ဆန်ဈေးကွက် တရားဝင်ဖြစ်စေရန် တရုတ်အစိုးရကိုယ်တိုင် လာရောက်ဆွေးနွေး

မူဆယ်နယ်စပ်မှတစ်ဆင့် မြန်မာနိုင်ငံမှ ၀ယ်ယူနေသည့် ဆန်ဈေးကွက်အား တရားဝင်ဖြစ်စေရေး
အတွက် ဆောင်ရွက်ရန် တရုတ်ဘက်မှ ဆန္ဒရှိလာပြီဖြစ်ကာ ယင်းကိစ္စနှင့် စပ်လျဉ်းပြီး
မြန်မာနိုင်ငံဆိုင်ရာ တရုတ်သံရုံး၏ စီးပွားရေး သံအမတ်ကိုယ်တိုင် ဆွေးနွေးမှုများ လာရောက်
ဆောင်ရွက်လျှက်ရှိကြောင်း မြန်မာနိုင်ငံ ဆန်စပါးလုပ်ငန်းအသင်းချုပ်က မြန်မာတိုင်း(မ်)ကို
ပြောသည်။

မြန်မာနိုင်ငံမှဆန်များကို တရုတ်နိုင်ငံက နယ်စပ်မှတစ်ဆင့် ၀ယ်ယူနေသော ဈေးကွက်သည်
၂၀၁၂ ခုနှစ်မှ စတင်ကာ ပေါ်ထွန်းလာခြင်းဖြစ်ပြီး ယင်းအချိန်ကတည်းက မြန်မာအနေဖြင့်
တရားဝင် ခွင့်ပြုထားပြီး ဖြစ်သော်လည်း တရုတ်နိုင်ငံဘက်က ခွင့်ပြုမှု မရှိသေးခြင်းဖြစ်သည်။

သို့ဖြစ်ရာမှ အဆိုပါဆန်ဈေးကွက်ကို တရုတ်နိုင်ငံဘက်ကပါ တရားဝင်ဖြစ်စေရန်လိုလားလာခြင်း
ကြောင့် လွန်ခဲ့သည့် တစ်နှစ်ကျော်ခန့်မှ စတင်ကာ ဆွေးနွေးမှုများ ပြုလုပ်နေခဲ့ခြင်းဖြစ်ကာ
ပြီးခဲ့သည့် ဇူလိုင် ၁၄ ရက်တွင် မြန်မာနိုင်ငံဆိုင်ရာ တရုတ်သံရုံး၏ စီးပွားရေးသံအမတ်က
ရန်ကုန်မြို့ရှိ မြန်မာနိုင်ငံဆန်စပါး အသင်းချုပ်ရုံးသို့ ကိုယ်တိုင်လာရောက် ဆွေးနွေးခဲ့ခြင်းဖြစ်သည်။

အဆိုပါ ဈေးကွက် တရားဝင်ဖြစ်စေရေးအတွက် မြန်မာနိုင်ငံမှ တင်ပို့မည်ဆန်များသည် စားသုံးရန်
သင့်လျှော်သည့် ပိုးမွှားနှင့် ရောဂါကင်းစင်သော ကုန်စည်များဖြစ်ကြောင်း တရားဝင်ထောက်ခံမှု
ပြုလုပ်ပေးရန် လိုအပ်ကြောင်း ကမ္ဘာ့ဘဏ်၏ အရှေ့တောင်အာရှဒေသဆိုင်ရာ စိုက်ပျိုးရေးကဏ္ဍ
စီးပွားရေးပညာရှင် မစ္စတာဆာဂျီယိုက မကြာမီက မြန်မာတိုင်း(မ်)နှင့် တွေ့ဆုံစဉ်ပြောကြားခဲ့သည်။

အထက်ပါကဲ့သို့ မြန်မာ့ဆန်များသည် ပိုးမွှားနှင့် ရောဂါကင်းစင်ကြောင်း ထောက်ခံချက်အတွက်
တရုတ်အစိုးရဘက်မှ အရည်အသွေးစစ်ဆေးဆိုင်ရာ တရားဝင်အဖွဲ့အစည်းနှင့် မြန်မာအစိုးရဘက်မှ
အရည်အသွေးစစ်ဆေးဆိုင်ရာ တရားဝင်အဖွဲ့အစည်းတို့အကြားတွင် တရားဝင်သဘောတူစာချုပ်
ချုပ်ဆိုရန်လိုအပ်သည်ဟု ကျွမ်းကျင်သူများကပြောသည်။

ထိုကဲ့သို့ စာချုပ်ချုပ်ဆိုရေးအတွက် တရုတ်နိုင်ငံဘက်တွင် အရည်အသွေး စစ်ဆွေးရေးဆိုင်ရာ
တရားဝင် အဖွဲ့အစည်း ရှိနေသော်လည်း မြန်မာဘက်တွင် မရှိသေးခြင်းကြောင့်
လုပ်ငန်းဆောင်ရွက်မှုများ တုံ့ဆိုင်းနေခြင်းဖြစ်သည်ဟု မြန်မာနိုင်ငံ၏ ထိပ်သီးဆန်တင်ပို့သူ
တစ်ဦးလည်းဖြစ်သည့် ဦးလူမော်မြင့်မောင် ကဆိုသည်။

အထက်ပါကဲ့သို့ တရုတ်သို့ တင်ပို့ရောင်းချနေသော ဆန်ဈေးကွက်အား တရားဝင်ဖြစ်အောင်
ဆောင်ရွက်နိုင်ပါက တရုတ်ကုန်သည်များအနေဖြင့် လက်ရှိအချိန်တွင် တရုတ်အစိုးရအား
ပေးဆောင်နေရသည့် အခွန် ၃၀ ရာခိုင်နှုန်းကို သက်သာခွင့်ရမည်ဖြစ်သောကြောင့် တရုတ်နှင့်
မြန်မာ နှစ်ဖက်စလုံး၏ ကုန်သည်များအတွက် အကျိုးအမြတ် ပိုမိုလာမည်ဖြစ်သည်ဟု
ဦးလူမော်မြင့်မောင်က ပြောသည်။

တရုတ်သို့ တင်ပို့သည့် ဆန်ဈေးကွက် တရားဝင်ဖြစ်စေရေးအတွက် ပိုးမွှားနှင့်ရောဂါကင်းစင်
ကြောင်းကို တာဝန်ယူဆောင်ရွက်ရမည့် လည်ယာစိုက်ပျိုးရေးနှင့် ဆည်မြောင်းဝန်ကြီးဌာနအား
အသင်းအနေဖြင့်လည်း တိုက်တွန်းမှုများ ပြုလုပ်ထားသည်ဟု မြန်မာနိုင်ငံဆန်စပါးအသင်းချုပ်
ဥက္ကဌ ဦးချစ်ခိုင် ကမြန်မာတိုင်း(မ်)ကိုပြောသည်။

လက်ရှိ ၂၀၁၄ - ၂၀၁၅ ဘဏ္ဍာနှစ်တွင် မြန်မာနိုင်ငံမှ ပြည်ပသို့ ဆန်တန်ချန် ၄၀၀,၀၀၀ ခန့်
တင်ပို့ထားပြီးဖြစ်ကာ ယင်းပမာဏအနက် တရုတ်နိုင်ငံသို့ တင်ပို့မှုသည် တန်ချိန် ၃၀၀,၀၀၀ နီးပါး
အထိ ၇၅ ရာခိုင်နှုန်းခန့် ပါဝင်နေကြောင်း ဆန်စပါးအသင်းချုပ်၏ စာရင်းများအရ သိရသည်။

ဤအကြောင်းအရာနှင့် ပက်သက်၍ ထင်မြင်ချက်ပေးလိုပါက ...
[email protected] သို့ ပေးပို့နိုင်ပါသည်။


ရာသီဥတုအခြေအနေ

အကြည့်အများဆုံး - ပြည်တွင်းသတင်း