နေပြည်တော် လူမှုဖူလုံရေးရုံးတွင် မှတ်ပုံတင်လုပ်သား နှစ်သောင်းခွဲကျော်ရှိ၊ အာမခံအလုပ်သမားနှစ်ဦးကို စရိတ်ထုတ်ပေး

နေပြည်တော်၌ လူမှုဖူလုံရေးရုံးတွင် မှတ်ပုံတင်ထားသော အလုပ်သမားနှစ်သောင်းခွဲကျော်
ရှိကြောင်း အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာနအောက်ရှိ
အဆိုပါရုံးက ထုတ်ပြန်သည်။

လူမှုဖူလုံရေးအဖွဲ့သည် နေပြည်တော် ပျဉ်းမနားမြို့က အာမခံပုဂ္ဂလိက အလုပ်သမားနှစ်ဦး
တို့အား နာရေးစရိတ်၊ ကျန်ရစ်သူ အကျိုးခံစားခွင့်၊ မီးဖွားစရိတ်စသည်တို့ကို
ဇန်နဝါရီ ၂ဝ ရက်က ထုတ်ပေးခဲ့သည်။

အဆိုပါ ခံစားခွင့်များ ပေးအပ်ခြင်းအခမ်းအနားကို ပျဉ်းမနားမြို့ရှိ စုပေါင်းရုံးတွင်
ပြုလုပ်ခဲ့ခြင်းဖြစ်ပြီး ဒီဇင်ဘာ ၂၂ ရက်က မန္တလာမင်း ခရီးသည်တင်ယာဉ်
မတော်တဆမှုကြောင့် သေဆုံးသွားခဲ့သော ကမ္ဘောဇဘဏ်လီမိတက်က ဦးမျိုးမောင်မောင်
အတွက် နာရေးစရိတ် ၆၁၄,၁ဝဝ ကျပ်နှင့် အလုပ်တွင် ထိခိုက်မှုကြောင့် သေဆုံးမှုအတွက်
ကျန်ရစ်သူအကျိုးခံစားခွင့် ကျပ် ၆၉ သိန်း စုစုပေါင်း၇,၅၁၄,၁ဝဝ ကျပ်ကို ၄င်း၏
ဆွေမျိုးတော်စပ်သူတစ်ဦးအား ပေးအပ်ခဲ့သည်။

ထို့ပြင် ပျဉ်းမနားမြို့နယ် လူမှုဖူလုံရေးရုံးတွင် အကျုံးဝင်မှတ်ပုံတင်ထားသော
အလုပ်သမားတစ်ဦးပင်ဖြစ်သည့် တောင်ဖီလာ ဘိလပ်မြေစက်ရုံက အာမခံအလုပ်သမား
ဒေါ်ခင်မာဌေး မီးဖွားမှုအတွက်လည်း အကျိုးခံစားခွင့်ကျပ် ၆၇၂,ဝဝဝ နှင့် မီးဖွားစရိတ်
ကျပ် ၁၅ဝ,ဝဝဝ စုစုပေါင်း ကျပ် ၈၂၂,ဝဝဝ ကို ပေးအပ်ခဲ့သည်။ ပြည်ထောင်စုနယ်မြေ၊
နေပြည်တော်၌ လူမှုဖူလုံရေးရုံးတွင် မှတ်ပုံတင်ထားသော အလုပ်ဌာနစုစုပေါင်း ၆၆၅ ခုရှိပြီး
အလုပ်သမားဦးရေ ၂၅,ဝဝဝ ကျော်ရှိကြောင်းလည်း အဆိုပါဌာန ခေတ္တညွှန်ကြားရေးမှူးချုပ်
ဦးမောင်မောင်အေးက ပြောကြားသည်။

နေပြည်တော်အတွင်း ပြီးခဲ့သည့် ၂ဝ၁၅၁၆ ဘဏ္ဍာနှစ်တွင် အာမခံ အလုပ်သမားများအား
အကျိုးခံစားခွင့်အဖြစ် စုစုပေါင်း ကျပ် ၂၂၉ ဒသမ ၈၃၂ သန်းကို ထုတ်ပေးခဲ့ကြောင်းလည်း
၎င်းကဆက်လက်ပြောကြားခဲ့သည်။

ထိုပမာဏသည် ထည့်ဝင်ကြေး ကောက်ခံရရှိခဲ့သောငွေ၏ ၁၄ ရာခိုင်နှုန်းဖြစ်သည်ဟုဆိုသည်။
ထို့ပြင် နေပြည်တော်အတွင်း နယ်လှည့်ဆေးကုသယာဉ်ဖြင့် အလုပ်ဌာနများအရောက်
ကျန်းမာရေး စစ်ဆေးကုသမှုပေးလျက်ရှိရာ ပြည်သူပိုင်အလုပ်ဌာန ၁၅ ခုက အာမခံ
အလုပ်သမား ၄၂၂ ဦးကိုလည်းကောင်း၊ ပုဂ္ဂလိကဌာန ၂၉ ခုကအာမခံအလုပ်သမား
၁,ဝဝဝ ကျော်ကို လည်းကောင်း ကျန်းမာရေးစောင့်ရှောက်မှု ပေးနိုင်ခဲ့သည်ဟု ၄င်းက
ဆိုသည်။

မြန်မာနိုင်ငံတွင် လူမှုဖူလုံရေးဥပဒေအသစ်ကို ၂ဝ၁၂ ခုနှစ်၊ သြဂုတ် ၃၁ ရက်တွင်
အတည်ပြုထုတ်ပြန်ခဲ့ပြီး ၂ဝ၁၄ ခုနှစ်၊ ဧပြီ ၁ ရက်တွင် စတင်ကျင့်သုံးခဲ့သည်။
ထိုအချိန်မှစ၍ ကျန်းမာရေးနှင့် လူမှုစောင့်ရှောက်ရေး အာမခံစနစ်၊ မိသားစုထောက်ပံ့မှု
အာမခံစနစ်နှင့် အလုပ်တွင် ထိခိုက်မှု အကျိုးခံစားခွင့် အာမခံစနစ်ဟူ၍အာမခံစနစ်သုံးမျိုးကို
စတင်ဆောင်ရွက်ခဲ့ခြင်းဖြစ်သည်။

အထက်ပါ စနစ်သုံးမျိုးအရ အလုပ်သမားတစ်ဦး၏ လစာအပေါ် မူတည်ပြီး အလုပ်ရှင်က
သုံးရာခိုင်နှုန်း၊ အလုပ်သမားက နှစ်ရာခိုင်နှုန်း၊ စုစုပေါင်း ငါးရာခိုင်နှုန်းထည့်ဝင်ရခြင်းဖြစ်သည်။

လူမှုဖူလုံရေးအဖွဲ့သည် ဥပဒေအသစ်စတင်ကျင့်သုံးသော ၂ဝ၁၄ ခုနှစ်၊ ဧပြီ ၁ ရက်မှ ၂ဝ၁၆
ခုနှစ်၊ ဒီဇင်ဘာအထိ အာမခံအလုပ်သမားများ မကျန်းမာမှု၊ မီးဖွားမှု၊ သေဆုံးမှု၊
အလုပ်တွင်ထိခိုက်မှုနှင့် ဆေးဖိုးပြန်အမ်းငွေများအဖြစ် အကျိုးခံစားခွင့်များထုတ်ပေးခဲ့ရာ
အမှုတွဲပေါင်း ၃၁ဝ,၆၅၅ မှုအတွက် ကျပ် ၁ဝ ဘီလျံကျော်(၁ဝ၃၄၂ ဒသမ ၆၁၆ သန်း) ကို
ထုတ်ပေးခဲ့ပြီးဖြစ်သည်။

''ခွင့်ပြုငွေထဲမှာ နာရေးစရိတ်နဲ့ ကျန်ရစ်သူအကျိုးခံစားခွင့် အမှုတွဲပေါင်း ၁၉၂ ခုအတွက်
ကျပ်သန်းပေါင်း ၆၇၈ ဒသမ ၆၄၉သန်းလည်း ထုတ်ပေးပြီးဖြစ်ပါတယ်''ဟု ဦးမောင်မောင်အေးက
ပြောသည်။ 

ဤအကြောင်းအရာနှင့် ပက်သက်၍ ထင်မြင်ချက်ပေးလိုပါက ...
comment.myanmar@mmtimes.com သို့ ပေးပို့နိုင်ပါသည်။


ရာသီဥတုအခြေအနေ - နေပြည်တော်

အကြည့်အများဆုံး - နေပြည်တော်သတင်း