ကျောက်ဖြူ၌ လျှပ်စစ်ဓာတ်အား ထုတ်လုပ်ရန် ကုမ္ပဏီရွေးချယ်နေ

ရခိုင်ပြည်နယ်၊ ကျောက်ဖြူမြို့နယ်တွင် တည်ဆောက်မည့် သဘာဝဓာတ်ငွေ့သုံး
လျှပ်စစ်ဓာတ်အားပေးစက်ရုံ စီမံကိန်းအတွက် ပုဂ္ဂလိကကုမ္ပဏီလေးခုကို စိစစ်ရွေးချယ်နေပြီး
ဟောင်ကောင် အခြေစိုက် V Power ကုမ္ပဏီက တစ်ယူနစ်ဓာတ်အားထုတ်လုပ်ရေး အနည်းဆုံး
ဈေးနှုန်းဖြင့် အဆိုပြုထားသည်ဟု သိရသည်။

လျှပ်စစ်စွမ်းအားဝန်ကြီးဌာနနှင့် ပုဂ္ဂလိက ဓာတ်အားထုတ်လုပ်သူများအကြား လက်ရှိသဘောတူ
ထားသည့် ဓာတ်အားထုတ်လုပ်မှုဈေးနှုန်းမှာ တစ်ယူနစ်လျှင် အမေရိကန်ဒေါ်လာ ၃ ဒသမ ၄ ဆင့်
(ကျပ် ၃၀ ခန့်)ဖြစ်သော်လည်း ကျောက်ဖြူစီမံကိန်းအတွက် V Power ကုမ္ပဏီက တစ်ယူနစ်
၂ ဒသမ ၆ ဆင့် (၂၅ ကျပ်ခန့်)ဈေးနှုန်းဖြင့် အဆိုပြုထားသည်ဟု သိရသည်။

အင်္ဂလန်နိုင်ငံက Aggreko ကုမ္ပဏီ၊ ဟောင်ကောင်အခြေစိုက် V Power၊ တရုတ်နိုင်ငံ က
Sino hydro ကုမ္ပဏီနှင့် စင်ကာပူအခြေစိုက် Max Power ကုမ္ပဏီတို့ကို နောက်ဆုံးအဆင့်
ရွေးချယ်စိစစ်နေခြင်း ဖြစ်သည်ဟု သိရသည်။

"စိစစ်ရွေးချယ်နေတုန်းပါပဲ။ ဘယ်ကုမ္ပဏီကိုမှ အတည်မပြုရသေးပါဘူး။ သူတို့အဆိုပြုထားတဲ့
စက်အနေအထား၊ သဘာဝဓာတ်ငွေ့ သုံးစွဲမှုနှုန်း၊ ထွက်ရှိမယ့် ဓာတ်အားပမာဏ၊ စက်အမျိုးအစားနဲ့
တစ်ယူနစ်ပျမ်းမျှကုန်ကျမယ့် စရိတ်ရယ်၊ တစ်နှစ်ကုန်ကျမယ့် စရိတ်တွေကို ချိန်ထိုးတွက်ချက်
ရဦးမှာပါ" ဟု မြန်မာ့လျှပ်စစ်ဓာတ်အားလုပ်ငန်း အင်ဂျင်နီယာချုပ်ဖြစ်သူ ဦးဝင်းမြင့် က
ပြောကြားသည်။

ကျောက်ဖြူ လျှပ်စစ်ဓာတ်အားပေးစက်ရုံ စီမံကိန်း အကောင်အထည်ဖော်ရေး နည်းလမ်းသုံးခုဖြင့်
စဉ်းစားလျက်ရှိရာ နည်းလမ်း (၁)အရ တစ်နှစ်ပတ်လုံး ၈၀ ရာခိုင်နှုန်း လျှပ်စစ်ဓာတ်အား
ထုတ်လုပ်ရန်၊ နည်းလမ်း (၂) အရ နွေရာသီတွင် ၁၀၀ ရာခိုင်နှုန်းနှင့် မိုးရာသီတွင် ၅၀ ရာခိုင်နှုန်း
ထုတ်လုပ်ရန်ဖြစ်ပြီး နည်းလမ်း (၃) အရ လပြတ်စနစ်ဖြင့် ၁၀၀ ရာခိုင်နှုန်း ဓာတ်အားထုတ်လုပ်ရန်
ဖြစ်သည်ဟု သိရသည်။

ကျောက်ဖြူ ဓာတ်အားပေးစက်ရုံစီမံကိန်းကို နည်းလမ်း (၁) အရ အကောင်အထည်ဖော်မည်
ဆိုပါက (သဘာဝဓာတ်ငွေ့ဖိုးမပါ) ဓာတ်အားထုတ်လုပ်မှု တစ်ယူနစ်ဈေးနှုန်းအဖြစ်
Aggreko ကုမ္ပဏီက အမေရိကန်ဒေါ်လာ ၄ ဒသမ ၆၉ ဆင့်နှုန်း၊ V Power ကုမ္ပဏီက ၂ ဒသမ
၆ ဆင့်နှုန်း၊ Sino hydro ကုမ္ပဏီက ၃ ဒသမ ၃၅ ဆင့်နှုန်းနှင့် Max Power ကုမ္ပဏီက ၃ ဒသမ
၉ ဆင့်နှုန်းဖြင့် အဆိုပြုထားသည်ဟု သိရသည်။

နည်းလမ်း (၂) အရ အကောင်အထည်ဖော် မည်ဆိုပါက တစ်ယူနစ်ဈေးနှုန်းအဖြစ်
Aggreko ကုမ္ပဏီက အမေရိကန်ဒေါ်လာ ၄ ဒသမ ၆၃ ဆင့်နှုန်း၊ V Power ကုမ္ပဏီက ၂ ဒသမ
၈ ဆင့်နှုန်း၊ Sino hydro ကုမ္ပဏီက ၃ ဒသမ ၃၅ ဆင့်နှုန်းနှင့် Max Power ကုမ္ပဏီက ၄ ဒသမ
၇ ဆင့်နှုန်းဖြင့် အဆိုပြုကမ်းလှမ်းထားသည်ဟု သိရသည်။

ကျောက်ဖြူ ဓာတ်အားပေးစက်ရုံ စီမံကိန်းကို ပုဂ္ဂလိကကုမ္ပဏီများထံမှ သဘာဝဓာတ် ငွေ့သုံး
အင်ဂျင်စက်များ ငှားရမ်း၍ တရုတ် - မြန်မာ သဘာဝဓာတ်ငွေ့ပိုက်လိုင်းက ရရှိမည့်
သဘာဝဓာတ်ငွေ့ဖြင့် ဓာတ်အားထုတ် လုပ်မည်ဖြစ်ပြီး နှစ်နှစ်သက်တမ်းရှိ စီမံကိန်းအတွက်
တစ်နေ့လျှင် သဘာဝဓာတ်ငွေ့ ကုဗပေသန်း ၂၀ အသုံးပြုရန် လျာထားကာ သဘာဝဓာတ်ငွေ့
ခွဲတမ်းအပေါ်မူတည်၍ ပထမအဆင့် လျှပ်စစ်မဂ္ဂါဝပ် ၅၀ ထုတ်လုပ်ရန် လျာထားသည်ဟု
သိရသည်။

ဤအကြောင်းအရာနှင့် ပက်သက်၍ ထင်မြင်ချက်ပေးလိုပါက ...
[email protected] သို့ ပေးပို့နိုင်ပါသည်။


ရာသီဥတုအခြေအနေ

အကြည့်အများဆုံး - ပြည်တွင်းသတင်း