အသေးစားဓာတ်အားစနစ် ရှေ့ပြေးစီမံကိန်း ရှစ်ခု ဆောင်ရွက်မည်

မဟာဓါတ်အားလိုင်းနှင့် လက်လှမ်းမမီသော ကျေးလက်ဒေသများအတွက် လျှပ်စစ်မီး ရရှိရေးအတွက်
လက်ရှိဘဏ္ဍာနှစ်အတွင်း အသေးစားဓာတ်အားစနစ် ရှေ့ပြေးစီမံကိန်း ရှစ်ခုကို ကျေးရွာ ၁ဝ ရွာတွင်
ဆောင်ရွက်သွားမည်ဟု စိုက်ပျိုးရေး၊ မွေးမြုရေးနှင့် ဆည်မြောင်းဝန်ကြီးဌာန ပြည်ထောင်စုဝန်ကြီး
ဒေါက်တာအောင်သူက ပြောကြားသည်။

''ယခုဘဏ္ဍာနှစ်မှာ ကျေးလက်ဒေသဖွံ့ဖြိုးတိုးတက်ရေး ဦးစီးဌာန၊ ကျေးလက်နေပြည်သူလူထုနဲ့
ဖွံ့ဖြိုးရေးလုပ်ငန်းရှင်များ ပူးပေါင်းပြီး ရှေ့ပြေးစီမံကိန်းအဖြစ် အသေးစားဓာတ်အားစနစ်ဖြင့်
စီမံကိန်း ရှစ်ခုကို ကျေးရွာ ၁ဝ ရွာမှာ ဆောင်ရွက်သွားမှာဖြစ်ပါတယ်''ဟု နေပြည်တော်တွင်
မေ ၉ ရက်က ကျင်းပခဲ့သည့် အာရှဖွံ့ဖြိုးရေးဘဏ်၏ မြန်မာ့မဟာဓာတ်အားလိုင်းပြင်ပ
ပြန်လည်ပြည့်ဖြိုးမြဲစွမ်းအင်ဆိုင်ရာ ရင်းနှီးမြှုပ်နှံမှု ဖိုရမ်တွင် ၄င်းက ပြောသည်။

အာရှဖွံ့ဖြိုးရေးဘဏ်၏ နည်းပညာအကူအညီပေးရေး အစီအစဉ်ဖြင့် စစ်ကိုင်း၊ မကွေးနှင့်
မန္တလေးတိုင်းဒေသကြီးများအတွင်းရှိ ကျေးရွာ ၁၂ ရွာတွင် ဆိုလာအသေးစားဓာတ်အားစနစ်ဖြင့်
ကျေးလက်မီးလင်းရေး စီမံကိန်းကို အကောင်အထည်ဖော်ခဲ့ပြီးဖြစ်သည်ဟုလည်း
ဒေါက်တာအောင်သူက ပြောသည်။

ယခုနှစ်တွင် ရှေ့ပြေးစီမံကိန်းအဖြစ် အကောင်အထည်ဖော်မည့် အသေးဓာတ်အားစနစ်ဖြင့်
၂ဝ၁၆ မှ ၂ဝ၂၁ ခုနှစ်အထိ ပထမငါးနှစ်စီမံကိန်းအရ အိမ်ထောင်စုပေါင်း သုံးသောင်းခွဲကျော်ကို
အကျိုးပြုနိုင်ရန် ရည်မှန်းထားပြီး၊ အိမ်သုံးဆိုလာစနစ်ဖြင့်လည်း ငါးနှစ်အတွင်း အိမ်ထောင်စုပေါင်း
လေးသိန်းခြောက်သောင်းကျော်ကို အကျိုးပြုနိုင်ရန် ရည်မှန်းဆောင်ရွက်လျက်ရှိသည်ဟု ဆိုသည်။

''ပထမငါးနှစ်စီမံကိန်းအတွင်း မဟာဓာတ်အားလိုင်းပြင်ပ လျှပ်စစ်ဓာတ်အား ရရှိရေးစနစ်ဖြင့်
လျှပ်စစ်ဓာတ်အား မဂ္ဂါဝပ် ၃ဝ အထိ ထုတ်လုပ်နိုင်ပြီး အိမ်ထောင်စုပေါင်း ငါးသိန်းခန့်အထိ
အကျိုးပြုနိုင်ဖို့ ရည်မှန်းထားပါတယ်။ မျှော်မှန်းချက်နှင့်အညီ ပြည့်ဝစွာ ဆောင်ရွက်နိုင်ရေးအတွက်
ပုဂ္ဂလိက၏ ပူးပေါင်းဆောင်ရွက်မှုက လွန်စွာအရေးကြီးပါတယ်'' ဟု ဒေါက်တာအောင်သူက
ပြောသည်။

လက်ရှိတွင်လည်း အသေးစားဓာတ်အားစနစ်ဆိုင်ရာ နည်းဥပဒေများ၊ လုပ်ထုံးလုပ်နည်းများ၊
စံသတ်မှတ်ချက်များကို ကမ္ဘာ့ဘဏ်၊ အာရှဖွံ့ဖြိုးရေးဘဏ်၊ ဂျာမနီနိုင်ငံ အပြည်ပြည်ဆိုင်ရာ
အထောက်အပံ့(ဂျီအိုင်ဇက်) စသည့် နိုင်ငံတကာအဖွဲ့အစည်းများနှင့် ပူးပေါင်းပြီးရေးဆွဲနိုင်ရန်
ကြိုးစားလျက်ရှိရာ ဝိုင်းဝန်းပံ့ပိုးရန် ၄င်းက တောင်းဆိုခဲ့သည်။

ဤအကြောင်းအရာနှင့် ပက်သက်၍ ထင်မြင်ချက်ပေးလိုပါက ...
[email protected] သို့ ပေးပို့နိုင်ပါသည်။


ရာသီဥတုအခြေအနေ - နေပြည်တော်

အကြည့်အများဆုံး - နေပြည်တော်သတင်း