နမ့်စန်မြို့နယ်အတွင်း ကျောက်မီးသွေးတူးဖော်မှုကို ကွင်းဆင်းစစ်ဆေးရန် တောင်းဆို

ရှမ်းပြည်နယ်တောင်ပိုင်း၊ လွိုင်လင်ခရိုင်၊ နမ့်စန်မြို့နယ်အတွင်း ကျောက်မီးသွေးတူးဖော်နေမှုကို
တရားဝင်ခွင့်ပြုမိန့် ထုတ်ပေးထားခြင်းရှိ၊ မရှိနှင့် တူးဖော်နေသူများကို စစ်ဆေးပေးရန် မြန်မာနိုင်ငံ
ပွင့်လင်းမြင်သာမှုနှင့် တာဝန်ယူမှု၊ တာဝန်ခံမှုဆိုင်ရာ အရပ်ဘက်မဟာမိတ်အဖွဲ့(MATA)က
ရှမ်းပြည်နယ်အစိုးရကို တောင်းဆိုထားသည်။

ကမ္ဘောဇကုမ္ပဏီက နမ့်စန်မြို့နယ်၊ ၀မ်ပုံကျေးရွာအုပ်စု၊ မီးသွေးကုန်းကျေးရွာအနီး၌ ကျောက်မီးသွေး
တူးဖော်လျက်ရှိခြင်းဖြစ်ပြီး ယင်းသို့တူးဖော်နေမှုကို တရားဝင်ခွင့်ပြုမိန့်ဖြင့် တူးဖော်ခြင်း ဟုတ်၊ မဟုတ်
သိရှိရန် (MATA) အဖွဲ့က သယံဇာတနှင့် သဘာဝပတ်ဝန်းကျင်ထိန်းသိမ်းရေး ၀န်ကြီးဌာနသို့
တင်ပြမေးမြန်းခဲ့ရာ ၀န်ကြီးဌာနက ကမ္ဘောဇကုမ္ပဏီကို ကျောက်မီးသွေးတူးဖော်ရန် ခွင့်ပြု မိန့်
ချထားပေးခြင်းမရှိဟု ဧပြီလကုန်ပိုင်းတွင် အကြောင်းပြန်ခဲ့သဖြင့် ဆက်လက်စစ်ဆေးရန်
ပြည်နယ်အစိုးရကို တောင်းဆိုထားသည်ဟု MATA အဖွဲ့ဝင် ဦးမိုးလွင်က ပြောသည်။

"အဲဒီမြေက စစ်တပ်က သိမ်းတယ်ဆိုပြီး ခြံစည်းရိုးခတ်ပစ်လိုက်တယ်။ ၂၀၁၅ ခုနှစ်အထိ လုပ်နေတဲ့
တောင်သူ ၁၂ ဦးကိုလည်း အဲဒီကနေ နှင်ထုတ်လိုက်တယ်။ အခုဘယ်လိုဖြစ်လဲဆိုတော့ တောင်သူ
၁၂ ဦးရဲ့ လယ်ယာမြေနဲ့ တချို့လယ်ယာမြေတွေ အပေါ်မှာ ကျောက်မီးသွေး တူးခွင့်ပြုလိုက်တယ်။
တောင်သူတွေကလည်း အဲဒီမြေကို ပြန်ရဖို့အတွက် တောင်းနေတယ်။ ပြန်မရဘူး။
အခုကျောက်မီးသွေး တွင်းကြီး လုပ်ပစ်လိုက်တာ"ဟု ၎င်းက ပြောသည်။

အဆိုပါနေရာတွင် ယန္တရားကြီးများ အသုံးပြု၍ တစ်ရက်လျှင် ကျောက်မီးသွေးတန်ချိန် ၁၀၀ နီးပါး
ထုတ်လုပ်နေသည်ဟု သိရကြောင်း ဦးမိုးလွင်က ပြောသည်။

အဆိုပါဒေသ၌ ကျောက်မီးသွေးတူးဖော်မှုအတွက် ကမ္ဘောဇကုမ္ပဏီကို ခွင့်ပြုမိန့်ချထားပေးခြင်း
မရှိကြောင်း သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးဌာန၊ သတ္တုတွင်းဦးစီးဌာန
ညွှန်ကြားရေးမှူးချုပ် ဦးဝင်းထိန်က ပြောသည်။

အဆိုပါ ကိစ္စရပ်နှင့် ပတ်သက်၍ သုံးသပ် အကြံပြုချက်များ တင်ပြနိုင်ရန် မြေပြင်အခြေအနေမှန်
စစ်ဆေးတွေ့ရှိချက် ဓာတ်ပုံမှတ်တမ်းများကို ပြည်နယ်သတ္တုတွင်းဦးစီးဌာနသို့ ရှမ်းပြည်နယ်
သယံဇာတနှင့် သဘာဝပတ်ဝန်းကျင်ထိန်းသိမ်းရေး ၀န်ကြီး ကိုယ်တိုင်က ပေးပို့ထားသော်လည်း
လက်ရှိအချိန်အထိ ကွင်းဆင်းစစ်ဆေးခြင်း မပြုလုပ်သေးကြောင်း ဦးမိုးလွင်က ပြောသည်။

အဆိုပါနေရာတွင် ကမ္ဘောဇကုမ္ပဏီက ကျောက်မီးသွေးတူးဖော်ခြင်း မရှိဘဲ ကျောက်မီးသွေး
တူးဖော်မှုကို တာဝန်ယူနေသည့် တပ်မတော်အရာရှိ ဗိုလ်မှူးချစ်ကိုထံမှ ၀ယ်ယူနေခြင်းသာဖြစ်သည်ဟု
ကမ္ဘောဇအုပ်စုကုမ္ပဏီလီမိတက် စာရင်းစစ်အရာရှိချုပ် ဦးနေမျိုးအောင်က ပြောသည်။

ကမ္ဘောဇကုမ္ပဏီသည် ပင်းပက်ဒေသတွင် ၀န်ကြီးဌာန၏ ခွင့်ပြုချက်ဖြင့် ဘိလပ်မြေစက်ရုံ
တည်ဆောက်ထားပြီး စက်ရုံလည်ပတ် ရန်လိုအပ်သော ကျောက်မီးသွေးကို မီးသွေးကုန်းကျေးရွာ
အနီးရှိ ကျောက်မီးသွေးတွင်းအပါအ၀င် ကျောက်မီးသွေးတွင်းသုံးတွင်းမှ ၀ယ်ယူအသုံးပြုနေခြင်း
ဖြစ်ကြောင်း ၎င်းက ပြောသည်။

ဤအကြောင်းအရာနှင့် ပက်သက်၍ ထင်မြင်ချက်ပေးလိုပါက ...
[email protected] သို့ ပေးပို့နိုင်ပါသည်။


ရာသီဥတုအခြေအနေ

အကြည့်အများဆုံး - ပြည်တွင်းသတင်း