ဘာသာ ကူးပြောင်းခြင်းဆိုင်ရာ ဥပဒေကြမ်း အငြင်းပွားဖွယ်ဖြစ်နေ

ဥပဒေပြဋ္ဌာန်းပေးရေးအတွက် ကြိုးပမ်းသည့် လှုပ်ရှားမှုများ ပြုလုပ်စဉ်ကတည်းက အမြင်မတူသူ
များအကြား အငြင်းပွားမှုများရှိခဲ့သလို၊ အရပ်ဘက်လူမှု အဖွဲ့အစည်းများက အစဉ်တစိုက်
ကန့်ကွက်မှုများရှိနေသည့် 'ကိုးကွယ်ရာ ဘာသာ ကူးပြောင်းခြင်းဆိုင်ရာ ဥပဒေ' မူကြမ်း ကို
မေလ ၂၇ ရက်နေ့တွင် အစိုးရက ထုတ်ပြန်ခဲ့သည်။

ဒုတိယရှေ့နေချုပ်ဦးဆောင်သော အဖွဲ့ဝင် ၁၂ ဦးပါ ကော်မရှင်က ထိုဥပဒေမူကြမ်းကို ရေးဆွဲခဲ့ခြင်း
ဖြစ်ပြီး ပြည်သူများထံမှ အကြံပြုချက်များပေးပို့ရန် ထုတ်ပြန်လိုက်ခြင်းဖြစ်သည်ဟု နိုင်ငံပိုင်
သတင်းစာများတွင် ဖော်ပြထားသည်။

ထိုဥပဒေမူကြမ်းတွင် ဘာသာသာသနာကို စော်ကားရန်၊ အကြည်ညိုပျက်စေရန်၊ ဖျက်ဆီးရန်
(သို့) အလွဲသုံးစားပြုရန် အကြံဖြင့် ကိုးကွယ်ရာဘာသာကို ကူးပြောင်းပါက ထောင်ဒဏ်နှစ်နှစ်
အထိ ချမှတ်နိုင်သော ပုဒ်မများလည်း ပါဝင်သည်ကို တွေ့ရသည်။

"လူတစ်ယောက်က ဘယ်လိုအကြံအစည်နဲ့ ဘာသာပြောင်းတယ်ဆိုတာကို ဘယ်သူက
စစ်ဆေးလို့ ရမှာလဲ။ ကိုးကွယ်ရာဘာသာဆိုတာ လူတစ်ဦးချင်းစီရဲ့ ယုံကြည်မှုနဲ့ ဆိုင်တဲ့ ကိစ္စမို့
စစ်ဆေးဖို့ မဖြစ်နိုင်ပါဘူး။ ဥပဒေတစ်ခုကို ပြဋ္ဌာန်းတဲ့အခါမှာ လက်တွေ့သုံးလို့ရတဲ့ဥပဒေမျိုးကိုပဲ
ပြဋ္ဌာန်းရပါတယ်။ ဒီလိုပြဋ္ဌာန်းချက်က လက်တွေ့မကျပါဘူး" ဟု တရားလွှတ်တော် ရှေ့နေ ဦးကိုနီ
က ဝေဖန်လိုက်သည်။

အဆိုပါပြဋ္ဌာန်းချက်သည် ရှိရင်းစွဲ တည်ဆဲဥပဒေဖြစ်သည့် ပြစ်မှုဆိုင်ရာဥပဒေတွင် ပါဝင်သော
'သာသနာညှိုးနွမ်းအောင်ပြုမှု'နှင့် အလား သဏ္ဌာန်တူနေသဖြင့် ပြဿနာတစ်စုံတစ်ရာ
ပေါ်ပေါက်ပါက လိုရာပုဒ်မဖြင့် တရားစွဲမှုမျိုး ဖြစ်လာနိုင်သလို အငြင်းပွားမှုများရှိလာနိုင်ကြောင်း
လည်း တရားလွှတ်တော်ရှေ့နေ ဦးခင်ဇော်က မြန်မာတိုင်း(မ်)ကို ပြောသည်။

ဥပဒေမူကြမ်းအရ ကိုးကွယ်ရာဘာသာ ကူးပြောင်းလိုသူသည် မြို့နယ် သာသနာရေးမှူးက ဥက္ကဋ္ဌ
အဖြစ် ဦးဆောင်ပြီး လူဝင်မှုကြီးကြပ်ရေးနှင့် အမျိုးသားမှတ်ပုံတင်ရေးဌာန မြို့နယ်ဦးစီးမှူး၊ မြို့နယ်
ဒုတိယအုပ်ချုပ်ရေးမှူး၊ မြို့မိမြို့ဖနှစ်ဦး၊ မြို့နယ်အမျိုးသမီးရေးရာအဖွဲ့ ဥက္ကဋ္ဌ၊ မြို့နယ်ပညာရေးမှူးက
တာဝန်ပေးအပ်သူတစ်ဦးတို့ ပါဝင်သည့် စိစစ်ရေးအဖွဲ့ထံ တင်ပြရမည်ဖြစ်သည်။

ထိုအဖွဲ့က ဘာသာကူးပြောင်းရန် လျှောက်ထားသူသည် တစ်စုံတစ်ရာ လွှမ်းမိုးမှု၊ ဖိအားပေးမှု
ခံထားရခြင်းရှိ၊မရှိ၊ ကူးပြောင်းမည့်ဘာသာ၏ အနှစ်သာရကို နားလည်သဘောပေါက်ခြင်း ရှိ၊ မရှိ
တို့ကို စစ်ဆေးပြီး ဘာသာပြောင်းကြောင်း မှတ်ပုံတင်ထုတ်ပေးရန် ဆုံးဖြတ်မည်ဟု ပါရှိသည်။

Equality Myanmar လူမှုအဖွဲ့အစည်းမှ ဒါရိုက်တာ ဦးအောင်မျိုးမင်းက ဘာသာကူးပြောင်းမှုကို
စစ်ဆေးပြီး မှတ်ပုံတင်ထုတ်ပေးမည့်အဖွဲ့တွင် ပါဝင်မည့်သူများသည် ဗုဒ္ဓဘာသာများသာ
ဖြစ်နိုင်ခြေများသဖြင့် အခြားဘာသာများ၏ ယုံကြည်မှုဆိုင်ရာကိစ္စများကို နားလည်ရန်
မလွယ်ကြောင်း၊ ထို့ကြောင့် ထိုအဖွဲ့တွင် ဘာသာပေါင်းစုံမှ ပုဂ္ဂိုလ်များပါဝင်မှသာ သင့်လျော်မည်
ဖြစ်ကြောင်းပြောသည်။

ဥပဒေကြမ်း၏ ပုဒ်မ ၂၅ တွင် ကိုးကွယ်ရာဘာသာကူးပြောင်းခြင်းဆိုင်ရာ ကိစ္စများကို ယခုဥပဒေ
အရသာ ဆောင်ရွက်ရမည်ဟု ပြဋ္ဌာန်းထားသဖြင့် မိမိယုံကြည်မှုအရ အလွယ်တကူ ဘာသာ
ကူးပြောင်းခြင်းသည် တရားမ၀င်သည့် သဘောမျိုးသက်ရောက်နေကြောင်း ရှေ့နေ ဦးကိုနီက
ဝေဖန်ခဲ့သည်။

"ကျွန်တော်က ခရစ်ယာန်ကိုးကွယ်သူဆိုပါ စို့ဗျာ။ ဗုဒ္ဓဘာသာဘုန်းတော်ကြီး တစ်ပါးနဲ့တွေ့ တဲ့
အခါ အဲဒီဆရာတော်ရဲ့ ဟောပြောမှုအရ ဗုဒ္ဓဘာသာကို ပြောင်းလဲ သက်ဝင်ယုံကြည်သွားပြီ
ဆိုပါစို့။ အဲဒါက ဒီဥပဒေအရ ဆိုရင် တရားမ၀င်ဘူးဖြစ်နေတယ်။ ဒါဟာ လွတ်လပ်စွာကိုးကွယ်ခွင့်
ကို ချိုးဖောက်တာပဲ။ အခြေခံဥပဒေနဲ့လည်း မညီညွတ်ဘူး"ဟု ၎င်းကပြောသည်။

ဥပဒေကြမ်း၏ ပုဒ်မ ၁၆ တွင် မည်သူမျှ ကိုးကွယ်ဘာသာကူးပြောင်းခြင်းကို ဟန့်တားခြင်း၊
ပိတ်ပင်ခြင်း၊ နှောင့်ယှက်ခြင်းမပြုရဟု ပါရှိသော်လည်း ဘာသာကူးပြောင်းမှု စိစစ်ရေးအဖွဲ့က
မှတ်ပုံတင်ထုတ်ပေးမှသာ ဘာသာပြောင်းလဲ ကိုးကွယ်ခွင့်ရှိသကဲ့သို့ ဖြစ်နေသဖြင့် ဥပဒေတွင်
ရှေ့နောက် မညီမှုများ ရှိနေသည်။

"စိစစ်ရေးအဖွဲ့က သူတို့စံနှုန်းနဲ့မညီလို့ ဘာသာပြောင်းခွင့် မှတ်ပုံတင် မပေးပါဘူးတဲ့။ အဲဒီအဖွဲ့ကို
ဘာသာပြောင်းတာ ဟန့်တားမှုနဲ့ ထောင်ချမှာလား" ဟု ဦးကိုနီက ပြောသည်။

ယခုဥပဒေသည် နိုင်ငံအတွက်ပြဋ္ဌာန်းရန် မလိုအပ်သော ဥပဒေဖြစ်ပြီး မြန်မာနိုင်ငံတွင်
လိုအပ်သော ဥပဒေမှာ စင်ကာပူတွင် ပြဌာန်းထားသကဲ့သို့ ဘာသာပေါင်းစုံ ချစ်ကြည်စွာ
နေထိုင်နိုင်ရေးအတွက် ဘာသာရေးဆိုင်ရာ အမုန်းစကားများကို တားမြစ်သော ဥပဒေကို
ပြဋ္ဌာန်းရန်သာ လိုအပ်ကြောင်း ၎င်းက ပြောကြားသည်။

မဘသအဖွဲ့မှ ဥပဒေအကြံပေး ဦးအေးပိုင်နှင့် ဗဟိုအလုပ်အမှုဆောင် ဓမ္မစက္ကဦးမောင်မောင်တို့ကမူ
ဥပဒေကြမ်းတွင် ထည့်သွင်းထားသည့် ပြစ်ဒဏ်များသည် နည်းနေသေးကြောင်း၊ ဘာသာ
သာသနာကိုစော်ကားရန် ရည်ရွယ်၍ ဘာသာပြောင်းပါက ထောင်ဒဏ် ငါးနှစ်မှ ၁၀ နှစ်
ချမှတ်သင့်ကြောင်းနှင့် ထိုအချက်ကို အကြံပြုချက်အနေဖြင့် ဥပဒေရေးဆွဲသည့် အဖွဲ့ထံ
တင်ပြသွားမည်ဟု ဆိုသည်။

ဤအကြောင်းအရာနှင့် ပက်သက်၍ ထင်မြင်ချက်ပေးလိုပါက ...
comment.myanmar@mmtimes.com သို့ ပေးပို့နိုင်ပါသည်။


ရာသီဥတုအခြေအနေ

အကြည့်အများဆုံး - ပြည်တွင်းသတင်း