ရွေးကောက်ပွဲ၊ နိုင်ငံရေးအရွေ့နှင့် ပြည်ပရင်းနှီးမြှုပ်နှံမှု

နိုင်ငံအတွက် အရေးကြီးသည့် ရွေးကောက်ပွဲကြီး လာမည့် နိုဝင်ဘာ ၈ ရက်တွင် စတင်တော့မည်။

ယခုရွေးကောက်ပွဲသည် မြန်မာတို့၏ အရေးတစ်ခု တည်းမဟုတ်ဘဲ နိုင်ငံတကာကလည်း
စောင့်ကြည့်နေကြသည့်၊ အထူးသဖြင့် အမေရိကန်နှင့် အနောက်နိုင်ငံများက
စောင့်ကြည့်နေကြသည့် ရွေးကောက်ပွဲဆိုလျှင်လည်း မမှားပေ။

ထို့ပြင် နိုင်ငံတစ်နိုင်ငံ ဖွံ့ဖြိုးတိုးတက်ရန် အဓိကကျသည့် အခန်းကဏ္ဍတစ်ခုဖြစ်သည့် နိုင်ငံခြား
ရင်းနှီးမြှုပ်နှံသူအများစုကပါ လာမည့်ရွေးကောက်ပွဲကို အထူးအာရုံစိုက် နေကြလေသည်။

လာမည့်ရွေးကောက်ပွဲအပေါ် စောင့်ကြည့်နေကြသည့် နိုင်ငံများထဲတွင် မြန်မာနိုင်ငံနှင့်
ကုန်သွယ်မှုနှင့် ရင်းနှီးမြှုပ်နှံမှု အများဆုံး ပြုလုပ်နေသည့် တရုတ်နိုင်ငံအပါအ၀င် အိမ်နီးချင်းနိုင်ငံများ၊
အရှေ့တောင် အာရှနိုင်ငံများ၊ အမေရိကန်နှင့် ဥရောပသမဂ္ဂနိုင်ငံများလည်း ပါဝင်သည်။

အမေရိကန်၊ ဂျပန်၊ အီးယူနိုင်ငံများက ကြီးမားသော ရင်းနှီးမြှုပ်နှံမှု များ နိုင်ငံတွင်းသို့ဝင်လာပါက
ရင်းနှီးမြှုပ်နှံမှုပမာဏမှာ ဘီလျံအထိ ရှိလာမည်ဖြစ်သော်လည်း ထိုရင်းနှီးမြှုပ်နှံမှုများမှာ
ဝင်ရောက်မလာသေးပေ။

ထိုသို့ဖြစ်လာရန်မှာလည်း နိုင်ငံရေးနှင့် စီးပွားရေးဆိုင်ရာ မူဝါဒအခြေအနေများအပေါ် များစွာ
မူတည်နေသည်။

လက်ရှိအရပ်သားအစိုးရလက်ထက်တွင် ပြုပြင်ပြောင်းလဲရေးများ လုပ်ဆောင်ခဲ့ခြင်းကြောင့် နိုင်ငံ၏
စီးပွားရေးဖွံ့ဖြိုးတိုးတက်မှု တိုးတက်လာခဲ့ပြီး နိုင်ငံတွင်းသို့ နိုင်ငံခြားရင်းနှီးမြှုပ်နှံမှုများ
ဝင်ရောက်လာခဲ့သည်။

သို့သော် သယံဇာတပေါကြွယ်ဝပြီး ရေခံမြေခံကောင်းသော မြန်မာနိုင်ငံဆီသို့ နိုင်ငံခြား
ရင်းနှီးမြှုပ်နှံမှုများ အထူးသဖြင့် အနောက် နိုင်ငံများက ၀င်သင့်သလောက် ၀င်မလာသေးဘူးဟု
စီးပွားရေးပညာ ရှင်များနှင့် နိုင်ငံရေးလေ့လာစောင့်ကြည့်သူများက ဆိုကြသည်။

အမေရိကန်အစိုးရသည် မြန်မာနိုင်ငံ၏ ပြုပြင်ပြောင်းလဲရေးများကို အသိအမှတ်ပြုသည့်အနေဖြင့်
အရေးယူပိတ်ဆို့ခြင်းများကို တဖြည်းဖြည်း ဖြေလျှော့ပေးခဲ့ပြီးဖြစ်သော်လည်း အချို့မှာ
ကျန်ရှိနေဆဲပင်ဖြစ်ရာ စီးပွားရေးနှင့်ရင်းနှီးမြှုပ်နှံမှုဆိုင်ရာ အခွင့်အလမ်းအားလုံးမှာ နိုင်ငံရေးနှင့်
ရွေးကောက်ပွဲအပေါ်တွင် အပြန်အလှန်မှီခိုနေသည်။

ယင်းအတွက်ကြောင့် လာမည့်ရွေးကောက်ပွဲနှင့် နိုင်ငံရေးအရွေ့ကို သန့်ရှင်းညင်သာစွာ
ပြီးဆုံးသွားရန် အားလုံးက မျှော်လင့်နေကြသည်။

လာမည့် ရွေးကောက်ပွဲကို တရားမျှတစွာကျင်းပပြီး လက်ရှိအစိုးရ နှင့် တပ်မတော်တို့က
နောင်တက်လာမည့်အစိုးရကို အာဏာလွှဲပေးကာ ဒီမိုကရေစီစံချိန်၊ စံညွှန်းများနှင့်အညီ
အသိအမှတ်ပြုပါက အမေရိကန်နိုင်ငံသည် အရေးယူပိတ်ဆို့မှုများကို ပြန်လည်ဖွင့်ပေး
လာလိမ့်မည်ဟု သီပေါမြို့နယ်၊ ပြည်သူ့လွှတ်တော်ကိုယ်စားလှယ် ဦးရဲထွန်းက သူ့အမြင်ကို
ပြောသည်။

ယင်းကဲ့သို့ဖြစ်လာလျှင် မြန်မာနိုင်ငံသည်လည်း အခြားနိုင်ငံများ နည်းတူ လွတ်လပ်သည့်
ကမ္ဘာ့ဈေးကွက်ကြီးထဲတွင် ၀င်ဆံ့နိုင်လာပါက နိုင်ငံခြားရင်းနှီးမြှုပ်နှံသူများအတွက်လည်း
အားတစ်ခုဖြစ်လာလိမ့်မည်ဟုလည်း ၎င်းက ဆိုသည်။

"ရွေးကောက်ပွဲကြောင့်ဆိုထာထက် ရွေးကောက်ပွဲအလွန်မှာ ပေါ်လာမယ့်အစိုးရဟာ တိုင်းပြည်ကို
တည်တည်ငြိမ်ငြိမ်နဲ့ ဘယ် လောက်အပြောင်းအလဲ ဖော်ဆောင်နိုင်မလဲ။ အပြောင်းအလဲ
ဖော်ဆောင်တယ်ဆိုတာ အဓိကအားဖြင့် ရင်းနှီးမြှုပ်နှံသူတွေ လိုလားတဲ့ တရားဥပဒေစိုးမိုးရေးပေါ့။
တည်တည်ငြိမ်ငြိမ်ဖြစ်အောင် အုပ်ချုပ်နိုင်စွမ်းရှိရင် ရင်းနှီးမြှုပ်နှံမှုတွေ တိုးလာမယ်။
တည်တည်ငြိမ်ငြိမ်ဖြစ်အောင် အုပ်ချုပ်နိုင်စွမ်း မရှိဘူး၊ တရားဥပဒေစိုးမိုးမှု မဖော်ဆောင်နိုင်ဘူးဆိုရင်
ရင်းနှီးမြှုပ်နှံမှုတွေက ထွက်ကုန်မယ်။ တန့်ကုန်မယ်။ အဲလို ဖြစ်လိမ့်မယ်လို့ ယူဆတယ်"ဟု
ဦးရဲထွန်းက ပြောသည်။

လက်ရှိမြန်မာနိုင်ငံ၏ အနေအထားမှာ စစ်အုပ်ချုပ်ရေးအာဏာ လွှမ်းမိုးနေဆဲဟု နိုင်ငံတကာက
လက်ခံထားကြဆဲဖြစ်သည်။

ရွေးကောက်ပွဲအလွန်တွင် နောက်တက်လာမည့်အစိုးရသည် စစ်တပ်နှင့် ငြိမ်းချမ်းစွာ
အသွင်ကူးပြောင်းရေးကို ဖော်ဆောင်သွားနိုင်ရန်မှာ အရေးကြီးသော အဓိကအချက်ပင်ဖြစ်သည်။

အစိုးရသစ်က ထိုသို့တည်ငြိမ်အောင် အုပ်ချုပ်နိုင်မည်လား ဆိုသည်မှာလည်း မေးခွန်းထုတ်စရာ
ဖြစ်လာသည်။

"ရွေးကောက်ပွဲအလွန်မှာ ထွက်လာတဲ့ ရလဒ်နောက်ပိုင်းမှာ အစိုးရသစ်က တိုင်းပြည်ကို
တည်ငြိမ်အောင် အုပ်ချုပ်နိုင်မလား။ ကျွန်တော်တို့ နိုင်ငံရဲ့အနေအထားကို နိုင်ငံခြားရင်းနှီးမြှုပ်နှံ
သူတွေက သိတယ်။ ကျွန်တော်တို့ဆီမှာ စစ်အုပ်ချုပ်ရေး၊ စစ်တပ်ရဲ့အာဏာက နိုင်ငံရေးမှာ
လွှမ်းမိုးနေသေးတယ်။ ပါဝင်ပတ်သက်နေသေးတယ်ဆိုတာလည်း သူတို့က ကောင်းကောင်း
နားလည်တယ်။ နောက်တက်လာတဲ့အစိုးရက စစ်တပ်နဲ့ ငြိမ်းငြိမ်းချမ်းချမ်း အသွင်ကူးပြောင်းရေးကို
ဖော်ဆောင်သွားနိုင်မလားဆိုတာက အရေးကြီးတယ်။ နောက်တက်လာတဲ့အစိုးရက
ပြည်သူလူထုရဲ့ မဲဆန္ဒနဲ့ တက်လာမယ်။ ဒါပေမဲ့ အဲဒီအစိုးရက တိုင်းပြည် မှာရှိနေတဲ့
အနေအထားကို လိမ္မာပါးနပ်စွာနဲ့ မကိုင်တွယ်နိုင်လို့ တပ်မတော်နဲ့ ပြဿနာတက်မယ်။ နိုင်ငံရေး
မတည်မငြိမ်ဖြစ်မယ်ဆိုရင် သူတို့ရဲ့ ရင်းနှီးမြှုပ်နှံမှုတွေကလည်း စိုးရိမ်စရာကောင်းမယ်" ဟု
ဦးရဲထွန်းက ဆိုသည်။

အနောက်နိုင်ငံတော်တော်များများက နိုင်ငံရေးအပြောင်းအလဲကို မျှော်လင့်နေပြီး အပြောင်းအလဲ
အမှန်တကယ်ဖြစ်သွားခဲ့ပါက နိုင်ငံခြား ရင်းနှီးမြှုပ်နှံမှုမှာ တစ်နှစ်တည်းမှာပင် ဘီလျံရာချီပြီး
ဝင်လာနိုင်သည်ဟု စီးပွားရေးနှင့် နိုင်ငံရေးလေ့လာစောင့်ကြည့်သူ သန်းစိုး(ဘောဂဗေဒ)က
ပြောသည်။

မြန်မာနိုင်ငံရင်းနှီးမြှုပ်နှံမှုကော်မရှင်၏ ထုတ်ပြန်ချက်အရ ၂၀၁၅ ခုနှစ်၊ ဩဂုတ်လကုန်အထိ
နိုင်ငံခြားရင်းနှီးမြှုပ်နှံမှုပမာဏမှာ နိုင်ငံပေါင်း ၃၆ နိုင်ငံက ရင်းနှီးမြှုပ်နှံမှုစုစုပေါင်း အမေရိကန်ဒေါ်လာ
၄၆,၈၂၉ ဒသမ ၈၈၇ မီလျံရှိသည်ဟု သိရသည်။

"ရင်းနှီးမြှုပ်နှံမှုအကုန်လုံးက ရပ်ထားတယ်လို့ ထင်တယ်။ ပြီးခဲ့တဲ့ လေးနှစ်အတွင်းမှာ လုပ်ထားတဲ့
တချို့ပရောဂျက်တွေ ရှိတယ်။ ရင်းနှီးမြှုပ်နှံမှု လက်မှတ်ထိုးထားတာက နည်းနည်းပါးပါး ရှိနိုင်တယ်။
သီလ၀ါစက်မှု ဇုန် တည်ဆောက်နေတဲ့အတွက် ရင်းနှီးမြှုပ်နှံမှု အနည်းငယ် ၀င်လာဖို့ရှိတယ်။
အဲဒါက Capital Investment ပဲဖြစ်မှာ။ ရင်းနှီးမြှုပ်နှံမှုအသစ်ကတော့ မလာနိုင်ပါဘူး။
အဓိကကတော့ ရွေးကောက်ပွဲကို စောင့်ကြည့်နေမှာ။ ရွေးကောက်ပွဲအပြီး အစိုးရသစ်
လက်ထက်ကျမှ စီးပွားရေးမူဝါဒရော၊ ဈေးကွက်မူဝါဒပါ ချမှတ်ပြီး အဲဒီအခါကျမှ ရင်းနှီးမြှုပ်နှံမှု
တော်တော်များများ တက်လာမှာ"ဟု သန်းစိုး(ဘောဂဗေဒ)က ပြောသည်။

အမေရိကန်က မြန်မာနိုင်ငံအပေါ် ယခုအချိန်ထိ အရေးယူပိတ်ဆို့မှုများထဲတွင် ကျောက်မျက်
ရတနာကဏ္ဍလည်း ပါဝင်ရာ ကမ္ဘာတွင် ကျော်ကြားသည့် မြန်မာ့ကျောက်စိမ်းသည် ဈေးကောင်း
ရရှိမည့် နိုင်ငံတကာ ဈေးကွက်များဆီသို့ တင်ပို့နိုင်ခြင်း မရှိသေးဘဲ ပြည်တွင်း၌ ကျင်းပသော
ကျောက်မျက် ရတနာပြပွဲများတွင်သာ ရောင်းချနေရပြီး အချို့မှာ တရုတ်သို့ မှောင်ခိုလမ်းကြောင်းမှ
ထွက်ရှိနေဆဲဖြစ်သည်။

ဥရောပသမဂ္ဂနိုင်ငံများ မြန်မာနိုင်ငံတွင် ရင်းနှီးမြှုပ်နှံမှု ပြုလုပ်ပါကလည်း အမေရိကန်၏ ပိတ်ဆို့မှုများ
ရုပ်သိမ်းမှု မရှိသေးခြင်းကြောင့် ပြန်လည်တင်ပို့နိုင်မည့် ဈေးကွက်မရှိပေ။

ပိတ်ဆို့ထားသည့် ကုန်ပစ္စည်းများလည်း ရှိနေခြင်းကြောင့် အနောက်နိုင်ငံများက ပြည်တွင်း၌
ရင်းနှီးမြှုပ်နှံမှု ပြုလုပ်ရန် စိတ်ဝင်စားမှုမရှိကြပေ။

ဒါ့ပြင် နိုင်ငံတွင်း တရားဥပဒေ မည်မျှစိုးမိုးမှု ရှိမည်နည်း။

ပြည်သူလူထုအတွင်း၌ နိုင်ငံခြား ရင်းနှီးမြှုပ်နှံမှုများကို မည်မျှအထိ ထိန်းနိုင်မည်နည်း၊
ပြုပြင်ပြောင်းလဲရေးလုပ်နေသော အစိုးရသည် နောက်ကြောင်းပြန်လှည့်သွားမည်လားဆိုသည့်
မေးခွန်းတွေလည်း ရှိနေပြန်သည်။

နိုင်ငံခြားရင်းနှီးမြှုပ်နှံမှုမှာ အရင်းအနှီးများစွာ ဖြင့် လာရောက်သည်ဖြစ်ရာ တရားဥပဒေစိုးမိုးမှု
အရေးကြီးခြင်းကြောင့် နိုင်ငံရေးတည်ငြိမ်မှုမှာ အဓိကကျပေသည်။

၎င်းတို့၏ စံချိန်စံညွှန်းသတ် မှတ်ချက်ထဲတွင် အပြည့်အ၀ အာမခံနိုင်သော အစိုးရကို
လိုလားသည်။

နိုင်ငံခြားရင်းနှီးမြှုပ်နှံမှုတွင် ကုန်ထုတ်လုပ်မှုလုပ်ငန်းများ၌ ၀င်ရောက် ရင်းနှီးမြှုပ်နှံမည့် နိုင်ငံခြား
ရင်းနှီးမြှုပ်နှံမှုများ ၀င်လာရန် ပိုအရေးကြီးကြောင်း စီးပွားရေးနှင့် ကူးသန်းရောင်းဝယ်ရေးဝန်ကြီးဌာန
အကြံပေး ပုဂ္ဂိုလ် ဒေါက်တာမောင်အောင်က ပြောသည်။

"ရွေးကောက်ပွဲကတော့ နိုင်ငံခြားရင်းနှီးမြှုပ်နှံသူတွေအတွက် စောင့်ကြည့်မယ့် အချက်ပဲ။ စောင့်ကို
စောင့်ကြည့်မှာပဲ။ ရွေးကောက်ပွဲကို တချို့ကလည်း တစ်ခုခုဖြစ်မလားဆိုပြီး စိုးရိမ်တာပဲ။ နိုင်ငံခြား
ရင်းနှီးမြှုပ်နှံမှုက ပမာဏအကြီးကြီးနဲ့ လာရမယ်။ နည်းပညာလည်း ပါရမယ်ဆိုတော့ သိပ်ပြီး
စွန့်စားမှုများရင်တော့ မလာဘူး။ အဲဒါကြောင့် စောင့်ကြည့်တာပါ"ဟု ၎င်းက ပြောသည်။

ယခုလက်ရှိ ရင်ဆိုင်နေရသော အဆောက်အအုံနှင့် လျှပ်စစ်မီးလိုအပ်ချက်သည်လည်း နိုင်ငံခြား
ရင်းနှီးမြှုပ်နှံသူများအတွက် အဟန့်အတား ဖြစ်စေသည်။

ထို့ပြင် မကြာမီက ပြဋ္ဌာန်းခဲ့သော အနိမ့်ဆုံးလုပ်ခလစာ ဥပဒေနှင့်ပတ်သက်၍လည်း
တုံ့ပြန်ချက်ရလဒ်မှာ သိပ်မကောင်းလှပေ။

"အဆောက်အအုံပိုင်းမှာ တော်တော်များများ လိုသေးတယ်။ မီးမမှန်၊ ရေမမှန်တဲ့အခြေအနေမှာ
လာရောက်ရင်းနှီးရတဲ့သူရဲ့ ဘ၀ကိုလည်း ထည့်တွက်ရမယ်။ လုပ်ငန်းခွင်ရဲ့လုံခြုံမှုဘက်ကလည်း
ထည့်စဉ်းစားရမယ်။ အာဆီယံဒေသတွင်းဖြစ်နေတဲ့အတွက်ကြောင့် အာဆီယံဒေသနဲ့ တန်းတူ
မရဘူးဆိုရင် ဒီလိုရင်းနှီးမြှုပ်နှံမှုတွေကို လက်မခံတာ ကောင်းတယ်"ဟု စီးပွားရေးပညာရှင်
ဒေါက်တာမောင်မောင်စိုးက ပြောသည်။

ယင်းအခြေအနေများ ပြေလည်နိုင်ပါက လာမည့် ၂၀၁၅-၂၀၁၆ တွင် ၀င်လာမည့် နိုင်ငံခြား
ရင်းနှီးမြှုပ်နှံမှုမှာ များနိုင်သော်လည်း နိုင်ငံခြား ရင်းနှီးမြှုပ်နှံမှုဘက်ကလည်း အသေအချာ
စဉ်းစားကြမှာဖြစ်သကဲ့သို့ မိမိတို့ဘက်ကလည်း ပြင်ဆင်ရမည့်အပိုင်းများ များစွာရှိနေဆဲပင်
ဖြစ်သည်။

"ရွေးကောက်ပွဲကလည်း အကြောင်းအရာ တစ်ခုအနေနဲ့ ပါဝင်တယ်။ နိုင်ငံရေးတည်ငြိမ်မှသာ
စီးပွားရေး တည်ငြိမ်မယ်။ စီးပွားရေးတည်ငြိမ်ရင် Demand နဲ့ Supply မှာပါ ပြေလည်အောင်
လုပ်လို့ရတယ်။ အခုဟာက တစ်ယောက်နဲ့ တစ်ယောက် လွန်ဆွဲပွဲ များနေတော့ စီးပွားရေး
မတည်ငြိမ်ဘူး။ စီးပွားရေး မတည်ငြိမ်တော့ နိုင်ငံရေး မတည်ငြိမ်ဖြစ်သွားတယ်"ဟု
ဒေါက်တာမောင် မောင်စိုးက သုံးသပ်သည်။

မြန်မာနိုင်ငံအတွင်းရှိ ရင်းနှီးမြှုပ်နှံမှုကဏ္ဍမှာ ပြီးခဲ့သည့် ဩဂုတ်လကုန်အထိ ရေနံနှင့်
သဘာဝ ဓာတ်ငွေ့ကဏ္ဍ၌ ၃၉ ဒသမ ၉၇ ရာခိုင်နှုန်းဖြင့် အများဆုံးရင်းနှီးမြှုပ်နှံထားသည်ကို
တွေ့ရသည်။

စွမ်းအင်ကဏ္ဍတွင် ၂၈ ဒသမ ၃၉ ရာခိုင်နှုန်း၊ ကုန်ထုတ်လုပ်မှုကဏ္ဍတွင် ၁၀ ဒသမ ၀၈ ရာခိုင်နှုန်း၊
ပို့ဆောင်ရေးနှင့် ဆက်သွယ်ရေးကဏ္ဍတွင် ၆ ဒသမ ၆၂ ရာခိုင်နှုန်း၊ သတ္တုကဏ္ဍတွင်
၎ ဒသမ ၉၉ ရာခိုင်နှုန်း၊ ဟိုတယ်နှင့်ခရီးသွားကဏ္ဍတွင် ၄ ဒသမ ၁၆ ရာခိုင်နှုန်း၊
အိမ်ခြံမြေကဏ္ဍတွင် ၃ ဒသမ ၅၂ ရာခိုင်နှုန်း၊ စိုက်ပျိုးရေးကဏ္ဍတွင် သုည ဒသမ ၄၆ ရာခိုင်နှုန်း၊
မွေးမြူရေးနှင့် ရေလုပ်ငန်းကဏ္ဍတွင် သုည ဒသမ ၄၁ ရာခိုင်နှုန်း၊ စက်မှုကဏ္ဍတွင် သုည ဒသမ
၃၈ ရာခိုင်နှုန်းနှင့် အခြား ကဏ္ဍများ၌ ၁ ဒသမ ၀၂ ရာခိုင်နှုန်း ရှိသည်။

ကဏ္ဍအလိုက် နိုင်ငံခြားရင်းနှီးမြှုပ်နှံမှုများကို ကြည့်ခြင်းအားဖြင့် သယံဇာတအခြေခံသည့်
ရင်းနှီးမြှုပ်နှံမှုများကိုသာ အများဆုံးပြုလုပ်နေ သည်ကို တွေ့ရသည်။

"ရွေးကောက်ပွဲကို အတိုင်းအတာတစ်ခုအထိ စောင့်ကြည့်တယ်။ ရင်းနှီးမြှုပ်နှံသူတွေဟာ သူတို့
လွန်ခဲ့တဲ့ နှစ်နှစ်၊ သုံးနှစ်က ရင်းနှီးချင်ရင်းနှီးမယ်။ ဒါပေမဲ့ ရွေးကောက်ပွဲမတိုင်မီ ခြောက်လ၊
တစ်နှစ် အတွင်းမှာတော့ မရင်းနှီးတော့ဘူး။ စောင့်ကြည့်နေတယ်။ ဘာမှ မသေချာသေးတဲ့
အချိန်မှာ သူတို့ အနေနဲ့ မရင်းနှီးသေးဘူးပေါ့။ ရွေးကောက်ပွဲကို စောင့်ကြည့်ရင် သူတို့ ဘက်က
မနာဘူးပေါ့။ ရွေးကောက်ပွဲက ပြီးသွားမယ်။ နောက်အစိုးရက ဘယ်သူဖြစ်မယ်။ ဒါတွေကို
စောင့်ကြည့်နေတာလည်းရှိတယ်။တချို့ ရင်းနှီးမြှုပ်နှံမှုတွေ ၀င်မလာတာက ရွေးကောက်ပွဲ
တစ်ခုတည်းနဲ့လည်း မဆိုင်ဘူး။ မြန်မာပြည်ရဲ့အဆောက်အအုံတွေက ရင်းနှီးမြှုပ်နှံဖို့အတွက်
အဆင်သင့်မဖြစ်သေးတဲ့ အခြေအနေကိုတွေ့တဲ့ ရင်းနှီးမြှုပ်နှံသူတွေလည်း ရှိတယ်"ဟု
Myanmar Research ၊ Consulting ၊ Capital Markets မှ စီအီးအို ဒေါက်တာအောင်သူရ က
ပြောသည်။

မြန်မာပြည်တွင် ရင်းနှီးမြှုပ်နှံကာ အချောထည် ထုတ်လုပ်၍ ပြန်လည်တင်ပို့မည့် ကုမ္ပဏီများ
အတွက် မြန်မာပြည်သည် အဆောက်အအုံပိုင်းနှင့် လူသားအရင်းအမြစ်ပိုင်းတို့တွင် အဆင်သင့်
မဖြစ်သေးခြင်းကြောင့် အချောထုတ်လုပ်ပြီးတင်ပို့သည့်လုပ်ငန်းအတွက် ရင်းနှီးမြှုပ်နှံရန်
စောနေသေးပြီး ယင်းအချက်များ အဆင်သင့်ဖြစ်လာရန် လိုအပ်နေသေးကြောင်း ၎င်းက
ထောက်ပြသည်။

ရွေးကောက်ပွဲအပြီး တက်လာသောအစိုးရသည် လိမ္မာပါးနပ်စွာဖြင့် တပ်မတော်နှင့် ဆက်ဆံရေး
မပျက်ရအောင် လုပ်ဆောင်နိုင်ရမည့်အပြင် တရားဥပဒေစိုးမိုးမှုကိုလည်း ဇောင်းပေးလုပ်ဆောင်နိုင်
ရမည်ဖြစ်သည်။

နိုင်ငံခြားရင်းနှီးမြှုပ်နှံ မှုများအတွက်လည်း ပြည်တွင်း၌ အလုပ်သမားများနှင့် ပဋိပက္ခကို
ပြေလည်စွာဖြေရှင်းနိုင်မည်လား၊ ဘက်ပေါင်းစုံကြည့်၍ ရင်းနှီးမြှုပ်နှံမှုများ တိုးလာမည်လား၊
ရပ်တန့်သွားမည်လား (သို့) နောက်ဆုတ်သွားမည်လား ဆိုသည်များမှာ ယခုအချိန်တွင်
သေချာစွာ ပြောဆိုနိုင်ခြင်း မရှိသေးပေ။

ဤအကြောင်းအရာနှင့် ပက်သက်၍ ထင်မြင်ချက်ပေးလိုပါက ...
[email protected] သို့ ပေးပို့နိုင်ပါသည်။


ရာသီဥတုအခြေအနေ

အကြည့်အများဆုံး - ပြည်တွင်းသတင်း