တောင်တရုတ်ပင်လယ်အရေး၌ တရုတ်နိုင်ငံကို ဦးစားပေးမည်မဟုတ်ကြောင်း သက်သေပြသွားမည်

တောင်တရုတ်ပင်လယ် အငြင်းပွားမှုဖြေရှင်းရာတွင် ဘက်လိုက်မှုနှင့် တရုတ်နိုင်ငံအား ဦးစားပေး
ဖြေရှင်းမှု မရှိကြောင်း အခိုင်အမာ သက်သေပြသွားမည်ဟု မကြာမီက ခန့်အပ်ခံထားရသည့်
အာဆီယံရေးရာ ပြောရေးဆိုခွင့်ရှိသူ ပြန်ကြားရေးဝန်ကြီးဌာန ဒုတိယ၀န်ကြီး ဦးရဲထွဋ်က
ပြောသည်။

တောင်တရုတ်ပင်လယ် အငြင်းပွားမှုသည် မြန်မာနိုင်ငံ အာဆီယံအလှည့်ကျ ဥက္ကဋ္ဌ တာဝန်
ထမ်းဆောင်စဉ်ကာလအတွင်း ကိုင်တွယ်ဖြေရှင်းရမည့် လုပ်ငန်းများအနက် အရေးကြီးသော
အခန်းကဏ္ဍတွင် ပါဝင်လာခဲ့ခြင်းဖြစ်ပြီး ဇန်န၀ါရီလ ၁၅ ရက်မှ ၁၈ ရက်ထိ ပုဂံမြို့၌ ကျင်းပခဲ့သည့်
အာဆီယံနိုင်ငံခြားရေးဝန်ကြီးများ သီးသန့်အစည်းအဝေးတွင် ယင်းကိစ္စရပ် တစ်ခုတည်းကို
ဦးစားပေးဆွေးနွေးခဲ့ကြောင်း သတင်းထုတ်ပြန်ခဲ့သည်။

အဆိုပါ ထုတ်ပြန်ချက်တွင် အစည်းအဝေးတက်ရောက်လာခဲ့ကြသည့် အာဆီယံနိုင်ငံများမှ
နိုင်ငံခြားရေးဝန်ကြီးများက နယ်မြေပိုင်နက် အငြင်းပွားမှု ဖြစ်ပွားလျက်ရှိသည့် တောင်တရုတ်
ပင်လယ် အရေးကိစ္စနှင့်ပတ်သက်ပြီး လက်ရှိ အခြေအနေအပေါ် စိုးရိမ်မိကြောင်း ထုတ်ဖော်ပြောဆို
ခဲ့ကြပြီး အာဆီယံအနေဖြင့် တောင်တရုတ်ပင်လယ် အရေးနှင့်ပတ်သက်ပြီး မူဝါဒ ခြောက်ရပ်
အပါအ၀င် ငြိမ်ချမ်းရေးနှင့်တည်ငြိမ်ရေးထိန်းသိမ်းမှု၊ ရေကြောင်းသွားလာမှုဆိုင်ရာ လုံခြုံရေး၊
တောင်တရုတ် ပင်လယ်တွင်း လွတ်လပ်စွာ ရေကြောင်းသွားလာခွင့်နှင့် လေယာဉ်ပျံသန်းခွင့်
ဆိုင်ရာကိစ္စရပ်များ ဆောင်ရွက်နိုင်ရန် ထပ်လောင်း အတည်ပြုခဲ့သည်။

"မြန်မာနိုင်ငံအနေနဲ့ ဒေသတွင်းပြဿနာတွေကို ဖြေရှင်းတဲ့နေရာမှာ မျှမျှတတ ဘက်မလိုက်ဘဲနဲ့
ဦးဆောင်နိုင်စွမ်းရှိပါ့မလားဆိုတဲ့ စိုးရိမ်စိတ်ရှိကြပါတယ်။ ဒါကိုတော့ ကျွန်တော်တို့က သက်သေပြ
ရမှာပဲ" ဟု ဦးရဲထွဋ်က သတင်းစာရှင်းလင်းပွဲ၌ ပြောကြားခဲ့သည်။

နိုင်ငံခြားရေးဝန်ကြီးဌာန ပြည်ထောင်စု ၀န်ကြီး ဦးဝဏ္ဏမောင်လွင်က ပြည်တွင်းသတင်းစာ၊ ဂျာနယ်
အချို့နှင့် တွေ့ဆုံခဲ့သည့် သီးသန့် အင်တာဗျူးတွင် မြန်မာနိုင်ငံအနေ ဖြင့် တောင်တရုတ်ပင်လယ်
အရေးကိစ္စအပါအ၀င် ဒေသတွင်းပြဿနာများကို ဖြေရှင်းရာတွင် ဘက်မလိုက်ဘဲ ခင်မင်ရင်းနှီးစွာ
ဖြင့် အာဆီယံ ပဋိညာဉ်၏ ဖော်ပြထားချက်ဖြစ်သော တစ်နိုင်ငံနှင့် တစ်နိုင်ငံ ၀င်ရောက်မစွက်ဖက်
ရေး မူဝါဒပေါ် အခြေခံ ဆောင်ရွက်သွားမည်ဖြစ်ကြောင်း ပြောကြားခဲ့သည်။

အာဆီယံဒေသတွင်း နိုင်ငံခြားရေးဝန်ကြီးများက တောင်တရုတ်ပင်လယ်အရေးကိစ္စနှင့်ပတ်သက်ပြီး
သီးသန့်အစည်းအဝေးတွင် လုပ်ငန်းစဉ်ကို ထပ်လောင်းအတည်ပြုခဲ့ကြသော်လည်း ယင်းအား
လက်တွေ့ဦးဆောင် လုပ်ကိုင်မှုသည် လက်ရှိဥက္ကဋ္ဌ တာဝန်ယူထားသည့် မြန်မာနိုင်ငံ၏ တာဝန်
ဖြစ်ပြီး မြန်မာနိုင်ငံမှ ထုတ်ပြန်ခဲ့သည့် တာဝန်ထမ်းဆောင် စဉ်ကာလအတွင်း လုပ်ဆောင်မည့်
မဟာဗျူဟာ လုပ်ငန်းစဉ်နှင့် ဦးစားပေးလုပ်ငန်းစဉ်များတွင် ယင်းအချက်များ မပါဝင်ကြောင်း၊
မြန်မာနိုင်ငံအနေဖြင့် အတည်ပြုခဲ့သည့် အချက်များကို မှန်ကန်စွာ ကိုင်တွယ်နိုင်မည်ဆိုပါက
အာဆီယံသည် နိုင်ငံတကာတွင် အရေးကြီးကဏ္ဍဖြစ်လာမည်ဖြစ်ကြောင်း ထိုင်းနိုင်ငံ အခြေစိုက်
သတင်းစာဆရာ မစ္စတာ ကဗီချောင်ကစ်တာဗာဝန်က ဇန်န၀ါရီလ ၁၉ ရက်နေ့တွင် မြန်မာတိုင်း(မ်)
ကိုပြောသည်။

သို့ရာတွင် အဆိုပါ အစည်းအဝေး ထုတ်ပြန်ချက်ကို အာဆီယံနိုင်ငံအချို့က ကြိုဆိုခဲ့ကြပြီး
မြန်မာနိုင်ငံအနေဖြင့် အငြင်းပွားမှုကိစ္စရပ်အပေါ် ကောင်းမွန်စွာ ကိုင်တွယ်နိုင်မည်ဟု ယုံကြည်လျက်
ရှိကြောင်း၊ ယင်းထုတ်ပြန်ချက် ထွက်ပေါ်လာစဉ်ကာလအတွင်း ရန်ကုန်မြို့၌ ကျင်းပလျက်ရှိသည့်
အာဆီယံဒေသတွင်း နိုင်ငံတကာရေးရာ လေ့လာသုံးသပ်ရေး အစည်းအဝေးသို့ တက်ရောက်
ခဲ့သည့် နိုင်ငံတကာနှင့် မဟာဗျူဟာလေ့လာသုံးသပ်ရေးအဖွဲ့ဝင် ဦးကြီးမြင့်က ပြောသည်။

ဤအကြောင်းအရာနှင့် ပက်သက်၍ ထင်မြင်ချက်ပေးလိုပါက ...
comment.myanmar@mmtimes.com သို့ ပေးပို့နိုင်ပါသည်။


ရာသီဥတုအခြေအနေ

အကြည့်အများဆုံး - ပြည်တွင်းသတင်း