ဖြည့်စွက်ဘတ်ဂျက်ကို ပြည်ထောင်စုလွှတ်တော်က ၅ ရာခိုင်နှုန်း ဖြတ်တောက်

ပြည်ထောင်စုအစိုးရအဖွဲ့က ၂ဝ၁၆၁၇ ဘဏ္ဍာနှစ်၏ လက်ကျန်ငါးလတာအတွင်း လုပ်ငန်းများ
အကောင်အထည်ဖော်နိုင်ရန် ထပ်မံတင်ပြလာသည့် ဖြည့်စွက်ခွင့်ပြုငွေစာရင်းများနှင့်ပတ်သက်ပြီး
ပြည်ထောင်စုလွှတ်တော်ကဒီဇင်ဘာ ၁၃ ရက်တွင် အတည်ပြုလိုက်သည်။

လွှတ်တော်အစည်းအဝေးတွင် မြန်မာနိုင်ငံတော်ဗဟိုဘဏ်၊ နေပြည်တော်စည်ပင်သာယာရေး
ကော်မတီနှင့် ပြည်ထောင်စုဝန်ကြီးဌာန ၁ဝ ခုက တင်ပြထားသောအသုံးစရိတ်များအနက်
အသုံးစရိတ်အချို့ကို လျှော့ချကာ အတည်ပြုခဲ့ခြင်းဖြစ်သည်။ ပြည်ထောင်စုအစိုးရအဖွဲ့က
ဖြည့်စွက်ခွင့်ပြုငွေအဖြစ် စုစုပေါင်းကျပ် ၁,၃၅၄ ဘီလျံတင်ပြခဲ့သော်လည်း ယင်းပမာဏ၏
၅ ဒသမ၁ ရာခိုင်နှုန်းဖြစ်သည့် ကျပ် ၇ဝ ဘီလျံဖြတ်တောက်ကာ အတည်ပြုခဲ့ခြင်းဖြစ်သည်။

ခွင့်ပြုငွေ စိစစ်ဖြတ်တောက်ခံရသောဝန်ကြီးဌာနများတွင် နိုင်ငံခြားရေးဝန်ကြီးဌာနလည်း
ပါဝင်သည်။ ယင်းဝန်ကြီးဌာသည် သာမန်အသုံးစရိတ်ခေါင်းစဉ်မှ ကျပ် ၂ဒသမ ဝ၂ဝ ဘီလျံ
တင်ပြထားခြင်းဖြစ်ပြီးပြည်ထောင်စုလွှတ်တော်က ကျပ် တစ်ဘီလျံဖြတ်တောက်ခဲ့သည်။

''ဝန်ကြီးဌာနအနေနဲ့ သံအမတ်ကြီးများရဲ့ နေအိမ်ငှားရမ်းခများနဲ့ ဆေးဝါးကုသစရိတ်များကို
လျှော့ချသုံးစွဲဖို့ အဆင်မပြေသော်လည်းပဲ ဘဏ္ဍာနှစ်မကုန်မီ ထပ်မံပေါ်ပေါက်လာရန်ရှိတဲ့
ခရီးသွားလာမှုစရိတ်စကတွေကိုလျှော့ချသုံးစွဲခြင်းအားဖြင့် ခြိုးခြံသုံးစွဲသွားမှာဖြစ်ပါတယ်''ဟု
နိုင်ငံခြားရေးဝန်ကြီးဌာန၊ဒုတိယဝန်ကြီး ဦးကျော်တင်က ပြောကြားခဲ့သည်။

အချုပ်ခန်းများတည်ဆောက်ရန်အတွက် ပြည်ထဲရေးဝန်ကြီးဌာန၏ တင်ပြချက်များကိုလည်း
လွှတ်တော်ကဖြတ်တောက်ခဲ့သည်။ ၄င်းဝန်ကြီးဌာနသည် ငွေလုံးငွေရင်းခေါင်းစဉ်ဖြင့်
ကျပ် ၃၆ ဒသမ ၉ ဘီလျံ တင်ပြထားခြင်းဖြစ်ပြီး လွှတ်တော်က ကျပ် ကိုးဘီလျံဖြတ်တောက်ခဲ့သည်။

''ငွေလုံးငွေရင်း အသုံးစရိတ်များအနက် မြန်မာနိုင်ငံရဲတပ်ဖွဲ့၊ တိုင်းဒေသကြီးပြည်နယ်ရဲတပ်ဖွဲ့များမှာ
ရှိတဲ့ အချုပ်ခန်းများပြုပြင်ခြင်းနှင့် အသစ်ဆောက်လုပ်ခြင်းလုပ်ငန်းများအတွက် တောင်းခံတဲ့ငွေထဲမှာ
အသစ်ဆောက်လုပ်ရန် အဆောက်အအုံ ၅၄ လုံးအတွက် ကျပ်သန်းပေါင်း ၉,ဝ၇၈ ဒသမ ၁၈၄
သန်းကို စိစစ်လျှော့ချခဲ့ပါတယ်''ဟု ပြည်ထဲရေးဝန်ကြီးဌာန၊ ဒုတိယဝန်ကြီး ဗိုလ်ချုပ်အောင်စိုးက
ပြောကြားခဲ့သည်။

နယ်စပ်ရေးရာဝန်ကြီးဌာနက တင်ပြထားသော ထောက်ပံ့ငွေအသုံးစရိတ်ကျပ် ၃ ဒသမ၅ ဘီလျံအနက်
ကျပ် ၅၉၂ သန်းလျှော့ချဖြတ်တောက်ခဲ့သည်။ ကာကွယ်ရေးဝန်ကြီးဌာနမှာမူ လျှော့ချဖြတ်တောက်
ခံရသည့်အထဲတွင် ပါဝင်ခြင်း မရှိပေ။

အလုပ်သမား၊ လူဝင်မှုကြီးကြပ်ရေးနှင့်ပြည်သူ့အင်အားဝန်ကြီးဌာနက သာမန်အသုံး
စရိတ်ခေါင်းစဉ်ဖြင့် တင်ပြထားသော ကျပ် ၉၉ သန်းကျော်တွင် ကျပ် ၂၁ သန်းကျော်ဖြတ်တောက်ခဲ့သည်။
စက်မှုဝန်ကြီးဌာနက သာမန်အသုံးစရိတ်ခေါင်းစဉ်ဖြင့် တင်ပြထားသော ကျပ် ၁၃၂ သန်းကျော်မှ
ကျပ် ၂၅သန်းကိုလည်း ဖြတ်တောက်ခဲ့သည်။ စက်မှုသင်တန်းကျောင်းခြောက်ကျောင်းတွင်
ဖွင့်လှစ်သင်ကြားနေသည့် သင်တန်းများတွင် တက်ရောက်မည့်သင်တန်းသား
စုစုပေါင်း ၁,၇၄၆ ဦးအတွက် နေ့တွက်စရိတ်(ကျပ်၅ဝဝ နှုန်း) တောင်းခံထားသည့်အနက်
သင်တန်းသား ၅၅၅ ဦးအတွက် စားစရိတ်တောင်းခံငွေကို စိစစ်လျှော့ချသွားမည်ဖြစ်ကြောင်း
စက်မှုဝန်ကြီးဌာန၊ ပြည်ထောင်စုဝန်ကြီး ဦးခင်မောင်ချိုက ပြောကြားခဲ့သည်။

ပညာရေးဝန်ကြီးဌာန၏ ငွေလုံးငွေရင်းအသုံးရိတ်တောင်းခံမှု ၅ဝ ဒသမ ၉၄၆ ဘီလျံတွင်လည်း
ကျပ် ၂၄၇ သန်းခန့်ကို ဖြတ်တောက်ခဲ့သည်။ စီမံကိန်းနှင့်ဘဏ္ဍာရေးဝန်ကြီးဌာနက တင်ပြထားသော
ငွေလုံးငွေရင်း အသုံးစရိတ်ကျပ် ၁ ဒသမ ၂၃၈ ဘီလျံအနက် ကျပ် ၃၅ သန်းနှင့် သာမန်အသုံးစရိတ်
တင်ပြငွေ ကျပ် ၂၂၈ ဒသမ ၄၃၆ ဘီလျံအနက် ကျပ်သန်း ၄ဝ ဖြတ်တောက်ရန် ပြည်ထောင်စု
လွှတ်တော်က ဆုံးဖြတ်ခဲ့သည်။

ဆောက်လုပ်ရေးဝန်ကြီးဌာနက သာမန်အသုံးစရိတ်ခေါင်းစဉ်ဖြင့် တင်ပြထားသော ၁ ဒသမ ၃ ဘီလျံတွင်
ကျပ်၂၆၁ သန်း၊ ငွေလုံးငွေရင်းခေါင်းစဉ်ဖြင့်တင်ပြထားသော ကျပ် ၅ဝ ဒသမ ၂၅၇ ဘီလျံတွင်
ကျပ် ၂ ဒသမ၃ ဘီလျံလျှော့ချခဲ့သည်။ လူမှုဝန်ထမ်းကယ်ဆယ်ရေးနှင့် ပြန်လည်နေရာချထားရေး
ဝန်ကြီးဌာန၏ တင်ပြထားသော ကျပ်၅၂၁ သန်းမှ ကျပ်သန်း ၂ဝ ခန့်ကို လျှော့ချဖြတ်တောက်ခဲ့သည်။

ပို့ဆောင်ရေးနှင့် ဆက်သွယ်ရေးဝန်ကြီးဌာနအောက်ရှိ နိုင်ငံတော်ပိုင်စီးပွားရေးအဖွဲ့အစည်းများက
တင်ပြထားသော ငွေလုံးငွေရင်းအသုံးစရိတ်ကျပ် ၂၁ ဒသမ ၂၈၉ ဘီလျံကိုလည်း ကျပ် ၅၆၁
သန်းလျှော့ချခဲ့သည်။ နေပြည်တော်စည်ပင်သာယာရေးကော်မတီက တင်ပြထားသည့်ထောက်ပံ့ငွေ
ကျပ် ၄ ဒသမ ၆၉ဝ ဘီလျံအနက် ကျပ် ၁ ဒသမ ၅၉၄ဘီလျံကို လျှော့ချခဲ့သည်။ မြန်မာနိုင်ငံတော်
ဗဟိုဘဏ်သည် သာမန်အသုံးစရိတ်အဖြစ်ကျပ် ၁၃ဝ ဒသမ ၂၅၄ ဘီလျံတင်ပြထားရာ
ကျပ် ၅၄ ဒသမ ၆၆၈ ဘီလျံ ဖြတ်တောက်ခံခဲ့ရသည်။

ဤအကြောင်းအရာနှင့် ပက်သက်၍ ထင်မြင်ချက်ပေးလိုပါက ...
[email protected] သို့ ပေးပို့နိုင်ပါသည်။


ရာသီဥတုအခြေအနေ - နေပြည်တော်

အကြည့်အများဆုံး - နေပြည်တော်သတင်း