အာရှ ပစိဖိတ် ဒေသများတွင် သုတေသနဌာနတစ်ခုစီ တည်ဆောက်သွားရန် ဟွာဝေး စီစဉ်

တရုတ်နိုင်ငံအခြေစိုက် ဟွာဝေး (Huawei) ကုမ္ပဏီသည် အိုင်စီတီနယ်ပယ်က မိတ်ဖက်
အဖွဲ့အစည်းများဖြင့် ပူးပေါင်းကာ စင်ကာပူနှင့် ဘန်ကောက်အပါအဝင် အာရှ ပစိဖိတ်ဒေသတွင်းရှိ
နိုင်ငံများတွင် သုတေသနဌာန တစ်ခုစီ တည်ဆောက်သွားရန် အစီအစဉ်ရှိကြောင်း
နိုဝင်ဘာ ၄ ရက်တွင် ဟွာဝေးက သတင်းထုတ်ပြန်ထားသည်။

အိုင်စီတီအသိုင်းအဝိုင်းရှိ မိတ်ဖက်အဖွဲ့အစည်းများနှင့် ပူးပေါင်းကာ အိုင်စီတီလောက
သာယာဝပြောရေးနှင့် နည်းပညာဆန်းသစ်မှုတို့မှတစ်ဆင့် အိုင်စီတီကဏ္ဍ ပိုမိုဖွံ့ဖြိုး
တိုးတက်လာစေရေးကို လက်တွဲဆောင်ရွက်သွားမည်ဟု ဆိုသည်။

''သုတေသနဌာနတွေကို အာရှပစိဖိတ်ဒေသတွင်းက စင်ကာပူနဲ့ ဘန်ကောက်မှာ မကြာမီ
ကာလအတွင်း ဖွင့်လှစ်တော့မှာဖြစ်တဲ့အတွက် မြန်မာနိုင်ငံအနေနဲ့လည်း နောက်ဆုံးပေါ်နည်းပညာ
သစ်တွေနဲ့ ပိုမိုကောင်းမွန်တဲ့ ဝန်ဆောင်မှုတွေကို ပေးသွားနိုင်ဖို့ ကြိုတင်ပြင်ဆင်ထားဖို့
လိုအပ်မှာဖြစ်ပါတယ်'' ဟု ဟွာဝေးနည်းပညာကုမ္ပဏီ(ရန်ကုန်)၏ အမှုဆောင်အရာရှိချုပ်
မစ္စတာရှောင်လီမန်က ပြောသည်။

ဟွာဝေး၏ သုတေသနဌာနများသည် တီထွင်ဆန်းသစ်မှုစင်တာ၊ မိတ်ဖက်များ တိုးတက်ဖွံ့ဖြိုးရေး
စင်တာ၊ နည်းပညာများအတွက် အဖြေရှာသည့်စင်တာနှင့် လေ့လာရေးစင်တာတို့အဖြစ်
လည်ပတ်ဆောင်ရွက်သွားမည်ဖြစ်ပြီး ဘေးကင်းလုံခြုံသည့် အဆင့်မြင့်မြို့တော်၊ အဆင့်မြင့်
နည်းပညာများ၊ Cloud နည်းပညာနှင့် အင်တာနက်ဆိုင်ရာကိစ္စရပ်များ အစရှိသော နယ်ပယ်
သုံးရပ်ကို လေ့လာရေးပြုလုပ်နိုင်မည်ဖြစ်သည်။

ဟွားဝေးကုမ္ပဏီကို ၁၉၈၇ ခုနှစ်က စတင်တည်ထောင်ခဲ့ပြီး ဆက်သွယ်ရေးနှင့် နည်းပညာဆိုင်ရာ
လုပ်ငန်းများတွင် ရင်းနှီးမြှုပ်နှံ လုပ်ကိုင်လျက်ရှိသည်။

ဤအကြောင်းအရာနှင့် ပက်သက်၍ ထင်မြင်ချက်ပေးလိုပါက ...
[email protected] သို့ ပေးပို့နိုင်ပါသည်။


အကြည့်အများဆုံး - နည်းပညာသတင်း