နိုင်ငံတကာမှ ဖိအားပေးမှုများလာသည့် မြန်မာ့သစ်ထုတ်လုပ်မှု

 

ယခင်သစ်အလုံးလိုက် ပြည်ပတင်ပို့ခွင့်ရစဉ်က တွေ့မြင်ရသည့် မြန်မာသစ်များ။ ဓာတ်ပုံ - အေအက်ဖ်ပီယခင်သစ်အလုံးလိုက် ပြည်ပတင်ပို့ခွင့်ရစဉ်က တွေ့မြင်ရသည့် မြန်မာသစ်များ။ ဓာတ်ပုံ - အေအက်ဖ်ပီ

၂ဝ၁၆ ခုနှစ်မှ စတင်ကာ ဥရောပသမဂ္ဂနိုင်ငံအချို့က မြန်မာနိုင်ငံမှ တင်သွင်းသည့်
သစ်များကို ပိုမိုတင်းကျပ်စွာ စိစစ်လာပြီး ဒဏ်ရိုက်ခြင်းများ၊ အရေးယူပိတ်ဆို့မှုများကို
ခပ်စိပ်စိပ်ဆောင်ရွက်လာသည်ကို တွေ့နေရသည်။ မြန်မာနိုင်ငံတွင် မြန်မာ့သစ်လုပ်ငန်းမှ
ထုတ်ယူသည့် သစ်သည်သာ တရားဝင်သစ် ဖြစ်သော်လည်း နိုင်ငံတကာက မြန်မာ့
သစ်လုပ်ငန်းသည် ပွင့်လင်းမြင်သာမှု မရှိခြင်း၊ နှစ်စဉ်တောထွက်ထက် ပိုမိုထုတ်ယူ
သည့်အတွက်သစ်တောပြုန်းတီးမှုကို ဖြစ်စေခြင်း၊ အကျင့်ပျက်ချစားမှုများရှိနေနိုင်ခြင်း
စသည့်အကြောင်း အမျိုးမျိုးဖြင့် တရားမဝင်သစ်အဖြစ် စွပ်စွဲမှုများ အရှိန်မြင့်လာသည်။

မြန်မာ့ သစ်လုပ်ငန်းမှ ထုတ်သည့် သစ်ကိုပင် ယခင်စစ်အစိုးရအုပ်ချုပ်မှု လက်ထက်တွင်လည်း
ပြည်ပသို့ တင်ပို့ခဲ့ပြီး ပြည်ပနိုင်ငံများကလည်း လိုလိုလားလား ဝယ်ယူခဲ့ကြခြင်း
ဖြစ်သည်။ မြန်မာနိုင်ငံသည် လက်ရှိတွင်လည်းမြန်မာနိုင်ငံ၏ တရားဝင် ထုတ်လုပ်သည့်
သစ်ဖြစ်ကြောင်း ခိုင်မာစေရန် ကြိုးပမ်းနေပြီးဥရောပသမဂ္ဂသုိ့ သစ်တင်သွင်းလိုသည့်
နိုင်ငံများ လိုက်နာရမည့် FLEGTVPA လုပ်ငန်းစဉ်များ၌ပါဝင်ရန်အတွက်
တစ်နိုင်ငံလုံးအတိုင်းအတာဖြင့် လုပ်ဆောင်နေခြင်းဖြစ်သည်။

တရားမဝင်သစ်များ ခိုးယူခြင်းနှင့် ကုန်သွယ်ခြင်းကို တိုက်ဖျက်ခြင်းဖြင့် နိုင်ငံတော်၏
သစ်တောဆိုင်ရာ တရားဥပဒေ မြှင့်တင်ရေး၊ သစ်တောသယံဇာတများ ရေရှည်တည်တံ့စွာ
အသုံးချနိုင်ရေးအတွက် သစ်ရောင်းချသည့် နိုင်ငံများနှင့် ဝယ်ယူသည့် နိုင်ငံများအကြား
သစ်ကုန်သွယ်ရေး မူဝါဒများ ချမှတ်ခြင်း၊တရားဝင်သစ် ဖြစ်ကြောင်း အာမခံသည့်စနစ်များ
ဖော်ထုတ်ခြင်း၊ တရားဝင်သစ်ကို လိုလားသည့် သစ်ဝယ်ယူသည့် နိုင်ငံများရှိ ဈေးကွက်များနှင့်
ချိတ်ဆက်ခြင်းတို့ကို နိုင်ငံတကာက ကျယ်ကျယ်ပြန့်ပြန့် လုပ်ဆောင်လာကြသည်။

မြန်မာနိုင်ငံတွင် တရားဝင်သစ်ဖြစ်ကြောင်း အဓိပ္ပာယ် ဖွင့်ဆိုချက်ခိုင်မာမှု မရှိခြင်းသည်
ပင်မ ပြဿနာ ဖြစ်သည်။ မြန်မာနိုင်ငံက ကျင့်သုံးနေသော ဥပဒေအရ မြန်မာ့သစ်လုပ်ငန်းက
ထုတ်သည့်သစ်သည် တရားဝင်သစ် ဖြစ်သော်လည်း နိုင်ငံတကာ အသိုင်းအဝိုင်းထံမှ
တရားဝင်သစ်အဖြစ် သတ်မှတ် မခံရခြင်းက အခြေအနေကို ပိုမိုဆိုးဝါးစေသည်။ ထို့ပြင်
ဥရောပသမဂ္ဂက သစ်မူဝါဒများချမှတ်ပြီးနောက် ယခင်မြန်မာ့သစ်လုပ်ငန်းက ထုတ်ပေးသည့်
သစ်နောက်ကြောင်း ခြေရာခံစနစ်ဆိုင်ရာ စာရွက်စာတမ်းများနှင့် ဥရောပသို့ သစ်တင်ပို့ရန်
မလုံလောက်တော့ဘဲ သစ်ကွင်းဆက် တစ်လျောက် အခြားတတိယ ကြားခံအဖွဲ့အစည်း၏
စောင့်ကြည့်မှုများ၊ မြန်မာ့သစ်လုပ်ငန်းအတွင်း ပွင့်လင်းမြင်သာမှုရှိရှိလုပ်ဆောင်မှုများအတွက်
ကတိကဝတ်များကို နိုင်ငံတကာ အထူးသဖြင့် ဥရောပသမဂ္ဂရှိ အဖွဲ့အစည်းများ
သိရှိရန်အတွက် ထုတ်ပြန်ပေးရန် အရေးတကြီး လိုအပ်လာပြီဖြစ်သည်။

''အစိုးရ၊ အရပ်ဘက်လူ့အဖွဲ့အစည်း၊ ပုဂ္ဂလိကလုပ်ငန်းရှင်နဲ့ နိုင်ငံတကာအသိုင်းအဝိုင်း
အများစုက ချွင်းချက်မရှိ လက်ခံနိုင်တဲ့ တရားဝင် သစ်ဖြစ်ကြောင်း အဓိပ္ပယ်ဖွင့်ဆိုချက်
သတ်သတ်မှတ်မှတ် ထွက်လာနိုင်မယ်ဆိုရင်တော့ အခုဖြစ်နေတဲ့ မြန်မာ့သစ်အပေါ်မှာ
စွပ်စွဲနေတဲ့ပြဿနာတွေ တော်တော်လေး ရှင်းသွားမယ်လို့ထင်တယ်''ဟု The Center for
People and Forests မှ ဌာနေ အစီအစဉ် ညှိနှိုင်းရေးမှူး ဒေါက်တာ မောင်မောင်သန်းက
မြန်မာတိုင်း(မ်)ကို ပြောသည်။

မြန်မာ့သစ်လုပ်ငန်းသည် သစ်ထုတ်ယူသည့် ကွင်းဆက်တစ်လျှောက် လိုအပ်ချက်နှင့်
ကွာဟာချက် အမြောက်အမြား ရှိနေသည့်တိုင်အောင် ထုတ်ယူသည့် သစ်များကို
တရားဝင်သစ်အဖြစ် ခံယူကျင့်သုံးခဲ့သလို တစ်ချိန်က နိုင်ငံတကာကလည်း ဝယ်ယူ
သုံးစွဲခဲ့သည်။

သို့သော် မြန်မာ့သစ်လုပ်ငန်းသည် အစိုးရသစ်လက်ထက်တွင် နိုင်ငံတကာ၏
ဖိအားပေးမှုများကြောင့်သော်လည်းကောင်း၊ သစ်တောသယံဇာတမှ နိုင်ငံခြားဝင်ငွေ
ရှာဖွေခြင်းထက်သစ်တောထိန်းသိမ်းရေးများကို ပိုမိုအားစိုက်လုပ်ကိုင်နေခြင်းကြောင့်
လည်းကောင်း ယခင်နှစ်စဉ် သစ်တောထွက် ထုတ်ယူမှုထက် ကျော်ကာ ခုတ်သဖြင့်
တောပြုန်းခြင်း၊ ဒေသခံတိုင်းရင်းသားများ၏ အခွင့်အရေးကို ထိပါးခဲ့မှုများကို
ထပ်မံမဖြစ်စေရန် ကြိုးစားနေသည့် ကာလဖြစ်သည်။

''လက်ရှိသစ်လုပ်ငန်းမှာ ဖြစ်နေတဲ့ အရေးယူပိတ်ဆို့မှုတွေကြောင့် မြန်မာ့သစ်ရဲ့
ပုံရိပ်နဲ့ကျော်ကြားမှုကို တစ်နည်းနည်းနဲ့တော့ ထိခိုက်မှာအမှန်ပဲ။ ဒါပေမဲ့
နိုင်ငံတကာအနေနဲ့လည်းမြန်မာနိုင်ငံက သစ်နဲ့ပတ်သက်လို့ ပွင့်လင်းမြင်သာမှုရှိအောင်
ဆောင်ရွက်နေတာတွေကို အသိအမှတ်ပြုပေးပြီး အချိန်ယူစောင့်ကြည့်နားလည်ပေး
ဖို့တော့လိုမယ်။ ခုတွေ့နေရတာတောတချို့နိုင်ငံတကာ အဖွဲ့အစည်းတွေက
မြန်မာနိုင်ငံရဲ့ အခြေအနေကိုနားလည်မှု အားနည်းစွာနဲ့ လိုက်ဖွ နေသလိုမျိုးဖြစ်နေတယ်။
အဲဒီလို ပိတ်ဆို့အရေးယူတာတွေ လုပ်မယ့်အစား constructive အပြုသဘော ဖြစ်စေမယ့်
နည်းမျိုးနဲ့ ကိုင်တွယ်ရင် ပိုထိရောက်မယ်'' ဟု ဒေါက်တာမောင်မောင်သန်းက ပြောသည်။

မကြာသေးမီက ရန်ကုန်မြို့တွင်ပြုလုပ်ခဲ့သည့် FLEGT လုပ်ငန်းစဉ်အတွက် လူထုဆွေးနွေးပွဲတွင်
မြန်မာ့သစ်လုပ်ငန်းမှ တာဝန်ရှိသူများက ပွင့်လင်းမြင်သာစွာဖြင့် ရှေ့ဆက်လုပ်ဆောင်မည့်
အကြောင်းကို ကတိကဝတ် ပြုပြီးဖြစ်သည်။ သို့သော် မြန်မာ့သစ်လုပ်ငန်းကလည်း
ပွင့်လင်းမြင်သာမှုရှိရှိ သစ်နောက်ကြောင်း ခြေရာခံမှုများကို ထုတ်ပြန်ပေးရန်အတွက်
တိကျသည့် လုပ်ဆောင်မှု စီမံချက်ကို နိုင်ငံတကာက သိရှိရန် ထုတ်ပြန်ပေးသင့်ကြောင်း
ဒေါက်တာမောင်မောင်သန်းက ပြောသည်။

'' Concrete Action Plan ကိုထုတ်ပြီး သစ်လုပ်ငန်း ကွင်းဆက်တစ်လျောက် ပါဝင်သူတွေကို
သတ်သတ်မှတ်မှတ် ချပြရမယ်။ ဥရောပသမဂ္ဂက ချမှတ်ထားတဲ့ သစ်စံချိန်စံညွှန်းတွေကို
မလိုက်နာနိုင်သေးရင်တောင် မြန်မာ့ သစ်လုပ်ငန်းက ထုတ်ပြန်ပေးတဲ့ စာရွက်စာတမ်းတွေကို
တစ်ဖက်နိုင်ငံတွေက လက်ခံလာအောင်လုပ်ဖို့လိုမယ်''ဟု ဒေါက်တာမောင်မောင်သန်းက
ပြောသည်။

မြန်မာ့သစ်လုပ်ငန်း သစ်ထုတ်လုပ်ရေးမှ ဒုတိယအထွေထွေမန်နေဂျာ ဦးခင်မောင်ကြည်က
မြန်မာ့သစ်လုပ်ငန်းအနေဖြင့် လက်ရှိဖြစ်ပေါ်နေသည့် သစ်ကွင်းဆက်ဆိုင်ရာ ပြဿနာများနှင့်
အရေးယူပိတ်ဆို့ခံရမှုများကို ဖြေရှင်းရန်အတွက် သစ်တောဦးစီးဌာန၊မြန်မာ့သစ်လုပ်ငန်း၊
သစ်လုပ်ငန်းရှင်များနှင့်အကောက်ခွန်ဌာနတို့နှင့်အတူ ချက်ချင်း တုံ့ပြန်ဆောင်ရွက်မှု၊
ရေတိုနှင့် ရေရှည်တွင် ဖြေရှင်းမှုများကို ဧပြီ ၁၂ ရက်နေ့တွင် ရန်ကုန်မြို့၌ ထုတ်ပြန်
ဆွေးနွေးမည် ဖြစ်ပြီး ရလဒ်များကို ဧပြီ ၁၉ ရက်တွင် ဥရောပသမဂ္ဂတွင် ကျင်းပမည့်
အစည်းအဝေးတွင် တင်သွင်းရန်ရည်ရွယ်သည်ဟု ဆိုသည်။

'' EU က အရှေ့တောင်အာရှနိုင်ငံတွေထဲမှာဆိုရင် ကျွန်းသစ်ကို အလိုချင်ဆုံးပဲ။ ဒီထဲမှာလည်း
မြန်မာကပဲ ကျွန်းသစ်ထွက်တာဆိုတော့ မြန်မာနိုင်ငံကို ဖိအားပေးနေသလို ဖြစ်နေတယ်။ ဒီလို
သစ်ပြဿနာတွေဟာ ဥရောပကို တင်ပို့နေတဲ့ သစ်ကုမ္ပဏီတွေအတွက် ခက်ခဲစေနိုင်ပေမဲ့
မြန်မာ့သစ်တင်ပို့မှုကို အကြီးအကျယ် ထိခိုက်စေတာမျိုးတော့ ရှိမယ်မထင်ဘူး။

''အဓိကက အိန္ဒိယဈေးကွက်ကို အားထားတင်ပို့တာဖြစ်တဲ့အတွက်ပါ။ ခုဂျာမနီက
သင်္ဘောကိစ္စဆိုလည်း သစ်တင်သွင်းတဲ့ ကုမ္ပဏီက မတင်သွင်းခင်ကတည်းက စာရွက်
စာတမ်း ခိုင်မာအောင်လုပ်ရမှာကို ခုဆောက်ပြီးကာမှ မြန်မာ့သစ်သုံးထားလို့ တရားမဝင်
သစ်သုံးထားလို့တွေ ဖြစ်တာဟာ တင်သွင်းတဲ့ ကုမ္ပဏီတွေ လုပ်ဆောင်ချက်
အားနည်းမှုကြောင့် မြန်မာရဲ့ ပုံရိပ်ကို ထိခိုက်စေပါတယ်''ဟု ၄င်းက ပြောသည်။

ဤအကြောင်းအရာနှင့် ပက်သက်၍ ထင်မြင်ချက်ပေးလိုပါက ...
[email protected] သို့ ပေးပို့နိုင်ပါသည်။


အကြည့်အများဆုံး - စီးပွားရေးသတင်း

အကြည့်အများဆုံး - အိမ်ခြံမြေကဏ္ဍ