ရွေးကောက်ပွဲ လုံခြုံရေးအတွက် ရဲတပ်ဖွဲ့ စတင်ပြင်ဆင်

အာဆီယံထိပ်သီး ဆွေးနွေးပွဲ ကျင်းပစဉ်က ရဲတပ်ဖွဲ့က လုံခြုံရေး ဆောင်ရွက်နေစဉ်။ ဓာတ်ပုံ - အေအက်ဖ်ပီအာဆီယံထိပ်သီး ဆွေးနွေးပွဲ ကျင်းပစဉ်က ရဲတပ်ဖွဲ့က လုံခြုံရေး ဆောင်ရွက်နေစဉ်။ ဓာတ်ပုံ - အေအက်ဖ်ပီ

လာမည့် နှစ်ကုန်ပိုင်းတွင် ပြုလုပ်မည့် ပါတီစုံ အထွေထွေ ရွေးကောက်ပွဲကာလအတွင်း လုံခြုံရေး
လုပ်ငန်းများကို နိုင်ငံတကာစံချိန် စံညွှန်းများနှင့်အညီ တာဝန်ယူ ဆောင်ရွက်နိုင်ရန်အတွက်
မြန်မာနိုင်ငံရဲတပ်ဖွဲ့သည် ယခုကတည်းက စတင်ပြင်ဆင်လျက်ရှိကြောင်း နေပြည်တော်၊
ဒုတိယတိုင်းရဲတပ်ဖွဲ့ မှူး ရဲမှူးကြီးဇော်ခင်အောင်က ပြောသည်။

ထိုကဲ့သို့ စတင်ပြင်ဆင်ခြင်းအနေဖြင့် ဒုတိယတိုင်း ရဲတပ်ဖွဲ့မှူးများကို ရွေးကောက်ပွဲလုပ်ငန်းဆိုင်ရာ
ဥပဒေ၊ လုပ်ထုးံလုပ်နည်း၊ လုပ်ငန်းလမ်းညွှန်များနှင့် ပတ်သက်ပြီး အလုပ်ရုံဆွေးနွေးပွဲကို
ပြီးခဲ့သည့်လက ပြုလုပ်ခဲ့သကဲ့သို့ ဖေဖော်ဝါရီလတွင်လည်း ဒုရဲအုပ်နှင့် အထက်အရာရှိများကို
အလုပ်ရုံ ဆွေးနွေးပွဲများ ပြုလုပ်သွားမည်ဖြစ်သည့်အပြင် အောက်ခြေရဲတပ်ဖွဲ့ဝင်များကိုပါ
ပိုမိုသိရှိနားလည်စေရန်အတွက် ဆက်လက်ပြီး ဆောင်ရွက်သွားမည်ဖြစ်သည်။

"ဒီရွေးကောက်ပွဲ လုံခြုံရေးလုပ်ငန်းစဉ်တွေကို အထက်အရာရှိတွေသာမက တပ်ဖွဲ့ ၀င်အားလုံး
အောက်ခြေအဆင့်အထိ သိမှသာ ကျွန်တော်တို့ လုံခြုံရေးရဲတပ်ဖွဲ့တွေရဲ့ ရပ်တည်ချက်
မှန်ကန်ပြီးတော့ ဒီရွေးကောက်ပွဲဟာ တရားမျှတမယ်၊ ဘက်လိုက်မှု ကင်းမယ်၊ နိုင်ငံတကာ
စံချိန်စံညွှန်းနဲ့ ညီမှာဖြစ်ပါတယ်"ဟု ရဲမှူးကြီး ဇော်ခင်အောင်က နေပြည်တော် ရဲတပ်ဖွဲ့မှူးရုံး၌
ဖေဖော်ဝါရီလ ၂၃ ရက် နေ့က ပြုလုပ်သည့် ၂၀၁၅ ခုနှစ်၊ ရွေးကောက် ပွဲလုံခြုံရေး အသိပညာပေး
ပူးပေါင်းဆောင်ရွက်မှု အလုပ်ရုံဆွေးနွေးပွဲတွင် ပြောကြားခဲ့သည်။

ထို့ပြင် မြန်မာနိုင်ငံရဲတပ်ဖွဲ့အနေဖြင့် အာဆီယံအဖွဲ့ဝင်နိုင်ငံဖြစ်သော အင်ဒိုနီးရှားနိုင်ငံ၏
ရွေးကောက်ပွဲဆိုင်ရာ လုံခြုံရေး လုပ်ငန်းများ ဆောင်ရွက်ခဲ့မှုကို လေ့လာသွားမည်ဟု
ရဲမှူးကြီး ဇော်ခင်အောင်က မြန်မာတိုင်း(မ်)ကို ပြောသည်။

"သူတို့နဲ့က အခြေခံအချက်ချင်း တူတယ်။ စိန်ခေါ်မှုချင်းလည်း တူတယ်။ ဒါပေမဲ့ သူတို့က
ပိုများတယ်။ သူတို့ရဲ့ ရွေးကောက်ပွဲကို ကမ္ဘာက လက်ခံတယ်။ ဒါကြောင့် ကျွန်တော်တို့
သွားပြီးလေ့လာမယ်။ ရှေ့က သူတို့ ဘယ်လိုလုပ်ခဲ့တယ်ဆိုတာလည်း တွေ့ပြီး စကားပြောခဲ့တယ်"
ဟု ၎င်းကပြောသည်။

လာမည့် အထွေထွေရွေးကောက်ပွဲ ကာလတွင် လုံခြုံရေးဆိုင်ရာ စိန်ခေါ်မှုများ ရှိလာနိုင်သော
ကြောင့် ယခုကတည်းက ရွေးကောက်ပွဲအကြို၊ ရွေးကောက်ပွဲအတွင်းနှင့် ရွေးကောက်ပွဲ
အလွန်ကာလဟူ၍ ကာလအလိုက် သတ်မှတ်ပြီး ကြိုတင်ပြင် ဆင်လျက်ရှိသည်။

"စိန်ခေါ်မှုတွေက နေရာဒေသအလိုက် ရှိတယ်။ ဥပမာ ရခိုင်မှာဆိုရင် လူမျိုးရေးကိစ္စတွေ ရှိတယ်။
နောက် နယ်စပ်ဒေသတွေမှာ လက်နက်ကိုင် အဖွဲ့အစည်းတွေရှိတယ်။ ဘယ်ပါတီပဲ အ၀င်ခံမယ်၊
ဘယ်ပါတီအ၀င် မခံဘူး၊ စသဖြင့် မဲဆွယ်စည်းရုံးတာကအစ စိန်ခေါ်မှုတွေရှိတယ်"ဟု ၎င်းက
ပြောသည်။

သို့သော်လည်း မြန်မာနိုင်ငံရဲတပ်ဖွဲ့ အနေဖြင့် ၂၀၁၃ ခုနှစ်တွင် တစ်နိုင်ငံလုံး အတိုင်းအတာဖြင့်
လုံခြုံရေး ဆောင်ရွက်ခဲ့ရသော အရှေ့တောင်အာရှ အားကစားပြိုင်ပွဲ၊ ၂၀၁၄ ခုနှစ်တွင် အာဆီယံ
အလှည့်ကျဥက္ကဋ္ဌ တာဝန်ယူခဲ့စဉ် အတွေ့အကြုံများအရ အဆိုပါ စိန်ခေါ်မှုများကို
ကျော်လွှားနိုင်မည်ဟု ယုံကြည်လျက်ရှိသည်။

"ဒီရွေးကောက်ပွဲဟာ ကျွန်တော်တို့ ရဲတပ်ဖွဲ့က စံနှုန်းသတ်မှတ်တာပဲ။ ကျွန်တော်တို့ဟာ
ပြည်သူ့ဝန်ထမ်း၊ နိုင်ငံ့ဝန်ထမ်း အနေနဲ့ ဘယ်လိုသမာသမတ်ကျကျ ရပ်တည်ပြီးတော့
ဘယ်ဘက်မှ မလိုက်ဘူးဆိုတဲ့ ဟာက ကျွန်တော်တို့ရဲ့ စံနှုန်းပဲ။ ဘယ်ပါတီပဲ တက်လာတက်လာ
ကျွန်တော်တို့က အစိုးရအဖွဲ့ ရဲ့ ဦးဆောင်မှုအောက်မှာ လိုက်ပြီးအကောင် အထည်ဖော်ပေးရမယ့်
ပြည်သူ့ဝန်ထမ်း၊ နိုင်ငံ့ဝန်ထမ်းပဲဖြစ်ပါတယ်"ဟု ရဲမှူးကြီး ဇော်ခင်အောင်က ပြောသည်။

ရွေးကောက်ပွဲ ကာလအတွင်း ကြုံတွေ့ လာနိုင်သည့် စိန်ခေါ်မှုများကို မည်ကဲ့သို့ ကိုင်တွယ်
ထိန်းသိမ်းနိုင်မည်ကို တွေးခေါ် သုံးသပ်နိုင်ရန်အတွက် လက်ရှိ ကျင်းပသည့် အလုပ်ရုံဆွေးနွေးပွဲ
များတွင် ရွေးကောက်ပွဲ ကော်မရှင်မှ တာဝန်ရှိသူများကို ဖိတ်ခေါ်ကာ ဆွေးနွေးကြမည်ဖြစ်သည်။

အလုပ်ရုံ ဆွေးနွေးပွဲများကို အခြားတိုင်းဒေသကြီး နှင့် ပြည်နယ်အားလုံးတွင်လည်း တစ်ချိန်တည်း
ပြုလုပ်လျက်ရှိသည်။

နေပြည်တော်၊ ဥတ္တရသီရိ ခရိုင် ရွေကောက်ပွဲကော်မရှင်အဖွဲ့ခွဲ ဥက္ကဋ္ဌ ဦးအောင်လွင်က
ရွေးကောက်ပွဲ အောင်မြင်ရေးအတွက် လုံခြုံရေး ပူးပေါင်းဆောင်ရွက်မည့် မြန်မာနိုင်ငံရဲတပ်ဖွဲ့ကို
ဝမ်းမြောက်ဝမ်းသာ ကြိုဆိုကြောင်း ပြောသည်။

"ကျွန်တော်တို့ နိုင်ငံရဲ့ ၂၀၁၆ ခုနှစ်လောက်ကနေ ပြုပြင်ပြောင်းလဲသွားမယ့် အစိုးရအဖွဲ့ကို
အသစ်တည်ဆောက်ဖို့အတွက် ကျွန်တော်တို့က အဓိက ကဏ္ဍကနေပြီး ဒိုင်လူကြီးသဖွယ်
ဆောင်ရွက်ကြရမှာဖြစ်ပါတယ်။

"အရင်တွေ့ခဲ့တဲ့ အားသာချက်၊ အားနည်းချက်တွေကို အခြေခံပြီး ၂၀၁၅ ရွေးကောက်ပွဲမှာ
အပီပြင်ဆုံး၊ အအောင်မြင်ဆုံး၊ ပွင့်လင်းမြင်သာမှု အရှိဆုံး၊ အတိအကျဆုံးဖြစ်အောင် လုပ်ကြမယ်
ဆိုပြီးတော့ ကျွန်တော်တို့ ရည်မှန်းချက်တွေ၊ ချထားပြီး ဖြစ်ပါတယ်"ဟု ၎င်းကပြောသည်။

ဤအကြောင်းအရာနှင့် ပက်သက်၍ ထင်မြင်ချက်ပေးလိုပါက ...
[email protected] သို့ ပေးပို့နိုင်ပါသည်။


ရာသီဥတုအခြေအနေ

အကြည့်အများဆုံး - ပြည်တွင်းသတင်း