ခန့်မှန်းရန်ခက်ခဲဆဲ ၂၀၁၅ ရွေးကောက်ပွဲနှင့် စီးပွားရေး ပြုပြင်ပြောင်းလဲမှု အိပ်မက်များ

ရန်ကုန်မြို့ရှိ ပုဂ္ဂလိကဘဏ်တစ်ခု၌ ငွေလာရောက် အပ်နှံနေမှုကို တွေ့ရစဉ်။ ကောင်းထက်/မြန်မာတိုင်း(မ်)ရန်ကုန်မြို့ရှိ ပုဂ္ဂလိကဘဏ်တစ်ခု၌ ငွေလာရောက် အပ်နှံနေမှုကို တွေ့ရစဉ်။ ကောင်းထက်/မြန်မာတိုင်း(မ်)

မကြာမီကျရောက်တော့မည့် ၂၀၁၅ ခုနှစ် ပါတီစုံရွေးကောက်ပွဲသည် နိုင်ငံ၏ စီးပွားရေးကဏ္ဍ
ဖွံ့ဖြိုးရေးအတွက် အရေးကြီးလွန်းလှသည့် အချိန်ကာလ ဖြစ်နေကြောင်း နိုင်ငံရေးပါတီအဖွဲ့ဝင်များ၊
စီးပွားရေးပညာရှင်များနှင့် စီးပွားရေးလုပ်ငန်းရှင်များက တညီတညွတ်တည်း
သုံးသပ်ပြောဆိုကြသည်။

မြန်မာ့စီးပွားရေးအခြေအနေသည် ၂၀၁၀ မှ ၂၀၁၂ ခုနှစ်အတွင်း အရှိန်အဟုန်ဖြင့် တိုးတက်မှု
ရှိခဲ့သည်။ သို့သော် ၂၀၁၃ ခုနှစ် နှစ်ကုန်ပိုင်းမှစတင်ကာ ပြန်လည်အေးစက်လာခဲ့သည်။

အာဆီယံဒေသတွင်းနိုင်ငံများအနက် ဖွံ့ဖြိုးမှုအနိမ့်ဆုံးနိုင်ငံများအဖြစ် သတ်မှတ်ထားသည့် CLMV
လေးနိုင်ငံအထဲတွင်ပင် နောက်ကျကျန်နေလျက်ရှိနေကြောင်း စီးပွားရေးလုပ်ငန်းရှင်များက
ပြောသည်။

၎င်းအခြေအနေမှ အမြန်ဆုံး ပြန်လည်နိုးထနိုင်ရေးအတွက် ရွေးကောက်ပွဲပြီးသည်နှင့် တစ်ပြိုင်နက်
အကောင်အထည်ဖော်ဆောင်ရွက်သင့်သည်ဟု ၎င်းတို့က ထောက်ပြကြသည်။

"မြန်မာနိုင်ငံရဲ့အခြေအနေက ဒီ ၂၀၁၅ ရွေးကောက်ပွဲအလွန်မှာ ဘာလုပ်ကြမလဲဆိုတာကို
စောင့်ကြည့်ရမယ့်အခြေအနေ မဟုတ်တော့ဘူး။ ပြောင်းကို ပြောင်းရတော့မှာ။
အာဆီယံဒေသတွင်းနိုင်ငံတွေကိုပဲ ကြည့်ရင်တောင် ဖွံ့ဖြိုးမှု အနိမ့်ကျဆုံးလို့ သတ်မှတ်ထားတဲ့
ကမ္ဘောဒီးယား၊ လာအို၊ မြန်မာ၊ ဗီယက်နမ် ဆိုတဲ့ CLMV လေးနိုင်ငံထဲမှာ ဗီယက်နမ်က
လွတ်သွားပြီ။ ကုန်းတွင်းပိတ်နိုင်ငံဖြစ်တဲ့ လာအိုကလည်း အခု မြန်မာနဲ့အပြိုင် ပြေးနေပြီ။
ကမ္ဘောဒီးယားလိုနိုင်ငံတောင် အဲဒီသတ်မှတ်ချက်ထဲက လွတ်ဖို့အတွက် ကြိုးစားနေပြီ။ အဲဒီတော့
ကျွန်တော်တို့နိုင်ငံက ဒီ ၂၀၁၅ မှာသာ စပြီးမလုပ်နိုင်သေးရင် ဘယ်တော့မှ အရှေ့က
ဘယ်နိုင်ငံကိုမှ လိုက်လို့မီမှာ မဟုတ်တော့ဘူး။ အဲဒီတော့ ပြုပြင်ပြောင်းလဲမှုက လုပ်ကို
လုပ်ရတော့မှာပါ"ဟု စီးပွားရေးလုပ်ငန်းရှင် ဦးနေလင်းဇင်က သူ့အမြင်ကို ခိုင်ခိုင်မာမာ ပြောသည်။

ခန့်မှန်းရန် ခက်ခဲနေဆဲ ၂၀၁၅ ခုနှစ် ရွေးကောက်ပွဲ အခင်းအကျင်း

နိုင်ငံ၏ ရွေးကောက်ပွဲ သမိုင်းများအရ ၁၉၉၀ ပြည့်နှစ်တွင် အမျိုးသားဒီမိုကရေစီအဖွဲ့ချုပ်ပါတီ
(NLD) က ၀င်ရောက်အရွေးခံကာ မဲအပြတ်အသတ်ဖြင့် အနိုင်ရရှိခဲ့သော်လည်း
တပ်မတော်အစိုးရက အုပ်ချုပ်မှုရေးအာဏာကို နှစ်ပေါင်း ၂၀ ခန့် ထိန်းချုပ်ခဲ့သည်။

ထို့နောက် ၂၀၁၀ တွင် ပါတီစုံရွေးကောက်ပွဲ စနစ်ကို ပြန်လည်ကျင်းပခဲ့ပြီး အရပ်သားအစိုးရ
အုပ်ချုပ်မှုကို စတင်ခဲ့သည်။

သို့သော် NLD ပါတီက ၀င်ရောက်အရွေးခံခဲ့ခြင်း မရှိတာကြောင့် ပြည်ထောင်စု ကြံ့ခိုင်ရေးနှင့်
ဖွံ့ဖြိုးရေးပါတီ (USDP) က အနိုင်ရရှိခဲ့ပြီး အုပ်ချုပ်ရေးနယ်ပယ် အများစုတွင် ၀င်ရောက်
တာဝန်ယူခဲ့ကြသည်။

၂၀၁၂ ခုနှစ်တွင် ကြားဖြတ်ရွေးကောက်ပွဲကျင်းပခဲ့ရာ NLD ပါတီက ပြန်လည် ယှဉ်ပြိုင်ခဲ့ပြီး
လွှတ်တော်အတွင်းသို့ ကိုယ်စားလှယ်အချို့ ၀င်ရောက်နိုင်ခဲ့သည်။

ယခု ၂၀၁၅ ခုနှစ် ရွေးကောက်ပွဲ ကျင်းပချိန်တွင် ၎င်းပါတီနှစ်ရပ်မှာ အင်အားအကြီးမားဆုံး
ပါတီများအဖြစ် တွေ့ဆုံလာခြင်းဖြစ်သည်။

သို့ဖြစ်ရာ ၎င်းရွေး ကောက်ပွဲရလဒ်သည် ခန့်မှန်းရန် ခက်ခဲနေကြောင်း ပါတီဝင်များကပြောသည်။

"အခုရွေးကောက်ပွဲက ဘယ်လိုရလဒ်ဖြစ်လာမလဲဆိုတာ ခန့်မှန်းလို့ကို မရတဲ့ အခြေအနေပါ။
ပြုပြင်ပြောင်းလဲမှုကလည်း ရွေးကောက်ပွဲပြီးတော့မှ ဖြစ်လာမယ့်အစိုးရအဖွဲ့ရဲ့ လုပ်ဆောင်ချက်က
အများကြီး မူတည်မှာပါ။ ၂၀၁၀ တုန်းကတော့ ပါတီကြီးကတစ်ခုတည်းကပဲ အနိုင်ရခဲ့ပြီး
အစိုးရအဖွဲ့ဖြစ်လာတော့ တစ်မျိုးဖြစ်ခဲ့တာပေါ့။ အခုရွေးကောက်ပွဲကျတော့ ပုံစံမတူတော့ဘူး။
ဒါပေမဲ့ တက်လာတဲ့အစိုးရအဖွဲ့ကတော့ ပြုပြင်ပြောင်းလဲရေးလုပ်ငန်းတွေကို သေသေချာချာ
လုပ်ရတော့မှာပါ။ ဘယ်ပါတီရဲ့ အစိုးရဖြစ်လာလာ တိုင်းပြည် တိုးတက်ရေးမူဘောင်တွေကို
စနစ်တကျချပြီး တကယ်လုပ်ကိုင်ရတော့မယ့် အချိန်ဖြစ်လာပါပြီ"ဟု ဘဏ်များနှင့် ငွေကြေးဆိုင်ရာ
ဖွံ့ဖြိုးတိုးတက်ရေးကော်မတီ အတွင်းရေးမှူးဖြစ်သည့် ပြည်ထောင်စုကြံ့ခိုင်ရေးနှင့် ဖွံ့ဖြိုးရေပါတီဝင်
ဦးဝင်းမြင့်က ပြောသည်။

မျက်မှောက် မြန်မာ့စီးပွားရေးနှင့် ပြုပြင်ပြောင်းလဲရေးလိုအပ်ချက်များ

လက်ရှိအစိုးရအဖွဲ့သည် ၂၀၁၁ ခုနှစ်မှ စတင်တာဝန်ယူခဲ့ပြီးနောက် စီးပွားရေးကဏ္ဍ
တိုးတက်မှုအတွက် ပြုပြင်ပြောင်းလဲမှုများကို အဆင့်ဆင့် လုပ်ဆောင်ခဲ့သည်။

ရင်းနှီးမြှုပ်နှံမှုကဏ္ဍတွင် ကုမ္ပဏီမှတ်ပုံတင်လွယ်ကူရန် ဖြေလျှော့ခြင်း၊ ကုန်သွယ်မှုကဏ္ဍ
လွယ်ကူရေး ဖြေလျှော့ခြင်း၊ တရားဝင်ငွေ လဲလှယ်မှု ဈေးကွက်ဖော်ဆောင်ပေးခြင်းစသဖြင့်
ဖြေလျှော့မှုများ လုပ်ဆောင်ခဲ့သည်။

သို့ရာတွင် အကောင်အထည်ဖော်မှုပိုင်းတွင် အားနည်းချက်များ ရှိနေသဖြင့် စီးပွားရေးတိုးတက်မှုမှာ
ထင်သာမှု မရှိခဲ့ကြောင်း စီးပွားရေးလုပ်ငန်းရှင်များက ပြောဆိုကြသည်။

"နိုင်ငံရဲ့အခြေအနေက မျက်ဝါးထင်ထင်ပြောနိုင်တာဆိုလို့ ဘာတစ်ခုမှ မရှိခဲ့ဘူး။ လက်ရှိအစိုးရ
အုပ်ချုပ်မှု ငါးနှစ်လောက်အတွင်းမှာ ဥပဒေပေါင်း ၁၈၀ လောက် ပြဋ္ဌာန်းခဲ့တယ်။ ဒါပေမဲ့ ပြောင်းလဲမှု
ဆိုတဲ့အပေါ်မှာ ဘယ်လောက်မှ အကျိုးသက်ရောက်မှု မရှိခဲ့ဘူး။ နိုင်ငံတစ်နိုင်ငံ ဖွံ့ဖြိုးဖို့အတွက်
မူဝါဒကောင်းတွေ လိုတယ်။ မူဝါဒကောင်းတွေကို ထိထိရောက်ရောက်လုပ်နိုင်ဖို့လည်း
စီးပွားရေးကဏ္ဍဖြစ်ဖြစ်၊ အခြားကဏ္ဍပဲဖြစ်ဖြစ် ဥပဒေစိုးမိုးဖို့ လိုတယ်။ ဘယ် ပါတီက အစိုးရ
တက်လာတက်လာ အများအတွက် လုပ်ရတာဖြစ်လို့ အရေးယူမှုကိုလည်း ပြတ်ပြတ်သားသား
လုပ်ဖို့လိုတယ်။ ပြည်သူက ရွေးချယ်ထားပြီး တက်လာတဲ့အစိုးရဖြစ်တဲ့အတွက် ပြည်သူ့မျက်နှာကိုပဲ
ကြည့်ပြီးလုပ်သင့်တယ်။ အခုက ဥပဒေတွေ ရှိပေမယ့် ဥပဒေစိုးမိုးမှုမရှိဘူး"ဟု ရေနံနှင့်သဘာဝ
ဓာတ်ငွေ့ဝန်ဆောင်မှုလုပ်ငန်းရှင်များအသင်း ဥက္ကဋ္ဌအဖြစ် တာဝန်ယူထားသည့် စီးပွားရေး
လုပ်ငန်းရှင် ဦးကျော်ကျော်လှိုင်က ပြောသည်။

၂၀၁၁ ခုနှစ်မှာ အရပ်သားအစိုးရတက်လာပြီးနောက် ယခင်တပ်မတော် အစိုးရအုပ်ချုပ်ခဲ့စဉ်က
ကျင့်သုံးခဲ့သည့် စီးပွားရေးမူဝါဒများကို ဖြေလျှော့ခြင်း၊ နိုင်ငံခြားရင်းနှီးမြှုပ်နှံမှုဥပဒေများကို
အသစ်ပြဋ္ဌာန်းခြင်း၊ ကုန်သွယ်ရေးမူဝါဒ အချို့ကို ဖြေလျှော့ခြင်းများကြောင့် တိုင်းပြည်စီးပွားရေးမှာ
ရုတ်တရက် တိုးတက်လာခဲ့သည်။

သို့သော် လာဘ်ပေးလာဘ်ယူပြဿနာများ ကြီးမားနေဆဲ ဖြစ်ခြင်း၊ ပြည်တွင်းဘဏ်စနစ် အားနည်းခြင်း၊
အခွန်စနစ်ကောင်းမွန်မှုမရှိခြင်း၊ ကုန်ထုတ်လုပ်မှုကဏ္ဍများအတွက် ချမှတ်ထားသည့် မူဝါဒများကို
စနစ်တကျ အကောင်အထည်ဖော်မည့် အဖွဲ့အစည်းများ အားနည်းခြင်းတို့ကြောင့် တိုးတက်မှု
အရှိန်အဟုန်များမှာ ပြန်လည်အနယ်ထိုင်ခဲ့ခြင်းဖြစ်ကြောင်း ဦးကျော်ကျော်လှိုင်က ဆက်ပြောသည်။

ထို့ပြင် မြန်မာ့စီးပွားရေးကို ပြန်လည်နိုးထစေရန် လုပ်ဆောင်မည်ဆိုပါက ၎င်းအချက်များ
အားကောင်းလာစေရန် လက်တွေ့ဆောင်ရွက်မှုများ လိုအပ်မည်ဖြစ်ကြောင်း ဦးကျော်ကျော်လှိုင်က
ထောက်ပြပြောဆိုသည်။

နိုင်ငံခြားရင်းနှီးမြှုပ်နှံမှုများ ခေါ်ယူရာတွင်လည်း ပြည်တွင်းအလုပ်အကိုင် ရရှိမှုမှတစ်ဆင့်
ဆက်ပွားစီးပွားရေး အကျိုးသက်ရောက်မှုများကိုလည်း ဖန်တီးပေးရန်မှာ အရေးကြီးသည့်
အချက်ဖြစ်သည်ဟု စီးပွားရေးလုပ်ငန်းရှင် ဦးနေလင်းဇင်က ပြောသည်။

ထို့အတွက် နိုင်ငံခြားရင်းနှီးမြှုပ်နှံမှုများ ယုံကြည်မှုခိုင်မာ လာစေမည့် ဥပဒေများ၊ မူဝါဒများနှင့်
လက်တွေ့အကောင်အထည်ဖော်မှုများကို ဦးစားပေးလုပ်ကိုင်ရန် လိုအပ်မည်ဟု
သူက ထောက်ပြသည်။

ရွေးကောက်ပွဲအလွန် မြန်မာ့စီးပွားရေးကဏ္ဍ

နိုင်ငံတစ်နိုင်ငံ၏ လူမှုရေး၊ ပညာရေးနှင့် ကျန်းမာရေးစသည့်ကဏ္ဍများ တိုးတက်ဖွံ့ဖြိုးစေရန်မှာ
၎င်းနိုင်ငံ၏ စီးပွားရေးကဏ္ဍတိုးတက်ရေးနှင့် တိုက်ရိုက် သက်ဆိုင်နေခြင်းဖြစ်သည်။

မြန်မာ့စီးပွားရေးကဏ္ဍ ဖွံ့ဖြိုးလာရန်မှာလည်း နိုင်ငံခြားနှီးမြှုပ်နှံမှုများ တိုးမြှင့်လာရေးက အဓိက
လိုအပ်ချက်အဖြစ် ရှိနေသည်။

နိုင်ငံတကာရင်းနှီးမြှုပ်နှံသူများကလည်း မြန်မာ့နိုင်ငံသို့ ၀င်ရောက်ရန် စိတ်ဝင်စားမှု
ရှိထားသော်လည်း မြန်မာ့နိုင်ငံရေးအခင်းအကျင်းက ၎င်းတို့အတွက် အဓိကစောင့်ကြည့်ရမည့်
အချက်ဖြစ်ကြောင်း စီးပွားရေးပညာရှင်များနှင့် ပါတီဝင်များက ထောက်ပြသည်။

"နိုင်ငံခြားသားတွေအနေနဲ့ သူတို့က တည်ငြိမ်မှုကို လိုတယ်။ သူတို့ လိုချင်တာက ရေရာမှု
လိုချင်တယ်။ အရှေ့၊ အနောက်ညီပြီး ပွင့်လင်းမြင်သာတာကို လိုချင်တယ်။ တစ်ကမ္ဘာလုံးမှာ
ကလည်း ဒီအနေအထားအတိုင်း ရှိနေတာပဲ။ ဒါကို မြန်မာနိုင်ငံက ဖန်တီးပေးရမှာပါ။ နိုင်ငံရေး
သေချာမှုရှိအောင်၊ ရေရာမှု ရှိအောင်၊ ရှေ့နောက်ညီအောင် ဖန်တီးပေးရမယ်။ ဒီအချက်တွေကတော့
ရွေးကောက်ပွဲရဲ့ရလဒ် ဘယ်အခြေအနေပဲဖြစ်ဖြစ်၊ ဘယ်လိုအဖြေပဲထွက်ထွက် လုပ်ကိုလုပ်ရမယ့်
အချက်တွေ ဖြစ်တယ်။ ဒါမှလည်း နိုင်ငံခြားရင်းနှီးမြှုပ်နှံမှုကို ပိုပြီးဆွဲဆောင်နိုင်မှာ"ဟု
နိုင်ငံတော်သမ္မတ စီးပွားရေးအကြံပေးဖြစ်သည့် ဒေါက်တာအောင်ထွန်းသက်က ပြောသည်။

၂၀၁၀ ရွေးကောက်ပွဲအလွန် ဦးသိန်းစိန်အစိုးရ အုပ်ချုပ်ခဲ့သည့် ငါးနှစ်နီးပါး သက်တမ်းအတွင်း
နိုင်ငံခြားရင်းနှီးမြှုပ်နှံမှုသည် ကန်ဒေါ်လာ ၂၆ ဘီလျံကျော် ၀င်ရောက်ခဲ့သည်။

ယခု ၂၀၁၄-၁၅ ဘဏ္ဍာနှစ် ငါးလတာကာလအတွင်း ကန်ဒေါ်လာ ၂ ဒသမ ၆ သန်းကျော်
ဝင်ရောက်ထားသည်။

၎င်းပမာဏသည် လက်ရှိအစိုးရသက်တမ်း ငါးနှစ်နီးပါးကာလအတွင်း နိုင်ငံရင်းနှီးမြှုပ်နှံမှု အများဆုံး
ဝင်ရောက်နေလျက်ရှိကြောင်း ရင်းနှီးမြှုပ်နှံမှုနှင့် ကုမ္ပဏီများ ညွှန်ကြားမှုဦးစီးဌာနက
ထုတ်ပြန်ထားသည်။

သို့သော် ၀င်ရောက်လာသည့် ရင်းနှီးမြှုပ်နှံမှုလုပ်ငန်းအများစုသည် ပမာဏကြီးမားစွာ
လုပ်ကိုင်ရန်စောင့် ကြည့်နေဆဲဖြစ်နေကြောင်း စီးပွားရေးပညာရှင်များနှင့် ပါတီဝင်များက
ထောက်ပြပြောဆိုသည်။

"နိုင်ငံခြားရင်းနှီးမြှုပ်နှံမှု မ၀င်ဘူးလားဆိုတော့ ၀င်တယ်။ ဒါပေမဲ့ မည်မည် ရရ လုပ်တာမျိုးနည်းပြီး
နေရာဦးတဲ့ သဘောလောက်ပဲ လုပ်ကြသေးတယ်။ အထုပ်လိုက် အထည်လိုက် ၀င်ရောက်မြှုပ်နှံ
လုပ်ကိုင်ဖို့အတွက် စောင့်ကြည့်နေဆဲဖြစ်နေသေးတယ်။ ဒီ၂၀၁၅ ရွေးကောက်ပွဲမှာသာ
မှန်မှန်ကန်ကန် ကျင်းပသွားနိုင်မယ်ဆိုရင်တော့ ရွေးကောက်ပွဲအလွန်မှာ တိုင်းပြည်ရဲ့
စီးပွားရေးအခြေအနေဟာ တက်လာမှာပါ။ ဒါက ရွေးကောက်ပွဲနဲ့ တိုက်ရိုက်သင့်ဆိုင်နေတဲ့
အပိုင်းပါ"ဟု ဘဏ်များနှင့်ငွေကြေးဆိုင်ရာ ဖွံ့ဖြိုးတိုးတက်ရေးကော်မတီအဖွဲ့ဝင်တစ်ဦး ဖြစ်ပြီး
NLD ပါတီအဖွဲ့ဝင်လည်းဖြစ်သည့် ဦးဖြိုးမင်းသိန်းက ပြောသည်။

ထို့ပြင် ရွေးကောက်ခံပါတီများအနက် အင်အားကြီးပါတီနှစ်ရပ်၏ အခြေအနေများကြောင့်
ရွေးကောက်အပေါ်တွင်လည်း အားမရသည့်အချက်များစွာ ရှိနေကြောင်း စီးပွားရေးလုပ်ငန်းရှင်
ဦးနေလင်းဇင်က ပြောဆိုသည်။

"NLD က တစ်ခါမှ အစိုးရ မလုပ်ခဲ့ဖူးတဲ့အတွက် သူတို့ ဘယ်လောက်လုပ်နိုင်မလဲဆိုတာ
ကျွန်တော်တို့ မသိဘူး။ ပါတီဝင်အများစုက လောက်လောက်လားလား စွမ်းဆောင်နိုင်တယ်၊
လူထုရှေ့ထွက်ပြီး ဦးဆောင်နိုင်တယ်ဆိုတဲ့သူတွေ ရှိမနေသေးဘဲ အခုမှ ၀င်အရွေးခံကြမယ့်
သူတွေပဲ ရှိနေသေးတယ်။ ဒီအရွေးခံကိုယ်စားလှယ်တွေကပဲ နိုင်ငံတကာနဲ့ ရင်ပေါင်တန်းပြီး
ဦးဆောင်နိုင်တဲ့ မူဝါဒေတွေ ချနိုင်သူတွေ၊ အကောင်အထည်ဖော်မယ့်သူတွေ ထွက်လာနိုင်မလား
ဆိုတာက အိပ်မက်တစ်ခုပေါ့"ဟု ဦးနေလင်းဇင်က ပြောသည်။

"USDP ကျတော့ အဲလို လုပ်နိုင်တဲ့သူတွေက အခုလက်ရှိမှာလည်း ရှိတယ်။ နှစ် ၃၀ လောက်နီးပါး
အုပ်ချုပ်မှုလုပ်ငန်းနယ်ပယ်မှာ ရှိလာတော့ အတွေ့ကြုံ ရှိတဲ့သူတွေ များတယ်။ ခက်တာက
မူမကောင်းဘူး။ မူကောင်းကောင်းရှိရင်တောင် အကောင်အထည်ဖော်တဲ့သူတွေက မကောင်းဘူး။
စီမံခန့်ခွဲမှုပိုင်းတွေမှာ မပြတ်သားဘူး။ သမ္မတကိုယ်တိုင်ကလည်း သန့်ရှင်းသောအစိုးရ၊
ကောင်းမွန်သောအစိုးရလို့ ပြောနေပေမယ့် တကယ့်လက်တွေ့မှာ မလုပ်နိုင်ဘူး။ ၀န်ကြီးဌာန
တွင်းမှာ၊ ပြည်သူတွေမှာ စည်းကမ်းနည်းတာတွေကို ဥပဒေနဲ့အညီ ပြတ်ပြတ်သားသား အပြစ်ပေး
အရေးယူ မလုပ်နိုင်ဘူး။ မဖြေရှင်းနိုင်ဘူး။ ဒါကြောင့် အခုရွေးကောက်ပွဲအလွန်မှာ ဘယ်သူတွေက
နိုင်ငံတော်ကို ဦးဆောင်မလဲ။ နိုင်ငံရေးဖွံ့ဖြိုးဖို့ အဓိကကစားသူတွေအဖြစ် ဘယ်သူတွေ ပါဝင်မလဲ။
ပြုပြင်ပြောင်းလဲရေးတွေ စီးပွားရေးကဏ္ဍတိုးတက်မှုတွေကို ဘယ်လိုပုံစံ အကောင်အထည်ဖော်
ဆိုတာတွေက တကယ့်ကို စိတ်ဝင်စားစရာဖြစ်နေပါတယ်"ဟု ဦးနေလင်းဇင်က ဆက်လက်
ထောက်ပြပြောဆိုသည်။

အစိုးရအဖွဲ့အတွက် ဆီးကြိုနေသည့် စိန်ခေါ်ချက်များ

၂၀၁၅ ခုနှစ် ရွေးကောက်ပွဲတွင် အနိုင်ရရှိရေး ရာခိုင်နှုန်းများနေသည့် အမျိုးသားဒီမိုကရေစီအဖွဲ့ချုပ်
ပါတီအနေဖြင့် အစိုးရအဖွဲ့အား မည်သို့ပုံဖော်သွားမည်ဆိုခြင်းမှာလည်း ခန့်မှန်းရခက်ခဲလှကြောင်း
နိုင်ငံရေးပါတီဝင်များနှင့် စီးပွားရေးပညာရှင်များက ပြောဆိုကြသည်။

"ရွေးကောက်ပွဲကိစ္စကတော့ ပွင့်လင်းမြင်သာမှု၊ မှန်ကန်မှုအခြေအနေပေါ် မူတည်ပြီး ဖြစ်လာမှာပါ။
ဒါပေမဲ့ တက်လာမယ့်အစိုးရအဖွဲ့ကတော့ စိန်ခေါ်ချက်ကြီးကြီးမားတွေကို ရင်ဆိုင်ဖို့
ဖြစ်လာပါလိမ့်မယ်။ ရေဘေးအခြေအနေ ကြောင့် ဒေသတွေအားလုံးကို ပြန်ပြီးနာလန်
ထူလာအောင်၊ အရင်ကထက် ပိုပြီး တိုးတက်လာအောင်ဆိုတဲ့အချက်တွေက
တကယ့်စိန်ခေါ်ချက်တွေ ဖြစ်လာမှာပါ။ ဒီအချက်တွေက မလုပ်ဘဲရှောင်လွှဲလို့မရတဲ့
တိုင်းပြည်ဖွံ့ဖြိုးရေးဆိုင်ရာ အဓိကအချက်တွေပဲဖြစ်ပါတယ်။ ဒါနဲ့အတူ စီးပွားရေးဖွံ့ဖြိုးရေးကဏ္ဍကို
တစ်ပါတည်းလုပ်ဆောင်သွားနိုင်မှ တိုင်းပြည်က အခုထက်ပိုပြီးဖွံ့ဖြိုးလာနိုင် မှာပါ"ဟု
နိုင်ငံတော်သမ္မတ စီးပွားရေးရေးအကြံပေး ဒေါက်တာဇော်ဦးက ပြောသည်။

ထို့အတွက် ရောက်ရှိလာတော့မည့် နိုဝင်ဘာ ၈ ရက်၊ ၂၀၁၅ ခုနှစ် ရွေးကောက်ပွဲ
အခင်းအကျင်းသည် မြန်မာ့နိုင်ငံရေးအပြင် စီးပွားရေးကဏ္ဍ တိုးတက်ပြောင်းလဲနိုင်ရေး
အတွက်လည်း အရေးပါလွန်းလှနေသည်။

ထို့အတူ ရွေးကောက်ပွဲအလွန် အစိုးရအဖွဲ့တစ်ရပ်၏ လူမှုဘ၀ တိုးတက်ရေး ဖော်ဆောင်မှုများ
ကလည်း နိုင်ငံသားအားလုံး၏ တစ်ခုတည်းသော အိပ်မက်အဖြစ် ရှိနေသည်။

ဤအကြောင်းအရာနှင့် ပက်သက်၍ ထင်မြင်ချက်ပေးလိုပါက ...
[email protected] သို့ ပေးပို့နိုင်ပါသည်။


ရာသီဥတုအခြေအနေ

အကြည့်အများဆုံး - ပြည်တွင်းသတင်း