ဆေးလိပ်နှင့် ဆေးရွက်ကြီးထွက်ပစ္စည်းများပေါ်၌ ကျန်းမာရေးသတိပေးရုပ်ပုံများ ဖော်ပြရတော့မည်

အင်ဒိုနီးရှားနိုင်ငံတွင် ရောင်းချသည့် စီကရက်ဘူးများပေါ်တွင် ကျန်းမာရေးသတိပေးရုပ်ပုံများ ထည့်သွင်းဖော်ပြထားသည်ကို တွေ့ရစဉ်။ ဓာတ်ပုံ - အီးပီအေအင်ဒိုနီးရှားနိုင်ငံတွင် ရောင်းချသည့် စီကရက်ဘူးများပေါ်တွင် ကျန်းမာရေးသတိပေးရုပ်ပုံများ ထည့်သွင်းဖော်ပြထားသည်ကို တွေ့ရစဉ်။ ဓာတ်ပုံ - အီးပီအေ

မြန်မာနိုင်ငံ၌ ထုတ်လုပ်သည့် ဆေးလိပ်နှင့် ဆေးရွက်ကြီးထွက်ပစ္စည်းများတွင် ကျန်းမာရေး
သတိပေးရုပ်ပုံနှင့် စာသားများ ဖော်ပြရန် အမိန့်ကြော်ငြာစာကို မကြာမီထုတ်ပြန်တော့မည်ဟု
ကျန်းမာရေးဝန်ကြီးဌာန ပြည်ထောင်စုဝန်ကြီး ဒေါက်တာသန်းအောင်က ပြောကြားသည်။

"ဆေးလိပ်ဘူးရဲ့ ရှေ့နောက်မျက်နှာပြင် ၇၅ ရာခိုင်နှုန်းမှာ ကျန်းမာရေး သတိပေးရုပ်ပုံနဲ့
စာသားတွေ ထည့်သွင်းဖော်ပြနိုင်ဖို့ အမိန့်ကြော်ငြာစာ တစ်ရပ်ကို အပြည်ပြည်ဆိုင်ရာ
သဘောတူစာချုပ်ပါအချက်တွေနဲ့ အညီ ပြုစုရေးသားခဲ့ပါတယ်၊ အခု ဥပဒေ ပညာရှင်တွေရဲ့
အကြံပြုချက်နဲ့အညီ အပြီးသတ် ပြင်ဆင်ရေးသားပြုစုပြီး ဖြစ်ပါတယ်။ မကြာမီ အကောင်အထည်
ပေါ်လာတော့မှာ ဖြစ်ပါတယ်" ဟု ၎င်းက ဩဂုတ် ၂၄ ရက်က ပြုလုပ်သည့် ဆေးလိပ်နှင့်
ဆေးရွက်ကြီးထွက် ပစ္စည်းထုပ်များတွင် ကျန်းမာရေးသတိပေးရုပ်ပုံနှင့် စာသားပုံနှိပ်ဖော်ပြခြင်း
ဆိုင်ရာ အမျိုးသားအဆင့် နှီးနှောဖလှယ်ပွဲတွင် ပြောကြားခဲ့သည်။

အမိန့်ကြော်ငြာစာကို ရှေ့နေချုပ်ရုံး၏ အကြံပြုချက်နှင့်အညီ ပြင်ဆင်ပြီးဖြစ်ပြီး နောက်ဆုံးအဆင့်သို့
ရောက်ရှိနေပြီဖြစ်သည်ဟု ပြည်သူ့ကျန်းမာရေးဦးစီးဌာန၊ အခြေခံကျန်းမာရေးဌာန
ဒုတိယညွှန်ကြားရေးမှူး ဒေါက်တာ နန်းနိုင်နိုင်ရှိန်က ပြောကြားသည်။

"ဘယ်အဆင့်အထိ ရောက်နေပြီလဲဆိုတော့ အမိန့်ကြော်ငြာစာက ရှေ့နေချုပ်ရုံး ရဲ့
အကြံပြုချက်နဲ့အညီ ပြင်ဆင်ပြီးသွားပြီ၊ နောက်ဆုံးအဆင့်တော့ ရောက်နေပြီ၊ ကျန်းမာရေး
ဝန်ကြီးဌာနကို တင်ထားပြီးပြီ၊ ၀န်ကြီးဌာနက အတည်ပြုပြီဆိုလို့ရှိရင်တော့ ထုတ်ပြန်လို့ရပြီပေါ့"
ဟု ၎င်းက မြန်မာတိုင်း(မ်)ကို ပြောကြားသည်။

ကျန်းမာရေးဝန်ကြီးဌာနက အတည်ပြုထုတ်ပြန်နိုင်မည်ဖြစ်သော်လည်း လိုအပ်ပါက အစိုးရအဖွဲ့သို့
ဆက်လက်တင်ပြရမည်ဟု ဒေါက်တာ နန်းနိုင်နိုင်ရှိန်က ဆိုသည်။

"တကယ်လို့ ကျန်းမာရေးဝန်ကြီးဌာနက အစိုးရအဖွဲ့ကို ဆက်တင်ဖို့လိုမယ်ဆိုရင်တော့
ဆက်တင်ရဦးမှာပေါ့။ အဲဒါပြီးလို့ရှိရင်တော့ ထုတ်ပြန်နိုင်ပါပြီ။ ဘယ်တော့လောက် ဖြစ်မယ်ဆိုတာ
ကိုတော့ သေချာပြောလို့ မရဘူး။ ဒီလထဲ ထုတ်ပြန်နိုင်ဖို့တော့ ကြိုးစားနေတာပေါ့။ သေချာတာက
ဒီနှစ်အတွင်းထဲ ဖြစ်နိုင်ပါတယ် " ဟု ၎င်းကပြောကြားသည်။

အမိန့် ကြော်ငြာစာ ထုတ်ပြန်ပြီးပါက ခြောက်လအတွင်း အသက်ဝင်မည်ဖြစ်ပြီး
အကောင်အထည်ဖော်ရန် ဆေးလိပ်နှင့် ဆေးရွက်ကြီး စက်ရုံများကို ရုပ်ပုံများ ဖြန့်ဖြူးခြင်း၊
ဟောပြောခြင်းတို့ကို ဆက်လက် လုပ်ဆောင်ရမည်ဖြစ်သည်။

ဆေးလိပ်နှင့် ဆေးရွက်ကြီးဆိုင်ရာ သတိပေး ရုပ်ပုံများမှာ ဆေးရွက်ကြီး၏ အန္တရာယ် ဖြစ်စေသည့်
ကင်ဆာပုံများနှင့် ကလေးများ အသက်ရှူလမ်းကြောင်းတွင် ရောဂါဖြစ်ပွားနေသည့် ပုံများဖြစ်ပြီး
ကျန်းမာရေးဝန်ကြီးက ရေးဆွဲသတ်မှတ်ခြင်းဖြစ်သည်။

"သတိပေးရုပ်ပုံတွေကို ဥပဒေအရ ကျန်းမာရေးဝန်ကြီးဌာနက သတ်မှတ်ပေးရတာပါ။
တခြားနိုင်ငံတွေမှာ လုပ်နေတဲ့ ရုပ်ပုံတွေကိုလည်း အတုယူပါတယ်။ ကိုယ့်နိုင်ငံက ပုံတွေကိုလည်း
ယူလိုက်တယ်" ဟု ဒေါက်တာ နန်းနိုင်နိုင်ရှိန်က ပြောသည်။

မြန်မာနိုင်ငံတွင် ၂၀၀၆ ခုနှစ်မှ စတင်ကာ ဆေးလိပ်နှင့် ဆေးရွက်ကြီးထွက်သုံးစွဲမှု
လျော့နည်း ကျဆင်းရေးအတွက် ဥပဒေ ထုတ်ပြန်ပြီး ထိန်းချုပ်မှုများဆောင်ရွက်နေသော်လည်း
ဥပဒေလိုက်နာစေရန် ပညာပေးမှုနှင့် ဥပဒေချိုးဖောက်မှုများကို အပြစ်ပေး အရေးယူမှုများ
အားနည်းနေသည်ဟု ပြည်သူ့ ကျန်းမာရေးဖောင်ဒေးရှင်းက သုံးသပ်ထားသည်။

ကမ္ဘာ့ကျန်းမာရေးအဖွဲ့က ကြီးမှူးကာ ဆေးလိပ်နှင့် ဆေးရွက်ကြီးထွက်ပစ္စည်း သုံးစွဲမှု
လျော့ကျရေးအတွက် အပြည်ပြည်ဆိုင်ရာ သဘောတူစာချုပ်တစ်ရပ်အဖြစ် ကမ္ဘာ့ကျန်းမာရေးအဖွဲ့၊
ဆေးရွက်ကြီး ထိန်းချုပ်ရေး အပြည်ပြည်ဆိုင်ရာ သဘောတူစာချုပ်ကို ၂၀၁၃ ခုနှစ်၊ မေလတွင်
ကမ္ဘာ့ နိုင်ငံများက သဘောတူ ထုတ်ပြန် ကြေငြာခဲ့သည်။

မြန်မာနိုင်ငံကလည်း အဆိုပါသဘောတူစာချုပ်ကို ၂၀၁၃ ခုနှစ်၊ အောက်တိုဘာလတွင်
လက်မှတ်ရေးထိုးခဲ့ပြီး ၂၀၁၄ ခုနှစ်၊ ဧပြီ ၂၀ ရက်တွင် အတည်ပြုခဲ့သည်။

စီးကရက်ဘူးများတွင် ထည့်သွင်းဖော်ပြရမည့် စာတမ်း၊ ရုပ်ပုံများနှင့် ပတ်သတ်ပြီး သုံးစွဲသင့်သည့်
စာသားနှင့် ရုပ်ပုံ၊ တည့်သွင်း ဖော်ပြသင့်သည့် နေရာ၊ ရုပ်ပုံစာသား၏အရွယ်အစား၊
အရောင်အသွေးနှင့် အဓိက အသုံးပြုရမည့် ဘာသာစကားစသည့် လိုက်နာသင့်သည့်
အခြေခံအချက် ရှစ်ချက်အပါအ၀င် အခြားအချက်အလက်များကို စာချုပ်တွင် အသေးစိတ်
ဖော်ပြထားသည်။

ထို့ပြင် ထိရောက်စွာအကောင်အထည်ဖော်နိုင်ရေးအတွက် မဟာဗျူဟာခြောက်ရပ်ကိုလည်း
၂၀၁၃ ခုနှစ်တွင်ပင် ကမ္ဘာ့ကျန်းမာရေးအဖွဲ့ဝင်နိုင်ငံများက သဘောတူခဲ့ကြပြီး ဖြစ်သည်။

"အဲဒီမဟာဗျူဟာ ခြောက်ရပ်အနက် ဆေးလိပ်နဲ့ ဆေးရွက်ကြီးထွက်ပစည်းထုပ်တွေမှာ ဆေးလိပ်၊
ဆေးရွက်ကြီးရဲ့ နောက်ဆက်တွဲအန္တရာယ်တွေနဲ့ ပတ်သက်တဲ့ ကျန်းမာရေးဆိုင်ရာ
သတိပေးစာတန်းတွေ၊ ရုပ်ပုံတွေ ထည့်သွင်းဖော်ပြစေတာဟာ ရိုးရှင်းပေမယ့် အလွန်ထိရောက်တဲ့
ဗျူဟာ တစ်ရပ်အနေနဲ့ ပါဝင်ပါတယ်" ဟု ဒေါက်တာ သန်းအောင်က ပြောကြားသည်။

မြန်မာနိုင်ငံတွင် ၂၀၁၄ ခုနှစ်က သေဆုံးသူ စုစုပေါင်း၏ ၅၉ ရာခိုင်နှုန်းသည် မကူးစက်တတ်သည့်
ရောဂါများကြောင့်ဖြစ်ပြီး အသက် ၃၀ နှင့် ၇၀ ကြားရှိ လူ လေးဦးတွင် တစ်ဦးမှာ ဆီးချို၊ သွေးတိုး၊
နှလုံးနှင့် ကင်ဆာရောဂါစသော မကူးစက်တတ်သည့် ရောဂါများကြောင့်ဖြစ်ကာ
ကင်ဆာရောဂါဖြစ်ပွား သေဆုံးသူ ၁၁ ရာခိုင်နှုန်းရှိသည်။

"အခုလို ဖြစ်ပွားသေဆုံးမှု မြင့်တက်လာနေတဲ့ မကူးစက်တတ်တဲ့ရောဂါတွေရဲ့ အဓိက
လက်သည်ကတော့ ဆေးလိပ်နဲ့ ဆေးရွက်ကြီးထွက်ပစ္စည်း သုံးစွဲခြင်းပဲ ဖြစ်ပါတယ်" ဟု
ဒေါက်တာသန်းအောင် ကပြောကြားခဲ့သည်။

ဤအကြောင်းအရာနှင့် ပက်သက်၍ ထင်မြင်ချက်ပေးလိုပါက ...
[email protected] သို့ ပေးပို့နိုင်ပါသည်။


ရာသီဥတုအခြေအနေ

အကြည့်အများဆုံး - ပြည်တွင်းသတင်း