လမ်းစနစ်မပြင်လျှင် ရန်ကုန်၌ တစ်နာရီ ငါးမိုင်နှုန်းသာ ကားမောင်း၍ ရတော့မည်

ရန်ကုန်မြို့တွင်း ရှုပ်ထွေးပိတ်ဆို့နေသည့် လမ်းမပေါ်၌ ဘတ်စ်ကားတစ်စီး မောင်းနှင်နေစဉ်။ ကောင်းထက်/မြန်မာတိုင်း(မ်)ရန်ကုန်မြို့တွင်း ရှုပ်ထွေးပိတ်ဆို့နေသည့် လမ်းမပေါ်၌ ဘတ်စ်ကားတစ်စီး မောင်းနှင်နေစဉ်။ ကောင်းထက်/မြန်မာတိုင်း(မ်)

ရန်ကုန်မြို့၏ လမ်းကွန်ရက်စနစ်ကို ပြုပြင်ထိန်းသိမ်းမှု မလုပ်လျှင် လာမည့် နှစ် ၂၀ ၌ တစ်နာရီ
ပျမ်းမျှ ငါးမိုင်နှုန်းခန့်သာ ကား မောင်းနှင်နိုင်တော့မည်ဟု မဟာရန်ကုန် မြို့ပြစီမံကိန်းကို
ရေးဆွဲနေသည့် ဂျပန် အပြည်ပြည်ဆိုင်ရာ ပူးပေါင်းဆောင်ရွက်ရေးအေဂျင်စီ (ဂျိုက်ကာ) ၏
သုတေသနပြုလုပ်ချက်အရ သိရသည်။

လက်ရှိအချိန်တွင်မူ ရန်ကုန်တွင် တစ်နာရီ ပျမ်းမျှ ၁၈ မိုင်ခွဲကျော်နှုန်းဖြင့်
ကားမောင်းနိုင်နေသေးကြောင်းလည်း ထိုသုတေသနရလဒ်တွင် ဖော်ပြထားသည်။

၂၀၃၅ ခုနှစ်တွင် ဖြစ်ပေါ်လာနိုင်သည့် ရန်ကုန်မြို့၏ ယာဉ်ကြောပိတ်ဆို့မှု အခြေအနေကို
ဂျိုက်ကာမှ ပညာရှင်များက တွက်ချက်၍ ကြိုတင်ဟောကိန်း ထုတ်လိုက်ခြင်း ဖြစ်သည်။

၂၀၃၅ ခုနှစ်တွင် ရန်ကုန်သားများ၏ လမ်းအသုံးပြုမှုပမာဏသည် လက်ရှိထက် ၂၁ ရာခိုင်နှုန်း
မြင့်တက်လာမည်ဟုလည်း ဆိုသည်။

ဂျိုက်ကာနှင့် မြန်မာအစိုးရတို့ ပူးပေါင်း၍ မဟာရန်ကုန်မြို့ပြ သယ်ယူပို့ဆောင်ရေးပင်မစီမံချက်
(YUTRA) ဟူသည့် စီမံကိန်း တစ်ခုကို ရေးဆွဲလျက်ရှိရာ ထိုစီမံကိန်းကို အကောင်အထည်ဖော်
လိုက်လျှင် လမ်းသုံးစွဲမှုပမာဏနှင့် လမ်းပမာဏ အချိုးအစားသည် အနည်းငယ် မြင့်တက်လာမည်
ဖြစ်သည်ဟု ဆိုသည်။

သို့သော် ယာဉ်များ သွားလာနိုင်သည့် မြန်နှုန်း လက်ရှိထက် လျော့ကျသွားမည်ကိုမူ
ရှောင်လွှဲနိုင်မည် မဟုတ်ကြောင်း ဖော်ပြထားသည်။

စီမံချက်တွင် တစ်နာရီ ၁၅ မိုင်နှုန်းခန့်ဖြင့် မောင်းနှင်နိုင်ရေး ဆောင်ရွက်ရန် လျာထားပြီး
တစ်နာရီ ၁၂ မိုင်ခွဲနှင့် အထက် မောင်းနှင်နိုင်ရန်ကိုမူ အဓိက ပစ်မှတ်ထားကြောင်း
သုတေသနရလဒ်တွင် ဖော်ပြထားသည်။

ထိုစီမံချက်ကို လုံးဝ မလုပ်လျှင်မူ တစ်နာရီ ငါးမိုင်ခန့်သာ ကားမောင်းနိုင်တော့မည်ဟု
ဖော်ပြထားခြင်းဖြစ်သည်။

ဂျိုက်ကာ၏ မြန်မာနိုင်ငံဆိုင်ရာအကြီး အကဲဖြစ်သူ မစ္စတာတာနာကာ က "သယ်ယူ
ပို့ဆောင်ရေးကိစ္စဟာ ရန်ကုန်အတွက် အရေးပေါ် ဆောင်ရွက်ရမယ့် ကဏ္ဍဖြစ်ပါတယ်" ဟု
ယခုလ ၁၉ ရက်နေ့က သတင်းထောက်များအား ပြောကြားခဲ့သည်။

ရန်ကုန်မြို့တွင် သွားလာရေး အဆင်ပြေရန် လုပ်ဆောင်မည့် အဆိုပါစီမံချက်အား
အကောင်အထည်ဖော်လျှင် ပြဿနာပြေလည်နိုင်သည် ဆိုသော်လည်း ထိုစီမံချက်အတွက်
ငွေကြေးအမြောက်အမြား ကုန်ကျမည်ဟု ၎င်းကပြောသည်။

"သယ်ယူပို့ဆောင်ရေးကဏ္ဍ တစ်ခုတည်းနဲ့တင် အမေရိကန်ဒေါ်လာ သန်း ၁၀,၀၀၀ လောက်
ကုန်ကျနိုင်ပါတယ်" ဟု ၎င်းကပြောသည်။

ထိုကုန်ကျစရိတ်၏ ပမာဏအများစုကို ပြည်ထောင်စုအစိုးရနှင့် တိုင်းအစိုးရ၏ ဘတ်ဂျက်မှ
ကျခံသုံးစွဲရမည်ဖြစ်ပြီး ကျန်ငွေကြေးများကို ဂျိုက်ကာမှ တစ်စိတ်တစ်ပိုင်း ထောက်ပံ့မည်ဖြစ်ပြီး
အာရှဖွံ့ဖြိုးရေးဘဏ်နှင့် ကမ္ဘာ့ဘဏ်ကဲ့သို့သော နိုင်ငံတကာ အဖွဲ့အစည်းများထံမှ အကူအညီ
ရယူရမည်ဖြစ်သည်။

ဤအကြောင်းအရာနှင့် ပက်သက်၍ ထင်မြင်ချက်ပေးလိုပါက ...
[email protected] သို့ ပေးပို့နိုင်ပါသည်။


ရာသီဥတုအခြေအနေ

အကြည့်အများဆုံး - ပြည်တွင်းသတင်း