ယခု ဘဏ္ဍာနှစ်ကုန်ရန်နီးလာသော်လည်း အခွန်ရရှိ နှုန်းထားမှာ လျာထားချက်၏ ထက်ဝက်ခန့်သာ ရရှိသေး

ယခုဘဏ္ဍာနှစ်ကုန်ရန် ရက်ပေါင်း ၅ဝ ကျော်သာကျန်ရှိသော်လည်း မန္တလေးတိုင်းဒေသကြီးအတွင်း
မှ အခွန်အရပ်ရပ်ကောက်ခံရရှိထားမှုမှာ ယခုဘဏ္ဍာနှစ်အတွက်လျာထားချက်၏ ထက်ဝက်ခန့်သာ
ကောက်ခံရရှိထားသေးကြောင်း မန္တလေးတိုင်းအခွန်ဦးစီးဌာနမှ လက်ထောက်ညွှန်ကြားရေးမှူး
ဦးအောင်ကျော်မိုးက ယခုလ ၈ ရက်တွင် ပြောသည်။

''အခွန်ကောက်ခံမှုတွေ တိုးလိုက်တဲ့အတွက် အခွန်ရှောင်မှုတွေရှိလာတာကြောင့်လည်းပါတယ်။
နောက်တစ်ခုကတော့ အခွန်လျာထားချက်ကို တိုးမြှင့်လိုက်တာလည်းပါတယ်။ ဒီနှစ် အခွန်မရတဲ့
အချက်တွေထဲမှာ အိမ်၊ ခြံ၊ မြေရောင်းတဲ့လူတွေ အခွန်မဆောင်တာက အဓိကဖြစ်ပါတယ်''ဟု
ဦးအောင်ကျော်မိုးက ပြောသည်။

မန္တလေးတိုင်း အခွန်ဦးစီးဌာနမှ ယခု ၂ဝ၁၆-၁၇ ခုနှစ်အတွက် အခွန်လျာထားချက်မှာ ၁၅၄ ဒသမ
၁ ဘီလျံဖြစ်ကြောင်းသိရပြီး လက်ရှိအချိန်တွင် ရရှိထားသည့်အခွန်ပမာဏာမှာ ၇၈ ဒသမ ၇ ဘီလျံ
သာရရှိသေးကြောင်းသိရသည်။

မန္တလေးတိုင်းအခွန်ဦးစီးဌာနမှ အခွန်စည်းကြပ်နေသည့် ကဏ္ဍငါးခုရှိပြီး ယခုလ ၆ ရက်အထိ ယခု
ဘဏ္ဍာနှစ်အတွက် အဆိုပါကဏ္ဍငါးခုမှ ကဏ္ဍတစ်ခုချင်းစီအလိုက် လျာထားချက်များထဲမှ စည်း
ကြပ်ရာတွင် ရရှိထားသည့် အခွန်ပမာဏများမှာ ကုန်သွယ်လုပ်ငန်းခွန်မှ ၆၄ ဒသမ ၂၈ ရာခိုင်နှုန်း၊
ဝင်ငွေခွန်မှ ၃၆ ဒသမ ၃၅ ရာခိုင်နှုန်း၊ အထူးကုန်စည်ခွန်မှ ၁၃၂ ဒသမ ၃၂ ရာခိုင်နှုန်း၊ တံဆိပ်ခေါင်း
ခွန်မှ ၈၉ ဒသမ ဝ၂ ရာခိုင်နှုန်းနှင့် အောင်ဘာလေသိန်းဆုခွန်မှ ၉၁ ဒသမ ၅၆ ရာခိုင်နှုန်းစည်းကြပ်
ပြီးဖြစ်သည်။

ပြီးခဲ့သည့် ၂ဝ၁၅-၁၆ ခုနှစ်အတွက် အခွန်လျာထားချက်မှာ ၁၁၂ ဒသမ ၉၄၉ ဘီလျံသာသတ်မှတ်
ထားသော်လည်း ယခုဘဏ္ဍာနှစ်အတွက် သတ်မှတ်ချက်မှာ ပြီးခဲ့သည့်နှစ်ထက် ၄ဝ ဘီလျံခန့်တိုး
မြင့်ခဲ့သည်။ ယခင်နှစ်များကမူ သက်ဆိုင်ရာကဏ္ဍအလိုက် အခွန်ကို သုံးရာခိုင်နှုန်းကိုသာ ကောက်
ယူခဲ့သော်လည်း၊ ယခုနှစ်တွင် ၁၅ ရာခိုင်နှုန်းထိ တိုးမြှင့်သတ်မှတ်ခဲ့သည့်အတွက် အခွန်များစွာရ
နိုင်သည့် အိမ်၊ ခြံ၊ မြေ လုပ်ငန်းများဘက်မှ အခွန်ရရှိမှုနှုန်းထားများမှာ နည်းပါးလာခဲ့ကြောင်းနှင့်
အခွန်ရှောင်သည့် အိမ်၊ ခြံ၊ မြေ ရောင်းဝယ်မှုများမှာ ၉ဝ ရာခိုင်နှုန်းခန့် အထိရှိကြောင်း ဦးအောင်
ကျော်မိုးထံမှသိရသည်။

''ရောင်းတဲ့လူတွေအနေနဲ့ သူရတဲ့ အမြတ်စွန်းပေါ်မူတည်ပြီး အခွန်ဆောင်ရမှာဖြစ်ပေမဲ့ အခွန်ကို
မဆောင်ကြဘူး။ အခွန်ဆောင်လိုက်ရင် အမြတ်ရတဲ့ငွေနဲ့ ကျန်တဲ့ပစ္စည်းတွေဝယ်ယူမယ်ဆိုရင်
အခွန်ဆောင်စရာ မလိုတော့ဘူးဆိုတာတွေကိုလည်း မသိကြတော့ မဆောင်ကြတာများပါတယ်''
ဟု ဦးအောင်ကျော်မိုးက ပြောသည်။

''အိမ်၊ ခြံ၊ မြေ အရောင်းအဝယ်တော်တော်များများကတော့ အခွန်မဆောင်ကြတာ များပါတယ်။
တချို့ကကျလည်း စီးပွားရေးမကောင်းလို့ သူတို့နေတဲ့အိမ်ကို ရောင်းလိုက်ရတယ်။ အဲဒီလို ရောင်း
ရတဲ့ ပိုက်ဆံတွေထဲကမှ အခွန်ဆောင်ရမယ်ဆိုတော့ သူတို့အတွက်ကျလည်း အခက်အခဲဖြစ်တာ
ပေါ့။ အိမ်၊ ခြံ၊ မြေ အရောင်းအဝယ်လုပ်နေတဲ့ လုပ်ငန်းရှင်တွေအတွက်ကတော့ အခွန်ဆောင်သင့်
ပါတယ်။ သူတို့ကကျ စီးပွားရေးလုပ်နေကြတာဖြစ်တယ်။ မရှိလို့ ရောင်းလိုက်ရတဲ့လူတွေကိုတော့
အခွန်ဆောင်ချင်လာအောင် အစိုးရဘက်ကနေလည်း နည်းလမ်းတစ်ခုခုနဲ့ ကြိုးစားသင့်တယ်'' ဟု
အိမ်၊ ခြံ၊ မြေ ပွဲစားဖြစ်သူ ဦးစိုးဝင်းက ပြောသည်။

ဤအကြောင်းအရာနှင့် ပက်သက်၍ ထင်မြင်ချက်ပေးလိုပါက ...
[email protected] သို့ ပေးပို့နိုင်ပါသည်။


ရာသီဥတုအခြေအနေ - မန္တလေး

အကြည့်အများဆုံး - မန္တလေးနှင့် အထက်မြန်မာပြည်သတင်း