အကြံပြုလွှာများ မျိုးစောင့်ဥပဒေကြမ်း ကော်မရှင်ထံ မရောက်သေး

ပြည်တွင်း၊ ပြည်ပ လူ့အခွင့်အရေး တက်ကြွလှုပ်ရှားသူများ၏ ဝေဖန် ကန့်ကွက်မှုများရှိနေသည့်
မျိုးစောင့် ဥပဒေအား လာမည့် မေလတွင် ပြည်သူ လူထုထံ ချပြတော့မည်ဖြစ်သော်လည်း ယနေ့
အချိန်အထိ ဥပဒေကြမ်းရေးဆွဲရေးကော်မရှင်ထံသို့ အကြံပြုလွှာများ မရောက်သေးကြောင်း
ကော်မရှင် ဒုတိယဥက္ကဋ္ဌ ဒေါက်တာ မောင်မောင်ဌေးက မြန်မာတိုင်း(မ်)ကို ပြောသည်။

"ကျွန်တော်တို့ ကော်မရှင်က ဥပဒေကြမ်းရေးဆွဲရာမှာ မည်သူမဆို အကြံပြုချက်ပေးပို့ နိုင်တယ်
ဆိုပြီး ကော်မရှင်စဖွဲ့ကတည်းက တရားဝင်ကြော်ငြာထားပြီးသားပါ။ အခုအချိန်အထိတော့
ပြည်တွင်း၊ ပြည်ပ လူ့အခွင့်အရေးအဖွဲ့တွေက အကြံပြုလွှာမရောက်သေးပါဘူး"ဟု သာသနာရေး
ဝန်ကြီးဌာနမှ ဒုတိယ ၀န်ကြီး ဒေါက်တာ မောင်မောင်ဌေးက ပြောသည်။

ပြည်ထောင်စု ရှေ့နေချုပ်ရုံး၊ ဒုတိယ ရှေ့နေချုပ် ဦးထွန်းထွန်းဦး ဦးဆောင်သည့် အဖွဲ့ဝင် ၁၂ ဦး
ဥပဒေကြမ်းရေးဆွဲရေးကော်မရှင်သည် မျိုးစောင့်ဥပဒေဟု လူအများခေါ်ဆိုကြသည့် ကိုးကွယ်ရာ
ဘာသာ ကူးပြောင်းခြင်းဆိုင်ရာ ဥပဒေနှင့် လူဦးရေတိုးပွားမှုနှုန်း ထိန်းညှိခြင်းဆိုင်ရာ ဥပဒေကြမ်း
အား မေလဆန်းပိုင်းတွင် ပြည်သူလူထုအား တရားဝင်ချပြမည် ဖြစ်ပြီး လူထုထံမှ တုံ့ပြန်ချက်များ
နှင့်အတူ နိုင်ငံတော် သမ္မတထံ ဇွန်လတွင် တင်ပြသွားမည် ဖြစ်သည်။

ရဟန်းသံဃာများအပါအ၀င် နိုင်ငံသား ၁၅ သိန်းကျော်လက်မှတ်ရေးထိုးကာ ဥပဒေ လေးခု အား
(ကိုးကွယ်ရာ ဘာသာ ကူးပြောင်းခြင်းဆိုင်ရာ ဥပဒေ၊ လက်ထပ်ထိမ်းမြားခြင်းဆိုင်ရာ ဥပဒေ၊
တစ်လင် တစ်မယား စနစ်ကျင့်သုံးခြင်းဆိုင်ရာ ဥပဒေ၊ လူဦးရေ တိုးပွားနှုန်း ထိန်းညှိခြင်းဆိုင်ရာ
ဥပဒေ) ပြဋ္ဌာန်းပေးရန် နိုင်ငံတော် သမ္မတထံ တင်ပြခဲ့သည်။

သမ္မတ ဦးသိန်းစိန် သည် ယင်းဥပဒေလေးခုအား ပြည်ထောင်စု လွှတ်တော်က ပြဋ္ဌာန်းပေးရန်
တိုက်တွန်းခဲ့သော်လည်း လွှတ်တော်နာယက သူရဦးရွှေမန်းက အစိုးရ ၀န်ကြီးအဖွဲ့နှင့်
ပြည်ထောင်စု တရားလွှတ်တော်ချုပ်တို့က ဥပဒေကြမ်းပြုစုပြီးမှသာ လွှတ်တော်အား
တင်ပြပြီးမှသာ ဆက်လက်ဆောင်ရွက်ရန် ဆုံးဖြတ်ခဲ့သည်။

သူရ ဦးရွှေမန်း၏ ဆုံးဖြတ်ချက်ကို လက်ခံပြီးနောက် မကြာမီမှာပင် နိုင်ငံတော်သမ္မတသည်
ဥပဒေကြမ်းရေးဆွဲရေး ကော်မရှင်ကို ဖွဲ့စည်းကာ ဥပဒေကြမ်း နှစ်ရပ်အား ပြုစုစေခဲ့ပြီး ဇွန်လကုန်
တွင် ပြန်လည်တင်ပြရန် တာဝန်ပေးခဲ့သည်။

ကော်မရှင်သည် ဥပဒေကြမ်းများ ပြုစုရာတွင် သံဃာတော်များ ပေးပို့ထားသည့် မူလ ဥပဒေကြမ်း
များကို ထည့်သွင်း စဉ်းစားကြောင်း ပြောဆိုခဲ့ပြီး သက်ဆိုင်ရာ ၀န်ကြီးဌာနများအပါအ၀င် ပြင်ပ
ဥပဒေပညာရှင်များ၏ အကြံဉာဏ်ကို ရယူကာ ရေးဆွဲနေကြောင်း ပြောသည်။

ယင်း ဥပဒေများသည် မြန်မာနိုင်ငံအတွင်း၌ ဖြစ်ပေါ်လျက်ရှိသည့် ပဋိပက္ခများကို ဖြေရှင်းရာတွင်
အဓိက အကြောင်းရင်းဖြစ်သည့် လူမှုရေး မညီမျှမှုများအား ပြေလည်စေရန် ရည်ရွယ်၍ မဖြစ်မနေ
ပြဋ္ဌာန်းပေးစေလိုကြောင်း ရဟန်း သံဃာ၊ လူထုကတောင်းဆိုခဲ့ခြင်းဖြစ်သော်လည်း ဥပဒေပြဋ္ဌာန်း
လိုက်ခြင်းဖြင့် လက်ရှိ ဖြစ်ပေါ်နေသော ပြဿနာများကို ပိုမိုကြီးထွားစေနိုင်သည်ဟုဆိုကာ
ပြည်တွင်း၊ ပြည်ပနိုင်ငံတကာ အဖွဲ့အစည်းများက ရှုတ်ချခဲ့ကြသည်။

သမ္မတ ဦးသိန်းစိန်အစိုးရ အဖွဲ့အနေဖြင့် အဆိုပါ ဥပဒေ အား နိုင်ငံရေး လက်နက်အဖြစ်
အသုံးချခြင်း ဖြစ်ကြောင်း ဝေဖန်ပြောဆိုမှုများရှိခဲ့ပြီး ၂၀၀၈ ဖွဲ့စည်းပုံ အခြေခံ ဥပဒေနှင့် ဆန့်ကျင်
ကွဲလွဲမှုများ ရှိနေကြောင်း လွှတ်တော် ကိုယ်စားလှယ်များအပါအ၀င် လူ့အခွင့်အရေး တက်ကြွ
လှုပ်ရှားသူက ဝေဖန်ခဲ့သည်။

လန်ဒန် အခြေစိုက် လူ့အခွင့်အရေး စောင့်ကြည့်ရေး အဖွဲ့အစည်းက သမ္မတ ဦးသိန်းစိန် နှင့်
လွှတ်တော် နာယက သူရဦးရွှေမန်းတို့အား အဆိုပါ ဥပဒေပြဋ္ဌာန်းရေး ကြိုးပမ်းမှုများကို ရပ်တန့်ရန်
မတ်လ ၂၄ ရက်နေ့တွင် တောင်းဆိုခဲ့သည်။

"မြန်မာနိုင်ငံမှာ ဒီလို ဥပဒေ ပြဋ္ဌာန်းပြီးတော့ကို ဗြောင်ကျကျ ခွဲခြားဆက်ဆံဖို့ စဉ်းစားနေတာဟာ
ထိတ်လန့်စရာပဲ"ဟု အဆိုပါ အဖွဲ့၏ အာရှရေးရာ ညွှန်ကြားရေးမှူး ဘားရက်အဒန့်က
ပြောဆိုသည်။

အမျိုးသား လွှတ်တော် နိုင်ငံရေး၊ စီးပွားရေး နှင့် ဥပဒေရေးရာ ကော်မရှင်၏ အဖွဲ့ဝင် ဖြစ်သူ
ဆရာ ကျော်ဝင်းကလည်း မျိုးစောင့်ဥပဒေသည် ဖွဲ့စည်းပုံ ဘာသာရေးနှင့် နိုင်ငံရေးကို ရောထွေး
မကျင့်သုံးရဟု ပြဋ္ဌာန်းထားသည့် ဖွဲ့စည်းပုံ အခြေခံ ဥပဒေနှင့် ကိုက်ညီမှု ရှိ၊ မရှိ မေးခွန်းထုတ်စရာ
ဖြစ်ကြောင်းပြောသည်။

"ကျွန်တော်ကတော့ ဘ၀င်မကျဘူး။ ဒါဟာ တကယ်ကော လိုအပ်ရဲ့လား။ ဒါကို အကြောင်းပြု
ပြီးတော့ တိုင်းရင်းသား စည်းလုံးညီညွတ်ရေးကို ထိခိုက်နိုင်စရာ ရှိလား။ သေချာစဉ်းစားဖို့
လိုတယ်" ဟု နိုင်ငံရေး ဆောင်းပါးများရေးသားလေ့ရှိသူ ဆရာကျော်ဝင်းက ပြောသည်။

လာမည့် မေလဆန်းပိုင်းတွင် ပြည်သူရှေ့ မှောက်သို့ ရောက်ရှိလာမည့် ကော်မရှင်၏ ဥပဒေကြမ်း
နှင့် ပတ်သက်၍ ထွက်ပေါ်လာမည့် သဘောထားကွဲလွဲမှုများ ၊ ဝေဖန်ချက်များအား ကော်မရှင်
အနေဖြင့် လက်ခံကာ ပြန်လည်စဉ်းစားပေးရန် သက်ဆိုင်ရာဌာနများအား တင်ပြပေးသွားမည်
ဖြစ်ကြောင်း ဒေါက်တာ မောင်မောင်ဌေးက ပြောသည်။

"ကျွန်တော်တို့က ဖွဲ့စည်းပုံ အခြေခံ ဥပဒေ ပုဒ်မ ၃၄ ပါ ပြဋ္ဌာန်းချက်အတိုင်း လွတ်လပ်စွာ
ကိုးကွယ်ခွင့်ဆိုတဲ့ ဘောင်ထဲက လွတ်မသွား အောင်၊ လူ့အခွင့်အရေးကို မထိခိုက်အောင်
ရေးဆွဲနေတယ်။ ဥပဒေကြမ်းအပေါ် ကြိုက်တဲ့သူ ရှိသလို၊ မကြိုက်တဲ့သူလည်းရှိမှာပါ။
တကယ်တော့ ဒါက တစ်ဦးတည်း ဆုံးဖြတ်နိုင်တဲ့ ကိစ္စ မဟုတ်ဘူး။ လွှတ်တော်မှာ
အတည်ပြုနိုင်မှသာ ဥပဒေဖြစ်လာမှာ"ဟု ၎င်းကပြောသည်။

ဤအကြောင်းအရာနှင့် ပက်သက်၍ ထင်မြင်ချက်ပေးလိုပါက ...
comment.myanmar@mmtimes.com သို့ ပေးပို့နိုင်ပါသည်။


ရာသီဥတုအခြေအနေ

အကြည့်အများဆုံး - ပြည်တွင်းသတင်း