Monday, April 24, 2017

တတိယမြောက် မိုးလေဝသရေဒါ မေလတွင် တပ်ဆင်ပြီးစီးမည်

မြန်မာနိုင်ငံ၏ မိုးလေဝသနှင့်ဇလဗေဒ ကဏ္ဍတွင် မုန်တိုင်းများ၏တည်နေရာ၊ ပြင်းအားနှင့်
ရွေ့လျားမှုလမ်းကြောင်း များကို အချိန်နှင့်တစ်ပြေးညီ ထောက်လှမ်းနိုင်ရန် ဂျပန်နိုင်ငံက
မိုးလေဝသ ရေဒါသုံးလုံး ထောက်ပံ့ကူညီပေးထားရာ တတိယမြောက်ရေဒါကို လာမည့်မေလ တွင်
တပ်ဆင်ပြီးမည်ဖြစ်ကြောင်း ပို့ဆောင်ရေးနှင့်ဆက်သွယ်ရေးဝန်ကြီး ဌာနမှ အမြဲတမ်းအတွင်းဝန်
ဦးဝင်းခန့် က ပြောကြားသည်။

ပထမရေဒါကို ရခိုင်ပြည်နယ်၊ ကျောက်ဖြူမြို့နယ်၊ မင်းပြင်ရွာတွင် ၂ဝ၁၅ ခုနှစ်၊ အောက်တိုဘာလက
တပ်ဆင်ခဲ့ခြင်းဖြစ်ပြီး ဒုတိယရေဒါကို ရန်ကုန်မြို့၊ ကမ္ဘာအေးတွင် ၂ဝ၁၆ ခုနှစ်၊ အောက်တိုဘာလက
တပ်ဆင်ခဲ့ကာ တတိယမြောက်ရေဒါကို မန္တလေးမြို့တွင် လာမည့်မေလအတွင်း တပ်ဆင်ပြီးစီးရေး
ဆောင်ရွက်နေသည်ဟု နေပြည်တော်၌ ယခုလ ၁ဝ ရက်က ကျင်းပပြုလုပ်ခဲ့သည့် အစိုးရအဖွဲ့၏
တစ်နှစ်တာအတွင်း ဆောင်ရွက်ချက်များနှင့် စပ်လျဉ်းသည့် သတင်းစာရှင်းလင်းပွဲတွင် ၄င်းက
ပြောကြားခဲ့သည်။

အဆိုပါရေဒါများကြောင့် မုန်တိုင်းဖြစ်ပေါ်မှုများကို သုံးနာရီလျှင်တစ်ကြိမ်၊ တစ်နေ့ရှစ်ကြိမ်
ရှာဖွေထောက်လှမ်းနိုင် ခဲ့ကြောင်းလည်း ဦးဝင်းခန့်က ပြောသည်။

မြန်မာနိုင်ငံသည် ရာသီဥတုဖောက်ပြန်မှု အများဆုံးကြုံတွေ့နေရသည့်နိုင်ငံ ၁ဝ နိုင်ငံတွင်
ဒုတိယမြောက်အများဆုံး နေရာတွင် ရှိနေရာ ယခုတပ်ဆင်သော မိုးလေဝသရေဒါများသည်
မုန်တိုင်းများ ကို ကြိုတင်ခန့်မှန်းနိုင်သောကြောင့် သဘာဝဘေး လျော့ပါးရေးအတွက် အလွန်
အရေးပါကြောင်းလည်း တာဝန်ရှိသူများက ပြောသည်။

သဘာဝဘေးအန္တရာယ်များ ကျရောက်လာပါက ချက်ချင်းတုံ့ပြန်နိုင်ရေးနှင့် ကူညီကယ်ဆယ်ရေး
လုပ်ငန်း များကို ပိုမိုထိရောက်စွာ ဆောင်ရွက်နိုင်ရန် ရဟတ်ယာဉ်ဝယ်ယူနိုင်ရေးကို ဆောင်ရွက်
လျက်ရှိကြောင်းလည်း လူမှုဝန်ထမ်း၊ ကယ်ဆယ်ရေးနှင့်ပြန်လည်နေရာချထားရေးဝန်ကြီးဌာန
ပြည်ထောင်စုဝန်ကြီး ဒေါက်တာဝင်းမြတ်အေးက အဆိုပါသတင်းစာရှင်းလင်းပွဲတွင်
ပြောကြားခဲ့သည်။

ရဟတ်ယာဉ်ဝယ်ယူရေးကို သဘာဝ ဘေးအန္တရာယ်ဆိုင်ရာ စီမံခန့်ခွဲမှုကော်မတီက ကြီးကြပ်
ဆောင်ရွက်လျက်ရှိ သည်ဟု ၄င်းက ပြောသည်။

မြန်မာနိုင်ငံသည် ငလျင်ဒဏ်ကြောင့် ထိခိုက်ဆုံးရှုံးမှုများ ကြုံတွေ့ရလေ့ရှိ သကဲ့သို့ မုန်တိုင်းများ၏
အကျိုးသက်ရောက်မှုကြောင့် ရေကြီးရေလျှံမှုများဖြစ်ပေါ်ကာ နောက်ဆက်တွဲဆုံးရှုံးမှုများကို
နှစ်စဉ်နီးပါး ကြုံတွေ့ရလေ့ရှိသည့် အတွက် ကယ်ဆယ်ရေးနှင့်ပြန်လည်နေရာချထားရေး
ဦးစီးဌာနတွင် ယခုဘဏ္ဍာနှစ်အတွက် သီးသန့်ရန်ပုံငွေကျပ် ၆ ဒသမ ၅ ဘီလျံထားရှိကြောင်း
အဆိုပါဝန်ကြီးဌာနမှ အမြဲတမ်းအတွင်းဝန် ဦးစိုးအောင်က ပြောကြားသည်။

အမျိုးသား သဘာဝဘေးအန္တရာယ်ဆိုင်ရာ စီမံခန့်ခွဲမှုရန်ပုံငွေအဖြစ်လည်း ယမန်နှစ်တွင်
ကျပ်ဘီလျံ၂ဝ ရရှိခဲ့ပြီး ယခုနှစ်အတွက်လည်း ကျပ်ဘီလျံ ၂ဝ ခွင့်ပြုထားသည်ဟု ၄င်းက
ပြောသည်။

အဆိုပါခွင့်ပြုငွေမှာ အမျိုးသား သဘာဝဘေးအန္တရာယ်ဆိုင်ရာ စီမံခန့်ခွဲမှုကော်မတီကို
ခွင့်ပြုထားခြင်းဖြစ်သောကြောင့် ဦးစီးဌာနအတွက် ခွင့်ပြုငွေကျပ် ၆ ဒသမ ၅ ဘီလျံအပါအဝင်
သဘာဝဘေးများတွင် အရေးပေါ်တုံ့ပြန်မှုများဆောင်ရွက်နိုင်ရန် စုစုပေါင်းခွင့်ပြု
ငွေကျပ် ၂၆ ဒသမ ၅ ဘီလျံရှိသည်ဟု ဦးစိုးအောင်က ပြောသည်။

ဤအကြောင်းအရာနှင့် ပက်သက်၍ ထင်မြင်ချက်ပေးလိုပါက ...
[email protected] သို့ ပေးပို့နိုင်ပါသည်။


ရာသီဥတုအခြေအနေ - နေပြည်တော်

အကြည့်အများဆုံး - နေပြည်တော်သတင်း