ဗိုင်ဘာက မြန်မာနိုင်ငံရှိ အသုံးပြုသူများအတွက် မြန်မာ့စတစ်ကာများ ဖန်တီးတော့မည်

မြန်မာနိုင်ငံမှ အသုံးပြုသူများအတွက် မြန်မာ့ရေခံမြေခံနှင့် ကိုက်ညီမည့် စတစ်ကာများကို
လာမည့် စတင် လုပ်ဆောင်နေပြီဖြစ်ကြောင်း ဇူလိုင်လ ၃၀ရက်နေ့က 50th Street Café တွင်
ပြုလုပ်ခဲ့သော မီဒီယာများနှင့် တွေ့ဆုံပွဲအတွင်း Viber ဖိလစ်ပိုင်မှ ဌာနေကိုယ်စားလှယ်
မစ္စခရစ်စတယ်လီက ပြောကြားခဲ့သည်။

"ကျွန်တော်တို့အတွက် မြန်မာနိုင်ငံက အရမ်းအရေးကြီးတဲ့ ဈေးကွက်တစ်ခုပါ။ တိုးတက်လာတဲ့
Viber သုံးစွဲသူနှုန်းထားက အံ့အားသင့်ဖွယ်ပါပဲ။ မြန်မာနိုင်ငံအတွင်း မိုဘိုင်းဖုန်းသုံးစွဲသူတွေ
အနေနဲ့ Viber မိသားစုအဖြစ် ၀င်ရောက်လာတာကို ကျွန်တော်တို့ ဂုဏ်ယူဝမ်းမြောက်ပါတယ်။
ဒီနေ့ အခမ်းအနားမှာလည်း Viber ရဲ့ အကြောင်းအရာတွေကို မီဒီယာတွေဆီကို မျှဝေခွင့်ရတာ
ကျွန်တော်တို့ အထူးပဲ ပျော်ရွှင်ကျေနပ်မိပါတယ်" ဟု Viber ကုမ္ပဏီ၏ အမှုဆောင်အရာရှိချုပ်
 Talmon Marco မှ အဆိုပါအခမ်းအနားအတွက် ဗွီဒီယိုနှုတ်ခွန်းဆက်သချက် ပေးပို့ခဲ့သည်။

၂၀၁၁ ခုနှစ်၊ ဖေဖော်ဝါရီလ၊ Viber ဖုန်းခေါ်ဆိုမှုဆော့ဖ်ဝဲကို စတင်ထုတ်လုပ်ခဲ့ချိန်၌ မြန်မာနိုင်ငံတွင်
အသုံးပြုသူ ၃ ဦးသာရှိခဲ့ပြီး၊ ၂၀၁၂ခုနှစ်၊ ဖေဖော်ဝါရီလတွင် အသုံးပြုသူ၂၀၀၀ ကျော်၊ ၂၀၁၃ ခုနှစ်၊
ဖေဖော်ဝါရီလတွင် အသုံးပြုသူ သုံးသိန်းကျော်နှင့် ၂၀၁၄ ခုနှစ်တွင် ဖေဖော်ဝါရီလတွင် ၂ သန်း
နီးပါးရှိခဲ့ပြီး၊ ယခုနောက်ဆုံး ဇူလိုင်လတွင်မူ အသုံးပြုသူ ၅ သန်း ကျော်လွန်သွားပြီဖြစ်ကြောင်း
မစ္စခရစ်စတယ်လီက ပြောကြားခဲ့သည်။

လက်ရှိအချိန်တွင် ကမ္ဘာပေါ်၌ Viber အသုံးပြုသူ သန်းပေါင်း ၃၇၀ ခန့်ရှိပြီး မြန်မာနိုင်ငံ၏ Viber
အသုံးပြုသူ အရေအတွက်သည် အိမ်နီးချင်းနိုင်ငံများနှင့် နှိုင်းယှဉ်လျင် အချိန်ကာလ
အနည်းငယ်အတွင်း အလျင်အမြန် တိုးတက်လာကြောင်း ၎င်းကဆိုသည်။

"တခြားဖုန်းခေါ်ဆိုမှုနဲ့ ပတ်သက်တဲ့ ဆော့ဖ်ဝဲတွေ ပေါ်လာပေါ်လာ မြန်မာပြည်သူတွေကတော့
Viber ကို ရွေးချယ်နေကြတုန်းပဲ။ ဘာလို့ရွေးချယ်ကြသလဲဆိုတဲ့ အကြောင်းပြချက်ကတော့
Viber အသုံးပြုရလွယ်ကူတယ်။ အခမဲ့ဖြစ်တဲ့ အတွက်ကြောင့်လို့ပဲ ပြောရမှာဖြစ်ပါတယ်" ဟု
၎င်းက ပြောသည်။

"အလျင်အမြန် တိုးတက်လာတဲ့ မြန်မာနိုင်ငံက အသုံးပြုသူတွေကို အလေးထားသောအားဖြင့်
မကြာခင်မှာ မြန်မာ့ရေခံမြေခံတွေနဲ့ ကိုက်ညီမှုရှိမယ့်၊ မြန်မာ့ယဉ်ကျေးမှု ဓလေ့ထုံးတမ်းတွေနဲ့
စပ်အပ်လျော်ညီမယ့် စတစ်ကာလေးတွေကို အခမဲ့ အသုံးပြုခွင့်ပေးသွားဖို့ စတင်လုပ်ဆောင်
နေပါပြီ။ မြန်မာ့ဟန်ပန် စတစ်ကာတွေကိုတော့ လာမယ့် သုံးလအတွင်းမှာ အသုံးပြုနိုင်အောင်လို့
စီစဉ်နေပါပြီ" ဟု မစ္စခရစ်စတယ်လီက ပြောသည်။

ထို့ပြင် Viber ကုမ္ပဏီမှလည်း မြန်မာနိုင်ငံတွင် ရုံးခွဲလာရောက်ဖွင့်လှစ်ရန် စိတ်ဝင်စားနေပြီး
လာမည့် နှစ်အနည်းငယ်အတွင်း အကောင်အထည်ဖော်သွားနိုင်ဖွယ်ရှိကြောင်း ၎င်းကပြောသည်။

"ကျွန်တော်တို့ရဲ့ ရေရှည် ရည်မှန်းချက်ပန်းတိုင်ကတော့ ကွန်ယက်ဆက်သွယ်မှုဆိုင်ရာ
နယ်ပယ်မှာ နံပါတ် ၁ ဖြစ်လာဖို့ပါပဲ။ မြန်မာနိုင်ငံအပါအ၀င် အာဆီယံဒေသတွင်းနိုင်ငံတွေဟာ
ကျွန်တော်တို့ ထားရှိတဲ့ ရည်မှန်းချက်ပန်းတိုင်အတွက် အရေးကြီးတဲ့ အစိတ်အပိုင်းတစ်ခု
ဖြစ်ပါတယ်" ဟု Viber ကုမ္ပဏီ၏ အရောင်းမြှင့်တင်ရေး အကြီးအကဲ Mark Hardy က
ပြောကြားခဲ့သည်။

မြန်မာနိုင်ငံမှ အသုံးပြုသူများသည် အခမဲ့ရရှိသော စတစ်ကာများကိုသာ အသုံးများလျက်ရှိပြီး
အွန်လိုင်းငွေပေးချေမှုစနစ်များ ကျယ်ကျယ်ပြန့်ပြန့် အသုံးပြုမှု မရှိသောကြောင့် ငွေပေးဝယ်ယူ
ရသည့် စတစ်ကာများ ၀ယ်ယူလိုသည့် အသုံးပြုသူများအတွက် အဆင်ပြေစေရန်
စီမံလုပ်ဆောင်နေပြီဖြစ်ကြောင်း မစ္စခရစ်စတယ်လီက ဆိုသည်။

အိမ်နီးချင်းနိုင်ငံများတွင် အော်ပရေတာအချို့က Viber နည်းပညာကို ပိတ်ပင်မှုမျိုး ရှိခဲ့ဖူးပြီး
အလားတူဖြစ်ရပ်မျိုး ဖြစ်ပွားလာပါက Viber အနေဖြင့် ဒေသခံနည်းပညာကုမ္ပဏီများ၊
အဖွဲ့အစည်းများနှင့် ပူးပေါင်းဆောင်ရွက်သွားရန်နှင့် ပြည်တွင်းရှိ အော်ပရေတာများနှင့်လည်း
ဖက်စပ်လုပ်ကိုင်သွားရန် ဆန္ဒရှိနေကြောင်း ၎င်းက အရိပ်အမြွတ် ပြောကြားခဲ့သည်။

အဆိုပါအခမ်းအနားသို့ Viber နှင့် မိတ်ဖက်လုပ်ငန်းတစ်ခုဖြစ်သော Galixo မှ CEO
Raphael Dana လည်း တက်ရောက်ခဲ့ပြီး Viber ၏ အရောင်းမြှင့်တင်ရေးအကြီးအကဲ
Mark Hardy နှင့် ထုတ်ကုန်ဌာနအကြီးအကဲ Michael Shmilov တို့မှလည်း တက်ရောက်သူများ
သိရှိလိုသည့် မေးခွန်းများကို Viber ဆော့ဖ်ဝဲမှတစ်ဆင့် တိုက်ရိုက်ဖြေဆိုမှုများ ပြုလုပ်ခဲ့သည်။

ဤအကြောင်းအရာနှင့် ပက်သက်၍ ထင်မြင်ချက်ပေးလိုပါက ...
comment.myanmar@mmtimes.com သို့ ပေးပို့နိုင်ပါသည်။


ရာသီဥတုအခြေအနေ

အကြည့်အများဆုံး - ပြည်တွင်းသတင်း