အငြင်းပွားဖွယ် ရုပ်/သံလွှင့် ဥပဒေမူကြမ်း လွှတ်တော်တင်မည်

ယခင်အစိုးရလက်ထက်မှစ၍ ပုံသဏ္ဌာန်အမျိုးမျိုးဖြင့် လုပ်ကိုင်ခွင့်ရရှိထားသည့် ပုဂ္ဂလိက
ရုပ်မြင်သံကြား၊ ရေဒီယိုလုပ်ငန်းများကို လိုင်စင်ပြန်လည် လျှောက်ထားစေခြင်းဖြင့် ဥပဒေကြောင်း
အရ တရားဝင်ရပ်တည်ခွင့်ပြုပြီး မူလသဘောတူညီချက်များ၊ စာချုပ်များကို ဥပဒေသစ်နှင့်အညီ
ပြန်လည်တိုက်ဆိုင် ပြင်ဆင်ရမည်ဖြစ်ကြောင်း ထည့်သွင်းထားသည့် ပြန်ကြားရေးဝန်ကြီးဌာန၏
ရုပ်မြင်သံကြားနှင့် အသံထုတ်လွှင့်ခြင်းဆိုင်ရာ ဥပဒေမူကြမ်းကို အောက်တိုဘာလအတွင်း
ပြည်ထောင်စုလွှတ်တော်သို့ တင်သွင်းမည်ဖြစ်ကြောင်း မြန်မာ့အသံနှင့် ရုပ်မြင်သံကြား
ညွှန်ကြားရေးမှူးချုပ် ဦးတင့်ဆွေက ပြောသည်။

"ဒီဥပဒေမှာ ပုံနှိပ်မီဒီယာနဲ့ မတူဘဲ institution ဆိုင်ရာရော၊ professional ဆိုင်ရာပါ တစ်ပေါင်း
တည်း ရေးဆွဲထားတယ်။ အောက်တိုဘာလလယ်လောက် လွှတ်တော်တင်ဖို့ ရည်ရွယ်ထားတယ်"
ဟု ၎င်းက ပြောသည်။

"ရုပ်/သံလွှင့် လုပ်ငန်း လိုင်စင်ပြန်လျှောက်ဖို့ အဆင်သင့်ရှိတယ်" ဟု ပြန်ကြားရေးဝန်ကြီး ဌာနနှင့်
MRTV-4 ရုပ်သံလိုင်းကို ဖက်စပ်ထုတ် လွှင့်သူ Forever Group မှ ဒါရိုက်တာဦးခင်မောင်ဌေးက
ပြောသည်။

"ဥပဒေကြောင်းအရ လုပ်ငန်းတရားဝင်ဖြစ်မှု ရှင်းလင်းခိုင်မာသွားတာပေါ့။ မတင်မကျ မစိုးရိမ်ရ
တော့ဘူး။ လက်ရှိလုပ်နေသူတွေအတွက် အကျိုးအရှိဆုံး ဖြစ်မှာပါ" ဟု မြန်မာနိုင်ငံ စာနယ်ဇင်း
ကောင်စီ (ယာယီ) အဖွဲ့ဝင် ဦးကိုကိုက ပြောသည်။

သို့သော် ဖွဲ့စည်းပုံ အခြေခံဥပဒေပုဒ်မ ၄၃ အရ နောက်ကြောင်းပြန် အာဏာသက်ရောက်ရန် ပြစ်မှု
ဆိုင်ရာဥပဒေပြဋ္ဌာန်းခွင့် မရှိရာ အဆိုပါပြဋ္ဌာန်းချက်သည် အငြင်းပွားဖွယ်ဖြစ်သည်ဟု ရုပ်/သံတစ်ခု
၏ ဥပဒေအကြံပေးတရား လွှတ်တော်ရှေ့နေ ဦးဖေခင်က ပြောသည်။

"အခြေခံဥပဒေအရ နောက်ကြောင်းပြန် အာဏာမသက်ရောက်ဘူးဆိုတော့ အရင် အစိုးရနဲ့
လုပ်ခဲ့တဲ့ အလုပ်တွေ၊ စာချုပ်တွေဟာ ဥပဒေသစ်တွေနဲ့ ညှိလို့မရဘူး။ အခု ပြဋ္ဌာန်းချက်က
ဥပဒေကြောင်းအရ အငြင်းပွားစရာဖြစ်တယ်"ဟု ၎င်းက ပြောသည်။

"ရုပ်/သံ မီဒီယာဥပဒေက (မြန်မာနိုင်ငံမှာ) အခုမှ ပေါ်တာ။ ဥပဒေကိုတော့ လူတိုင်း လိုက်နာရမယ်
လို့ မြင်တယ်။ ဥပဒေအထက်မှာ ဘယ်သူမှ မရှိဘူး။ လိုက်နာဆိုရင် လိုက်နာရမှာပဲ။ နိုင်ငံတော်ရဲ့
အမြင့်ဆုံး အခြေခံဥပဒေ ကိုတောင်မှ ပြင်ဖို့ ကြိုးစားနေကြတာပဲ။ အဲတော့ အရင်တုန်းက စာချုပ်
တွေ ဆိုတာတွေ၊ အရင်တုန်းက သဘောတူညီခဲ့တာတွေ၊ အရင်က ဥပဒေဆိုတာလည်း အခု
ဥပဒေ ပေါ်လာပြီးတော့ ပြင်ရင် နိုင်ငံသား တစ်ယောက်အနေနဲ့ လိုက်နာသင့်တယ်လို့ မထင်ဘူး
လား။ ဒီကိစ္စနဲ့ ပတ်သက်ရင်တော့ ကျွန်တော့်အမြင် ဘာမှ ပြဿနာမရှိဘူးလို့ ထင်ပါတယ်" ဟု
ဦးခင်မောင်ဌေးက ပြောသည်။

အဆိုပါ ဥပဒေမူကြမ်းသည် မြန်မာနိုင်ငံတွင် ရုပ်/သံ မီဒီယာလုပ်ငန်းကို ပုဂ္ဂလိကသို့ ပထမဦးဆုံး
အကြိမ် လုပ်ကိုင်ခွင့် တရားဝင်ပြဋ္ဌာန်းမည့် ဥပဒေ ဖြစ်သည်။ မူကြမ်းတွင် အကျိုးအမြတ်မယူသည့်
ဒေသန္တရရုပ်သံ၊ ရေဒီယို၊ မီဒီယာများ ပေါ်ပေါက်ရန် အားပေးပြဋ္ဌာန်းထားပြီး စီးပွားဖြစ်လုပ်ကိုင်သူ
များကိုမူ ဈေးကွက်၊ ဧရိယာတစ်ခုအတွင်း ပုံနှိပ်မီဒီယာနှင့် ရုပ်/သံလွှင့် မီဒီယာ တွဲဖက်ပိုင်ဆိုင်ခြင်း၊
ရုပ်သံ၊ ရေဒီယိုလိုင်း နှစ်လိုင်းပိုင်ဆိုင်ခြင်းများကို တားမြစ်ထားသည်။

သို့ရာတွင် အစိုးရပိုင် သတင်းစာ၊ ရေဒီယို၊ ရုပ်သံ လုပ်ငန်းများနှင့်ပတ်သက်၍မူ ကွဲပြားမှုမရှိသေးဘဲ
မူကြမ်းအရ ပြည်ထောင်စု၊ တိုင်းဒေသကြီးနှင့် ပြည်နယ်အစိုးရအဖွဲ့များလည်း ရုပ်/သံ မီဒီယာ
လုပ်ငန်းများ လိုင်စင်လျှောက်ထား လုပ်ကိုင်နိုင်မည်ဖြစ်ပြီး မူကြမ်းပုဒ်မ ၁၀၅ အရ အဆိုပါ အစိုးရ
ပိုင်နှင့် အများပြည်သူဝန်ဆောင်မှုလုပ်ငန်းများ လိုင်စင်ကြေး ကင်းလွတ်ခွင့်ရှိမည်ဖြစ်သည်။

မူကြမ်းအရ ပြည်ထောင်စုဝန်ကြီး ငါးဦး ပါဝင်ဖွဲ့စည်းမည့် လုပ်ငန်းအာဏာပိုင်အဖွဲ့က မူဝါဒများ
ချမှတ်မည်ဖြစ်ပြီး လုပ်ငန်းဆိုင်ရာ ကျင့်ဝတ်၊ အမိန့်၊ ညွှန်ကြားချက်၊ စည်းမျဉ်းများကို လွှတ်တော်
နှင့် အုပ်ချုပ်ရေးကဏ္ဍမှ အဆင့်ဆင့် ရွေးချယ်ဖွဲ့စည်းမည့် အမျိုးသား ရုပ်သံလွှင့်ကောင်စီက
ထုတ်ပြန်မည်ဖြစ်သည်။

အဆိုပါ အသေးစိတ်အချက်များ မထွက်ရှိသေးသော်လည်း ယင်းတို့ကို ချိုးဖောက်ပါက အစီအစဉ်
ကဏ္ဍအလိုက် ယာယီပိတ်ခြင်း၊ ထုတ်လွှင့်ချိန် ကန့်သတ်ခြင်း၊ လိုင်စင်ပိတ်သိမ်းခြင်းများ
ဆောင်ရွက်မည်ဖြစ်သည်။

"ကျွန်တော့်အမြင် ကြိုတင်ကာကွယ်မှု (protective attitude) များလွန်းတယ်လို့ ထင်တယ်။
မူကြမ်းထုတ်ပြန် ဆွေးနွေးချိန်မှာ လျော့ရင်လည်း လျော့သွားမှာပါ" ဟု ဒီမိုကရက်တစ် မြန်မာ့
အသံမှ မြန်မာဗျူရိုတာဝန်ခံ ဦးတိုးဇော်လတ်က ပြောသည်။

ဦးခင်မောင်ဌေးက လက်ရှိလုပ်ကိုင်နေသူ တစ်ဦးအနေဖြင့် မူကြမ်းပါပြဋ္ဌာန်းချက်များကို သဘော
တူညီထားပြီးဖြစ်သည်ဟု ပြောသည်။

"ကျွန်တော့်အမြင် fair ဖြစ်ပါတယ်။ content control လို့ ပြောတဲ့ဟာတွေကလည်း လုပ်သင့်
လုပ်ထိုက်တဲ့ national interest ပြောတဲ့ဟာတွေပဲပါတယ်။ မူကြမ်းက ပဉ္စမမူကြမ်း ဖြစ်ပြီး
လက်ရှိလုပ်ကိုင်နေသူတွေနဲ့ ဆွေးနွေးပြီးသားတွေဖြစ်တဲ့အတွက် အားလုံး သဘောတူထားပြီးလို့
ထည့်ထားတဲ့ကိစ္စတွေ ဖြစ်တယ်"ဟု ၎င်းကပြောသည်။

ဤအကြောင်းအရာနှင့် ပက်သက်၍ ထင်မြင်ချက်ပေးလိုပါက ...
[email protected] သို့ ပေးပို့နိုင်ပါသည်။


ရာသီဥတုအခြေအနေ

အကြည့်အများဆုံး - ပြည်တွင်းသတင်း