အက်ဖ်အမ်အိုင် ရှယ်ယာအရေအတွက် နှစ်သန်းခန့် ထပ်မံ တိုးမြင့်လာရန်ရှိ

ရန်ကုန်စတော့အိတ်ချိန်း၏ စာရင်းဝင်ဖြစ်သော အက်ဖ်အမ်အိုင်ကုမ္ပဏီ၏ အစုရှယ်ယာ
အရေအတွက်သည် သြဂုတ်လနောက်ပိုင်းတွင် နှစ်သန်းဝန်းကျင်ခန့်တိုးမြင့်လာပြီး 
စုစုပေါင်းရှယ်ယာအရေအတွက် ၂၅ သန်းခန့် ဖြစ်လာဖွယ်ရှိနေသည်။

အက်ဖ်အမ်အိုင် (FMI) ကုမ္ပဏီသည် ရှယ်ယာရှင်များကို ယခု ၂ဝ၁၆–၁၇ ဘဏ္ဍာနှစ်
အတွက် အမြတ်ဝေစုခွဲဝေပေးခြင်းကို လာမည့် သြဂုတ် ၁၅ ရက်တွင် ဆောင်ရွက်သွား
မည်ဖြစ်ပြီး အမြတ်ဝေစု ခွဲဝေပေးရာတွင် ရှယ်ယာတစ်စုလျှင် ကျပ် ၁ဝဝ ပေးမည်ဖြစ်ပြီး
ဆယ်စုပိုင်ဆိုင်သူများအား ရှယ်ယာအပိုဆုတစ်စု ခွဲဝေပေးသွားရန် စီစဉ်ထားသည်ဟု
ကုမ္ပဏီအမှုဆောင် ဒါရိုက်တာ ဦးထွန်းထွန်းက ပြောသည်။

ကုမ္ပဏီသည် မူလက ပြင်ပသို့ အစုရှယ်ယာအရေအတွက် ( Issued share ) ၂၃ ဒသမ
၄၈ သန်းကျော်ကိုရောင်းချထားခြင်းဖြစ်ရာ ယခုအပိုစုရှယ်ယာများ ဆယ်စုလျှင် တစ်စု
တိုးမြှင့်ပိုင်ဆိုင်ခွင့်ပေးမည်ဖြစ်ခြင်းကြောင့် စတော့ဈေးကွက်အတွင်း ကုမ္ပဏီ၏ ရှယ်ယာ
အရေအတွက်သည် နှစ်သန်းဝန်းကျင်ခန့် ထပ်မံတိုးမြင့်လာတော့မည် ဖြစ်သည်။

''အခုချိန်ထိကို အက်ဖ်အမ်အိုင်အနေနဲ့ အစုရှယ်ယာ ၂၃ သန်းကျော်ကိုရောင်းချထားတယ်။
အဲဒီရှယ်ယာအားလုံးအတွက် တစ်စုကို အမြတ်ကျပ် ၁ဝဝ နဲ့ ဆယ်စုပိုင်တဲ့သူကို အပိုဆု
အဖြစ် တစ်စုတိုးမြှင့်ပေးသွားမှာပါ။ လက်ရှိဖြစ်နေတဲ့ တစ်စုအပေါ်မှာပဲ ကြည့်ပြီး
အမြတ်ဝေစုပေးသွားမှာပါ''ဟု ဦးထွန်းထွန်းက ပြောသည်။

ထိုကဲ့သို့ အစုရှယ်ယာအပိုဆုပိုင် ဆိုင်ခွင့်ပေးလိုက်ခြင်းကြောင့် ဈေးကွက်အတွင်း
အရောင်းအဝယ်လုပ်ကိုင်ခွင်ရှိသည့် ရှယ်ယာအရေအတွက် ပိုမိုများလာမည်ဖြစ်သည်။

ကုမ္ပဏီအနေဖြင့် အစုရှယ်များကို အမြတ်ခွဲဝေပေးမည်ဖြစ်ကြောင်း ဇူလိုင် ၁ ရက်က
ထုတ်ဖော်ခဲ့ခြင်း ဖြစ်သည်။ ထို့အတွက် ဇွန် ၃ဝ ရက်က FMI ရှယ်ယာတစ်စုတန်ဖိုးသည်
ကျပ် ၁၃,၅ဝဝ ဈေးသာရှိခဲ့ရာမှ ဇူလိုင် ၄ ရက်တွင် ရှယ်ယာတစ်စုတန်ဖိုးသည်
ကျပ် ၁၅,ဝဝဝ အထိ ဈေးပေါက်လာခဲ့သည်။ ယခု ဇွန် ၅ ရက်တွင်မူ ကျပ် ၁၄,၅ဝဝ
ဈေးဖြင့် ရပ်နေလျက်ရှိသည်။

၎င်းကုမ္ပဏီသည် ယခု ၂ဝ၁၆–၁၇ ဘဏ္ဍာနှစ်တွင် စုစုပေါင်းဝင်ငွေ ကျပ် ၁၆၁ ဘီလျံ
အထိရရှိခဲ့ခြင်းဖြစ်ပြီး ရှေ့ဘဏ္ဍာနှစ်ထက် ကျပ် ၈ ဒသမ ၉ ဘီလျံ တိုးမြင့်ရရှိခဲ့သည်ဟု
ရှယ်ယာရှင်များအား အသိပေး ကြေညာချက်တွင် ဖော်ပြထားသည်။ ၂ဝ၁၅–၁၆
ဘဏ္ဍာနှစ်ကမူ လုပ်ငန်းစု၏ စုစုပေါင်းအမြတ်တွေသည် ကျပ်ဘီလျံ ၁၁ဝ သာရှိခဲ့ခြင်း
ဖြစ်သည်။

အမြတ်ငွေများ တိုးတက်လာရာတွင်လည်း အက်ဖ်အမ်အိုင် FMI ကုမ္ပဏီ၏ ရင်းနှီးမြှုပ်နှံမှု
ပါဝင်သည့် လုပ်ငန်းများအနက် ရိုးမဘဏ်မှ အဓိက အမြတ်ငွေ တိုးမြှင့်ရရှိခဲ့ခြင်းကြောင့်
ဖြစ်သည်ဟုလည်း ထုတ်ဖော်ထားသည်။ ရိုးမဘဏ်လုပ်ငန်းမှ ရရှိသည့် အမြတ်ငွေသည်
ယခု ၂ဝ၁၆–၁၇ ဘဏ္ဍာနှစ်တွင် ၅၃ ရာခိုင်နှုန်းအထိ တိုးတက်လာပြီး ပန်းလှိုင်ဆေးရုံမှ
ဝင်ငွေသည် ၂၃ ဒသမ ၁ ရာခိုင်နှုန်းအထိ တိုးတက်လာခြင်းကြောင့် ဖြစ်သည်ဟု ဖော်ပြ
ထားသည်။

ဘဏ်၏ လုပ်ငန်းလည်ပတ်မှုအရ ချေးငွေထုတ်ပေးထားသည့်ပမာဏသည် ကျပ် ၁,ဝ၇၆
ဘီလျံအထိရှိလာပြီး ရှေ့ဘဏ္ဍာနှစ်ထက် ကျပ် ၃၅၄ ဘီလျံကျော် တိုးမြှင့် ထုတ်ချေးပေး
ထားနိုင်ခဲ့ကြောင်း ထုတ်ပြန်ချက်တွင် ဖော်ပြထားသည်။

ထိုကဲ့သို့ အမြတ်ဝေစုခွဲပေးခြင်းများ ရှိလာသော်လည်း ရှယ်ယာရှင်များသည် သြဂုတ် ၄
ရက်နောက်ဆုံးထား ပိုင်ဆိုင်သူများသာ အမြတ်ခံစားခွင့်ရှိမည်ဟုလည်း ဦးထွန်းထွန်းက
ပြောသည်။ ထို့အတွက် သြဂုတ် ၅ ရက်တွင် ရှယ်ယာဝယ်ယူသူများသည် ယခုဘဏ္ဍာနှစ်
အတွင်း ခွဲဝေပေးသည့် အမြတ်ဝေစုနှင့် ရှယ်ယာအပိုဆုများကို ခံစားခွင့်ရှိမည်မဟုတ်ဘဲ
၂ဝ၁၇–၁၈ဘဏ္ဍာနှစ်မှသာ ခံစားခွင့်ရှိတော့မည်ဖြစ်သည်ဟု ဦးထွန်းထွန်းက ပြောသည်။

ထို့အတွက် ရှယ်ယာအမြတ်ခွဲဝေမှုဆိုင်ရာ နှစ်ပတ်လည်အစည်းအဝေးအား ဇူလိုင် ၃ဝ
ရက်တွင် ကျင်းပကာ ရှယ်ယာရှင်များထံမှ သဘောတူညီမှု ရယူသွားမည်ဖြစ်သည်။

ဤအကြောင်းအရာနှင့် ပက်သက်၍ ထင်မြင်ချက်ပေးလိုပါက ...
[email protected] သို့ ပေးပို့နိုင်ပါသည်။


အကြည့်အများဆုံး - စီးပွားရေးသတင်း

အကြည့်အများဆုံး - အိမ်ခြံမြေကဏ္ဍ