ရွေးကောက်ပွဲစည်းမျဉ်းနှင့် ပတ်သက်သည့် စွပ်စွဲမှုကို ကော်မရှင် ငြင်းဆို

ကြားဖြတ် ရွေးကောက်ပွဲတွင် အမျိုးသား ဒီမိုကရေစီအဖွဲ့ချုပ်မှ ကိုယ်စားလှယ်လောင်းများအတွက်
ဒေါ်အောင်ဆန်းစုကြည်က လိုက်လံမဲဆွယ်ပေးခွင့်မရအောင် ကန့်သတ်သည့်သဘော
သက်ရောက်သည့် စည်းမျဉ်းကို ထုတ်ပြန်ရန် ရွေးကောက်ပွဲကော်မရှင်က ကြိုးပမ်းနေသည်
ဆိုသော စွပ်စွဲချက်များကို ကော်မရှင်ဥက္ကဋ္ဌ ဦးတင်အေးက ငြင်းဆိုလိုက်သည်။

"သိပ်အငြင်းပွားရင်လည်း ယခင်လုပ်တဲ့အတိုင်း ၂၀၁၄ မှာ ဆက်လုပ်ကြတာပေါ့။ ဒါက
ကောင်းစေချင်လို့ လုပ်လိုက်တာပါ။ ဆေးကြောင့် လေးသွားတယ်ဆိုရင်လည်း ဒီနေရာမှာပဲ
ရပ်တန့်ကြတာပေါ"ဟု ဦးတင်အေးက သတင်းထောက်များကို မေ ၁၆ ရက်နေ့က ပြောသည်။

ရန်ကုန်မြို့၊ ဆန်းမစ်ပါ့ခ်ဗျူးဟိုတယ်တွင် ဦးတင်အေးဦးဆောင်သော ကော်မရှင်အဖွဲ့ဝင်များနှင့်
စာနယ်ဇင်းအဖွဲ့အစည်းများ အလွတ်သဘောတွေ့ဆုံစဉ် သတင်းထောက်များ၏ မေးမြန်းမှုကို
၎င်းက ဖြေကြားခြင်းဖြစ်သည်။

ပြည်ထောင်စု ရွေးကောက်ပွဲကော်မရှင်သည် လာမည့်ရွေးကောက်ပွဲများ၌ ၀င်ရောက်ယှဉ်ပြိုင်မည့်
ကိုယ်စားလှယ်လောင်းများ လိုက်နာရမည့် ဟောပြောခွင့်၊ မဲဆွယ်စည်းရုံးခွင့်နှင့် ပတ်သက်၍
ညွှန်ကြားချက်အသစ်တစ်ခု ထုတ်ပြန်နိုင်ရေးအတွက် ကြိုးပမ်းနေသည်။

မူကြမ်း အဆင့်သာရှိသေးသည့် ထိုညွှန်ကြားချက်တွင် ကိုယ်စားလှယ်လောင်းများက
၎င်းကိုယ်တိုင် မဲဆွယ်မှုမပြုဘဲ ကိုယ်စားမဲဆွယ်ပါက အကန့်အသတ်များ ပြုလုပ်ထားသည်။

စည်းမျဉ်းသစ်အရ အမတ်လောင်းများသည် ၎င်းတို့ မဲဆန္ဒနယ်များ၌ မဲဆွယ်စည်းရုံးရန် ရက် ၃၀
အချိန်ရမည်ဖြစ်ကြောင်း၊ ထိုကာလတွင် ကိုယ်တိုင်ဖြစ်စေ၊ မဲဆွယ်ပေးရန် လွှဲအပ်သည့်
ကိုယ်စားလှယ်ကဖြစ်စေ မည်သည့်နေရာတွင် မည်သို့မဲဆွယ်မည့်ကို ရွေးကောက်ပွဲကော်မရှင်ထံ
တင်ပြရမည်ဟု ဦးတင်အေးက ပြောသည်။

"တင်လာရင် ကျွန်တော်တို့က ဒါတွေကို ကြည့်မယ်။ ကြည့်ပြီးရင် ဘယ်သူ့ကိုမှ ခွင့်မပြုဘူး
ဆိုတာမျိုးမရှိပါဘူး" ဟု ၎င်းကပြောသည်။

စည်းမျဉ်းမူကြမ်းကို နိုင်ငံရေးပါတီများထံသို့ ပေးပို့ထားသလို အတည်ပြုထုတ်ပြန်နိုင်ရေးအတွက်
မေလ ၁၅ ရက်နေ့ကလည်း နိုင်ငံရေး ပါတီများနှင့် ရွေးကောက်ပွဲကော်မရှင်တို့တွေ့ဆုံ
ဆွေးနွေးခဲ့ကြသည်။

ဤအကြောင်းအရာနှင့် ပက်သက်၍ ထင်မြင်ချက်ပေးလိုပါက ...
[email protected] သို့ ပေးပို့နိုင်ပါသည်။


ရာသီဥတုအခြေအနေ

အကြည့်အများဆုံး - ပြည်တွင်းသတင်း