ရှယ်ယာ လိမ်လည်မှု ဖြစ်စဉ်တွေ ဘယ်လိုကိုင်တွယ်မလဲ

ရန်ကုန်စတော့အိတ်ချိန်းကို ၂ဝ၁၆ ခုနှစ်၊ မတ်လတွင် ဖွင့်လှစ်ခဲ့ပြီးနောက် မြန်မာနိုင်ငံ 
ငွေချေးသက်သေခံလက်မှတ်လုပ်ငန်း ကြီးကြပ်ရေးကော်မရှင် 
(Securities and  Exchange Commission of Myanmar) SECM ကြေညာချက်
တစ်ရပ်ကို တရားဝင်ထုတ်ပြန်ခဲ့သည်။

၎င်းကြေညာချက်သည် အများပိုင်ကုမ္ပဏီများကို ကော်မရှင်၏ခွင့်ပြုချက်ရယူခြင်းမရှိဘဲ
အစုရှယ်ယာများ ရောင်းဝယ်လုပ်ကိုင်ခြင်းမပြုရန် တားမြစ်သည့် ထုတ်ပြန်ချက်ဖြစ်သည်။
ထို့အတူ အစုရှယ်ယာ ရင်းနှီးမြှုပ်နှံလိုသူများသည်လည်း ကော်မရှင်က တရားဝင်ခွင့်ပြု
ထားသည့်ကုမ္ပဏီများတွင်သာ ဝင်ရောက်ရင်းနှီးမြှုပ်နှံ လုပ်ကိုင်ကြရန် အသိပေးချက်များ
ရှိခဲ့သည်။

သို့သော် ရင်းနှီးမြှုပ်နှံသူများသည့် ငွေကြေးဈေးကွက်အတွင်း အရင်းအနှီး ပြုလုပ်ရာတွင်
ရှယ်ယာဝယ်ယူ ရင်းနှီးမြှုပ်နှံခြင်း၊ နိုင်ငံခြားငွေကြေး လဲလှယ်မှုဈေးကွက်အတွင်း
ဝင်ရောက်ကစားခြင်းဖြင့် ရင်းနှီးမှုပြုလုပ်ခြင်း၊ ရွှေဈေးကွက်အတွင်း ဝင်ရောက်ကစားခြင်း
ဖြင့် ရင်းနှီးမြှုပ်နှံမှုများ လုပ်ကိုင်နေလျက်ရှိသည်။ ထိုဈေးကွက်များအပေါ် ရင်းနှီးမြှုပ်နှံ
လုပ်ကိုင်ကြရာတွင် ကျွမ်းကျင်မှုဖြင့် ဝင်ရောက်လုပ်ကိုင်ခြင်းထက် အမြတ်တစ်ခုတည်း
ကိုသာ အဓိထား ဝင်ရောက်လုပ်ကိုင်သူများနေသဖြင့် ငွေကြေးလိမ်လည်သည့် ဖြစ်ရပ်များ
ဖြစ်ပေါ်လာလျက်ရှိသည်။

မကြာသေးမီက Saxon Capital Limited (SCL) အမည်ရှိ ကုမ္ပဏီသည် ဘဏ်
လုပ်ငန်းများနှင့် မိုဘိုင်းဖုန်းများကိုအသုံးပြု၍ အစုရှယ်ယာများ ရင်းနှီးမြှုပ်နှံရန် ဖိတ်ခေါ်ကာ
လိမ်လည်သည့်ဖြစ်စဉ်တစ်ရပ် ဖြစ်ခဲ့သည်။ ထို့အတွက် SECM ကော်မရှင်သည်
၎င်းကုမ္ပဏီကို သတိပေးချက်နှင့် ပြည်သူများကို အသိပေးသည့် ကြေညာချက်တစ်ရပ်
ဇွန် ၂၇ ရက်က ထုတ်ပြန်ခဲ့သည်။

ကော်မရှင်၏ထုတ်ပြန်ချက်အရ SCL ကုမ္ပဏီသည် ရန်ကုန်မြို့တွင် အခြေစိုက်ရုံး
ဖွင့်လှစ်ကာ ရန်ကုန်တိုင်းဒေသကြီး၊ မန္တလေးတိုင်းဒေသကြီး၊ ဧရာဝတီတိုင်းဒေသကြီးနှင့်
တနင်္သာရီတိုင်းဒေသကြီးများတွင် အစုရှယ်ယာများကို လိမ်လည်ရောင်းချ၍ ငွေကြေး
လိမ်လည်မှုရှိခဲ့ကြောင်း ဖော်ပြပါထားသည်။

သတိပေးချက်ထုတ်ပြန်လိုက်ခြင်းကြောင့် SCL ကုမ္ပဏီသည် ရန်ကုန်အခြေစိုက်ရုံးကို
ပိတ်သိမ်းကာ တိမ်းရှောင်ခဲ့သည်။ သို့သော်၎င်းကုမ္ပဏီနှင့် ဆက်စပ်ဖွယ်ရှိသည်ဟု ယူဆ
ရသည့် I Smart အမည်ရှိ ကုမ္ပဏီက ဧရာဝတီတိုင်းဒေသကြီးအတွင်း အလားတူ
လိမ်လည်မှုများ ထပ်မံဆောင်ရွက်ခဲ့သည်။ ထို့အတွက် ၄င်းကုမ္ပဏီကို အရေးယူ
ဆောင်ရွက်တော့မည့် သတိပေးချက်တစ်ရပ်ကို ဇူလိုင် ၃ ရက်တွင် ကော်မရှင်က
ထပ်မံထုတ်ပြန်ခဲ့သည်။ လက်ရှိတွင် ၄င်းကုမ္ပဏီသည် တိမ်းရှောင်နေခြင်းကြောင့် ကုမ္ပဏီ
တာဝန်ရှိသူများကိုအရေးယူနိုင်ရန် စုံစမ်းမှုများ ပြုလုပ်နေသည်ဟု ကော်မရှင်အဖွဲ့ဝင်
ဦးဌေးချွန်က မြန်မာတိုင်း(မ်)ကို ပြောသည်။

''လောလောဆယ်မှာတော့ ကုမ္ပဏီတွေအနေနဲ့ တရားဝင်ခွင့်ပြုချက်မရှိဘဲ အစုရှယ်ယာ
ရောင်းဝယ်မှုမလုပ်ဖို့ သတိပေးချက်တွေ ထုတ်ပြန်နေပါတယ်။ ပြည်သူတွေကလည်း
အဲဒီခွင့်ပြုချက်မရှိတဲ့ ကုမ္ပဏီတွေမှာ ဝယ်ယူရင်းနှီးတာမလုပ်ဖို့ သတိပေးချက်တွေလုပ်နေ
ပါတယ်။ နောက်ပြီး ကျူးလွန်တဲ့ကုမ္ပဏီကိုလည်း အရေးယူနိုင်ဖို့ သတင်းအချက်အလက်
စုဆောင်းတာကို လုပ်နေပါတယ်။ အရေးယူပိုင်ခွင့်ရှိတဲ့ ဌာနတွေနဲ့လည်း ပူးပေါင်း
ဆောင်ရွက်နေပါတယ်''ဟု ကော်မရှင်အဖွဲ့ဝင် ဦးဌေးချွန်က ပြောသည်။

ငွေကြေးဈေးကွက်အတွင်း ရင်းနှီးမြှုပ်နှံလိုသူများအပေါ် လိမ်လည်မှုများသည် ယခုမှ
စတင်ပေါ်ပေါက်လာခဲ့ခြင်းမဟုတ်ဘဲ ၂ဝ၁၅ ခုနှစ်၊ ဇွန်လအတွင်းကလည်း ဖြစ်ပေါ်ခဲ့ဖူး
သေးသည်။ ထိုစဉ်က Global Growth --- အမည်ရှိ ဟောင်ကောင်နိုင်ငံသား
NG Kwok Fai (ခေါ်) Mr.ED ပိုင်ဆိုင်သော ကုမ္ပဏီက နိုင်ငံခြားငွေလဲလှယ်မှုဈေးကွက်
နှင့်ရွှေဈေးကွက်အတွင်း ဈေးနှုန်းအတက်အကျ ပါဝင်ကစားပေးမည်ဟုဆိုကာ ငွေကြေး
ထည့်ဝင်ရန် ကမ်းလှမ်းကာ လိမ်လည်ခဲ့ခြင်းဖြစ်သည်။ ၄င်းကုမ္ပဏီ လိမ်လည်ခဲ့စဉ်
အချိန်က ရင်းနှီးမြှုပ်နှံမှုနှင့် ကုမ္ပဏီများညွှန်ကြားမှုဦးစီးဌာနထံမှ ကုမ္ပဏီမှတ်ပုံတင်ခွင့်ပြု
ချက်ကို တရားဝင်ရယူထားခြင်းဖြစ်သည်။ သို့သော် ကုမ္ပဏီ မှတ်ပုံတင်ခွင့်ပြုချက်
တောင်းခံစဉ်က တင်ပြခဲ့သည့်လုပ်ငန်းများကို လုပ်ကိုင်ခြင်းမပြုဘဲ ငွေကြေးဈေးကွက်တွင်
ရင်းနှီးမြှုပ်နှံသူများထံမှ လိမ်လည်မှုဆောင်ရွက်ခဲ့သည်။

ထိုသို့သော လိမ်လည်မှုဖြစ်စဉ်များ ဖြစ်ပေါ်နေခြင်းသည် ရင်းနှီးမြှုပ်နှံသူများ၏ အသိပညာ
အားနည်းမှုကြောင့်ဟု ဆိုနိုင်သော်လည်း အခြားတစ်ဖက်တွင် ဥပဒေအရ ဆောင်ရွက်မှု
အားနည်းနေခြင်းကြောင့်ဖြစ်သည်ဟု စီးပွားရေးပညာရှင်တစ်ဦးက ပြောသည်။ ထို့အတွက်
ကျူးလွန်သည့်ကုမ္ပဏီများကို ထိရောက်ပြင်းထန်စွာ အရေးယူဆောင်ရွက်မှသာ ထပ်မံ
လိမ်လည်သည့်ဖြစ်စဉ်များ ကျဆင်းသွားမည်ဟု ¤င်းကပြောသည်။

''သတိပေးတားမြစ်ချက် ထုတ်ပြန်တာက လိမ်လည်မှုတွေ ဖြစ်မလာသေးခင်အချိန်မှာ
တော့ လုပ်သင့်တဲ့ကိစ္စဖြစ်တယ်။ဒါပေမဲ့ အမှန်တကယ်လိမ်လည်မှု ဖြစ်လာပြီးတဲ့အချိန်မှာ
တော့ သတိပေးချက်ထုတ်ပြန်တာထက် အရေးယူနိုင်ဖို့ကို တည်ဆဲဥပဒေနဲ့အညီ
လုပ်နိုင်ဖို့လိုတယ်''ဟု ရန်ကုန်စတော့အိတ်ချိန်း ထူထောင်ရာတွင် အရေးပါခဲ့သူတစ်ဦး
ဖြစ်သည့် စီးပွားရေးပညာရှင်တစ်ဦးက ပြောသည်။

''ဥပဒေတွေက ပြည့်ပြည့်စုံစုံရှိထားပြီးသားပါ။ အဲဒါကြောင့် ကျူးလွန်တဲ့ ကုမ္ပဏီတွေကို
သေချာဖော်ထုတ်ပြီး အရေးယူနိုင်တဲ့ အခြေအနေအထိ လုပ်နိုင်အောင် ဆောင်ရွက်ဖို့
လိုတယ်။ ဒါမှလည်း လိမ်လည်မှု လုပ်ရဲတဲ့ ကုမ္ပဏီတွေ နည်းသွားမှာပါ။ မဟုတ်ရင်တော့
လိမ်လည်တဲ့ ကုမ္ပဏီတွေက ဆက်ပြီး ရှိနေမယ်။ အဲဒီလိုပဲ အသိပညာနည်းပါးတဲ့
လူတွေကလည်း ဆက်ပြီး အလိမ်ခံရတာတွေက ဖြစ်နေဦးမှာပဲ''ဟု ၄င်းက ဆက်လက်
ပြောသည်။

ရန်ကုန်စတော့အိတ်ချိန်းတွင် စာရင်းဝင်အများပိုင်ကုမ္ပဏီများ၏ ရှယ်ယာဈေးများ လေ့လာနေသူများကို တွေ့ရစဉ်။ အောင်ဌေးလှိုင် / မြန်မာတိုင်း(မ်)ရန်ကုန်စတော့အိတ်ချိန်းတွင် စာရင်းဝင်အများပိုင်ကုမ္ပဏီများ၏ ရှယ်ယာဈေးများ လေ့လာနေသူများကို တွေ့ရစဉ်။ အောင်ဌေးလှိုင် / မြန်မာတိုင်း(မ်)

လက်ရှိတွင် မြန်မာနိုင်ငံ၌ ကုမ္ပဏီ အစုရှယ်ယာများကို တရားဝင် ရောင်းချခွင့်ရှိသည့်
ကုမ္ပဏီများအဖြစ် ရန်ကုန်စတော့အိတ်ချိန်း စာရင်းဝင်ကုမ္ပဏီ လေးခုနှင့် အခြားဈေးကွက်
ဖြစ်သော OTC (Over The Counter Market) ဈေးကွက်ကဲ့သို့ တရားဝင်ရောင်းချခွင့်
ရှိသည့်ကုမ္ပဏီနှစ်ခုကိုသာ မြန်မာနိုင်ငံငွေချေး သက်သေခံလက်မှတ် လုပ်ငန်းကြီးကြပ်ရေး
ကော်မရှင်က ခွင့်ပြုထားခြင်းဖြစ်သည်။

မြန်မာနိုင်ငံအနေဖြင့် OTC (Over The Counter Market) ပီပြင်စွာ မရှိသေးခြင်းကြောင့်
ပြင်ပ ဈေးကွက်များတွင် ရောင်းချခြင်းများကို ငွေချေးသက်သေခံလက်မှတ် လုပ်ငန်းကုမ္ပဏီ
များဖြင့်သာ တစ်ဆင့်ခံရောင်းဝယ်ခွင့် ပြုထားခြင်းဖြစ်သည်။

ရန်ကုန်စတော့အိတ်ချိန်းတွင်မူ စာရင်းဝင်ကုမ္ပဏီများအဖြစ် ပထမမြန်မာရင်းနှီးမြှုပ်နှံမှု
ကုမ္ပဏီလီမိတက် (FMI)၊ မြန်မာသီလဝါ အက်စ်အီးဇက်ဟိုးလ်ဒင်းပလက် ကုမ္ပဏီ
လီမိတက် ( MTSH )၊ မြန်မာနိုင်ငံသားများဘဏ် (MCB Bank) နှင့် ပထမ မြန်မာပုဂ္ဂလိက
ဘဏ် (FPB  Bank) လေးခုကိုသာ စာရင်းဝင်ကုမ္ပဏီများအဖြစ် သတ်မှတ်ထားသည်။

OTC (Over The Counter Market) ဈေးကွက်ကဲ့သို့ သဘောတရား တူညီသည့် ပြင်ပ
ဈေးကွက်တွင်မူ ရန်ကုန်ဘတ်စ်ကား အများနှင့်သက်ဆိုင်သောကုမ္ပဏီ (YBPC) နှင့်
Myanmar  Agro Exchange Public Ltd MAEX အမည်ရှိ ကုမ္ပဏီနှစ်ခုကိုသာ ခွင့်ပြု
ထားခြင်းဖြစ်သည်။

မြန်မာနိုင်ငံတွင် အများပိုင်ကုမ္ပဏီများအဖြစ် တရားဝင်မှတ်ပုံတင်ထားသည့်ကုမ္ပဏီသည်
လက်ရှိတွင် အရေအတွက် ၂ဝဝ နီးပါးခန့်ရှိနေသည်။ ၄င်းကုမ္ပဏီများအနက် အချို့သော
ကုမ္ပဏီကြီးများသည် ရန်ကုန် စတော့အိတ်ချိန်း မပေါ်ပေါက်မီအချိန်က အစုရှယ်ယာ
ရောင်းချမှုများကို ပြုလုပ်ခဲ့ကြသည်။ သို့သော် မြန်မာနိုင်ငံ ငွေချေးသက်သေခံလက်မှတ်
လုပ်ငန်းကြီးကြပ်ရေးကော်မရှင်၏ နောက်ဆုံးမူဝါဒအရ ကော်မရှင်၏ ခွင့်ပြုချက်မရရှိသေး
ပါက မည်သည့်ကုမ္ပဏီမျှ ပြင်ပတွင် အစုရှယ်ယာရောင်းချခြင်းများကို လုပ်ကိုင်ခွင့်
မရှိတော့ပေ။

၎င်းအချက်သည် ငွေကြေးဈေးကွက်အတွင်း ရင်းနှီးမြှုပ်နှံသူများအနေဖြင့် လိမ်လည်ခံ
ရမည့်အခြေအနေများ မဖြစ်ပေါ်စေရန်အတွက် ဦးတည်ဆောင်ရွက်ထားခြင်းလည်း
ဖြစ်သည်။ ထို့အတွက်လည်း မြန်မာနိုင်ငံ ငွေချေးသက်သေခံလက်မှတ် လုပ်ငန်းဥပဒေဖြင့်
ပြဋ္ဌာန်းကာ အကာအကွယ်ပေးထားသည်။

ငွေကြေးဈေးကွက်အတွင်း ရင်းနှီးမြှုပ်နှံလုပ်ကိုင်ခြင်းသည် မိမိပိုင်ငွေကြေးများကို
ကုမ္ပဏီသို့ လွှဲပြောင်းပေးအပ်လိုက်ရခြင်းကြောင့် ဈေးကွက်သဘောတရားကို အမှန်
တကယ်နားလည်မှသာ ဝင်ရောက်မြှုပ်နှံခြင်းက ပိုမိုအကျိုးသက်ရောက်နိုင်မည်ဖြစ်သည်
ဟု စီးပွားရေးပညာရှင် ဒေါက်တာအောင်ထွန်းသက်က ပြောထားဖူးသည်။

ထို့အတူ ရန်ကုန်စတော့အိတ်ချိန်းဈေးကွက်၌ ရှယ်ယာအရောင်းအဝယ်ပြုလုပ်ရာတွင်
တရားဝင် ခွင့်ပြုချက်ရရှိထားသည့် ဝန်ဆောင်မှုကုမ္ပဏီများနှင့်သာ လုပ်ဆောင်ကြရသည်။
အဆိုပါ ဝန်ဆောင်မှုကုမ္ပဏီများက အများပိုင်ကုမ္ပဏီနှင့် ရင်းနှီးမြှုပ်နှံသူတို့အကြား
အရောင်းအဝယ် ဆိုင်ရာကိစ္စရပ်များကို လုပ်ဆောင်ပေးရသည်။

လက်ရှိ ကော်မရှင်မှ တရားဝင်ခွင့်ပြုချက်ဖြင့်ဝန်ဆောင်မှုပေးနေသော ကုမ္ပဏီများမှာ
AYA Trust Securities Company၊ CB Bank Securities၊ Myanmar Securities
Exchange Center? Global World Securities၊ Expert Investment Securities၊
Aung MyintMo Min Securities၊ KBZ Stirling Coleman Securities၊ KTZ Ruby Hill
Securities၊ Amara Securities၊ Union Trust Securities Company နှင့် Amara
Investment Securities Company Limited တို့ ဖြစ်သည်။

¤င်းကုမ္ပဏီများနှင့် ချိတ်ဆက်ဝယ်ယူရာတွင်လည်း ဈေးကွက်ပေါက်ဈေးအတိုင်း ရောင်း
ဝယ်ခြင်း (Market Order) နှင့် သတ်မှတ်ဈေးနှုန်းတစ်ခုဖြင့် ရောင်းဝယ်သည့်
(Price Limit) နှစ်မျိုးအပေါ် နားလည်ရန် လိုအပ်သည်။ ရှယ်ယာရောင်းဝယ်သူများသည်
မိမိရှယ်ယာကိုဈေးကွက်ပေါက်ဈေးနှင့် ကန့်သတ်ဈေး နှစ်မျိုးစလုံးဖြင့် စာရင်းတင်သွင်းနိုင်
သည်။ သို့သော် မိမိပိုင်ဆိုင်ထားသော အစုရှယ်ယာကို အရောင်းအဝယ် စာရင်း
တင်သွင်းမှုမှားပါက နစ်နာမှုများ ကြုံတွေ့နိုင်မည်ဖြစ်သည်။

Market Price ဖြင့် အရောင်းတင်ခြင်းသည် ဈေးကွက်၏ မည်သည့် ပေါက်ဈေးမဆို
ရောင်းချမည်ဟု သဘောတူသည့် အရောင်းစာရင်းတင်သွင်းမှုဖြစ်သည်။ အဝယ်စာရင်း
တင်သွင်းပါကလည်း မည်သည့်ဈေးဖြင့်မဆိုဝယ်ယူမည်ဟု သဘောသက်ရောက်သည်။
Limit Price ဖြင့် အရောင်းအဝယ်စာရင်း တင်ပါက သတ်မှတ်ဈေးရမှသာ အရောင်းအဝယ်
လုပ်မယ်ဟု သဘောသက်ရောက်သည်။ ထို့အတွက် Market Price ဖြင့် အရောင်းစာရင်း
တင်ခြင်းသည် ဝယ်လိုအား ကျဆင်းပါက နစ်နာမှု ကြုံတွေ့နိုင်သည်။ Market Price ဖြင့်
အဝယ်စာရင်း တင်သွင်းသူများသည် ဝယ်လိုအားမြင့်တက်ချိန်တွင် ရှယ်ယာများကို
ဈေးပိုပေး၍ဝယ်ယူရနိုင်သည်။ သတ်မှတ်ဈေးနှုန်းတစ်ခုဖြင့်ရောင်းဝယ်သည့် (Price Limit) 
စာရင်းတင်သွင်းသူများသည် မိမိသတ်မှတ်သည့် ဈေးနှုန်းဖြင့် ကိုက်ညီမှသာ အရောင်း
အဝယ် ဖြစ်ပေါ်နိုင်မည်ဖြစ်သည်။

ရှယ်ယာဝယ်ယူထားသူများသည် မိမိရှယ်ယာ ဝယ်ယူထားသော ကုမ္ပဏီအရှုံးပေါ်ပါက
မိမိ၏ ရှယ်ယာများမှာလည်း အရှုံးပေါ်နိုင်သည့် အခြေအနေများ ရှိနေသည်ဆိုသော
အချက်မှာ ငွေကြေးဈေးကွက်၏ အခြေခံသဘောအဖြစ်ရှိနေသည်။

''ရှယ်ယာဝယ်တယ်ဆိုတာ ကိုယ့်ပိုက်ဆံကို သူ့ကုမ္ပဏီအတွက် ရင်းနှီးမြှုပ်နှံမှုလုပ်ဖို့
ပေးလိုက်တာဖြစ်တယ်။ ရှယ်ယာဝယ်လိုက်တာနဲ့ မြတ်မယ်လို့ တရားသေပြောလို့မရဘူး။
တကယ်တော့ ရှယ်ယာဝယ်ယူရင်းနှီးမြှုပ်နှံတယ်ဆိုတာ သေချာနားလည်ပြီး ရင်းနှီးမြှုပ်နှံ
ထားတဲ့သူတွေတောင် အကြောင်းကြောင်းကြောင့် ကုမ္ပဏီက အရှုံးပေါ်လို့ ကိုယ့်ရှယ်ယာ
လည်း ဈေးကျသွားတာကို ကြုံတွေ့ရတာအများကြီးရှိတယ်''ဟု စီးပွားရေးပညာရှင်
ဒေါက်တာအောင်ထွန်းသက်က အများနှင့်သက်ဆိုင်သော ကုမ္ပဏီများဆိုင်ရာ ဟောပြော
ပွဲတွင် ပြည်သူများကို သတိပေးပြောသည်။

လက်ရှိတွင် ငွေကြေးဈေးကွက်အပေါ် လိမ်လည်လိုသည့် ကုမ္ပဏီများသည် အမြတ်တစ်ခု
တည်းအပေါ် မက်လုံးပေးခြင်းဖြင့် ဆွဲငင်နေကြခြင်းဖြစ်သည်။ စီးပွားရေးလုပ်ငန်းများ
တစ်စုံတစ်ရာ ပြနိုင်ခြင်းမရှိဘဲ အမြတ်ပေးမည်ဟု ဆိုသည့်အချက်အပေါ် ရင်းနှီးမြှုပ်နှံသူ
များက သတိထားရန် လိုအပ်လှသည်။

ထို့အတွက် ငွေကြေးဈေးကွက်အပေါ် ရင်းနှီးမြှုပ်နှံရာတွင် ရင်းနှီးမြှုပ်နှံမှုဆိုင်ရာ အသိပညာ
များကို လေ့လာနိုင်ရန်အတွက် အရင်းအနှီး ဈေးကွက်ဆိုင်ရာ အသိပညာပေး သင်တန်း
ကျောင်းများအဖြစ် (၁) MIND Investment Institiute (၂) Shenton Institute of
Applied (၃) Myanmar Institute of Finance (၄) MyAsia Consulting Co.,Ltd &
Infra Partner IMCM (၅) Myanmar Certified Training Centers Co.,Ltd (MFC) 
(၆) IMA Institute of Accounting & Finance (၇) Global Institute of Finance 
(၈) Myanmar Institute of Business (MTB) စသည့် သင်တန်းကျောင်းများကို
SECM လိုင်စင်ချပေးထားသည်။ ၄င်းသင်တန်းကျောင်းများမှ ငွေကြေးရင်းနှီးမြှုပ်နှံမှု
ဈေးကွက်၏ အခြေခံသဘောများကို သိရှိနိုင်မည် ဖြစ်သည်။

''ရှယ်ယာရင်းနှီးမြှုပ်နှံတဲ့ သူတွေက အမြတ်ရလိုမှုတစ်ခုတည်းနဲ့ ဘာလုပ်ငန်းလုပ်လဲ
ဆိုတာကို သေချာလေ့လာခြင်း မရှိဘဲ ဝင်တိုးကြတဲ့အတွက် မဖြစ်သင့်တာတွေ ဖြစ်သွား
ကြတာများတယ်။ တကယ်တော့ ရှယ်ယာရင်းနှီးမြှုပ်နှံတဲ့ သူတွေက အစုရှယ်ယာ
ရောင်းဝယ်မှုရဲ့သဘောတရားကိုလည်း သေချာလေ့လာထားဖို့ လိုအပ်တယ်''ဟု
ရန်ကုန်စတော့အိတ်ချိန်း၏ အကြီးတန်းအမှုဆောင်မန်နေဂျာ ဦးသက်ထွန်းဦးက
မြန်မာတိုင်း(မ်)ကိုပြောသည်။

မြန်မာနိုင်ငံအနေဖြင့် ကုမ္ပဏီလုပ်ငန်းများအပေါ် အစဉ်မပြတ် လေ့လာစောင့်ကြည့်နိုင်
သည့်စနစ် Moni-toring Systemာ အားနည်းချက်များကြောင့် ယခုကဲ့သို့ လိမ်လည်မှုများ
ပေါ်ပေါက်စေရန် လွယ်ကူနေစေလျက် ရှိသည်ဟု ၄င်းက ဆက်လက် ထောက်ပြပြော
သည်။ ထို့အတူ ကုမ္ပဏီများက ဥပဒေအပေါ် လက်တစ်လုံးခြား လုပ်ကိုင်ကြခြင်းများလည်း
ပါဝင်နေသဖြင့် ကုမ္ပဏီများအပေါ်အစဉ်တစိုက် လေ့လာစောင့်ကြည့်သည့်စနစ်ကို
ကောင်းမွန်စွာ တည်ဆောက်သင့်သည်ဟု ထပ်မံပြောသည်။

''ကုမ္ပဏီမှတ်ပုံတင်ဌာနကတော့ သူ့ဆီကို မှတ်ပုံတင် ခွင့်ပြုချက်တောင်းရင် ခွင့်ပြုလိုက်
မှာပဲ။ ဒါပေမဲ့ ကုမ္ပဏီတွေက လက်တစ်လုံးခြားလုပ်ပြီး အခုလို မသမာတဲ့ နည်းလမ်းတွေ
လုပ်ရင်လုပ်မှာပဲ။ ဒါကို စောင့်ကြည့် အကဲခတ်နေဖို့ Monitoring System လိုအပ်တယ်။
အဲဒါကို တစိုက်မတ်မတ်လုပ်မယ့် အဖွဲ့အစည်းတစ်ခု သီးခြားရှိဖို့ လိုတယ်။ ဒါမှ
ကုမ္ပဏီတွေရဲ့ လက်တစ်လုံးခြားလုပ်မှုကို ကာကွယ်နိုင်မှာဖြစ်တယ်''ဟု ဦးသက်ထွန်းဦးက
ဆက်လက်ပြောသည်။

လက်ရှိအချိန်ထိတွင် ငွေကြေးဈေးကွက်အတွင်း လိမ်လည်မှုဖြစ်ပေါ်သည့် ကုမ္ပဏီများကို
အရေးယူနိုင်သည့် အခြေအနေ ဆောင်ရွက်မှုများသည် အားနည်းနေဆဲဟု ဆိုရမည်။
ထို့အတွက် ငွေကြေးဈေးကွက်အတွင်း လိမ်လည်မှုဖြစ်စဉ်များက မကြာခဏ ဖြစ်ပေါ်နေ
လျက်လည်းရှိသည်။

ထို့အတူ စတော့ဈေးကွက်၏ ဖွံ့ဖြိုးမှု နည်းပါးနေသေးခြင်းကြောင့် စတော့ဈေးကွက်
အရောင်းအဝယ်သည် ၂ဝ၁၆ ခုနှစ်အတွင်း ဖြစ်ပေါ်ခဲ့သည့် အရောင်းအဝယ်များထက်
နိမ့်ကျလာနေလျက် ရှိသည်။

ဤအကြောင်းအရာနှင့် ပက်သက်၍ ထင်မြင်ချက်ပေးလိုပါက ...
[email protected] သို့ ပေးပို့နိုင်ပါသည်။


အကြည့်အများဆုံး - စီးပွားရေးသတင်း

အကြည့်အများဆုံး - အိမ်ခြံမြေကဏ္ဍ