လူမျိုးဘာသာကွဲသော ကလေးသူငယ်များ အပြန်အလှန် လေးစားချစ်ခင်ရေး ဘာသာရေးခေါင်းဆောင်များ ပူးပေါင်းတာဝန်ယူ

မြန်မာနိုင်ငံအတွင်းရှိ လူမျိုးဘာသာ မတူညီကွဲပြားသော ကလေးသူငယ်များကြား အပြန်အလှန်
လေးစားချစ်ခင်သည့် လူ့အဖွဲ့အစည်းတစ်ရပ် ထူထောင်ရန် ပူးပေါင်းဆောင်ရွက်မှုများ ပြုလုပ်သွား
မည်ဖြစ်ကြောင်း ဘာသာကြီး လေးခုမှ ထင်ရှားသော ခေါင်းဆောင်များက ဧပြီလ ၃ ရက်တွင်
ရန်ကုန်မြို့၌ ပြုလုပ်ခဲ့သည့် 'ယုံကြည်ဆောင်ရွက် ကလေးများအတွက်' နိုင်ငံတော်အဆင့်စုံညီ
တွေ့ဆုံပွဲတွင် ကတိပြုခဲ့ကြသည်။

အဆိုပါတွေ့ဆုံပွဲကို ကုလသမဂ္ဂကလေးများ ရန်ပုံငွေအဖွဲ့(ယူနီဆက်ဖ်)နှင့် ရတနာ့မေတ္တာအဖွဲ့တို့၏
ပူးပေါင်းစီစဉ်မှုဖြင့် ကျင်းပခြင်းဖြစ်ကာ ခရစ်ယာန်ဘာသာ၊ ဗုဒ္ဓဘာသာ၊ အစ္စလာမ်ဘာသာနှင့်
ဟိန္ဒူဘာသာတို့မှ ဘာသာရေး ခေါင်းဆောင်များက ကလေးငယ်များ၏ လက်ရှိ အခြေအနေနှင့်
ဆက်လက်ပံ့ပိုးဆောင်ရွက်ရမည့် အခြေအနေများကို ဆွေးနွေးခဲ့သည်။

ကလေးတိုင်း ဘေးကင်းပြီး ကောင်းမွန်စွာ ဖွံ့ဖြိုးတိုးတက်ကြီးပြင်းပိုင်ခွင့်၊ လွတ်လပ်စွာ တွေးတော
ကြံဆခွင့်၊ လွတ်လပ်စွာကိုးကွယ် ယုံကြည်ခွင့်နှင့် ကလေးသူငယ် အခွင့်အရေးများ ရရှိခံစားခွင့်
ရရှိစေရေးအတွက် ပူးပေါင်းဆောင်ရွက်ကြရန် ဘာသာရေးခေါင်းဆောင်များက သဘောတူညီခဲ့
ကြသည်။

"ဘာသာရေးခေါင်းဆောင်တွေ ပူးပေါင်းပြီးတော့ ကျွန်တော်တို့ ကလေးသူငယ်တွေရဲ့ ဖွံ့ဖြိုးရေး၊
သူတို့ကို အကာအကွယ်ပေးရေးနဲ့ ဘ၀မြှင့်တင်ရေး စတာတွေကို ဆောင်ရွက်ဖို့ ရည်ရွယ်သလို
ကျွန်တော်တို့ နိုင်ငံတစ်ဝန်းမှာဖြစ်နေတဲ့ ပဋိပက္ခတွေထပ်မံမဖြစ်ပွားရေး၊ ငြိမ်းချမ်းရေးကို ရည်ရွယ်
ပါတယ်"ဟု ရတနာ့ မေတ္တာအဖွဲ့မှ ဥက္ကဋ္ဌ ဦးမြင့်ဆွေက ပြောသည်။

ဗုဒ္ဓဘာသာဝင်အများစုရှိသောကြောင့် ဗုဒ္ဓဘာသာမှ အဆုံးအမများကို ကောက်နုတ် ဖော်ပြထား
သော 'ယုံကြည်ဆောင်ရွက် ကလေးများအတွက်' စာအုပ်များကို မြန်မာနိုင်ငံအတွင်းရှိ
ကျေးရွာပေါင်း ၈၀၀ မှ ဘုန်းကြီး ကျောင်း ၃,၀၀၀ ကျော်တွင် ဖြန့်ဝေထားပြီး အခြားဘာသာတရား
များ၏ အဆုံးအမများကိုလည်း သက်ဆိုင်ရာဘာသာဝင်များထံသို့ ထုတ်ဝေ ဖြန့်ချိသွားမည်
ဖြစ်ကြောင်း ဦးမြင့်ဆွေက ပြောသည်။

"ကျွန်ုပ်တို့ ဘာသာရေးခေါင်းဆောင်တွေအနေနဲ့ ယုံကြည်ကိုးကွယ်မှု ဘာသာတရားတွေဟာ
လူသားတွေရဲ့ စိတ်ထဲမှာရှိတဲ့ အကြမ်းဖက်မှုတွေကို လျော့ပါးစေဖို့နဲ့ လူသားတွေကို ယဉ်ကျေး
လိမ္မာစေဖို့ သက်ဆိုင်တဲ့ နည်းလမ်း တွေရှိပါတယ်" ဟု သီတဂူ အပြည်ပြည်ဆိုင်ရာ
ဗုဒ္ဓတက္ကသိုလ်မှ ဒေါက်တာအရှင်ဉာဏိဿရ က မိန့်ကြားသည်။

ဘာသာပေါင်းစုံ ငြိမ်းချမ်းရေး(မြန်မာ)မှ နာယက ဟာဂျီဦးကိုလေးက အစ္စလာမ်ဘာသာ၏
ကိုရမ်ကျမ်းစာတွင် ကလေးသူငယ်များမှာ ရတနာတစ်ပါးဖြစ်ခြင်းကြောင့် အကောင်းဆုံး
ပြုစုစောင့်ရှောက်ရန် မိဘများကို တင်းတင်းကျပ်ကျပ်ညွှန်ကြားထားကြောင်း ပြောသည်။

လက်ရှိအခြေအနေတွင် မြန်မာနိုင်ငံ၌ ကလေးသူငယ်ပြဿနာများကို ကိုင်တွယ်ဖြေရှင်းရေးနှင့်
ဘာသာပေါင်းစုံဆွေးနွေးပွဲများ ဖြစ်ထွန်းရေးကို အားပေးမည့် အနေအထားတစ်ခု ဖန်တီးပေးရန်
အရေးကြီးကြောင်း ယူနီဆက်ဖ်က သတင်းထုတ်ပြန်ခဲ့သည်။

လက်ရှိ အသွင်ကူးပြောင်းရေးကာလအတွင်း ကလေးသူငယ်များနှင့် ပတ်သက်သော ပြဿနာ
များစွာ ကြုံတွေ့နေရပြီး နိုင်ငံတစ်ဝန်း ဖြစ်ပွားနေသော ပဋိပက္ခများကြောင့် ထိခိုက် ခံစားနေရ
ကြောင်း ယူနီဆက်ဖ်ဌာနေ ကိုယ်စားလှယ် ဘာထရန်ဗိန်းဘဲလ် ကပြောသည်။

"ငြိမ်းချမ်းရေးနဲ့ ဖွံ့ဖြိုးရေးကို မြှင့်တင်ပေးဖို့အတွက် ဘာသာရေးခေါင်းဆောင်တွေဟာ
အလွန်အရေးပါတဲ့ အခန်းကဏ္ဍမှာ ပါဝင်နေပါတယ်"ဟု ၎င်းက ပြောသည်။

ဤအကြောင်းအရာနှင့် ပက်သက်၍ ထင်မြင်ချက်ပေးလိုပါက ...
comment.myanmar@mmtimes.com သို့ ပေးပို့နိုင်ပါသည်။


ရာသီဥတုအခြေအနေ

အကြည့်အများဆုံး - ပြည်တွင်းသတင်း