ်။ ကျွန်တော်တို့လည်း တန်ဖိုးဖြတ်အဖွဲ့ရဲ့
ဆုံးဖြတ်ချက်အတိုင်း တန်ဖိုး သိန်း ၃,၅ဝဝ ပဲဖြတ်လိုက်တာ။ သယံဇာတတွေ၊ သစ်တွေ၊
သစ်တောထွက်ပစ္စည်းတွေ ထွက်တာပေါ့။ တိရစ္ဆာန်ထွက်ကုန်ဆိုရင် နွားအသားတွေ ထွက်တယ်။
ဒါတွေ တားဆီးနိုင်ပါတယ်'' ဟု ၄င်းက ပြောသည်။

စီမံကိန်းနှင့် ဘဏ္ဍာရေးဝန်ကြီးဌာန ဦးဆောင်မှုဖြင့် ရေပူအမြဲတမ်းစစ်ဆေးရေးစခန်းကို
၂ဝ၁၇ ခုနှစ်၊ ဇန်နဝါရီလတွင် ဖွင့်လှစ်ခဲ့ပြီး ယင်းလ ၁၆ ရက်တွင် စတင်လုပ်ငန်းလည်ပတ်ခဲ့ရာ
ဇန်နဝါရီလကုန်အထိ အမှုပေါင်း ၂၂ မှုရှိခဲ့ပြီး ခန့်မှန်းခြေ ကျပ်သန်းပေါင်း ၅၃၃ သန်းကျော်
ရှိသည်။

ဖေဖော်ဝါရီလတွင် ကုန်စည်များ တရားမဝင်တင်ပို့မှုနှင့် စားသုံးရန် မသင့်သော
စားသောက်ကုန်များ တင်သွင်းလာမှုများကို ခန့်မှန်းခြေ ကျပ်သန်း ၇၂၁ သန်းကျော်ဖိုး
ဖမ်းဆီးမိခဲ့ရာ အမှုပေါင်း ၃ဝ ရှိခဲ့သည်။ ထို့ပြင် မတ်လအတွင်း ၆၂ မှုဖြင့် တရားမဝင်
ကုန်သွယ်မှု မြင့်တက်ခဲ့သည်ကို တွေ့ရသည်။ မတ်လအစမှ ၂၄ ရက်နေ့ထိ ခန့်မှန်းခြေ
ကျပ်သန်းပေါင်း ၁,ဝ၁ဝ ကျော်ဖိုး ဖမ်းဆီးရရှိထားကြောင်း တရားဝင်စာရင်းများအရ
သိရသည်။

ဖမ်းဆီးရမိပစ္စည်းများထဲမှ ဖျက်ဆီးရခြင်း၊လေလံပစ်ရသည့် ပစ္စည်းများနှင့် ပြည်သူပိုင်
သိမ်းခြင်းများ ရှိကြောင်း၊ သယံဇာတများ ဖမ်းဆီးရရှိမှုကို သက်ဆိုင်ရာဝန်ကြီးဌာနသို့
လွှဲပြောင်းခြင်းများ ပြုလုပ်ကြောင်း အကောက်ခွန်ဦးစီးဌာန ဒုတိယညွှန်ကြားရေးမှူး
ဦးတက်ထွန်းအောင်က ပြောသည်။

အဆိုပါ စစ်ဆေးရေးစခန်းအနေဖြင့် စစ်ဆေးမှုများ ပြုလုပ်သည့်ထဲမှ သစ်သီးများ
တင်ဆောင်လာသော ကားများကို စစ်ဆေးရာတွင် အခက်အခဲများရှိကြောင်း ၄င်းက
ပြောသည်။

''သစ်သီးကားတွေစစ်ရင် ကုန်တင်ကုန်ချလုပ်ရတဲ့အတွက် အသီးတွေနာတော့ ကုန်သည်တွေ
နစ်နာမှုရှိတယ်။ သတင်းရတဲ့အပေါ် မူတည်ပြီး ရွေးနုတ်စစ်ဆေးတယ်''ဟု ၄င်းက ပြောသည်။

တရားမဝင်မှု ပပျောက်ရေးအတွက် ရေပူအမြဲတမ်း စစ်ဆေးရေးစခန်း ဖွင့်ပြီးနောက်ပိုင်းတွင်
စီမံကိန်းနှင့် ဘဏ္ဍာရေးဝန်ကြီးဌာန ပြည်ထောင်စုဝန်ကြီး ဦးကျော်ဝင်းက အဂတိလိုက်စားမှု
ပပျောက်အောင် စစ်ဆေးရေး ဝန်ထမ်းများကို ဖမ်းဆီးရမိသည့် ပစ္စည်းတန်ဖိုး၏ ၅ဝ
ရာခိုင်နှုန်းကို ဆုကြေးအဖြစ် ပေးသွားမည်ဟု ပြောဆိုခဲ့သည်။

သို့သော် ယခုဖမ်းဆီးရရှိသော ခန့်မှန်းတန်ဖိုးသည် အတည်ယူ၍မရဘဲ တစ်ဖက်နိုင်ငံမှ
တင်သွင်းလာသော စားသောက်ကုန်များကို စားသုံးရန်မသင့်ခြင်းကြောင့် ဖျက်ဆီးရခြင်း
ရှိကြောင်း၊ လေလံတင်ရသည့်ပစ္စည်းတွင် လေလံတင်၍ရသော ဈေးရှိမည်ဖြစ်သည်။
ဖမ်းဆီးရမိသည့် ပစ္စည်းများထဲမှ လိုင်စင်မဲ့ ကားများကို နိုင်ငံတော်ပိုင်သိမ်းခြင်းများပြုလုပ်ပြီး
ကျန်ကားများကို အရေးယူ ဒဏ်ငွေပေးခြင်းများ လုပ်ဆောင်ကြောင်း၊ ထိုသို့ လေလံတင်
ရောင်းချခြင်းများပြုလုပ်ပြီးမှသာ တန်ဖိုးငွေအမှန်ကို သိရှိမည်ဖြစ်ကြောင်း
ဦးတက်ထွန်းအောင်က ပြောသည်။

''ကျောက်စိမ်းဆိုရင် သတ္တုတွင်းကနေ လေလံပွဲတွေ လုပ်မှ ဈေးနှုန်း ထွက်လာမှာပေါ့။
သစ်လည်း အလားတူပါပဲ။ဒါတွေပြီးမှပဲ ၅ဝ ရာခိုင်နှုန်း ဆုကြေးပေးတဲ့အပိုင်းတွေ ဖြစ်လာမှာပါ။
ဒါကတော့ နိုင်ငံတော်က ပေးမဲ့ ပိုက်ဆံပါ။နိုင်ငံတော်က ပေးပေး၊မပေးပေး ကျွန်တော်တို့
အကောက်ခွန်ဌာန အပါအဝင် ဝန်ထမ်းတွေက ဆုကြေးရတာ မရတာ ခေါင်းထဲမှာ မရှိပါဘူး။
ကိုယ့်နိုင်ငံက ထွက်သွားမယ့် သယံဇာတတွေ မထွက်ဖို့ရယ်။ သူများနိုင်ငံက ဝင်လာတဲ့
ပစ္စည်းတွေကလည်း အဆင့်အတန်းနိမ့်တဲ့၊ အရည်အသွေးမမီတဲ့ ပစ္စည်းတွေ မဖြစ်ဖို့
အဓိကပါ။ ဆုကြေးရခြင်း မရခြင်းက ကျွန်တော်တို့အဖွဲ့တွေ ခေါင်းထဲမှာ မရှိပါဘူး။
တာဝန်ကို ကျေပွန်အောင် ထမ်းဆောင်တဲ့ အပိုင်းပဲဖြစ်ပါတယ်''ဟု ၄င်းက
ဆက်လက်ပြောသည်။

ဤအကြောင်းအရာနှင့် ပက်သက်၍ ထင်မြင်ချက်ပေးလိုပါက ...
[email protected] သို့ ပေးပို့နိုင်ပါသည်။


အကြည့်အများဆုံး - စီးပွားရေးသတင်း

အကြည့်အများဆုံး - အိမ်ခြံမြေကဏ္ဍ