အကျဉ်းထောင်အရာရှိများကို လူအခွင့်အရေး သင်တန်းပို့ချပေးနေ

ရန်ကုန်မြို့ရှိ အင်းစိန်အကျဉ်းထောင်ကို ဝေဟင်က တွေ့ရစဉ်။ ဓာတ်ပုံ - အီးပီအေရန်ကုန်မြို့ရှိ အင်းစိန်အကျဉ်းထောင်ကို ဝေဟင်က တွေ့ရစဉ်။ ဓာတ်ပုံ - အီးပီအေ

မြန်မာနိုင်ငံတစ်ဝန်းရှိ အကျဉ်းထောင်များတွင် အကျဉ်းသားများနှင့် အကျဉ်းထောင်ဝန်ထမ်းများအကြား
ကောင်းမွန်သည့် ဆက်ဆံရေးဖြစ်ပေါ်လာစေရန် အကျဉ်းထောင်အရာရှိများကို လူအခွင့်အရေးနှင့်
ပက်သက်သည့် သင်တန်းများပို့ချပေးမည်ဟု ပြည်ထဲဝန်ကြီးဌာန၊ အကျဉ်းဦးစီးဌာန (နေပြည်တော်)
ဒုတိယညွှန်ကြားရေးမှူး ဦးမင်းထွန်းစိုးက ပြောသည်။

အဆိုပါသင်တန်းကို မြန်မာနိုင်ငံအမျိုးသား လူ့အခွင့်ရေးဆိုင်ရာ ကော်မရှင်နှင့် အကျဉ်းဦးစီးဌာနတို့
ပူးပေါင်းဆောင်ရွက်မည်ဖြစ်ပြီး အကျဉ်းဝန်ထမ်းအရာရှိ ၁ဝဝ ကို အထက်မြန်မာပြည်နှင့်
အောက်မြန်မာပြည် နှစ်ပိုင်းခွဲပြီး သင်တန်းပေးသွားမည်ဖြစ်ကာ အောက်မြန်မာပြည်အတွက်
ရန်ကုန်မြို့ အင်းစိန် ဝန်ထမ်းလေ့ကျင့်ရေးသင်တန်းကျောင်းတွင် ယခုလ ၁၂ ရက်နှင့် ၁၃ ရက်တို့တွင်
လည်းကောင်း၊ အထက်မြန်မာပြည် အတွက် မန္တလေးမြို့ရှိ ဝန်ထမ်းလေ့ကျင့်ရေးသင်တန်းကျောင်းတွင်
ယခုလ ၁၅ ရက်နှင့် ၁၆ ရက်တို့တွင်လည်းကောင်း သင်ကြားပေးမည်ဟု ဦးမင်းထွန်းစိုးက ပြောသည်။

''ရန်ကုန်မှာတော့ ဒီနေ့ကစတင်ပြီးတော့ သင်တန်းပေးနေပါတယ်။ လူအခွင့်အရေးကော်မရှင်က
ပြည်ထဲရေးဝန်ကြီးဌာနကို တင်ပြလာတော့ ဝန်ကြီးဌာနက ခွင့်ပြုပေးလို့ အကျဉ်းဦးစီးဌာနနဲ့
ပူးပေါင်းဆောင်ရွက် တာပါ။ မြန်မာနိုင်ငံတစ်ဝန်းရှိ အကျဉ်းထောင်တွေက အဆင့်မြင့်အရာရှိတွေကို
ပထမဆုံး စတင်သင်တန်းပေးတာပါ။ သူတို့ကတစ်ဆင့် လက်အောက်က ဝန်ထမ်းတွေကို ပြန်လည်
ပို့ချပေးသွားမှာပေါ့။ ဒီသင်တန်းတွေ ပြီးသွားရင်တော့ လူအခွင့်အရေးကော်မရှင်က
အကျဉ်းထောင်တွေကို ဝင်ရောက် စစ်ဆေးတာတွေ လုပ်ပါလိမ့်မယ်'' ဟု ၄င်းက ပြောသည်။

မြန်မာနိုင်ငံတွင် အကျဉ်းထောင် ၄၆ ထောင်ရှိပြီး အကျဉ်းသားများ၏ ကျန်းမာရေး၊ နေထိုင်
စားသောက်မှုပုံစံများကို အကျဉ်းဦးစီးဌာနဝန်ထမ်းများက ကောင်းစွာသိရှိနာလည်ပြီး အကျဉ်းထောင်
ဝန်ထမ်းများနှင့် အကျဉ်းသားများအကြား ကောင်းမွန်သည့် ဆက်ဆံရေး တိုးမြင့်လာစေရန်
ရည်ရွယ်၍ သင်တန်းပေးရခြင်းဖြစ်သည်။

မကြာသေးမီက မြင်းခြံအကျဉ်းထောင်တွင် လူအခွင့်အရေးချိုးဖောက်ခံရမှုများ တွေ့ရှိပြီးနောက်
ယခုကဲ့သို့ လေ့ကျင့်ရေးသင်တန်းအစီအစဉ်ကို စတင်ခဲ့ခြင်းဖြစ်ကြောင်းအမျိုးသားလူ့အခွင့်အရေး
ကော်မရှင်အဖွဲ့ဝင်ဦးယုလွင်အောင်က ပြောသည်။

''ကျွန်တော်တို့ မြင်းခြံအကျဉ်းထောင် ကိစ္စပြီးတော့ အကြံပြုစာတွေကို အကျဉ်းဦးစီးကို
ပို့တယ်ပေါ့နော်၊ ဒီလိုမျိုး လူအခွင့်အရေးချိုးဖောက်မှုတွေဟာ မြင်းခြံအကျဉ်းထောင် တစ်ခုတည်းမှာ
မဟုတ်ဘဲ အခြား အကျဉ်းထောင်တွေမှာလည်း ရှိနေနိုင်တော့ ဒီလိုမျိုး သင်တန်းပြုလုပ်ဖို့
စတင်ရည်ရွယ်ခဲ့တာပါ'' ဟု ၄င်းက ပြောသည်။

ယခုလက်ရှိကျင်းပလျက်ရှိသော လူ့အခွင့်အရေးဆိုင်ရာ သင်တန်းကို ဆွီဒင်နိုင်ငံအခြေစိုက်ွ
Rawul Wallenberg Institue (RWI) အဖွဲ့အစည်းနှင့် ပူးပေါင်းဆောင်ရွက်ခြင်းဖြစ်ပြီး ၄င်း
အဖွဲ့အစည်းက ငွေကြေးထောက်ပံ့ခြင်းဖြစ်ပြီး သင်တန်းအတွက် နိုင်ငံတကာလူ့အခွင့်အရေး
ပညာရှင်ကိုလည်း ငှားရမ်းပေးခဲ့ကြောင်း ဦးယုလွင်အောင်က ပြောသည်။

အမျိုးသားလူအခွင့်အရေးကော်မရှင်က အပြည်ပြည်ဆိုင်ရာ လူ့အခွင့်အရေးနေ့အထိမ်းအမှတ်အဖြစ်
ကြေညာချက်တစ်စောင်ထုတ်ပြန်ထားပြီး ယင်းကြေညာချက်တွင် ကော်မရှင်သို့ ၂ဝ၁၆ ခုနှစ်
ဇန်နဝါရီ ၁ ရက်မှ လက်ရှိအချိန်အထိ လူ့အခွင့်အရေးချိုးဖောက်မှုကြောင့် တိုင်ကြားလာသည့်
တိုင်ကြားစာပေါင်း ၄၉၅ စောင်ရှိပြီး လုပ်ထုံးလုပ်နည်းနဲ့အညီ ဆောင်ရွက်နေကြောင်း၊
ကော်မရှင်သည် အကျဉ်းထောင်များ၊ ရဲအချူပ်ခန်းများ၊ ထိန်းသိမ်းစောင့်ရှောက်ရေးစခန်းများကို
စစ်ဆေးခဲ့ပြီး အကြံပြုချက်များထုတ်ပြန်ခြင်း၊ ယင်းဌာနများရှိ ဝန်ထမ်းများကို သင်တန်းများ
ပို့ချမည်ဖြစ်ကြောင်း ထုတ်ပြန်ထားသည်။

''အရင်တုန်းကတော့ ဟုတ်တာပေါ့။ အကြောက်တရားနဲ့ အုပ်ချူပ်ခဲ့တယ်ဆိုတာ၊ ဒါပေမဲ့ အခုနောက်ပိုင်း
ဒီလိုမဟုတ်တော့ပါဘူး။ အကြောက်တရားကင်းစင်ပြီးတော့ အားလုံး နေမှုထိုင်အဆင်ပြေအောင်
ဆောင်ရွက်ပေးရပါတယ်။ နောက်တစ်ခုက ကျွန်တော်တို့ဆီရောက်လာလို့ ပညာတစ်ပိုင်းတစ်စ
ဖြစ်နေတဲ့လူတွေဆိုရင်လည်း ပညာ ဆက်လက်သင်ကြားခွင့်ရအောင် ဆောင်ရွက်ပေးတာ
တွေရှိပါတယ်။ လုပ်စရာတွေ ကတော့ ရှိနေပါသေးတယ်။ အားလုံးကောင်းဖို့ဆိုရင် ရဲဝန်ထမ်းတွေ၊
အကျဉ်းထောင်ဝန်ထမ်းတွေ အားလုံးညှိနှိုင်းဆောင်ရွက်ရမှာ ဖြစ်မှာပါ''ဟု ဦးမင်းထွန်းစိုးက
ပြောသည်။

ဤအကြောင်းအရာနှင့် ပက်သက်၍ ထင်မြင်ချက်ပေးလိုပါက ...
[email protected] သို့ ပေးပို့နိုင်ပါသည်။


ရာသီဥတုအခြေအနေ

အကြည့်အများဆုံး - ပြည်တွင်းသတင်း