ဒီဇယ်စက်ခေါင်းစက်ရုံစီမံကိန်းအတွက် ယူရိုငါးသန်းချေးယူမည်

ဒီဇယ် စက်ခေါင်းစက်ရုံ (ရွာထောင်) တိုးတက်ကောင်းမွန်ရေး စီမံကိန်း ဆောင်ရွက်နိုင်ရန်
ဂျာမနီနိုင်ငံ KfW Development Bank မှ ယူရိုငွေငါးသန်းချေးယူသွားမည်ဖြစ်ကြောင်း
ပို့ဆောင်ရေးနှင့် ဆက်သွယ်ရေးဝန်ကြီးဌာန၊ ပြည်ထောင်စုဝန်ကြီး ဦးသန့်စင်မောင်က
ပြောသည်။

အဆိုပါ ချေးငွေ ချေးယူနိုင်ရန် ယခုလ ၁၇ ရက်က ကျင်းပခဲ့သည့် ပြည်ထောင်စုလွှတ်တော်
အစည်းအဝေးတွင် ဝန်ကြီးက တင်ပြခဲ့ပြီး ချေးငွေကို ဆိုင်းငံ့ကာလ ၁ဝ နှစ်၊ ပြန်ဆပ်ကာလ
နှစ် ၃ဝ ဖြင့် စုစုပေါင်းချေးငွေသက်တမ်း နှစ် ၄ဝ ဖြင့် ချေးယူသွားမည်ဖြစ်ပြီး အတိုးနှုန်းမှာ
တစ်နှစ်လျှင် သုည ဒသမ ၇၅ ရာခိုင်နှုန်းဖြစ်ကြောင်း ဝန်ကြီးက တင်ပြခဲ့ခြင်းဖြစ်သည်။

'' ဒီစီမံကိန်းမှာ ဂျာမနီနိုင်ငံထုတ် ဒီဇယ် ဟိုက်ဒရောလစ် စက်ခေါင်းတွေကို စွမ်းအားမြှင့်တင်
ပြုပြင်တာတွေ၊ လက်ရှိ ဘီးခုတ်စက်ကို အကြီးစား မွမ်းမံ ပြင်ဆင်တာတွေနဲ့ဘီးခုတ်စက်
အသစ် တိုးချဲ့တပ်ဆင်တာတွေ၊ ရထားစက်မှုသင်တန်းကျောင်း အဆင့်မြှင့်တင်တာတွေ
စတဲ့ လုပ်ငန်းတွေ ပါဝင်ပါတယ်'' ဟု ပြည်ထောင်စုဝန်ကြီး ဦးသန့်စင်မောင်က ပြောသည်။

အဆိုပါ ဒီဇယ်စက်ခေါင်းစက်ရုံ စီမံကိန်းကို ဆောင်ရွက်ခြင်းဖြင့်မန္တလေးမြစ်ကြီးနား
ရထားလမ်းပိုင်းနေ ပြည်သူများအတွက် အချိန်မှန်ကန်စိတ်ချရသော လော်ကယ်ရထားများ
တိုးချဲ့ ပြေးဆွဲလာနိုင်ခြင်း၊ စက်ခေါင်းများ ဘီးတာယာခုတ်စားမှု ပိုမိုလျင်မြန်ထိရောက်စေခြင်းနှင့်
ဘီးချော်ကျမှုစသော မတော်တဆမှုများကို ကြိုတင်ကာကွယ်နိုင်ခြင်း၊ လက်ရှိအသုံးပြုနေသော
စက်ခေါင်းအလုံးလိုက်တင်၍ ဘီးခုတ်နိုင်သည့် ဘီးခုတ်စက် (Underfloor Wheel Lathe) ကို
အကြီး စားမွမ်းမံပြင်ဆင်ခြင်း၊ ဘီးခုတ်စက် အသစ်အဖြစ် Universal Wheel Lathe အား
တိုးချဲ့ တပ်ဆင်ခြင်း၊ ဒီဇယ်စက်ခေါင်း၊ လူစီးတွဲနှင့် ကုန်တွဲများ အကြီးစားမွမ်းမံပြင် ဆင်ရာတွင်
ဘီးတာယာခုတ်စားမှု မြန်ဆန်ပြီး အရည်အသွေးမီ ဆောင်ရွက်နိုင်ခြင်း စသည့်အကျိုးကျေးဇူးများကို
ရရှိမည်ဖြစ်ပြီး ရထားစက်မှုသင်တန်းကျောင်းကို အဆင့်မြှင့်တင်ခြင်း၊ စက်မှုနှင့်လျှပ်စစ်အင်ဂျင်နီယာ
ဌာနရှိ အရာထမ်း၊ အမှုထမ်းများကို စက်ခေါင်းပြုပြင်မွမ်းမံမှု ခေတ်မီနည်းစနစ်များကို စနစ်တကျ
စာတွှေုလက်တွေ့ သင်ကြားပေးနိုင်ခြင်းနှင့်ကျွမ်းကျင်မှုနှင့် အရည်အသွေးမြင့်မားသည့်
လူ့စွမ်းအားအရင်းအမြစ်များ ပေါ်ထွက်လာ စေသည့် အကျိုးကျေးဇူးများကို ရရှိမည်ဖြစ်ကြောင်း
ပြည်ထောင်စုဝန်ကြီးဦးသန့်စင်မောင်က ပြည်ထောင်စုလွှတ်တော်သို့ တင်ပြခဲ့သည်။

ဂျာမနီနိုင်ငံ KfW Development Bank မှ ချေးယူမည့် ချေးငွေသည် အတိုးနှုန်းသက်သာသည့်
နှုန်းထားဖြစ်ခြင်းကြောင့် ချေးငွေရယူနိုင်ရန် ပြည်ထောင်စုလွှတ်တော်က ထောက်ခံအတည်ပြုပေးရန်
စီမံကိန်းနှင့် ဘဏ္ဍရေးဝန်ကြီးဌာန၊ ဒုတိယဝန်ကြီး ဦးမောင်မောင်ဝင်းက တင်ပြခဲ့သည်။

အဆိုပါ ချေးငွေ ယူရို ငါးသန်း ချေးယူမှုအတွက် ၂ဝ၁၆ ခုနှစ် ပြည်ထောင်စု၏ ဘဏ္ဍာငွေအရသုံး
ဆိုင်ရာ ဥပဒေပုဒ်မ ၁ဝ နှင့် ပြည်သူ့ ကြွေးမြီစီခံခန့်ခွဲမှု ဥပဒေ ပုဒ်မ ၃ ပါပြဋ္ဌာန်းချက်များအရ
ပြည်ထောင်စုလွှတ်တော်၏ အတည်ပြုချက်ရယူနိုင်ရန် ပြည်ထောင်စုလွှတ်တော် နာယကထံသို့
နိုင်ငံတော်သမ္မတက ယခုလ ၁၅ ရက်က ပေးပို့ခဲ့ခြင်းဖြစ်သည်။

ဤအကြောင်းအရာနှင့် ပက်သက်၍ ထင်မြင်ချက်ပေးလိုပါက ...
[email protected] သို့ ပေးပို့နိုင်ပါသည်။


ရာသီဥတုအခြေအနေ - နေပြည်တော်

အကြည့်အများဆုံး - နေပြည်တော်သတင်း