စောင့်ကြည့်ရမည့် ဥပဒေရေးရာနှင့် အထူးကိစ္စရပ်များ လေ့လာသုံးသပ်ရေး ကော်မရှင်၏ ခြေလှမ်းများ

ယခင်လွှတ်တော်တွင် ဖွဲ့စည်းခဲ့သည့် ဥပဒေ ရေးရာနှင့် အထူးကိစ္စရပ်များ လေ့လာသုံးသပ်ရေး
ကော်မရှင်၏ အခန်းကဏ္ဍ မှေးမှိန်ခဲ့သော်လည်း လက်ရှိကော်မရှင် ဥက္ကဋ္ဌ သူရ ဦးရွှေမန်းတစ်ယောက်
ကော်မရှင်၏ လုပ်ပိုင်ခွင့်များကို မည်မျှအတိုင်းတာအထိ လွှတ်တော်၌ အသုံးချခွင့်ရမည်ကို
စောင့်ကြည့်နေသူများ ရှိနေသည်။

ယခင် ပြည်သူ့လွှတ်တော် ဒုတိယဥက္ကဋ္ဌ ဦးနန္ဒကျော်စွာ ဦးဆောင်သည့် ဥပဒေရေးရာနှင့်
အထူးကိစ္စရပ်များ လေ့လာသုံးသပ်ရေး ကော်မရှင်ကို လွှတ်တော်ကိုယ်စားလှယ်၊ အစိုးရနှင့်
တပ်မတော် အငြိမ်းစားအရာရှိများ၊ ပြင်ပက တတ်သိပညာရှင်များ စသည်ဖြင့် အဖွဲ့ဝင် ၅၀ ကျော်ဖြင့်
ဖွဲ့စည်းခဲ့သည်။

ကော်မရှင်၏ တာဝန်မှာ လွှတ်တော်တွင်း ဥပဒေပြုမှုဆိုင်ရာ ကိစ္စရပ်များနှင့် ပတ်သက်၍
လွှတ်တော်ကိုယ်စားလှယ်များကို အကြံပြုချက်များပေးခြင်းနှင့် လွှတ်တော် ဥက္ကဋ္ဌက တာဝန်ပေးပါက
အထူးကိစ္စများကို လေ့လာစုံစမ်းခွင့်ရှိခြင်းတို့ ဖြစ်သည်။

သို့သော် ငါးနှစ်တာ သက်တမ်းအတွင်း ကော်မရှင်၏ ထူးခြားသော လုပ်ဆောင်မှုများကို
လွှတ်တော်တွင် မတွေ့ခဲ့ရပေ။

လက်ရှိ အမျိုးသားဒီမိုကရေစီအဖွဲ့ချုပ် ဦးဆောင်သည့် လွှတ်တော်တွင် ပါတီ ခေါင်းဆောင်
ဒေါ်အောင်ဆန်းစုကြည်၏ သဘောတူညီမှုဖြင့် ပြည်ထောင်စုလွှတ်တော် နာယကဟောင်း
သူရဦးရွှေမန်းက ကော်မရှင် ဥက္ကဋ္ဌရာထူးကို ရယူထားသည်။

အဖွဲ့ဝင် ၂၃ ဦးဖြင့် ဖွဲ့စည်းထားသည့် ကော်မရှင် အသစ်တွင်မူ ပြည်ခိုင်ဖြိုးပါတီက လွှတ်တော်
အမတ်ဟောင်း ၁၀ ဦး ပါဝင်ပြီး အငြိမ်းစား အစိုးရအရာရှိများဖြင့် အားဖြည့်ထားသည်။

သူရဦးရွှေမန်းကို ကော်မရှင် ဥက္ကဋ္ဌ ရာထူး ခန့်အပ်လိုက်ခြင်းဖြင့် အင်န်အယ်လ်ဒီနှင့် တပ်မတော်၊
အာဏာကုန်ဆုံးတော့မည့် အစိုးရတို့ကြားတွင် ငြိမ်းချမ်းစွာ အာဏာ လွှဲပြောင်းရေးအတွက်
ကသိကအောက် ဖြစ်နိုင်သည်ဆိုသည့် ဝေဖန်မှုများလည်း ရှိသည်။

မည်ကဲ့သို့ ဝေဖန်မှုများ ရှိစေကာမူ ကော်မရှင်ဥက္ကဋ္ဌရာထူးကို လက်ခံခြင်းဖြင့် သူရ ဦးရွှေမန်း
တစ်ယောက် လွှတ်တော်ထဲတွင် တရားဝင်ဆက်လက်လှုပ်ရှားခွင့် ရရှိခဲ့သည်။

ကော်မရှင်ဥက္ကဋ္ဌ တစ်ယောက်သာဖြစ်သော်လည်း လွှတ်တော်တွင်းရှိ ၀န်ထမ်းများက သူရဦးရွှေမန်းကို
ယခင်ကကဲ့သို့ ဦးညွှတ် အလေးပြုမြဲ ဖြစ်သလို နိုင်ငံခြား သံတမန်များ၊ နိုင်ငံတကာ အဖွဲ့အစည်းများက
ကိုယ်စားလှယ်များကလည်း မကြာခဏ လာရောက် တွေ့ဆုံမြဲဖြစ်သည်။

ကော်မရှင် ဥက္ကဋ္ဌတာဝန်ကို လစာမယူဘဲ ထမ်းဆောင်မည့် သူရဦးရွှေမန်းကလည်း
တာဝန်စယူပြီးပြီးချင်းမှာပင် ကော်မရှင် အစည်းအဝေးများကို ခေါ်ယူခဲ့သည်။

နောက်ဆုံးကျင်းပသည့် အစည်းအဝေးအပြီးတွင် ယခင် ပြဋ္ဌာန်းထားသည့် ဥပဒေပေါင်း ၂၀၀ ခန့်ကို
ပြန်လည်စိစစ်မည်ဟု ကော်မရှင် အဖွဲ့ဝင်များကပြောသည်။

သို့သော် မည်သည့် ဥပဒေများကို ဦးစားပေး စိစစ်မည်ကိုမူ တိတိကျကျ ပြောဆိုခြင်း မရှိပေ။

သို့ရာတွင် ထိုကဲ့သို့ ပြောဆိုချက်များမှာ ကော်မရှင်၏ လုပ်ပိုင်ခွင့်အပေါ် မေးခွန်းထုတ်စရာများ
ဖြစ်နေကြောင်း ရှမ်းတိုင်းရင်းသားများ တိုးတက်ရေးပါတီ လွှတ်တော်အမတ်ဟောင်း ဦးရဲထွန်းက
ပြောသည်။

"ကော်မရှင်က လွှတ်တော်ကိုယ်စားလှယ်တွေကို အကြံပေးဖို့ပဲ။ ဥပမာ - ကော်မတီမှာ ဥပဒေတစ်ခု
တက်လာလို့ လွှတ်တော်အမတ်တွေကလည်း ဒီဥပဒေအကြောင်းကို သေချာမသိဘူးဆိုရင် သူတို့က
ကူညီရတယ်၊ အကြံပေးရတယ်။ အခု သူရဦးရွှေမန်းတို့ ပြောသလို ဥပဒေ ၂၀၀ ကို စိစစ်မယ်ဆိုတာမျိုး
စိတ်ကြိုက် လုပ်ခွင့် မရှိဘူး။ တကယ်လို့ ဒီလိုပြောရင်တောင် လွှတ်တော်ဥက္ကဋ္ဌရဲ့ တာဝန်ပေးချက်အရ
ဆိုတာမျိုးပဲ ဖြစ်သင့်တယ်"ဟု ဦးရဲထွန်း က ပြောသည်။

ကော်မရှင်၏ အမည်မှာ ဥပဒေရေးရာနှင့် အထူးကိစ္စရပ်များ လေ့လာဆန်းစစ်ရေး ကော်မရှင်ဖြစ်သည့်
အတွက် ဥပဒေများကို လွှတ်တော်ဥက္ကဋ္ဌ၏ တာဝန်ပေးချက်ဖြင့် လေ့လာဆန်းစစ်ကာ လွှတ်တော်ကို
အကြံ ပြုချက်များပေးနိုင်သော်လည်း ဆုံးဖြတ်ချက် အားလုံးမှာ လွှတ်တော်အပေါ်တွင်သာ
မူတည်ကြောင်း ဦးရဲထွန်းကပြောသည်။

သို့သော် လွှတ်တော်ဥက္ကဋ္ဌအဖြစ် ငါးနှစ်တာ တာဝန်ယူခဲ့ဖူးသည့် သူရဦးရွှေမန်းနှင့် ကော်မရှင်
အဖွဲ့ဝင်များသည် ၎င်းတို့၏ အတွေ့အကြုံများဖြင့် ပြည်သူလူထုအတွက် အကျိုးရှိမည့် ဥပဒေများကို
ပြင်ဆင်ပြဋ္ဌာန်းပေးရန် လွှတ်တော်ကို အကြံပေးမည်ဆိုပါက များစွာ အကျိုးရှိမည့် ကော်မရှင်
ဖြစ်လာလိမ့်မည်ဟု ဦးရဲထွန်းကပြောသည်။

ဒေါ်အောင်ဆန်းစုကြည်က 'အတိတ်ကို ပြန်လည်မတူးဆွရေးမူ'ကို ဆုပ်ကိုင်ထားသော်လည်း
ဥပဒေများကို ပြန်လည် ပြင်ဆင်ခြင်းဖြင့် နောက်ကြောင်းပြန် အရေးယူမှုများ ဖြစ်လာမည်ကို
စိုးရိမ်နေသူများလည်း ရှိနေသည်။

ထို့ကြောင့်ပင် ပြီးခဲ့သည့် လွှတ်တော် သက်တမ်း မကုန်ဆုံးမီ 'နိုင်ငံတော် သမ္မတ
တာဝန်ထမ်းဆောင်ခဲ့သူ၏ လုံခြုံရေးဆိုင်ရာ ဥပဒေ' ကို ပြဋ္ဌာန်းခဲ့သည်။ ဥပဒေအရ နိုင်ငံတော်
သမ္မတသည် အရေးယူခွင့်မှ ကင်းလွတ်ခွင့်နှင့် ကာကွယ်ခွင့်ပေးထားသည်။ သို့သော် ပုဒ်မ ၁၀ အရ
နိုင်ငံတော်သမ္မတတာဝန် ထမ်းဆောင်ခဲ့သူကို နိုင်ငံတော်သမ္မတအဖြစ် ထမ်းဆောင်ခဲ့သည့်
တာဝန်အရ ဥပဒေနှင့်အညီ ဆောင်ရွက်ချက်များနှင့် စပ်လျဉ်း၍ ယင်းကို တရားစွဲဆိုခြင်း၊ အရေးယူခြင်း
မရှိစေရဟုသာ ပြဋ္ဌာန်းထားရာ ဥပဒေနှင့် မညီသည့် လုပ်ဆောင်ချက်များအတွက် အရေးမယူရန်
ကာကွယ်ပေးမထားပေ။ နောက်ကြောင်းပြန် အရေးယူမှုများ ပြုလုပ်မည် မဟုတ်ဟု
ဒေါ်အောင်ဆန်းစုကြည်က ကတိပေးထားသော်လည်း ဆက်လက်လုပ်ဆောင်ရန် လိုအပ်သည့်
စီမံကိန်းဆိုင်ရာ စာချုပ်များအတွက်မူ ပြန်လည် လေ့လာ ဆန်းစစ်မှုများ ပြုလုပ်ရန် လိုအပ်လာမည်
ဖြစ်ကြောင်း ဒေါ်ဒွဲဘူကပြောသည်။

စီမံကိန်းဆိုင်ရာ စာချုပ်များ၊ အခြား အထူးကိစ္စရပ်များအတွက် လွှတ်တော် ဥက္ကဋ္ဌက တာဝန်ပေးပါက
ကော်မရှင်က လေ့လာ သုံးသပ်ကာ လွှတ်တော်ကို အကြံပြုချက်များပေးနိုင်သော်လည်း သူရဦးရွှေမန်း
ဥက္ကဋ္ဌ တာဝန်ယူစဉ်က အထူးကိစ္စရပ်များလေ့လာရန် ကော်မရှင်ကို တာဝန်ပေးခဲ့ခြင်း မရှိခဲ့ကြောင်း
ကချင်ပြည်နယ် အင်ဂျန်းယန် မဲဆန္ဒနယ် ပြည်သူ့ လွှတ်တော် ကိုယ်စားလှယ်ဟောင်း ဒေါ်ဒွဲဘူ က
ပြောသည်။

"အရင် ကော်မရှင်တုန်းက အဖွဲ့ဝင်တွေ အများစုက အစိုးရ အဖွဲ့က မှားရင်တောင်မှ ၀င်မပြောရဲဘူး။
ဘာလို့လဲဆိုတော့ သူတို့က အငြိမ်းစားဝန်ထမ်းတွေကိုး။ သူတို့ အချင်းချင်းဆိုတော့ ဘာမှ မပြောရဲဘူး။
ဦးရွှေမန်း ကိုယ်တိုင်က အစိုးရအဖွဲ့ကို အများကြီး ကာပေးခဲ့တာပဲ။ လွှတ်တော်အမတ်က
ဝေဖန်ရင်တောင် သတိပေးခံရတာမျိုးတွေရှိတယ်" ဟု ဒေါ်ဒွဲဘူက ပြောသည်။

သူရဦးရွှေမန်းသည် သမ္မတတာဝန် ထမ်းဆောင်ရန် ရည်မှန်းချက် ကြီးခဲ့သော်လည်း
၂၀၁၅ ရွေးကောက်ပွဲ ကျင်းပခါနီး အချိန်တွင် ပါတီဥက္ကဋ္ဌအဖြစ်မှ ဖယ်ရှားခံခဲ့ရသည့်အပြင်
ရွေးကောက်ပွဲတွင်လည်း ရှုံးနိမ့်ခဲ့သည်။

အင်န်အယ်လ်ဒီပါတီကို အာဏာလွှဲ ပြောင်းပြီးပါက သမ္မတ ဦးသိန်းစိန်နှင့် ၎င်း၏ ၀န်ကြီးများမှာ
ပါတီသို့ ပြန်လည်ဝင်ရောက် လာမည်ဖြစ်သည့်အတွက် သူရ ဦးရွှေမန်းက ပြည်ခိုင်ဖြိုးပါတီနှင့်
ဆက်လက်လက်တွဲရန် စိတ်ဝင်စားမှု မရှိတော့ကြောင်း ၎င်းနှင့် နီးစပ်သူများက ပြောသည်။

ထို့ကြောင့် အင်န်အယ်လ်ဒီနှင့် လက်တွဲ ဆောင်ရွက်ရေး ဆုံးဖြတ်ချက်သည် သူရ ဦးရွှေမန်းအတွက်
နိုင်ငံရေးတွင် ဆက်လက် ခြေကုပ်ရယူနိုင်ရန် အထောက်အပံ့တစ်ခု ဖြစ်သော်လည်း ကော်မရှင်ဥက္ကဋ္ဌ
ရာထူးမှ တစ်ဆင့် ၎င်း၏ နိုင်ငံရေး ရည်မှန်းချက်များကို အောင်မြင်အောင် အကောင်အထည်ဖော်နိုင်ရန်
မသေချာကြောင်း ပြည်ခိုင်ဖြိုး ပါတီဝင် အချို့ကပြောသည်။

ဤအကြောင်းအရာနှင့် ပက်သက်၍ ထင်မြင်ချက်ပေးလိုပါက ...
[email protected] သို့ ပေးပို့နိုင်ပါသည်။


ရာသီဥတုအခြေအနေ

အကြည့်အများဆုံး - ပြည်တွင်းသတင်း