လမ်းအသုံးပြုမှု ဘေးကင်းလုံခြုံရေးအကြောင်း တစေ့တစောင်း

ဒေါက်တာ ဖူနမ်ခက်ထရာပယ်ဆင်း။ဒေါက်တာ ဖူနမ်ခက်ထရာပယ်ဆင်း။

လမ်းအသုံးပြုမှု ဘေးကင်းလုံခြုံရေးအတွက် အစိုး၏ ရမူဝါဒ ကောင်းမွန်ရန် လိုသည်။ မော်တော်ကားဖြင့်
ခရီးသွားလာခြင်းက မျက်မှောက်ခေတ်ကမ္ဘာကို အခြေခံကျကျ ပြောင်းလဲစေခဲ့သည်။ ကားလမ်း
ကွန်ရက်များက လူ့အဖွဲ့အစည်းများကို ချိတ်ဆက်ပေးသည်။ သယ်ယူပို့ဆောင်ရေးစနစ်များက
လူနေမှုဘ၀ပုံစံကို ပြောင်းလဲစေသည်။ ပိုမို လှုပ်ရှားနိုင်၊ သွားလာနိုင်ခြင်းက လူမှုစီးပွားရေးကို
တိုးတက်စေသည်။ ကားမောင်းရင်း ခံစားရသည့် ရိုးစင်းသော ပီတိမှသည် အဆင့်မြင့်ကားများ
မောင်းနှင်ရသည့် စိတ်အားထက်သန်မှု အထိ အားလုံးကို စိတ်လှုပ်ရှားစေလျက်ရှိသည်။

အထက်ပါ ကောင်းကွက်များ ရှိနေလင့်ကစား အခြားတစ်ဖက်တွင် ကားနှင့် ကားလမ်းများ၏
မကောင်းသည့် ဆိုးကျိုးများလည်း ရှိနေသည်။ လူအများ ဒဏ်ရာရသည်။ လူအများ မသန်မစွမ်း
ဖြစ်ကြသည်။ လူအများ အသက်ဆုံးရှုံးရသည်။ ကမ္ဘာ့ကျန်းမာရေး အဖွဲ့၏ ခန့်မှန်းချက်အရ
အရှေ့တောင်အာရှဒေသတွင် နှစ်စဉ် လူဦးရေ ၃၁၆,၀၀၀ မှာ ယာဉ်မတော်တဆမှုကြောင့်
အသက်ဆုံးရှုံး နေကြရသည်။ တစ်နေ့လျှင် လူ ၈၆၅ ဦးနှုန်းဖြင့် သေဆုံးနေခြင်း ဖြစ်၏။
အဆိုပါ လူဦးရေ၏ အဆ (၂၀)မှ (၅၀) အထိမှာ ထိခိုက်ဒဏ်ရာ ရခြင်း၊ မသန်စွမ်းဖြစ်ခြင်း၊
နာတာရှည် အစောင့်ရှောက်ခံလူနာဖြစ်ခြင်း စသည့် ဆိုးကျိုးများ ခံစားကြရသည်။ လမ်းပေါ်တွင်
မတော်တဆမှုကြောင့် သေဆုံးမှုသည် လူငယ်များအတွက် အဓိက အသက်ဆုံးရှုံးရသည့်
အကြောင်းရင်း ဖြစ်နေသည်။ လမ်းအသုံးပြုမှုဆိုင်ရာ မတော်တဆမှုများ၏ ကုန်ကျစရိတ်မှာ
တိုင်းပြည် ဂျီဒီပီ၏ သုံးရာခိုင်နှုန်းအထိ မြင့်တက်လာလျက်ရှိနေပေသည်။ အထက်ပါ ကုန်ကျစရိတ်တွင်
ဆေးကုသစရိတ်များ ပါဝင်ခြင်း မရှိသေးချေ။

ယာဉ်ပိုင်ဆိုင်သူ ဦးရေ များပြားလာခြင်း ကလည်း မတော်တဆမှုများကို တစ်ခါတစ်ရံ တိုးပွားစေသည်။
သို့ရာတွင် ယင်းအချက်မှာ အပြည့်အ၀ မှန်ကန်ခြင်းကား မရှိချေ။ ၀င်ငွေမြင့်မားသော နိုင်ငံများသည်
ကမ္ဘာပေါ်ရှိ စုစုပေါင်း ကားအရေအတွက်၏ ၄၆ ရာခိုင်နှုန်း ပိုင်ဆိုင်ထားသော်လည်း
ယာဉ်မတော်တဆမှုကြောင့် သေဆုံးမှုတွင်မူ စုစုပေါင်း၏ ၁၀ ရာခိုင်နှုန်းသာ ရှိသည်ကို တွေ့ရသည်။
ကားအရေအတွက်များတိုင်း ယာဉ်မတော်တဆမှုကြောင့် သေဆုံးမှုများခြင်း မဟုတ်ပေ။

ထို့အတူ လမ်းအန္တရာယ်သည် လူသား၏ အမှားကြောင့်ဟု တလွဲထောက်ပြမှုများလည်း ရှိသည်။
ယင်းအချက်မှာလည်း အပြည့်အ၀ မှန်ကန်ခြင်း မရှိ။ အရှိန်လျှော့ လမ်းအကန့်များ၊ အတားအဆီးများ၊
ဆိုင်းဘုတ် သင်္ကေတများ စသည့် လမ်းအသုံးပြုမှုဆိုင်ရာ ဘေးကင်းလုံခြုံရေးနည်းလမ်းများ
ကျင့်သုံးခြင်း ကြောင့် ယာဉ်မတော်တဆမှု အများစုကို ရှောင်ရှားနိုင်မည်ဖြစ်ကြောင်း လေ့လာမှုများအရ
တွေ့ရှိရသည်။ ထို့အတူ ဘေးအန္တရာယ်ကင်းရေးအတွက် ပိုမိုစိတ်ချလုံခြုံရသည့် မော်တော်ယာဉ်များ
အသုံးပြုခြင်းကလည်း မတော်တဆမှုကို လျော့နည်းကျဆင်းစေနိုင်သည်။

လမ်းအသုံးပြုသူများ စည်းကမ်းလိုက်နာ ရန် အရေးကြီးသည်မှာ မှန်သော်လည်း ပြဿနာအတွက်
အဓိက အခြေခံလိုအပ်ချက်မှာ အစိုးရ၏ မူဝါဒဖြစ်သည်။ မူဝါဒ ကောင်းပါက အပြောင်းအလဲကို
တစ်မဟုတ်ခြင်း ဖြစ်ပေါ်စေနိုင်၏။ အဓိကကျသော အချက်(၄)ချက်ကို အရေးယူဆောင်ရွက်ပါက
ယာဉ်မတော်တဆမှုကြောင့် သေကြေ၊ ပျက်စီး၊ ဒဏ်ရာရမှုများမှာ တစ်နိုင်ငံလုံးတွင် လျော့ကျသွားမည်
ဖြစ်သည်။ ကမ္ဘာ့ ရေရှည်တည်တံ့သော ဖွံ့ဖြိုးရေး ရည်မှန်းချက် (အက်စ်ဒီဂျီ) တစ်ခုဖြစ်သည့်
လမ်းမတော်တဆမှုများကြောင့် သေဆုံးမှုကို ၂၀၂၀ ပြည့်နှစ် အရောက်တွင် တစ်ကမ္ဘာလုံး၌
ထက်ဝက်လျှော့ချရေးဟူသော ရည်မှန်းချက်ကိုလည်း ဖြည့်ဆည်းနိုင်မည်ဖြစ်သည်။

ပထမအချက်မှာ အာဏာပိုင်များ ထိထိရောက်ရောက်ဆောင်ရွက်နိုင်ရန် အချက်အလက်များ
အပြည့်အစုံရှိရေး ဖြစ်သည်။ အချက်အလက်ကောင်းစွာရှိပါက ယာဉ်တိုက်မှု ဖြစ်ပေါ်စေသည့်
အကြောင်းရင်းများကို ဆန်းစစ်သုံးသပ်နားလည်နိုင်မည် ဖြစ်သကဲ့သို့ ကုန်ကျစရိတ်နှင့် လျော်ညီစွာ
အကျိုးရှိထိရောက်မည့် နည်းလမ်းများ ချမှတ်ဆောင်ရွက်နိုင်မည်ဖြစ်သည်။ စုံလင်သည့်
အချက်လက်များအပေါ် ဆန်းစစ်ဆောင်ရွက်မည့်နည်းလမ်းများမှာ လမ်းထိန်းနံရံ
တည်ဆောက်ခြင်းကဲ့သို့ အသေးအမွှား ဖြစ်နိုင်သကဲ့သို့ အန္တရာယ်ကြီးလွန်းသည့် လမ်းပိုင်းတစ်ခုလုံးကို
ဖြိုဖျက်ပြီး လမ်းအသစ်ပြန်လည် ဖောက်လုပ်ခြင်းအထိ လုပ်ငန်းကြီးမားနိုင်သည်။ အစိုးရအဖွဲ့အစည်းနှင့်
ပါဝင်သက်ဆိုင်သူအားလုံးအကြား ရှင်းလင်းသည့် တာဝန်ယူမှုနှင့် ရှင်းလင်းသည့် ပူးပေါင်းဆောင်ရွက်မှု
ရှိပါက လုပ်ငန်းစဉ်ကို ချောမွေ့စေသည်၊ အထူးသဖြင့် ကဏ္ဍပေါင်းစုံပါဝင်နေသည့် ပြဿနာမျိုးတွင်
များစွာအထောက်အကူပြု နိုင်မည်ဖြစ်သည်။

ဒုတိယအချက်မှာ ထိခိုက်နိုင်ခြေရှိသည့် လမ်းအသုံးပြုသူများကို ဗဟိုပြုစဉ်းစား၍
အခြေခံအဆောက်အအုံကို တည်ဆောက်ရန် ဖြစ်သည်။ ယာဉ်မတော်တဆမှုကြောင့် သေဆုံးမှု၏
၅၀ ရာခိုင်နှုန်းမှာ လမ်းဖြတ်ကူးသူများ၊ စက်ဘီးစီးသူများ၊ ဆိုင်ကယ်စီးသူများ ဖြစ်ကြသည်။
အချို့နိုင်ငံများတွင် ယင်းလမ်း အသုံးပြုသူ အမျိုးအစားများ၏ သေဆုံးမှုမှာ ၈၀ ရာခိုင်နှုန်းအထိ
မြင့်မားတတ်သည်။ စက်ဘီးစီးနင်းရမည့် လမ်းသတ်မှတ်ခြင်း၊ လူကူးမျဉ်းကြားများ ထားရှိခြင်း၊
ဆိုင်ကယ်စီး ဦးထုပ်ဆောင်းရမည့် စည်းကမ်းကို လိုက်နာရန် အထူးကြပ်မတ်ခြင်းကဲ့သို့ အစီအမံများ
ဆောင်ရွက်နိုင်သည်။ မြို့ပြများအား မော်တော်ကား အမှီအခို လျှော့ချရေးအတွက်လည်း
ရည်မှန်းဆောင်ရွက်နိုင်မည်ဖြစ်သည်။

တတိယအချက်မှာကား ထုတ်လုပ်ရာတွင် မြင့်မားသော ဘေးအန္တရာယ်ကင်း စံချိန်စံညွှန်းများဖြင့်
သတ်မှတ်ထုတ်လုပ်ရန် ဖြစ်သည်။ ဒေသတွင်း ကားထုတ်လုပ်သည့်နိုင်ငံများအနက် နိုင်ငံနှစ်ခုက
သာလျှင် ထိုင်ခုံ ခါးပတ်၊ တည်ငြိမ်ကောင်းမွန်သည့် အီလက်ထရွန်းနစ်စနစ် စသည့် နိုင်ငံတကာ
မော်တော်ယာဉ်ဘေးအန္တရာယ်ကင်းရေး ဦးစားပေး စံညွှန်း (၇)ချက်နှင့်အညီ ထုတ်လုပ်လျက်ရှိသည်။
မော်တော်ကား အသစ်တိုင်းကို အဆိုပါ ဦးစားပေးစံညွှန်းများနှင့်အညီ ထုတ်လုပ်ရန် လိုအပ်ပြီး
ပိုမိုခေတ်မီသည့် နည်းပညာများ ထည့်သွင်းအသုံးပြုမှုကိုလည်း အားပေးရန် လိုသည်။ ယင်းသို့
ဦးစားပေး စံနှုန်းများနှင့်အညီ ထုတ်လုပ်ရေး၊ ပြည်တွင်း၌ လည်း နိုင်ငံတကာ စည်းမျဉ်း၊
စည်းကမ်းများနှင့်အညီ ပြုပြင်ရေးတို့တွင် စားသုံးသူများ၏ တန်ခိုးဩဇာမှာလည်း ကြီးမားသည်။

နောက်ဆုံး စတုတ္ထအချက်မှာ ယာဉ်မတော်တဆမှုအပြီး အရေးပေါ်တုံ့ပြန် ဆောင်ရွက်နိုင်စွမ်းကို
မြှင့်တင်ရန် ဖြစ်သည်။ ယာဉ်မတော်တဆမှုဖြစ်ပြီးသည်နှင့် စက္ကန့် တိုင်းမှာ အလွန်အရေးကြီးသည်။
တစ်ပြည်လုံးကို လွှမ်းခြုံနိုင်သည့် အရေးပေါ် ဖုန်းလိုင်း ရှိရန် လိုအပ်သည်။ ယာဉ်မတော်တဆမှုဆိုင်ရာ
ထိခိုက်မှုများအတွက် ဆေးရုံမရောက်မီနှင့် ဆေးရုံရောက်ပြီး အရေးပေါ် ပြုစု စောင့်ရှောက်မှုများမှာ
ကောင်းမွန်ထိရောက်သည့် စနစ်များဖြစ်ရန် လိုသည်။ အကျဉ်းရုံး ဆိုရလျှင် အလုပ်ပိုလုပ်ရန် လိုသည်။
ဒဏ်ရာ ရသည့်သူများအား ကနဦး နေရာချခြင်း၊ အကူအညီပေးခြင်းဆိုင်ရာ လုပ်ငန်းများလည်း
အဆင့်မြှင့်တင်ရန် လိုအပ်သည်။ ကောင်းမွန် ပြည့်စုံသည့် အရေးပေါ် တုံ့ပြန်မှု၊ ပြုစုစောင့်ရှောက်မှု
များကြောင့် ရေရှည်တွင် တွေ့ကြုံလာနိုင်သည့် နောက်ဆက်တွဲ ပြဿနာ များ၊ ဘ၀တစ်သက်တာ
ကျန်းမာရေး စောင့်ရှောက်မှုခံယူရန် လိုအပ်ချက်များကို လျော့ နည်းကျဆင်းစေနိုင်မည် ဖြစ်သည်။

သို့ရာတွင် လမ်းမများ ဘေးကင်းလုံခြုံ လာသည် ဆိုသည့်တိုင်အောင် လူသားအမှားကြောင့်
ဘေးအန္တရာယ် ကျရောက်နိုင်မှုမှာမူ ဖြစ်နိုင်ခြေရှိနေဆဲ ဖြစ်သည်။ ဖြည်းဖြည်း မောင်းနှင်ခြင်း၊
အရက်သောက်ပြီး မောင်းနှင်ခြင်းမှ ရှောင်ကြဉ်ခြင်း၊ ထိုင်ခုံခါးပတ်ပတ်ခြင်း၊ ကလေးများအတွက်
သတ်မှတ်ချက်များနှင့်အညီ စီးနင်းရန် စီစဉ်ခြင်း၊ ဆိုင်ကယ်မောင်း နှင်ရာတွင်လည်း ဆိုင်ကယ်ဦးထုပ်
ဆောင်းခြင်း စသည့်အချက်များကို လိုက်နာဆောင် ရွက်ခြင်းအားဖြင့် မိမိကိုယ်တိုင်နှင့်
မိမိချစ်မြတ်နိုးရသူအပေါင်းကို အသက်အန္တရာယ် အပါအ၀င် ထိခိုက်မှုဘေးအန္တရာယ်အမျိုးမျိုး
ဖြစ်စေနိုင်မည့် အလားအအလာကို လျှော့ချပေးနိုင်မည်ဖြစ်သည်။

မော်တော်ယာဉ်ပိုင်ဆိုင်မှုကို ကျယ်ကျယ်ပြန့်ပြန့် အလေးပေးစဉ်းစားရန် အရေးကြီးသည်။
မော်တော်ကား အရေအတွက် များပြား လာခြင်းမှာ တိုးတက်မှု လက္ခဏာတစ်ရပ်ဖြစ်သော်လည်း
ယင်း၏ နောက်ဆက်တွဲ ပြည်သူ့ ကျန်းမာရေး (ဘေးအန္တရာယ်) ကိုမူ တစ်တိုင်း တစ်ပြည်လုံး
ဝေမျှခံစားကြရသည်။ ဒေသတွင်း နိုင်ငံများ၌ မော်တော်ယာဉ်ပိုင်ဆိုင်သည့် လူဦးရေ
များပြားလာခြင်းမှသည်၊ အများပြည်သူ ကျန်းမာရေးနှင့် ထုတ်လုပ်နိုင်စွမ်း တိုးတက်ရေးကို
အလေးထား လုပ်ဆောင်လာ ကြသည်နှင့်အမျှ၊ လမ်းများ ပိုမိုစိတ်ချ လုံခြုံမှု ရှိရေးအတွက်
အစိုးရ မူဝါဒများ ချက်ချင်း အရေးယူ ချမှတ် ဆောင်ရွက်ရန် လိုအပ်လာလျက်ရှိသည်။
လမ်းများဘေးကင်းလုံခြုံ စိတ်ချရရေးအတွက် ကိုင်တွယ် ဆောင်ရွက်ရမည့်တာဝန်မှာ ရှောင်လွှဲ၍
ရနိုင်သည့် တာဝန်ကား မဟုတ်ချေ။

ဇော်ညွန့် ဘာသာပြန်သည်။


(ကမ္ဘာ့ကျန်းမာရေးအဖွဲ့၏ အရှေ့တောင်အာရှဒေသဆိုင်ရာ ညွှန်ကြားရေးမှူး
ဒေါက်တာ ဖူနမ်ခက်ထရာပယ်ဆင်း ရေးသားပေးပို့လာသော ဆောင်းပါးကို ဖော်ပြခြင်းဖြစ်ပါသည်။)

ဤအကြောင်းအရာနှင့် ပက်သက်၍ ထင်မြင်ချက်ပေးလိုပါက ...
[email protected] သို့ ပေးပို့နိုင်ပါသည်။