တစ်သွေး၊ တစ်သံ၊ တစ်မိန့်သည် ဒီမိုကရေစီမဟုတ်ကြောင်း နိုင်ငံတော်၏ အတိုင်ပင်ခံပုဂ္ဂိုလ်ပြော

မြန်မာ့ဒီမိုကရေစီ ကူးပြောင်းမှုဖြစ်စဉ် သုံးသပ်ဆွေးနွေးပွဲဖွင့်ပွဲအပြီး ဒေါ်အောင်ဆန်းစုကြည်နှင့်အတူ အမှတ်တရဓာတ်ပုံရိုက်ကူးနေကြစဉ်။ ပြည့်သက်ဖြိုး/မြန်မာတိုင်း(မ်)မြန်မာ့ဒီမိုကရေစီ ကူးပြောင်းမှုဖြစ်စဉ် သုံးသပ်ဆွေးနွေးပွဲဖွင့်ပွဲအပြီး ဒေါ်အောင်ဆန်းစုကြည်နှင့်အတူ အမှတ်တရဓာတ်ပုံရိုက်ကူးနေကြစဉ်။ ပြည့်သက်ဖြိုး/မြန်မာတိုင်း(မ်)

ဒီမိုကရေစီလမ်းကြောင်းပေါ် လျှောက်လှမ်းရာတွင် တစ်သွေး၊ တစ်သံ၊ တစ်မိန့်သည်
ဒီမိုကရေစီမဟုတ်ကြောင်း နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က
သြဂုတ်လ ၁၁ ရက်နေ့က ပြောကြားလိုက်သည်။

အဆိုပါနေ့ကနေပြည်တော်ရှိ မြန်မာအပြည်ပြည်ဆိုင်ရာ ကွန်ဗင်းရှင်းစင်တာ(၂)တွင် ပြုလုပ်သည့်
'မြန်မာ့ဒီမိုကရေစီကူးပြောင်းမှုဖြစ်စဉ် သုံးသပ်ဆွေးနွေးပွဲ' တွင် ၄င်းက အထက်ပါအတိုင်း
ပြောကြားခဲ့ခြင်းဖြစ်သည်။

"အမြင်မတူခြင်းဟာ ကောင်းပါတယ်၊ အားလုံးဟာ တစ်ပုံစံတည်းပဲ စဉ်းစားမယ်၊ တစ်ပုံစံတည်းပဲ
တွေးမယ်ဆိုရင် တကယ်တော့ ဒါကဒီမိုကရေစီရဲ့ အနှစ်သာရနဲ့ မကိုက်ညီပါဘူး၊ ဒါကတစ်သွေး၊
တစ်သံ၊ တစ်မိန့်ပေါ့နော်၊ တစ်သွေး၊ တစ်သံ၊ တစ်မိန့်ဆိုတာ ဒီမိုကရေစီမဟုတ်ပါဘူး"ဟု
နိုင်ငံတော်၏ အတိုင်ပင်ခံပုဂ္ဂိုလ်ကပြောသည်။

ဒီမိုကရေစီတွင် တစ်သွေး၊ တစ်သားတည်းဖြစ်ရန်အတွက် ကောင်းသော်လည်း တစ်သံတည်းထွက်ရန်
မလိုအပ်သည့်အပြင် တစ်မိန့်ဆိုသည်မှာလည်း လုံးဝ မသင့်လျော်ကြောင်း ၎င်းက ဆိုသည်။

"ဒီမိုကရေစီမှာဆိုရင် အသံတွေ အမျိုးမျိုးထွက်ပေမဲ့လည်း အောက်ခြေအားဖြင့် ကျွန်မတို့ဟာ
တစ်သွေးတည်း၊ တစ်သားတည်းညီညွတ်မှု လိုပါတယ်၊ ဒီညီညွတ်မှုကနေထွက်လာတဲ့
အသံအမျိုးမျိုးကို ညှိနိုင်ခြင်းဟာ ဒီမိုကရေစီရဲ့ စွမ်းရည်တစ်ခုပဲဖြစ်ပါတယ်"ဟု
ဒေါ်အောင်ဆန်းစုကြည်ကပြောသည်။

ထိုသို့ ညှိရာတွင် အမိန့်အရမဟုတ်ဘဲ အများစု၏ သဘောတူညီချက်အရ အဖြေတစ်ခုကို
ဖော်ထုတ်ပြီး အကောင်အထည်ဖော်ထုတ်ခြင်းသည် ဒီမိုကရေစီ၏ ရိုးရိုးလေးလမ်းစဉ်သာ ဖြစ်သည်ဟု
၎င်းက ဆိုသည်။

"ဒီရိုးရိုးလေးလမ်းစဉ်ဆိုပေမဲ့လည်း လျှောက်လို့ကတော့ အင်မတန်မှ ခက်ခဲပါတယ်"ဟု နိုင်ငံတော်၏
အတိုင်ပင်ခံပုဂ္ဂိုလ်ကပြောသည်။

ထို့အပြင် ပြည်သူ၊ ပြည်သားများအနေဖြင့် ဒီမိုကရေစီစိတ်ဓာတ်မွေးမြူနိုင်မှသာ စစ်မှန်သော
ဒီမိုကရေစီရရှိမည်ဟု နိုင်ငံတော်၏ အတိုင်ပင်ခံပုဂ္ဂိုလ်က ထည့်သွင်းပြောကြားသည်။

"တကယ့်ဒီမိုကရေစီရဖို့ဆိုတာ ကျွန်မတို့ဟာ ဒီမိုကရေစီစနစ်နဲ့ ကိုက်ညီတဲ့ စိတ်ဓာတ်မွေးမြူနိုင်မှ
ရမှာ၊ ဒီလိုမွေးမြူနိုင်မှ ကျွန်မတို့ရဲ့ ဒီမိုကရေစီဟာလည်း တည်တံ့ခိုင်မြဲနိုင်မှာ ဖြစ်ပါတယ်၊ ဒါကြောင့်
ကျွန်မတို့ စိတ်ဓာတ်တွေကို ပြုပြင်ဖို့လိုပါတယ်"ဟု ၎င်းက ပြောသည်။

နိုင်ငံပြုပြင်ပြောင်းလဲရေးအတွက် စတင်လှုပ်ရှားရာတွင် ဒီမိုကရေစီတော်လှန်ရေးကြီးဟု တစ်ချို့က
ခေါ်ဆိုနေကြပြီးတော်လှန်ရေးဆိုသည်မှာ စိတ်ဓာတ်တော်လှန်ရေး ဖြစ်ရမည်ဟု
ဒေါ်အောင်ဆန်းစုကြည်က ဆိုသည်။

"အင်္ဂလိပ်လိုပြောရရင်တော့ Mind-Set ပေါ့နော်၊ ကိုယ့်ရဲ့ အတွေးအခေါ်၊ အမြင်၊ အနေအထား၊
ရပ်တည်မှု အားလုံးပေါ့၊ ဒီဟာတွေကို ကျွန်မတို့ မပြုပြင်ပဲနဲ့ ဒီမိုကရေစီကို ကျွန်မတို့နိုင်ငံအတွက်
အကျိုးရှိအောင်လုပ်လို့ မရပါဘူး"ဟု နိုင်ငံတော်၏ အတိုင်ပင်ခံပုဂ္ဂိုလ်ကပြောသည်။

ဒီမိုကရေစီဆိုသည်မှာ အခွင့်အရေးနှင့် အတူတာဝန်များလည်း ပါရှိလာပြီး ထိုအခွင့်အရေးများကို
အမျိုးသားဒီမိုကရေစီအဖွဲ့ချုပ်ပါတီအစိုးရက တစ်နှစ်ခွဲနီးပါးကာလအတွင်း သုံးစွဲခဲ့သည်ဟု
၎င်းက ဆိုသည်။

"တစ်ချို့တွေက ဒီမိုကရေစီအခွင့်အရေးတွေကိ်ု အပြုသဘောဆောင်တဲ့ အပေါင်းလက္ခဏာဆောင်တဲ့
ပုံစံနဲ့ သုံးစွဲကြတယ်၊ တစ်ချို့တွေကတော့ ဒီလိုမဟုတ်ဘဲနဲ့ ဒီမိုကရေစီအခွင့်အရေးတွေကို
အနုတ်လက္ခဏာဆောင်တဲ့ ပုံစံနဲ့ သုံးစွဲကြတယ်၊ ဘယ်သူတွေက ဒီလိုသုံးစွဲနေတယ်ဆိုတာတော့
ကျွန်မတို့ရဲ့ ပြည်သူ ပြည်သားတွေက သိမယ်လို့ ထင်ပါတယ်"ဟု ဒေါ်အောင်ဆန်းစုကြည်က
ပြောသည်။

မြန်မာနိုင်ငံ၏ ဒီမိုကရေစီပြုပြင်ပြောင်းလဲရေးသည် ရည်ရွယ်ချက်မှန်ကန်ရန် လိုအပ်သကဲ့သို့
လုပ်ပုံ၊ လုပ်နည်းလမ်းစဉ် မှန်ကန်ရန်အတွက်လည်းအရေးကြီးကြောင်း ၎င်းက ဆိုသည်။

"ပန်းတိုင်တစ်ခုဆိုတာ ပန်းတိုင်ကိုပဲ ကြည့်လို့မဖြစ်ပါဘူး၊ ပန်းတိုင်ကိုသွားတဲ့ လမ်းကလည်း
မှန်ဖို့လိုပါတယ်၊ တစ်ချို့ကဆိုရင် ပန်းတိုင်ရောက်ရင်ပြီးရော ဘယ်လိုနည်းနဲ့ သွားသွားဆိုပြီး
ဒီလိုမြင်ကြပါတယ်၊ ကျွန်မကတော့ ဒီလိုမမြင်ပါဘူး၊ ပန်းတိုင်ကိုသွားတဲ့လမ်းမှာ သွားပုံသွားနည်း
မမှန်လို့ရှိရင် ပန်းတိုင်ကိုရောက် သွားတဲ့အခါကျရင် ကိုယ်မျှော်မှန်းသိလို မဖြစ်တတ်ပါဘူး၊
ဒီပန်းတိုင်ကိုက ပုံပျက်ပန်းပျက်၊ ဂုဏ်သိက္ခာမဲ့ ဖြစ်သွားနိုင်ပါတယ်၊ ဘာဖြစ်လို့လဲဆိုတော့
ရောက်အောင်လာတဲ့ လမ်းကဂုဏ်သိက္ခာမဲ့ခဲ့လို့ရှိရင် ဒီလိုပဲ ဖြစ်မှာပါ၊ ဒါကြောင့်
ပန်းတိုင်ရောက်အောင်လုပ်တဲ့ နည်းလမ်းတွေကလည်းမှန်ကန်ဖို့ လိုတယ်၊ သိက္ခာရှိဖို့လိုတယ်"ဟု
နိုင်ငံတော်၏ အတိုင်ပင်ခံပုဂ္ဂိုလ်ကပြောသည်။

မြန်မာနိုင်ငံတွင် ပြည်တွင်းစစ်ငြိမ်းချမ်းရေးကို ဦးစားပေးပြီး ဆောင်ရွက်နေပြီး ပြည်တွင်စစ်ငြိမ်းရေး
ရရှိရန် လုပ်ဆောင်နေသည်နှင့် တစ်ပြိုင်နက်တည်းတိုင်းရင်းသား ပြည်သူ၊ ပြည်သားများအားလုံး
ဖွံ့ဖြိုးတိုးတက်ရန်အတွက်လည်း ကြိုးစားနေသည်ဟု ၎င်းက ထည့်သွင်းပြောကြားသည်။

"တစ်ချို့ကဆိုရင် ကျွန်မတို့နိုင်ငံမှာ ဒီမိုကရေစီမရှိခဲ့တာ အင်မတန်ကြာလို့ ကျွန်မတို့နိုင်ငံသူ၊
နိုင်ငံသားများဟာ ဒီမိုကရေစီနိုင်ငံရေး နားမလည်ဘူးလို့ ထင်ကြပါတယ်၊ ဥပဒေအရ၊
လုပ်ထုံးလုပ်နည်းအရ၊ အုပ်ချုပ်ရေးစနစ်အရ နားမလည်တာရှိနိုင်ပါတယ်၊ ဒါပေမဲ့လည်း ကျွန်မတို့ရဲ့
ပြည်သူ၊ ပြည်သားများဟာမှန်ကန်မှုနဲ့ မမှန်ကန်မှုကိုတော့ ခွဲခြားပြီး မြင်တဲ့လူကများပါတယ်၊
ဒါကြောင့်မို့ ဒီမိုကရေစီပြုပြင် ပြောင်းလဲရေးဟာမှန်ကန်တဲ့ ပုံစံနဲ့ သွားနေသလား၊ မသွားနေဘူးလား
ဆိုတာ အသိဆုံးကတော့ ကျွန်မတို့ရဲ့ ပြည်သူ၊ ပြည်သားတွေပါပဲ၊ မှန်ကန်တဲ့ပုံစံနဲ့ သွားရင်တောင်မှ
အားလုံးဟာ ချက်ချင်းလက်ငင်းကောင်းသွားဖို့ဆိုတာ မဖြစ်နိုင်ပါဘူး၊ နေရာတိုင်းမှာလည်း
အောင်မြင်မှုရဖို့ဆိုတာမဖြစ်နိုင်ပါဘူး၊ ကျွန်မတို့ အဖက်ဖက်က ကြိုးစားရပါတယ်"ဟု နိုင်ငံတော်၏
အတိုင်ပင်ခံပုဂ္ဂိုလ်ကပြောသည်။

မြန်မာနိုင်ငံသည် ဒီမိုကရေစီအသွင်ကူးပြောင်းရေးအတွက် နှောင့်နှေးနေသည့် နိုင်ငံဖြစ်ပြီး
ဒီမိုကရေစီအမြစ် တွယ်ရေးအတွက် ကြိုးပမ်းမှုတွင် စီးပွားရေး၊ နိုင်ငံရေး၊ လူမှုရေးနှင့် နိုင်ငံအတွင်းရှိ
ပြဿနာပေါင်းစုံဘက်က ကြည့်ရမည်ဟု ၎င်းက ဆိုသည်။

"တစ်ချို့ကဆိုရင် ဒီမိုကရေစီအမြင် ကူးပြောင်းရေးဘက်ကနေပဲ မြင်ပါတယ်၊ တစ်ဘက်တည်းက
ကြည့်လို့မရပါဘူး၊ ကိုယ်လိုချင်တဲ့ ဘက်ကိုပဲကိုယ်ကနေပြီးတော့ ဦးစားပေးချင်တဲ့ ဘက်ကကြည့်လို့
မရပါဘူး၊ ဘယ်ဟာတွေကိုဦးစားပေးရမှာလဲဆိုပြီးတော့ အစိုးရများကဆုံးဖြတ်ဖို့
တာဝန်ရှိလာနိုင်ပါတယ်"ဟု ဒေါ်အောင်ဆန်းစုကြည်ကပြောသည်။

အစိုးရအနေဖြင့် တာဝန်အရ ဆုံးဖြတ်ရာတွင်လည်းမှန်ကန်သည့် ဆုံးဖြတ်ချက်များဖြစ်ရန် မျှော်လင့်ပြီး
အမှားအယွင်းရှိသည်ဆိုပါက ပြုပြင်ရန် မ၀ံ့မရဲမဖြစ်သင့်ဘဲ သတ္တိရှိရှိ ပြုပြင်ရမည်ဖြစ်ကြောင်း၊
ပြုပြင်ပြောင်းလဲရေးကိုအမြန်ဆုံး ပြုလုပ်သွားမည်ဖြစ်ကြောင်းနှင့် ဒီမိုကရေစီယဉ်ကျေးမှုကို
ထူထောင်ရန် ပြည်သူအားလုံး ပါဝင်ဖို့ အလွန်အရေးကြီးကြောင်း ၎င်းက ဆိုသည်။

"အစိုးရအဖွဲ့ဝင်တွေကို ပြောရမယ်ဆိုလို့ရှိရင် ကိုယ်နဲ့ သက်ဆိုင်တဲ့ တာဝန်တွေ
ကိုယ်ကျေပြွန်ရဲ့လား၊ ကိုယ့်တာဝန်တွေ ကျေပြွန်တဲ့နေရာမှာအမြင်ကျယ်ကျယ်နဲ့ ကျေပြွန်အောင်
ထမ်းဆောင်နေရဲ့လား၊ ငါ့ဌာနကအောင်မြင်ရင်ပြီးရော၊ ငါ့တို့လုပ်လို့ရရင်ပြီးရော၊ ကျန်တဲ့သူတွေ
ဘယ်လိုပဲဖြစ်ဖြစ်ဆိုတဲ့ စိတ်ဓာတ်တွေနဲ့ ကျွန်မတို့ လုပ်လို့မဖြစ်ပါဘူး၊ ဒီတော့ အမြင်ကျယ်မှု၊
တာဝန်ကျေမှုက အင်မတန်မှ အရေးကြီးပါတယ်၊ အစိုးရဘက်က တာဝန်မကျေလို့ရှိရင်၊
အမြင်မကျယ်လို့ရှိရင် ပြည်သူတွေဘက်ကဘယ်လိုလုပ် တာဝန်ကျေမလဲ၊ ဘယ်လိုလုပ်
အမြင်ကျယ်မှာလဲ၊ အမြင်မကျယ်ဘူးဆိုလို့ရှိရင် ငြိမ်းချမ်းမှု ရဖို့ဆိုတာအင်မတန်မှ ခက်ပါတယ်၊
ဘာဖြစ်လို့လဲဆိုတော့ ငြိမ်းချမ်းရေးရဲ့ အခြေခံဟာတစ်ဦးနဲ့ တစ်ဦးလေးစားခြင်း၊ တစ်ဦးပေါ်တစ်ဦး
နားလည်မှုရှိခြင်းပဲဖြစ်ပါတယ်"ဟု နိုင်ငံတော်၏ အတိုင်ပင်ခံပုဂ္ဂိုလ်ကပြောသည်။

ထို့အပြင် အမျိုးသားဒီမိုကရေစီအစိုးရ၏ ဒုတိယနှစ် သက်တမ်းကာလအတွင်း ရောက်ရှိလာချိန်တွင်
မည်သည့် ပြောင်းလဲမှုမျိုးကိုမဆို အမှန်တကယ် ခိုင်မာတည်တံ့ရန်အတွက် 'ပြည်သူနှင့် အတူ'
ဆောင်ပုဒ်ကို ကိုင်စွဲထားပြီး ပြည်သူလူထုမပါလျှင် မဖြစ်ဟုဒေါ်အောင်ဆန်းစုကြည်က
ထပ်လောင်းပြောကြားသည်။

"အစိုးရဆိုတာဟာ ဒီမိုကရေစီနည်းအရ ပြည်သူလူထုက ရွေးချယ်တင်မြှောက်တဲ့ အစိုးရသာ
ဖြစ်ရပါတယ်၊ ပြည်သူလူထုကရွေးချယ်တင်မြှောက်တဲ့ အစိုးရကသာ ပြည်သူနဲ့နီးစပ်မှုရှိမယ်၊
ပြည်သူတွေရဲ့ စိတ်နေစိတ်ထားသဘောထားဆန္ဒတွေကိုလေးစားရမယ်၊ နားလည်မယ်၊
တန်ဖိုးထားမယ်၊ အကောင်အထည်ဖော်ဖို့ရာ အတတ်နိုင်ဆုံးကြိုးစားမှ ဖြစ်ပါမယ်"ဟု
၎င်းက ပြောသည်။

ထို့ကြောင့် အတိတ်ကိုသင်ခန်းစာယူသုံးစွဲရန် အလွန်အရေးကြီးပြီး လက်ရှိ မြန်မာနိုင်ငံ၏
ဒီမိုကရေစီအသွင်ကူးပြောင်းရေးနှင့် ပတ်သတ်ပြီး ပြုလုပ်သည့် ဆွေးနွေးပွဲတွင် လက်တွေ့ကျသော
အဖြေရှာရန် ဒေါ်အောင်ဆန်းစုကြည်က တိုက်တွန်းခဲ့သည်။

"ဒီမိုကရေစီပြုပြင်ပြောင်းလဲမှုကို လျှောက်တဲ့ လမ်းမှာဆိုရင် အတိတ်ကို မမေ့နိုင်လို့ အတိတ်ရဲ့
သားကောင်အဖြစ်မှ လွတ်မြောက်အောင် မရုန်းကန်နိုင်လို့ ဒီလိုကိုယ့်ကိုယ်ကို အတိတ်ကနေပြီးတော့
လွတ်လပ်အောင်မလုပ်နိုင်တဲ့ ကိစ္စတွေကြောင့်မို့လို့ အထစ်အငေါ့တွေ အများကြီးဖြစ်ပါတယ်၊
အတိတ်ဆိုတာဟာ သင်ခန်းစာယူဖို့ပါပဲ၊ ကျွန်မတို့အတွက် အရေးကြီးဆုံးကတော့ ပစ္စုပ္ပန်ပဲ
ဖြစ်ပါတယ်၊ ပစ္စပ္ပန်မှာ ဒီမိုကရေစီအတွက် ရုန်းကန်တဲ့နေရာမှာ ကျွန်မခဏခဏပဲပြောပါတယ်၊
ရိုးရိုးလေးစဉ်းစားပါ၊ ကိုယ်တိုင်ကဒီမိုကရေစီအတွက် ဘာလုပ်နေကြလဲ၊ ဘာလုပ်ပေးကြလဲ၊
ဒါဟာအစိုးရအဖွဲ့ဝင်တွေမှာတော့ အဓိကတာဝန်ရှိပါတယ်၊ သို့သော်ငြားလည်း ပြည်သူပြည်သား
တစ်ယောက်ချင်းမှာလည်း တာဝန်ရှိပါတယ်"ဟု ၎င်းက ပြောသည်။

ဒီမိုကရေစီစနစ်အတွင်း နေထိုင်သူသည် တစ်ဦးကိုတစ်ဦး လေးစားမှုက အရေးကြီးပြီး မတူညီသည့်
သဘောတရားများ ရှိသော်လည်း လေးလေးစားစားနှင့် သိက္ခာရှိရှိ ဆက်ဆံရန်လည်း
အရေးကြီးကြောင်း ဒေါ်အောင်ဆန်းစုကြည်က ဆိုသည်။

'မြန်မာ့ဒီမိုကရေစီကူးပြောင်းမှုဖြစ်စဉ် သုံးသပ်ဆွေးနွေးပွဲ' သို့ ကာကွယ်ရေး၊ ပြည်ထဲရေးနှင့်
ပြန်ကြားရေး ၀န်ကြီးဌာနတို့ရှိ ပြည်ထောင်စုဝန်ကြီးများအပါအ၀င် ပြည်သူ့လွှတ်တော်ဥက္ကဋ္ဌနှင့်
ဒုဥက္ကဋ္ဌ၊ အမျိုးသားလွှတ်တော်ဒုဥက္ကဋ္ဌ၊ ပြည်ထောင်စုလွှတ်တော် ဥပဒေရေးရာနှင့် အထူးကိစ္စရပ်များ
လေ့လာဆန်းစစ်သုံးသပ်ရေးကော်မရှင် ဥက္ကဋ္ဌ၊ အမျိုးသားလုံခြုံရေးဆိုင်ရာ အကြံပေးပုဂ္ဂိုလ်၊
နိုင်ငံတကာသံတမန်များနှင့် မြန်မာနိုင်ငံသတင်းမီဒီယာကောင်စီတို့ တက်ရောက်ခဲ့ကြပြီး
ဆွေးနွေးပွဲကို သြဂုတ်လ ၁၃ ရက်နေ့အထိ ကျင်းပသွားမည်ဖြစ်သည်။

ဤအကြောင်းအရာနှင့် ပက်သက်၍ ထင်မြင်ချက်ပေးလိုပါက ...
[email protected] သို့ ပေးပို့နိုင်ပါသည်။


ရာသီဥတုအခြေအနေ

အကြည့်အများဆုံး - ပြည်တွင်းသတင်း