အထက်ပေါင်းလောင်းဆည်စီမံကိန်းကြောင့် ဒေသခံများ အခက်အခဲများ ကြုံတွေ့

အထက်ပေါင်းလောင် ဆည်တည်ဆောက်နေမှုကို တွေ့ရစဉ်။ ဓာတ်ပုံ - ကယန်းမျိုးဆက်သစ်လူငယ်အဖွဲ့အထက်ပေါင်းလောင် ဆည်တည်ဆောက်နေမှုကို တွေ့ရစဉ်။ ဓာတ်ပုံ - ကယန်းမျိုးဆက်သစ်လူငယ်အဖွဲ့

အထက်ပေါင်းလောင်း ဆည်စီမံကိန်းကြောင့် ကျေးရွာပေါင်း ၂၃ ရွာ ပြောင်းရွှေ့ခဲ့ရပြီး လက်ရှိ
ပြောင်းရွှေ့ထားသော နေရာသစ်တွင် လမ်းပန်း ဆက်သွယ်ရေး၊ လျှပ်စစ်မီးရရှိမှု၊ သောက်သုံးရေး
ရရှိမှု အခက်အခဲများအပြင် လုပ်ကိုင်စားသောက်ရန် မြေများ မရှိမှုတို့ကြောင့် ဒေသခံရွာသူရွာသား
များ အခက်အခဲများကြုံတွေ့နေကြရပြီး အစိုးရအနေဖြင့် ယင်းကိစ္စအပေါ် ကိုင်တွယ်ဖြေရှင်းပေးစေ
လိုကြောင်း ဒေသခံရွာသူရွာသာများက မြန်မာတိုင်း(မ်)ကို ပြောသည်။

"လယ်တွေက လာမယ့်နှစ်ကျရင်ရေမြုပ်တော့မယ်။ တစ်အိမ်ထောင်စု ကို ခြောက်ဧကပေးမယ်
ဆိုတာက အခုချိန်အထိ သတ်မှတ်ပေးခြင်းမရှိသေးဘူး။ ကျေးရွာတွေမှာ ရေမရသေးဘူး။ ရတဲ့
ရွာက အနည်းငယ်လောက်ပဲရတယ်"ဟု ပင်းလောင်းမြို့နယ်၊ သံလှေ ကျေးရွာမှ ဒေသခံ
ကိုခွန်းသူရိန်က ပြောသည်။

အထက်ပေါင်းလောင်းဆည် စီမံကိန်းကြောင့် ရှမ်းပြည်တောင်ပိုင်း ပင်လောင်းမြို့နယ်အတွင်းရှိ
ကျေးရွာ ၂၃ ရွာမှာ ဘေးလွတ်ရာသို့ ယခုနှစ် မေလမှ စတင်၍ပြောင်းရွှေ့ခဲ့ရသည်။

လျော်ကြေးငွေများကို ရေအား လျှပ်စစ်ဆည်တည်ဆောက်ရေးအဖွဲ့ဝင်များ၊ ရှမ်းပြည်နယ်လျှပ်စစ်
အဖွဲ့ဝင်များနှင့် ပင်လောင်းမြို့နယ် အုပ်ချုပ်ရေးအဖွဲ့များက ဧပြီလနှင့် မေလများတွင် လာရောက်
ပေးအပ်ခဲ့ကြောင်းဒေသခံများ၏ ပြောပြချက်အရသည်။

သို့ရာတွင် လျှပ်စစ်စွမ်းအားဝန်ကြီး ဌာန၏ ရေအားလျှပ်စစ် အကောင်ထည်ဖော်ရေးဦးစီးဌာနမှ
ညွှန်ကြား ရေးမှူးချုပ် ဦးမောသာထွေးကမူ စီမံကိန်းကြောင့် ရွှေ့ပြောင်းခံခဲ့ရသည့် ဒေသခံများ
ကျေနပ်မှုရှိသည်ဟု အောက်တိုဘာ၂၇ ရက်ကပြောသည်။

"လျော်ကြေးက ငါးသုတ်ခွဲပေးလိုက်တာ၊ အခု သူတို့လက်ထဲ အားလုံးရောက်သွားပြီ။ ပထမ
မရွှေ့ခင်က တစ်ဝက်ပေးတယ်၊ ပေးတဲ့အခါမှာလည်း တဲအိမ်ဆို ရင် သစ်သားအိမ်ဖြစ်ရမယ်၊
သစ်သားအိမ်ဆိုရင်လည်း တိုက်အိမ်ဖြစ်ရမယ်၊ တိုက်ဆိုရင်လည်း တိုက်ကောင်း ကောင်းဖြစ်ရမယ်
ဆိုပြီး အိမ်ရှင်စာရင်းကောက် ဆယ်အိမ်ခေါင်းနဲ့ ငွေပေးသူတွေက ကျေနပ်စွာလက်မှတ်ထိုးပြီးတော့
မရွှေ့ခင်မှာတစ်ကြိမ် သူတို့စရိတ် ရအောင်လုပ်ပေးတယ်၊ ရွှေ့ပြီးတော့ နောက်ထပ်တစ်ဝက်လုံးကို
အပြီးပေးလိုက်တယ်"ဟု ၎င်းက ပြောသည်။

စပါးသီးနှံလျော်ကြေး အပါအ၀င် လယ်တစ်ဧကလျှင် ကျပ် ၁၀ သိန်း ငါးသောင်း၊ အိမ်တစ်လုံး
တိုက်အိမ်၊ သစ်အိမ်ဝါးအိမ်အမျိုးအစားအလိုက် ၉၃,၀၀၀ ကျပ်မှ ၆၂ သိန်းအထိ သတ်မှတ်နှုန်းထား
များအတိုင်း လျော်ကြေးများ ပေးလျှော်ခဲ့ကြောင်း သိရသည်။

ယင်းဒေသအတွက် လျော်ကြေးငွေ ကျပ်သိန်း ၁၁၃,၀၀၀ ပေးလျော်ခဲ့ပြီး ဖြစ်ကြောင်း ရှမ်းပြည်နယ်
လျှပ်စစ်နှင့် စက်မှုဝန်ကြီး ဦစိုင်းထွန်းရင်က ပြောသည်။

ကျေးရွာများပြောင်းရွှေ့မှုတွင် ရွာအသစ်တည်သောနေရာများတွင် ပြန် လည်ပေးအပ်မြေကွက်
အကျယ်အ၀န်းမှာ သတ်မှတ်ချက်ထက် လျော့နေကြောင်း လိန်းလီကျေးရွာမှ ဒေါ်အမာစိန် က
ပြောသည်။

"သတ်မှတ်နှုန်းက ၈၀x၁၀၀ သတ်မှတ်ထားတယ်။ သူတို့တကယ်တမ်းချပေးတော့ ၅၀x ၆၀
ပတ်လည်ပဲပြန်ပေးပါတယ်"ဟု ၎င်းက ပြောဆိုသည်။

ဒေသခံများအနေနှင့် ၎င်းတို့လက်ရှိ ပြောင်းရွှေ့ခဲ့ရသည့် ရွာသစ်တွင် သောက်သုံးရေများ ရှားပါးခြင်း၊
ဘာသာရေးအဆောက်အုံ၊ စာသင်ကျောင်းများ ပြန်လည်ဆောက်လုပ်နိုင်မှု မရှိခြင်း၊ အချိန်တို
အတွင်လျင်မြန်စွာ ပြောင်းရွှေ့ရခြင်းကြောင့် စိုက်ပျိုးထားသော သီးနှံများ ဆုံးရှုံးခြင်းရှိခြင်း၊
သက်ဆိုင်ရာကုမ္ပဏီများက လျော်ကြေးငွေများမှာ လက်ရှိစားဝတ်နေရေးနှင့် ပြန်လည်ထူထောင်
ရေးလုပ်ငန်းများ ဆောင်ရွက်ရာတွင် အခက်အခဲများ ကြုံတွေ့နေရခြင်းများကြောင့် နိုင်ငံတော်
သမ္မတထံ တင်ပြထားကြောင်း သိရသည်။

အထက်ပေါင်းလောင်းဆည် စီမံကိန်းတည်နေရာမှာ ပျဉ်မနားမြို့ အရှေ့ဘက် ၂၆ မိုင်အကွာနှင့်
လက်ရှိပေါင်းလောင်းဆည်၏ အထက်ဘက် ၁၅ မိုင်အကွာ စစ်တောင်းမြစ်လက် တက်တစ်ခု
ဖြစ်သည့် ပေါင်းလောင်း မြစ်အထက်ပိုင်း ပင်လောင်းမြို့နယ်တွင် တည်ရှိသည်။

စီမံကိန်းကို ၂၀၀၄ ခုနှစ်တွင် စတင် အကောင်အထည်ဖော်ခဲ့ပြီး လက်ရှိအချိန်တွင် ၈၀ ရာခိုင်နှုန်း
ပြီးစီးနေပြီဖြစ်သည်။

အဆိုပါ ဆည်တည်ဆောက်ရေးစီမံကိန်းတွင် လျှပ်စစ်စွမ်းအား ၀န်ကြီးဌာနနှင့် ဆွစ်ဇာလန်
အခြေစိုက် AF Colen co., ltd. ကုမ္ပဏီ၊ လန်ဒန် အခြေစိုက် Melcon Dunstan & Associate၊
တရုတ်ကုမ္ပဏီ တစ်ခုဖြစ်သည့် Yunan Machinery and Export Co., ltd. တို့ပါဝင်ကြောင်း
သိရသည်။

ဤအကြောင်းအရာနှင့် ပက်သက်၍ ထင်မြင်ချက်ပေးလိုပါက ...
[email protected] သို့ ပေးပို့နိုင်ပါသည်။


ရာသီဥတုအခြေအနေ

အကြည့်အများဆုံး - ပြည်တွင်းသတင်း