အစိုးရသာ ပြောင်းပြီး လူတွေရဲ့စိတ်ဓာတ် မပြောင်းရင် ဒီအတိုင်းပဲ ဖြစ်နေဦးမှာပဲ

ဦးခင်လှိုင် (ဇောတိက)
တစ်သီးပုဂ္ဂလကိုယ်စားလှယ်လောင်း၊ ပြည်သူ့လွှတ်တော်၊ ကြည့်မြင်တိုင်မဲဆန္ဒနယ်

* ရွေးကောက်ပွဲအပြီးမှာ ပြည်တွင်းစီးပွားရေး အခြေအနေနဲ့ နိုင်ငံခြားရင်းနှီးမြှုပ်နှံမှုတွေ
ကကော အခုထက်ပိုပြီးတိုးတက် လာနိုင်ဖို့ အလားအလာရှိနိုင်ပါသလား။

စီးပွားရေးလုပ်ငန်းရှင်တစ်ယောက်အနေနဲ့ ပြောရရင် လက်ရှိအခြေအနေအရ မြန်မာပြည်
အများကြီးပြုပြင် ပြောင်းလဲဖို့ လိုအပ်နေသေးတယ်။ အစိုးရသစ်ရဲ့ နိုင်ငံရေး တည်ငြိမ်မှုနဲ့
ကောင်းမွန်တဲ့ စီးပွားရေးပေါ်လစီ ချမှတ်နိုင်မှုပေါ် မူတည်ပြီးတော့မှ နိုင်ငံခြားရင်းနှီးမြှုပ်နှံမှုတွေ
ဝင်ရောက်လာနိုင်မှာဖြစ်ပါတယ်။

နိုင်ငံခြားရင်းနှီး မြှုပ်နှံမှုတွေ ၀င်ရောက်လာရင်လည်း အစိုးရအနေနဲ့ ပြည်တွင်းက နိုင်ငံသားတွေရဲ့
အကျိုးကို ကာကွယ်ပေးဖို့လည်း လိုအပ်တယ်။ ထို့အတူ လာလုပ်မယ့် ပြည်ပရင်းနှီးမြှုပ်နှံမှုတွေ
ကိုလည်း ကာကွယ်ပေးဖို့ လိုအပ်တယ်။

အပြန်အလှန်ကာကွယ်ပေးရမယ့် ဥပဒေတွေ လိုသလို ပေါ်လစီကောင်းတွေ၊ စီးပွားရေး
တိုးတက်အောင် လုပ်နိုင်တဲ့ အရည်အချင်းကောင်းတွေရှိတဲ့ အစိုးရသစ်တစ်ရပ်လည်း
ဖြစ်ဖို့လိုတယ်။

ဒါတွေ မဖန်တီးပေးနိုင်ဘူးဆိုရင်တော့ နိုင်ငံခြားရင်းနှီးမြှုပ်နှံမှုပဲလာလာ၊ ဘယ်သူပဲ လာလာ
ပြုတ်မှာပဲ။ ပြည်တွင်းလုပ်ငန်းရှင်တွေလည်း ပြုတ်ဖို့ ကျိန်းသေပဲ။

* မြန်မာစီးပွားရေး နှေးကွေး ကျဆင်းနေပြီး အရောင်းအ၀ယ်တွေ မကောင်းတဲ့
အချိန်လို့လည်း စီးပွားရေးလုပ်ငန်းရှင်တွေက ဆွေးနွေးပွဲတွေမှာပြောဆိုနေတာကို
တွေ့နေရပါတယ်။ တချို့ကလည်း ရွေးကောက်ပွဲအခြေအနေကို စောင့်ကြည့်နေတယ်လို့
ဆိုကြပါတယ်။ မှန်ကန်မှု ရှိနိုင်ပါသလား။

ဒီမိုကရေစီအစိုးရ တက်လာပြီး ၂၀၁၀ ကနေ ၂၀၁၃ အထိ အလုပ်အကိုင်တွေ ကောင်းခဲ့တာ
အားလုံး အသိပါပဲ။ ၂၀၁၄၊ ၂၀၁၅ မှာ နည်းနည်းဆုတ်ယုတ်လာတယ်။ အစိုးရသစ်တစ်ရပ်က
စတက်လာလာချင်းမှာ ကြွေးကြော်သံတွေနဲ့ အားကြိုးမာန်တက်လုပ်လာတဲ့
အချိန်သုံးနှစ်လောက်အထိ အောင်မြင်လာခဲ့ပြီး သက်တမ်း သုံးနှစ်ကျော် လေးနှစ်ထဲ
ရောက်လာတဲ့အချိန်မှာ မအောင်မြင်တဲ့ စီမံကိန်းတွေ၊ အလုပ်တွေလည်း ပေါ်ထွက်လာတယ်။

အစိုးရလုပ်ဆောင်ချက်တွေပေါ် မူတည်ပြီး ပြင်ပမှာ ငွေကြေးကစားမှု ပြောင်းလဲမှုတွေကလည်း
စီးပွားရေးအသိုက်အ၀န်းမှာ အများကြီး ရှိပါတယ်။ အခု နောက်ပိုင်း စီးပွားရေးတော်တော်
ကျလာတာ အားလုံး သိပါတယ်။

ဘယ်လိုကောင်းအောင် လုပ်ရမလဲဆိုတော့ နိုင်ငံရေးတည်ငြိမ်ဖို့လိုသလို ပြောဖို့လည်း
နည်းနည်းလေးလိုတဲ့အချိန် ဖြစ်နေသေးတာကြောင့် ပြောလို့မဖြစ်တာပါ။ ဒါပေမဲ့ ၂၀၁၆ ရောက်လို့
ဘယ်အစိုးရတက်ပြီလဲလို့ သေချာသိရင်တော့ ပြောလို့ရပါပြီ။

* လွှတ်တော်ကိုယ်စားလှယ်အဖြစ် ပြည်သူက ရွေးချယ်လိုက်ရင် စီးပွားရေး
ဖွံ့ဖြိုးတိုးတက်ဖို့ ဘယ်အချက်ကို အရင် လုပ်ဖို့ ပြင်ဆင်ထားပါသလဲ။

စီးပွားရေးတိုးတက်ဖို့အတွက် နိုင်ငံရေးတည်ငြိမ်ဖို့ လိုသလို တရားဥပဒေစိုးမိုးဖို့လည်း
လိုအပ်ပါတယ်။ တရားဥပဒေက ခြွင်းချက်မရှိ တည်မြဲရမယ့်အပြင် တကယ်အရေးယူဖို့လည်း
လိုတယ်။ နိုင်ငံရေးတည်ငြိမ်ပြီး ဥပဒေစိုးမိုးမယ်၊ လူတိုင်းက စည်းကမ်းတကျ လိုက်နာမယ်ဆိုရင်
စီးပွားရေးက မအောင်မြင်စရာ အကြောင်းမရှိပါဘူး။

ဒါပေမဲ့ အုပ်ချုပ်တဲ့အစိုးရနဲ့ အုပ်ချုပ်ခံပြည်သူ လူထုအကြားမှာ အပြန်အလှန်ယုံကြည်လေးစားမှု
ရှိဖို့တော့လိုတယ်။ အုပ်ချုပ်တဲ့ အစိုးရကလည်း ပြည်သူ့ အကျိုးကိုလိုလားတဲ့ အစိုးရစစ်စစ်ဖြစ်ဖို့
လိုတဲ့အပြင် မှန်ကန်တဲ့ စီးပွားရေးယှဉ်ပြိုင်မှု ဖြစ်လာမယ်။ အလုပ်သမား၊ အလုပ်ရှင်တွေရဲ့အကျိုးကို
နိုင်ငံတော်က စောင့်ရှောက်ပေးရမှာဖြစ်တယ်။ ဥပဒေခိုင်မာမှပဲ ဒါတွေက လုပ်နိုင်မယ်။
ဒီအစိုးရပြောင်းသွားလို့ ၂၀၁၆ ရောက်လာခဲ့ရင်လည်း စီးပွားရေးကောင်းလာလိမ့်မယ်လို့
မထင်လိုက်ပါနဲ့။ အစိုးရသာပြောင်းပြီး လူတွေရဲ့စိတ်ဓာတ် မပြောင်းသရွေ့ကတော့ ဒီအတိုင်းပဲ
ဖြစ်နေဦးမှာပါပဲ။

* ရွေးကောက်ပွဲ ၀င်ပြိုင်မယ်ဆိုတော့ ဘယ်လိုစိန်ခေါ်မှုတွေ ကြုံတွေ့လာနိုင်သလဲ။

ရွေးကောက်ပွဲနဲ့ ပတ်သက်ပြီး အခက်အခဲမရှိပါဘူး။ ကျွန်တော့်အတွက် စိန်ခေါ်မှုကတော့ အလုပ်ပဲ
ဖြစ်ပါတယ်။ ကျွန်တော် အခုလုပ်နေတဲ့ စည်ပင်ကော်မတီဝင် အလုပ်ကလည်း
အားလုံးသိတဲ့အတိုင်း အလုပ်များတဲ့ အလုပ်ဖြစ်ပါတယ်။ မဲဆွယ်စည်းရုံးမှုတွေကို အများကြီး
မလုပ်ပါဘူး။ ဗျူဟာတွေ၊ နည်းဗျူဟာတွေနဲ့ပဲ လုပ်သွားမှာပါ။ အခုက စောသေးလို့ မပြောသေးပါဘူး။
တွန်းတိုက် မဲဆွယ်တာလည်း မလုပ်သလို ကျွန်တော့်ကို မဲပေးပါလို့လည်း ဘယ်သူ့ကိုမှ
မပြောခဲ့ပါဘူး။ လွှတ်တော်ကိုယ်စားလှယ်အဖြစ် ပြည်သူက ရွေးချယ်ခဲ့ရင်လည်း လွှတ်တော်
ကိုယ်စားလှယ်အဖြစ် ကျွန်တော် ရပ်တည်မှာ မဟုတ်ဘူး။ အခုလို သွားပြီး လေနဲ့ ရင်းပြီး
လုပ်တဲ့အလုပ်ကို မလုပ်ချင်ဘူး။ လွှတ်တော်ကိုယ်စားလှယ်ဖြစ်ပြီး အုပ်ချုပ်ရေးယန္တရားမှာ
ကျွန်တော်မပါရင် ပြန်လာမယ်။ လက်ရှိပြီးသွားတဲ့ လွှတ်တော်ကို မယုံဘူး။ လွှတ်တော်မှာလည်း
သွားပြီး အချိန်ကုန်မခံနိုင်ဘူး။ အုပ်ချုပ်မှုယန္တရားထဲ ပါအောင် လုပ်မယ်။ မပါဘူးဆိုရင်လည်း
၂၀၁၆ ဖေဖော်ဝါရီမှာ လုပ်မယ့် ရန်ကုန်စည်ပင်သာယာရေးကော်မတီ ရွေးကောက်ပွဲမှာ
ထပ်ပြီးဝင်ပြိုင်မယ်။

* ပါတီတစ်ခုခုကနေ မပြိုင်ဘဲ ဘာကြောင့် တစ်သီးပုဂ္ဂလ အဖြစ် ၀င်ပြီးပြိုင်ရပါသလဲ။

၂၀၁၀၊ ၂၀၁၂၊ အခု၂၀၁၅ ရွေးကောက်ပွဲတိုင်းမှာ တစ်သီးပုဂ္ဂလအဖြစ်ပဲ ပြိုင်ပါတယ်။
ဘာဖြစ်လို့လဲဆိုတော့ တစ်သီးပုဂ္ဂလက လူတစ်ယောက်ရဲ့စွမ်းရည်ကို ပြည်သူက
ကွက်ကွက်ကွင်းကွင်း မြင်ရမယ်။ ပါတီရဲ့ လွှမ်းမိုးမှုမရှိဘဲ ပြည်သူရဲ့လွှမ်းမိုးမှုအောက်မှာပဲ
သူက ရှိတယ်။ ပါတီထဲမှာဆို မြုပ်နေတယ်။ ကျွန်တော် ပြည်သူဘက်က ရပ်တည်မှု ရှိလား
မရှိလားဆိုတာ ပြည်သူ အားလုံး သိပါတယ်။ အခု ၀င်အရွေးခံမယ့်မြို့နယ်က ကြည့်မြင်တိုင်မြို့နယ်
ပြည်သူ့လွှတ်တော်အတွက် ရွေးချယ်ခဲ့ပါတယ်။ ပါတီဝင်ပြီး ပယ်လိုက်လို့ တစ်သီးပုဂ္ဂလ
ဖြစ်လာတာလည်း မဟုတ်ပါဘူး။ စနစ်ပြောင်းအောင် လုပ်နိုင်ခဲ့လား မလုပ်နိုင်ခဲ့ဘူးလား
ဆိုတာကတော့ လက်ရှိစည်ပင်ကော်မတီဝင်အဖြစ် ပြည်သူက ရွေးကောက်ခံရပြီး
ခြောက်လ ခုနစ်လအတွင်းမှာ တော်တော်များများ လုပ်နိုင်တာကို တွေ့မြင်ခဲ့ရမှာပါ။

ဤအကြောင်းအရာနှင့် ပက်သက်၍ ထင်မြင်ချက်ပေးလိုပါက ...
[email protected] သို့ ပေးပို့နိုင်ပါသည်။


ရာသီဥတုအခြေအနေ

အကြည့်အများဆုံး - ပြည်တွင်းသတင်း