ပညာရေး ပြုပြင်ပြောင်းလဲရေး လှုပ်ရှားမှုတွင် ပါဝင်သည့် ဆရာဆရာမများ ပြောင်းရွှေ့ခံရ

ရန်ကုန်တိုင်းဒေသကြီးအတွင်းရှိ တက္ကသိုလ် အသီးသီး၌ ဖွဲ့စည်းထားသော တက္ကသိုလ်
ဆရာဆရာမများ သမဂ္ဂအသင်းအဖွဲ့များ၌ တက်ကြွစွာ ပါဝင်ခဲ့ကြသော ဆရာဆရာမ များကို
ပညာရေးဝန်ကြီးဌာနနှင့် သက်ဆိုင်ရာ အဆင့်မြင့် ပညာဦးစီးဌာနက နယ်ဝေးပြောင်းရွှေ့စေမှုများ
ပြုလုပ်ခဲ့ကြောင်း ဒဂုံ တက္ကသိုလ်ဆရာများသမဂ္ဂ ဥက္ကဋ္ဌဒေါက်တာ အာကာမိုးသူက
မြန်မာတိုင်း(မ်)ကိုပြောသည်။

"သူတို့က နယ်ကို ပို့လိုက်တော့ ကျွန်တော်တို့အနေနဲ့ နယ်မှာ ဆရာဆရာမများ အရေးတွေ
ပိုပြီးဆောင်ရွက်ခွင့် ရသွားတာလို့ပဲ ကျွန်တော်တို့ သဘောထားပါတယ်"ဟု ၎င်းက ပြောသည်။

ဆရာဆရာများ နယ်ပြောင်းရွှေ့ရေးနှင့် ပတ်သက်ပြီး ပညာရေးဝန်ကြီးဌာနနှင့် သက်ဆိုင်ရာ
အဆင့်မြင့်ပညာဦးစီးဌာန အနေဖြင့် ပြီးခဲ့သည့် ဇွန်လ ၁၇ ရက်က တစ်ပြည်လုံး အထွေထွ
အပြောင်းအရွှေ့ များကို လုပ်ထုံးလုပ်နည်း တန်းစီဇယားအတိုင်း သတ်မှတ်ဆောင်ရွက်ခဲ့ခြင်းသာ
ဖြစ်ကြောင်း ရန်ကုန်အနောက်ပိုင်း တက္ကသိုလ်ပါမောက္ခချုပ်၊ ယခင် အဆင့်မြင့် ပညာဦးစီးဌာန
ဒုတိယညွှန်ကြားရေးမှူးဟောင်း ဒေါက်တာခိုင်မြဲက ပြောသည်။

"အပြောင်းအရွှေ့(Transfer) မသွားသင့်တဲ့ သူကိုသွားခိုင်းရင် တိုင်လို့ရတယ်။ ဒါပေမဲ့ လက်ရှိ
အချိန်အထိ တိုင်ကြားစာ တစ်စောင်မှ မတွေ့ရသေးပါဘူး"ဟု ၎င်းက ပြောသည်။

ပညာရေးဝန်ကြီးဌာန အဆင့်မြင်ပညာ ဦးစီးဌာန၏ သတ်မှတ် ပြဋ္ဌာန်းချက်များအရ ပြောင်းရွှေ့
ခံရမည့် ဆရာ၊ဆရာမများ အနေဖြင့် အပြောင်းအရွှေ့အလှည့်ကျ ဇယားကို တစ်နှစ်ကြိုတင်
သိရှိနိုင်ကြောင်း ၎င်းက ပြောသည်။

ပညာရေးဝန်ကြီးဌာန သက်ဆိုင်ရာ ဦးစီးဌာနများအနေဖြင့် ဆရာဆရာများ အပြောင်းအရွှေ့
အခြေအနေ မရေမရာထုတ်ပြန်မှုများ၊ ကြိုတင်အသိပေးခြင်း မရှိသည့် အခြေအနေများကြောင့်
အပြောင်းအရွှေ့ကို မြန်ဆန်ပွင့်လင်းစွာ ထုတ်ပြန်ပေးရန် တက္ကသိုလ်ဆရာဆရာမများအသင်းက
ပြီးခဲ့သည့် ဇွန်လ ၁၂ ရက်က ကြေညာချက်ထုတ်ပြန် တောင်းဆိုခဲ့ကြောင်း
ဒေါက်တာ အာကာမိုးသူက ပြောသည်။

လက်ရှိတွင် ရန်ကုန်တက္ကသိုလ် အပါအ၀င် ရန်ကုန်တိုင်းဒေသကြီးအတွင်းရှိ အခြားသောဒေသခွဲ
တက္ကသိုလ်များတွင် တက်ကြွစွာ ပါဝင်လှုပ်ရှားခဲ့ကြသည့် ဆရာဆရာမ ၂၀ ကျော်တို့မှာ မုံရွာ၊
ပုသိမ်၊ စစ်တွေ၊ တောင်ငူ၊ ဟင်္သာတ၊ မြိတ်၊ ထားဝယ်နှင့် ဗန်းမော် တက္ကသိုလ်များသို့ ပြောင်းရွှေ့ခံခဲ့
ရကြောင်း ရန်ကုန်အရှေ့ပိုင်းတက္ကသိုလ်မှ ပုသိမ်တက္ကသိုလ်သို့ ပြောင်းရွှေ့ခံရသူ သမိုင်းဌာန
လက်ထောက် ကထိက ဦးသန်းထိုက်အောင်က ပြောသည်။

၎င်းမှာ ရန်ကုန်အရှေ့ပိုင်းခရိုင် တက္ကသိုလ်တွင် ကိုးနှစ်ကြာ တာဝန်ထမ်းဆောင်ခဲ့ပြီး ၂၀၁၂ ခုနှစ်မှ
စတင်ကာ ရန်ကုန်အရှေ့ပိုင်းခရိုင် တက္ကသိုလ်ဆရာဆရာမများအသင်းတွင် ဥက္ကဋ္ဌ တာဝန်ယူ
ဆောင်ရွက်ခဲ့ကြောင်း သိရသည်။

"ကျွန်တော့်အနေနဲ့ ပြောင်းရွှေ့ခံရမှုက သူတို့ရဲ့ ဘောင်ထဲက ဖြစ်ပေမယ့် သမဂ္ဂကို လူစုကွဲအောင်၊
ပြိုကွဲအောင် လုပ်လိုက်တာလို့ ကျွန်တော်တို့ ခံစားရပါတယ်"ဟု ၎င်းက ပြောသည်။

ရန်ကုန် အရှေ့ပိုင်းခရိုင်တက္ကသိုလ် ဆရာဆရာမများသမဂ္ဂရှိ အမှုဆောင်အဖွဲ့ဝင် ခုနစ်ဦးအနက်
လေးဦးကို နယ်ဝေးသို့ ပြောင်းရွှေ့ခဲ့ကြောင်း သိရသည်။

နယ်အပြောင်းအရွှေ့နှင့် ပတ်သက်ပြီး ပညာရေးဝန်ကြီးဌာန၏ သတ်မှတ်ချက်များအရ သွားရေး
လာရေးခက်ခဲသော စစ်တွေ၊ မြိတ်၊ ထားဝယ် စသည့် ဝေးလံခေါင်ဖျား တက္ကသိုလ်များတွင်
တစ်နှစ်တာဝန်ထမ်းဆောင်ကာ ပြောင်းရွှေ့နိုင်ကြောင်းနှင့် ရန်ကုန်၊ ပုသိမ်၊ ဟသာင်္တ ကဲ့သို့သော
သွားရေးလာရေး လွယ်ကူသည့်မြို့များရှိ တက္ကသိုလ်များတွင် သုံးနှစ် တာဝန်ထမ်းဆောင်ပြီးပါက
အပြောင်းအရွှေ့လျှောက်ထားနိုင်ကြောင်း သိရသည်။

အသင်းအဖွဲ့ဆိုင်ရာ လှုပ်ရှားမှုများတွင် ပါဝင်မှုကြောင့် နယ်ဝေးများသို့ ပို့နေကြောင်း တက္ကသိုလ်
ဆရာဆရာများဘက်က စွပ်စွဲမှုကို ပညာရေးဝန်ကြီးဌာန အမည်မဖော်လိုသူတာဝန်ရှိသူ တစ်ဦးက
ဖြစ်နိုင်ခြေမရှိကြောင်း ငြင်းဆိုခဲ့သည်။

လက်ရှိတွင် အမျိုးသားပညာရေး ဥပဒေနှင့် ပတ်သက်ပြီး တက္ကသိုလ်ဆရာဆရာမများ
သမဂ္ဂများက ပြင်းပြင်းထန်ထန် ဝေဖန်နေကြသည်။

ဤအကြောင်းအရာနှင့် ပက်သက်၍ ထင်မြင်ချက်ပေးလိုပါက ...
[email protected] သို့ ပေးပို့နိုင်ပါသည်။


ရာသီဥတုအခြေအနေ

အကြည့်အများဆုံး - ပြည်တွင်းသတင်း