ဒေသတွင်း ဆင်းရဲနွမ်းပါးမှု အမြင့်ဆုံး မြန်မာဖြစ်နေ

ချင်းပြည်နယ် ကျေးရွာတစ်ရွာတွင် တွေ့ရသည့် ကလေးငယ်တစ်ဦး။ သီရိလူ/မြန်မာတိုင်း(မ်)ချင်းပြည်နယ် ကျေးရွာတစ်ရွာတွင် တွေ့ရသည့် ကလေးငယ်တစ်ဦး။ သီရိလူ/မြန်မာတိုင်း(မ်)

လူဦးရေ ၅၁ ဒသမ ၄ သန်းရှိပြီး အရှေ့တောင် အာရှတွင် အဆင်းရဲဆုံးနိုင်ငံဖြစ်နေသည့်
မြန်မာနိုင်ငံတွင် ပြည်သူ ၇၀ ရာခိုင်နှုန်းသည် အခြေခံအခွင့်အရေးနှင့် စောင့်ရှောက်ရေးများ
မရရှိရုံသာမက ဥစ္စာဓနခွဲဝေမှုတွင်လည်း ညီမျှမှုကို မခံစားရကြောင်း ကမ္ဘာ့ဘဏ်က
သုံးသပ်ထားသည်။

"မြန်မာနိုင်ငံ၏ လူတစ်ဦးချင်း ဂျီဒီပီ မှာ ၁,၁၀၅ ဒေါ်လာဖြစ်ပြီး ဆင်းရဲနွမ်းပါးမှု နှုန်းမှာ
၃၇ ဒသမ ၅ ရာခိုင်နှုန်းဖြစ်ရာ ဒေသတွင်း ဆင်းရဲနွမ်းပါးမှု အမြင့်ဆုံး နိုင်ငံတစ်နိုင်ငံ ဖြစ်ကြောင်း"
ကမ္ဘာ့ဘဏ် က ယခုလ ၁၅ ရက်တွင် ထုတ်ပြန်သည့် အစီရင်ခံစာတွင် ဖော်ပြထားသည်။

ထို့ပြင် ပျမ်းမျှလူ့သက်တမ်း ၆၅ နှစ်ဖြင့် အာဆီယံနိုင်ငံများအတွင်း အသက်အတိုဆုံးဖြစ်ပြီး
မွေးကင်းစ ကလေးနှင့် ကလေးသူငယ် သေဆုံးမှုတွင်လည်း ဒုတိယအမြင့်ဆုံး နိုင်ငံအဖြစ်
ရပ်တည်နေသည်။

လျှပ်စစ်မီးတွင် ပင်မဓာတ်အားလိုင်း ကွန်ရက်နှင့် ချိတ်ဆက်အသုံးပြုနိုင်သည့် ဦးရေသည်
စုစုပေါင်းလူဦးရေ၏ သုံးပုံတစ်ပုံအောက်တွင် ရှိနေပြီး လမ်းသိပ်သည်းဆမှာလည်း
စတုရန်းကီလိုမီတာ ၁,၀၀၀ လျှင် ၂၁၉ ဒသမ ၈ ကီလိုမီတာနှုန်းသာရှိကြောင်း ဖော်ပြထားသည်။

အခြားတစ်ဖက်တွင်မူ အသွင်ကူးပြောင်း ခါစမှ စတင်ပြီး မက်ခရိုစီးပွားရေးစီမံခန့်ခွဲမှု
တိုးတက်လာခြင်း၊ ဓာတ်ငွေ့ထုတ်လုပ်မှုနှင့် ပြည်ပပို့ကုန် တိုးတက်လာခြင်း၊ စီးပွားရေးတံခါး
ပွင့်လာမှုအရ သဘာဝဓာတ်ငွေ့မဟုတ်သည့် အခြားကဏ္ဍများတွင် စွမ်းဆောင်ရည်
တိုးတက်လာခြင်းများကြောင့် စီးပွားရေးတိုးတက်မှုနှုန်းမှာ ၂၀၀၆ ခုနှစ်နှင့် ၂၀၀၉ - ၁၀ ကြား
ကာလက ၅ ဒသမ ၁ ရာခိုင်နှုန်းသာရှိခဲ့ရာမှ လက်ရှိတွင် ပျမ်းမျှ ၆ ဒသမ ၅ ရာခိုင်နှုန်း
တိုးတက်လျက်ရှိသည်။

သို့သော်လည်း ဆင်းရဲနွမ်းပါးမှု လျှော့ချရေးတွင် အရေးပါပြီး ပြည်သူ ၇၀ ရာခိုင်နှုန်း မှီခိုနေရသည့်
လယ်ယာကဏ္ဍတွင်မူ တိုးတက်မှုနှုန်း နည်းနေသည့်အပြင် အတက်အကျလည်း တည်ငြိမ်မှု
မရှိကြောင်း ကမ္ဘာ့ဘဏ် အစီရင်ခံစာက ထောက်ပြထားသည်။

လယ်ယာစိုက်ပျိုးရေးအပေါ် မှီခိုနေရသော ဆင်းရဲနွမ်းပါးသည့် ပြည်သူအများစုအတွက်
လယ်ယာလုပ်ငန်းမှ အကျိုးအမြတ် ပိုမိုရရှိစေရန် ဆောင်ရွက်ပေးသင့်သကဲ့သို့ တန်ဖိုးမြင့်
ကုန်ထုတ်လုပ်ငန်းများတွင်လည်း ပုဂ္ဂလိကပါဝင်မှုကို မြှင့်တင်ပြီး လယ်ယာ လုပ်ငန်းခွင်
ပြင်ပလုပ်ငန်းများကိုပါ အကူအညီပေးသင့်ကြောင်း ကမ္ဘာ့ဘဏ်က အကြံပြုထားသည်။

ဘဏ္ဍာရေးဝန်ကြီးဌာန ဒုတိယ၀န်ကြီး ဒေါက်တာမောင်မောင်သိမ်း ကမူ အစိုးရက
ကျေးလက်ဒေသ ဆင်းရဲနွမ်းပါးမှုကို လျှော့ချရန်ကြိုးစားလျက်ရှိရာ အောင်မြင်မှု ရှိ မရှိ
အကဲဖြတ်ရန်အတွက် အချိန်စောနေသေးကြောင်း ပြောကြားသည်။

"အစိုးရသစ် လေးနှစ်အတွင်းမှာ ဆင်းရဲမှုလျှော့ချရေးကို အာရုံစိုက်ခဲ့တယ်။ ဒါပေမဲ့
အချိန်တိုအတွင်းမှာတော့ အကုန်မအောင်မြင်နိုင်ပါဘူး" ဟု ၎င်းက မြန်မာတိုင်း(မ်)၏ မေးမြန်းမှုကို
ဖြေကြားခဲ့သည်။

သို့သော်လည်း အစိုးရ၏ ရည်မှန်းချက်ဖြစ်သည့် ဆင်းရဲမှုလျှော့ချရေးကို ကုစားရန် နည်းလမ်း
ရှာဖွေပေးသော ကမ္ဘာ့ဘဏ်၏ အစီရင်ခံစာကို ကြိုဆိုကြောင်း ၎င်းက ပြောကြားခဲ့သည်။

အမျိုးသားစီမံကိန်းနှင့် စီးပွားရေးဖွံ့ဖြိုး တိုးတက်မှုဝန်ကြီးဌာန ပြည်ထောင်စုဝန်ကြီး
ဒေါက်တာကံဇော်ကလည်း ကမ္ဘာ့ဘဏ်၏ ဒေါ်လာ သန်း ၈၀ အထောက်အပံ့၊ ဂျာမနီ ချေးငွေ
ဒေါ်လာသန်း ၁၀၀၊ တရုတ်နိုင်ငံ ချေးငွေ ဒေါ်လာသန်း ၁၀၀ အပြင် ကိုရီးယားနိုင်ငံ၏
အရစ်ကျချေးငွေ ဒေါ်လာသန်း ၁၀၀ တို့ကို ကျေးလက်ဒေသ ဖွံ့ဖြိုးရေးအတွက် ရင်းနှီးမြှုပ်နှံထားပြီး
တိုးတက်မှုလည်း ရှိနေကြောင်းပြောသည်။

ကမ္ဘာ့ဘဏ်က စီးပွားရေးပညာရှင် Khwima Nthara ကမူ "ဆင်းရဲမှု လျှော့ချဖို့အတွက်
အလုပ်အကိုင်တွေ ဖန်တီးပေးဖို့နဲ့ ၀င်ငွေတွေပိုကောင်းလာဖို့ လိုပါတယ်" ဟု ပြောကြားခဲ့သည်။

ကြွယ်ဝသည့် ရေ၊ မြေ၊ တွင်းထွက်သတ္တု များပိုင်ဆိုင်ထားသည့် မြန်မာနိုင်ငံတွင် ဆင်းရဲမှု
လျှော့ချရေး ဆောင်ရွက်ရာ၌ သယံဇာတခွဲဝေမှုတွင် မျှတမှုရှိစေရန်လည်း
ဆောင်ရွက်သင့်ကြောင်း ၎င်းက အကြံပြု ပြောကြားခဲ့သည်။

ဤအကြောင်းအရာနှင့် ပက်သက်၍ ထင်မြင်ချက်ပေးလိုပါက ...
comment.myanmar@mmtimes.com သို့ ပေးပို့နိုင်ပါသည်။


ရာသီဥတုအခြေအနေ

အကြည့်အများဆုံး - ပြည်တွင်းသတင်း