ပုဂ္ဂလိကကုမ္ပဏီငါးခု အာမခံခြောက်မျိုး လုပ်ကိုင်ခွင့်ရ

ပြည်တွင်းပုဂ္ဂလိက အာမခံကုမ္ပဏီ ငါးခုအား အာမခံအမျိုးအစားခြောက်မျိုး လုပ်ကိုင်ခွင့်ကို
နှစ်ပေါင်း ၅၀ ကျော်အတွင်း ပထမဆုံးအဖြစ် မေလ၂၅ ရက် နေ့တွင် စတင်ပေးအပ်ခဲ့ကြောင်း
ဘဏ္ဍာရေးနှင့် အခွန်ဝန်ကြီးဌာန ဒုတိယ၀န်ကြီး ဒေါက်တာမောင်မောင်သိမ်းက ပြောသည်။

ဘဏ္ဍာရေးနှင့် အခွန်ဝန်ကြီးဌာန၊ အာမခံကြီးကြပ်ရေးလုပ်ငန်းအဖွဲ့က စတင်လုပ်ကိုင်ခွင့်လိုင်စင်
ချပေးသော ကုမ္ပဏီငါးခုမှာ အောင်မြင့်မိုရ်မင်း၊ အောင်သစ္စာဦး၊ အိုင်ကေဘီဇက်အာမခံ၊ နိုင်ငံသား
စီးပွားရေးအများပိုင်လီမိတက်နှင့် ဂရန်းဂါးဒီးယမ်း အများပိုင်လီမိတက်တို့ ဖြစ်သည်။

"မနေ့ကအထိ အာမခံကုမ္မဏီဟာ တစ်ခုတည်းပါပဲ။ လွန်ခဲ့တဲ့ ၁၀ နှစ်ရဲ့ ဟိုဘက်ထက်စာရင်
အခုက အာမခံကို လူတွေပိုသိလာပါတယ်။ တစ်ယောက်တည်းလုပ်တာထက် လူတွေအများကြီး
က လုပ်မယ်ဆိုရင် လှုပ်ခတ်သွားတဲ့သဘောပါပဲ။ ပိုပြီးတော့ လုပ်နိုင်လာတာ ကောင်းပါတယ်။
အရင်တုန်းက တစ်ယောက်တည်းလုပ်ရာကနေ အခု ၁၀ ယောက် ၀ိုင်းလုပ်ဖို့ကြိုးစားတဲ့အခါ
ကျတော့ ပိုပြီးတော့ စည်ကားသွားတယ်၊ ကျယ်ပြန့်သွားတယ်။ မြန်မာနိုင်ငံရဲ့ တိုးတက်လာတဲ့
အနေအထားအရ မြန်မာ့အာမခံတစ်ခုတည်းပဲ လက်ဝါးကြီးအုပ် လုပ်ကိုင်နေလို့ မရပါဘူး။
ဒါကြောင့် ပုဂ္ဂလိကကိုလုပ်ကိုင်ခွင့်ပေးရတာပါ"ဟု ဒေါက်တာမောင်မောင်သိမ်းက ပြောသည်။

ပုဂ္ဂလိကအာမခံလုပ်ငန်း ၁၂ ခု အနက်မှ ငါးခုသာ စတင်လုပ်ကိုင်ခွင့် လိုင်စင်ပေးရခြင်းနှင့်
ပတ်သက်၍ "ပုဂ္ဂလိကအာမခံလုပ်ငန်းလုပ်ကိုင်ခွင့် အတွက် မြန်မာ့အာမခံကြီးကြပ်ရေးလုပ်ငန်းက
လျှောက်လွှာအစောင် ၂၀၀ ကျော် ရောင်းချခဲ့ရပါတယ်။ အမှန်တကယ် လာလျှောက်တဲ့အချိန်မှာ
တော့ ကုမ္ပဏီ ၂၀ ကျော်ပဲ လာလျှောက်ကြတာပါ။ အဲဒီထဲကမှ မြန်မာပြည်ရဲ့ စီးပွားရေး၊ လူဦးရေ
အခြေနေတွေကို တွက်ချက်ပြီး သင့်တော်မယ့်စံနှုန်းတွေ သတ်မှတ်ပြီး ကုမ္ပဏီ ၁၂ ခုကိုပဲရွေးချယ်
ခဲ့တာပါ။ ဒီထဲကမှ ကုမ္ပဏီခုနစ်ခု မတည်ငွေသွင်းပြီးပါပြီ။ ငါးခုကိုပဲ အခုလုပ်ကိုင်ခွင့်ပြုပေးသေး
တယ် ဆိုတာကတော့ ကျန်တဲ့ကုမ္ပဏီနှစ်ခုကလည်း ငွေအကျေသွင်းပြီးပေမယ့် ရုံးပိုင်းဆိုင်ရာ
လိုအပ်ချက်တွေ ဖြည့်ဆည်းနေတာတွေ မပြီးသေးတာကြောင့်ပါ။ ဒါတွေ ပြီးရင်တော့ သူတို့လည်း
ဖွင့်သွားမှာပါ"ဟု မြန်မာ့အာမခံလုပ်ငန်း ဦးဆောင် ညွှန်ကြားရေးမှူး ဦးအေးမင်းသိမ်းက ပြောသည်။

"အခုလို စတင်လုပ်ကိုင်တဲ့အခါမှာ လဲကျမသွားအောင်၊ လဲကျခဲ့ရင်လည်း ပြန်ပြီးတည့်မတ်ရ
အောင် မြန်မာ့အာမခံလုပ်ငန်းနဲ့ ပုဂ္ဂလိကအာမခံ လုပ်ငန်းတွေဟာ ကိုင်းကျွန်းမှီ ကျွန်းကိုင်းမှီ
လုပ်ဆောင်သွားကြရမှာဖြစ်ပါတယ်။ နိုင်ငံတော်ပိုင်တဲ့အာမခံနဲ့ ပုဂ္ဂလိကအာမခံတွေ စုပေါင်းပြီး
မြန်မာ့ အာမခံရဲ့ လိုအပ်ချက်တွေကို အကောင်အထည်ဖော် ဖြည့်ဆည်းသွားမှာဖြစ်ပါတယ်။
အိမ်နီးချင်း ထိုင်း နိုင်ငံမှာလည်း ပုဂ္ဂလိကကုမ္ပဏီပေါင်း ၉၀ ကျော်ရှိနေတဲ့အနေအထားဖြစ်ပါတယ်"
ဟု ၎င်းက ပြောသည်။

အောင်သစ္စာဦး အာမခံကုမ္ပဏီမှမန်နေးဂျင်းဒါရိုက်တာ ဦးဘထွန်းက "အသက်၊ မီး၊ မော်တော်ယာဉ်
အလုံးစုံအာမခံ၊ ငွေသားလုံခြုံမှုအာမခံ၊ ငွေသား သယ်ယူပို့ဆောင်မှုအာမခံ၊ သမာဓိအာမခံ (ဘဏ်
မှာငွေရေးကြေးရေးလုပ်နေတဲ့သူ တာဝန်ရှိသူတွေက အလွဲသုံးစားလုပ်ခဲ့ရင် ပေးရတဲ့ အာမခံ)တွေ
ကို အခုဖွင့်တဲ့ ပုဂ္ဂလိက ကုမ္ပဏီတွေကို လုပ်ကိုင်ခွင့်ပေးထားတယ်။

ကျွန်တော်တို့ကုမ္ပဏီက ခြောက်မျိုးစလုံးလုပ်မှာ ဖြစ်ပါတယ်။ ဒါပေမဲ့ အသက်အာမခံ တစ်ခုတည်း
ကိုပဲ အဓိကလုပ်မယ်ဆိုတဲ့ ကုမ္ပဏီလည်းရှိပါတယ်"ဟုပြောသည်။

အောင်မြင့်မိုရ်မင်းကုမ္ပဏီမှ အထွေထွေမန်နေဂျာ ဦးဝင်းမြင့်ကလည်း အသက်အာမခံတစ်မျိုးတည်း
သာ လုပ်ဆောင်မည်ဟု ပြောသည်။

"အခုဖွင့်တာက တစ်ခုတည်း သီးသန့်ပါ။ သီးသန့် အသက်အာမခံလုပ်ငန်းပဲဖြစ်ပါတယ်။
တပ်မတော်သားတွေအားလုံးအတွက် အဓိကလုပ်တာပါ။ တခြားသူတွေကို အာမခံပေးထားဖို့
ကတော့ နောက်မှရှေ့ဆက်လုပ်သွားမှာပါ" ဟု ၎င်းကပြောသည်။

"အရာရှိတွေရဲ့ အာမခံဆိုင်ရာကို အရင်လုပ်တာပါ။ ဇွန်လကနေစပြီး အာမခံထားလို့ရပါပြီ။
ကျွန်တော်တို့က ကြီးကြပ်ရေးလုပ်ငန်းရဲ့ ကြီးကြပ်လမ်း ညွှန်မှုအတိုင်းလုပ်တယ်။ အတွေ့ အကြုံ
ကတော့ သိပ်မရှိသေးဘူးပေါ့။ အဓိကအနေနဲ့ကတော့ တပ်မတော်ဝန်ထမ်းတွေ၊ ပြည်သူပြည်သား
တွေရှိတယ်။ တပ်မတော်ဝန်ထမ်းတွေသေရင်၊ ကျဆုံး၊ ကွယ်လွန်မယ်ဆိုရင် သူတို့ မိသားစုတွေ
အတွက် ဘယ်လိုအာမခံချက်တွေရှိမလဲပေါ့။ ဒါအဓိကပါ"ဟု အဆိုပါကုမ္မဏီ၏ မန်နေးဂျင်း
ဒါရိုက်တာ ဦးမြင့်မောင်က ပြောသည်။

အိုင်ကေဘီဇက် အာမခံကုမ္မဏီမှ တာဝန်ခံအရာရှိ ဒေါ်တင်အေးဝင်းက "နှုန်းတွေ၊ လုပ်ထုံးလုပ်နည်း
တွေကို အာမခံလုပ်ငန်းက လုပ်တဲ့အတိုင်းပဲ တူညီစွာ လုပ်ဆောင်ကြရမှာပါ။ အခု မြန်မာ့အာမခံ
လုပ်ငန်းကသတ်မှတ်ပေးတဲ့အတိုင်း လုပ်ကြရပါမယ်"ဟု ပြောသည်။

ဤအကြောင်းအရာနှင့် ပက်သက်၍ ထင်မြင်ချက်ပေးလိုပါက ...
comment.myanmar@mmtimes.com သို့ ပေးပို့နိုင်ပါသည်။


ရာသီဥတုအခြေအနေ

အကြည့်အများဆုံး - ပြည်တွင်းသတင်း