ကြားဖြတ်ရွေးကောက်ပွဲ မဲဆန္ဒရှင်စာရင်း ဆန်းစစ် လေ့လာမှု ဆောင်ရွက်မည်

၂၀၁၅ ခုနှစ်အထွေထွေရွေးကောက်ပွဲတွင် ထုတ်ပြန်ခဲ့သည့် မဲဆန္ဒရှင်စာရင်းသည် မှားယွင်းမှု
များပြားခဲ့သည့်အတွက် လာမည့် ကြားဖြတ်ရွေးကောက်ပွဲ မတိုင်မီ လစ်လပ်မဲဆန္ဒနယ်များမှ
မဲဆန္ဒရှင်စာရင်းများကို ဆန်းစစ်လေ့လာမှု ပြုလုပ်ရန် ရည်ရွယ်ထားကြောင်း ပြည်တွင်းရွေးကောက်ပွဲ
လေ့လာစောင့်ကြည့်ရေးအဖွဲ့အစည်းဖြစ်သည့် ပေ့စ်မြန်မာ (PACE Myanmar) အဖွဲ့မှ စည်းရုံးရေးမှူး
မနေခြည်က ပြောသည်။

အထွေထွေရွေးကောက်ပွဲ ကာလတွင် ရွေးကောက်ပွဲကျင်းပမှုနှင့် မဲပေးမှုဖြစ်စဉ် များပေါ်တွင်သာ
ခြုံငုံသုံးသပ်နိုင်ခဲ့ပြီး အခြား ဆန်းစစ်လေ့လာမှုများ မပြုလုပ်နိုင်ခဲ့သဖြင့် ၂၀၁၇ ခုနှစ် ဧပြီ ၁ ရက်
ကျင်းပမည့် ကြားဖြတ်ရွေးကောက်ပွဲ လစ်လပ်မဲဆန္ဒနယ် ၁၉ နေရာရှိ မြို့နယ် ၂၂ မြို့နယ်အတွက်
မဲဆန္ဒရှင်စာရင်းများကို ဆန်းစစ်လေ့လာမှုပြုလုပ်ရန် ရည်ရွယ်ထားကြောင်း ၎င်းက ပြောသည်။

"ပြီးခဲ့တဲ့ ၂၀၁၅ ရွေးကောက်ပွဲတုန်းက မဲပေးတဲ့ ဖြစ်စဉ်မှန်လား၊ မမှန်လားကိုဘဲ ခြုံငုံတယ်။
အဲဒီကတည်းက အစိတ်အပိုင်း တစ်ခုချင်းစီကို လေ့လာတဲ့ကိစ္စတွေ ကျွန်မတို့ မလုပ်ဖြစ်ဘူး။
အခု ကြားဖြတ်မှာ မဲစာရင်းရဲ့ အရည်အသွေးကို ဆန်းစစ်လေ့လာဖို့ ကျွန်မတို့ ကြိုးစားမယ်။
ဖြစ်မလား၊ မဖြစ်မလားတော့ မပြောတတ်သေးဘူး"ဟု မနေခြည်က ပြောသည်။ မဲဆန္ဒရှင်စာရင်း
ဆန်းစစ်လေ့လာမှု ပြု လုပ်နိုင်ရန် ကွန်ပျူတာစနစ်ဖြင့် ကြည့်ရှုနိုင်မည့် စာရင်းပုံစံကို
ရွေးကောက်ပွဲကော်မရှင်ထံက ရရှိရန်လိုအပ်ကြောင်း၊ ကြားဖြတ်ရွေးကောက်ပွဲအတွက် မြို့နယ်ပေါင်း
၂၂ မြို့ နယ်တွင် ကာလရှည် စောင့်ကြည့်လေ့လာသူ ၃၀ ဦးဖြင့် စောင့်ကြည့်လေ့လာမည်ဖြစ်ပြီး
မဲဆန္ဒရှင်စာရင်း မှန်ကန်မှုအတွက် ဆန်းစစ်လေ့လာသူ ၈၀ ဦးဖြင့် လေ့လာသွားမည်ဖြစ်ကြောင်း
ပေ့စ်မြန်မာအဖွဲ့၏ အမှုဆောင် ဒါရိုက်တာ ဦးစိုင်းရဲကျော်စွာမြင့်က ပြောသည်။

"ရွေးကောက်ပွဲမှာ အားလုံးပါဝင်နိုင်မှုကိစ္စမှာ မဲဆန္ဒရှင်စာရင်းက အရေးကြီးတယ်လို့ ကျွန်တော်တို့
ယူဆတယ်။ ဒါကြောင့်မို့ ရွေးကောက်ပွဲ ကော်မရှင်အသစ်နဲ့ ပူးပေါင်းဖို့ ကျွန်တော်တို့ ကြိုးစားနေတယ်။
ရွေးကောက်ပွဲ ကော်မရှင်ဆီကနေ ကျွန်တော်တို့ လိုအပ်တာက ကွန်ပျူတာနဲ့ စစ်ဆေးလို့ရနိုင်မယ့်
ပြုပြင်ပြီးသား မဲစာရင်းလိုအပ်တယ်"ဟု ၎င်းက ပြောသည်။

ကြားဖြတ်ရွေးကောက်ပွဲ ကျင်းပမည့် မဲဆန္ဒနယ်များရှိ မဲဆန္ဒရှင်စာရင်း မှန်ကန်တိကျစွာ
ထုတ်ပြန်နိုင်ရေးအတွက် အိမ်တိုင်ရာရောက် စနစ်ဖြင့် မဲဆန္ဒရှင်စာရင်း ကောက်ခံမှုကို
နိုဝင်ဘာ ၁ ရက်မှ စတင်ပြီး ဆောင်ရွက်လျက်ရှိကြောင်း ပြည်ထောင်စု ရွေးကောက်ပွဲကော်မရှင်က
သတင်းထုတ် ပြန်ထားသည်။

ပြည်ထောင်စု ရွေးကောက်ပွဲကော်မရှင် အဖွဲ့ ညွှန်ကြားရေးမှူး ဦးသိန်းထွန်းက အိမ်တိုင်ရာရောက်
မဲဆန္ဒရှင်စာရင်းကောက်ခံမှုကို ဆောင်ရွက်နေဆဲဖြစ်ပြီး ထိုကောက်ခံ ရရှိသည့် မဲဆန္ဒရှင်စာရင်းများကို
ဒီဇင်ဘာတွင် စာရင်း ပြုစုဆောင်ရွက်သွားမည်ဖြစ်ကြောင်း၊ အရပ်ဘက်လူမှုအဖွဲ့အစည်းများ၏
မဲဆန္ဒရှင်စာရင်းရယူရန်တောင်းဆိုမှုနှင့် ပတ်သက်ပြီး တောင်းဆိုမှုပြုလုပ်သည့်အဖွဲ့ အစည်း၏
ရည်ရွယ်ချက်နှင့် လုပ်ငန်းစဉ်ပေါ်မူတည်ပြီး ဆုံးဖြတ်သွားမည်ဖြစ်ကြောင်း ပြောသည်။

"မဲဆန္ဒရှင်စာရင်းဆိုတာ နိုင်ငံသားတွေရဲ့ ကိုယ်ရေးအချက်အလက်တွေ ဖြစ်ပါတယ်။ ဒါကြောင့်
တောင်းဆိုတဲ့အဖွဲ့အစည်းရဲ့ ရည်ရွယ်ချက်နဲ့ လုပ်ဆောင်မယ့် လုပ်ငန်းစဉ်တွေ ပေါ်မူတည်ပြီး
ဆက်လက်ဆောင်ရွက်ရမှာပါ။ ကျွန်တော်တို့က ဘယ်အဖွဲ့အစည်းနဲ့ မဆို ပူးပေါင်းဆောင်ရွက်မှု
ပြုလုပ်ချင်ပါတယ်" ဟု ဦးသိန်းထွန်းက ပြောသည်။

၂၀၁၅ ခုနှစ် အထွေထွေရွေးကောက်ပွဲ တွင် ရွေးကောက်ပွဲကော်မရှင်က ထုတ်ပြန်ခဲ့သည့်
မဲဆန္ဒရှင်စာရင်းသည် အမှားအယွင်း အများဆုံးနှင့် ဝေဖန်မှုခံရမှုအများဆုံး ဖြစ်ခဲ့သော်လည်း
မည်သည့်အဖွဲ့အစည်းကမှ ဆန်းစစ်လေ့လာမှု ပြုလုပ်နိုင်ခဲ့ခြင်း မရှိကြောင်း၊ ကျင်းပမည့်
ကြားဖြတ်ရွေးကောက်ပွဲအတွက် ရွေးကောက်ပွဲကော်မရှင်က ပံ့ပိုးမှသာ မဲဆန္ဒရှင်စာရင်း
မှန်ကန်မှုအပေါ် ဆန်းစစ်လေ့လာမှု ပြုလုပ်နိုင်မည်ဖြစ်ကြောင်း၊ အိမ်တိုင်ရာရောက်
ကောက်ခံထားသည့် မဲဆန္ဒရှင်စာရင်း မည်မျှ မှန်ကန်သည်နှင့် လိုအပ်ချက်များကို
အကြံပေးနိုင်မည်ဖြစ်ကြောင်း မနေခြည်က ပြောသည်။

ပြည်သူ့လွှတ်တော် လစ်လပ်မဲဆန္ဒနယ် ကိုးနေရာ၊ အမျိုးသားလွှတ်တော် လစ်လပ်မဲဆန္ဒနယ်
သုံးနေရာနှင့် ပြည်နယ်လွှတ်တော် လစ်လပ်မဲဆန္ဒနယ် ခုနစ်နေရာအတွက် ၂၀၁၇ ခုနှစ်၊
ဧပြီ ၁ ရက်တွင် ကြားဖြတ်ရွေးကောက်ပွဲ ကျင်းပပြုလုပ်မည် ဖြစ်သည်။

ဤအကြောင်းအရာနှင့် ပက်သက်၍ ထင်မြင်ချက်ပေးလိုပါက ...
[email protected] သို့ ပေးပို့နိုင်ပါသည်။


ရာသီဥတုအခြေအနေ

အကြည့်အများဆုံး - ပြည်တွင်းသတင်း