‘ဒီမိုကရေစီ၊ မျိုးဆက်ပွားကျန်းမာရေးနှင့် ပြည်သူ့နီတိ’ တို့ကို သင်ရိုးညွှန်းတန်းတွင် ထည့်သွင်းရေးဆွဲရန် အဆိုတင်သွင်း

မေလ ၁၈ ရက်နေ့က ကျင်းပသည့် အမျိုးသားလွှတ်တော်အစည်းအဝေးအပြီး လွှတ်တော်ကိုယ်စားလှယ်များကို တွေ့ရစဉ်။ ပြည့်သက်ဖြိုး/မြန်မာတိုင်း(မ်)မေလ ၁၈ ရက်နေ့က ကျင်းပသည့် အမျိုးသားလွှတ်တော်အစည်းအဝေးအပြီး လွှတ်တော်ကိုယ်စားလှယ်များကို တွေ့ရစဉ်။ ပြည့်သက်ဖြိုး/မြန်မာတိုင်း(မ်)

‘ဒီမိုကရေစီ၊ မျိုးဆက်ပွားကျန်းမာရေးနှင့် ပြည်သူ့နီတိ’ တို့ကို ပညာရှင်များနှင့် တိုင်ပင်ကာ
သင်ရိုးညွှန်းတန်း၊ အထွေထွေဘာသာရပ်တွင် ထည့်သွင်းရေးဆွဲရန် ပြည်ထောင်စု အစိုးရအား
တိုက်တွန်းကြောင်း အဆိုကို မေလ ၁၈ ရက်နေ့က ပြန်လည်ကျင်းပသည့် အမျိုးသားလွှတ်တော်
အစည်းအဝေး၌ ပဲခူးတိုင်းဒေသကြီးမဲဆန္ဒနယ် အမှတ်(၅)၏ လွှတ်တော်ကိုယ်စားလှယ်
ဒေါက်တာ တင်တင်ဝင်းက တင်သွင်းခဲ့သည်။

အဆိုပါ အချက်သုံးချက်ကို အထွေထွေဘာသာရပ်အတွင်း ထည့်သွင်းရေးဆွဲပြီး မူလတန်း၊
အလယ်တန်း၊ အထက်တန်း၊ ပညာရေးကောလိပ်နှင့် တက္ကသိုလ်တို့တွင် သင်ကြားပေးစေလိုကြောင်း
၎င်းက ဆိုသည်။

“ကျွန်မတို့နိုင်ငံဟာ နိုင်ငံကြီးသားပီသအောင် သင်ပေးတဲ့ ပညာရေးစနစ်မရှိတာ နှစ်ပေါင်းကြာခဲ့ပါပြီ၊
ဒါကြောင့် ဒီခေါင်းစဉ် သုံးခုကို သင်ရိုးညွှန်းတန်း အထွေထွေဘာသာရပ်ထဲမှာ ထည့်သွင်း
သင်ကြားပေးစေလိုပါတယ်” ဟု ဒေါက်တာတင်တင်ဝင်းက ပြောသည်။

ဒီမိုကရေစီကို ထည့်သွင်းသင်ကြားစေလိုသည့် အကြောင်းမှာ ပြည်သူထဲက ပြည်သူ့အကျိုးအတွက်
ပြည်သူက တင်မြှောက်ပေးသော အုပ်ချုပ်ရေးစနစ်ဖြစ်သည့်အတွက် ပြည်သူတစ်ဦးချင်းစီက
စွမ်းဆောင်ရည်နှင့် တာဝန်ယူမှုရှိမှ အောင်မြင်မည့် စနစ်ဖြစ်သည်ဟု ၄င်းက ဆိုသည်။

“ဒါကြောင့် မိမိကိုယ်တိုင် အရင်ကောင်းအောင်ကြိုးစားမှ ဒီစနစ်ကို အကောင်အထည်ဖော်လို့ရပါမယ်၊
တစ်ဦးနဲ့တစ်ဦးသဘောမတူခဲ့ရင်လည်း သဘောမတူတာကို လက်ခံပြီး တိုင်းပြည်တိုးတက်ဖို့အတွက်
ဆွေးနွေးညှိနှိုင်းတိုင်ပင်တဲ့ အလေ့အထကိုငယ်စဉ်ကပင် ကျင့်သုံးတတ်ပြီးပန်းတိုင်ကို
အရောက်သွားရမှာလည်း ဒီမိုကရေစီစနစ်ဖြစ်ပါတယ်” ဟု အဆိုတင်သွင်းသူ လွှတ်တော်
ကိုယ်စားလှယ်ကပြောသည်။

မျိုးဆက်ပွား ကျန်းမာရေးနှင့် ပတ်သက်ပြီးလည်း မြန်မာနိုင်ငံ၏ ယဉ်ကျေးမှုအရ လိင်ပညာပေးခြင်းကို
မိဘကသားသမီးကို သင်ကြားမပေးကြသောကြောင့် အချိန်မတိုင်ခင် လိင်မသမာမှုများ
ကျူးလွန်ကြသည့်အခါ မျိုးပွားအင်္ဂါ ထိခိုက်ခြင်း၊ ပိုးဝင်၍ သွေးအဆိပ်တက်ခြင်းနှင့် သွေးသွန်၍
အသက်ဆုံးရှုံးခြင်းများ ဖြစ်ကြကာ ဒုက္ခပေါင်းစုံကြုံတွေ့ကြကြောင်း ၄င်းက ဆိုသည်။

“ငယ်ရွယ်သော အမျိုးသမီးများဟာ အိမ်ထောင်မပြုမီ ကိုယ်ဝန် ရရှိကြတဲ့အခါ ဆရာဝန်ထံ ဖျက်ဖို့
လာကြပါတယ်၊ ဆရာဝန်က ကျင့်ဝတ်အရ မဖျက်ပေးရင် ဖျက်ချင်တဲ့ဆီမှာ ဖျက်ပေးသူနဲ့ ဖျက်ချင်သလို
ဖျက်လာတဲ့ အခါမှာဒီလိုအဖြစ်မျိုးတွေနဲ့ လူသားအရင်းအမြစ်များဆုံးရှုံးကြရပါတယ်” ဟု
ဒေါက်တာတင်တင်ဝင်းက ပြောသည်။

လူသားများအနေဖြင့် ငယ်စဉ်အခါကတည်းက ကိုယ်ကျင့်တရားကို သိရှိစေရန် သင်ပေးခဲ့ပါက
ပြည်သူ့ ငွေသန်းပေါင်း ၇၀၀၀ ကျော် အလွဲသုံးစားမှုမျိုးလည်း မရှိနိုင်သည့်အပြင် နေရာတိုင်းတွင်
စိတ်အခန့်မသင့်သည်နှင့် လူသတ်နေသော အဖြစ်မျိုးနှင့် လိမ်လည်လှည့်ဖြားပြီး ငွေကိုဖြစ်စေ၊
လူကိုဖြစ်စေယူနေသော အမှုမျိုးလည်း မရှိနိုင်ကြောင်း ပြည်သူ့နီတိကိုသင်ကြားစေလိုသည့်
ရည်ရွယ်ချက်ကို ၄င်းက ပြောသည်။

“ငယ်စဉ်ကတည်းကသာ ကိုယ်ကျင့်တရားနဲ့ ပတ်သက်ပြီး သင်ကြားပေးခဲ့ရင် မူးယစ်ဆေးစွဲပြီး ခိုးမှု၊
လုယက်မှု၊ အိမ်အခွံ့ချည်းကျန်အောင် ရောင်းစားမှုမျိုးလည်းရှိမှာ မဟုတ်ပါဘူး၊ လိင်မသမာမှုတွေ
မကျူးလွန်တော့တဲ့အတွက် မုဒိမ်းမှု၊ သူများအိမ်ထောင်ကိုဖျက်ဆီးမှု၊ လူကုန်ကူးမှုနဲ့
အရွယ်မရောက်သေးသူတွေကို မုဒိမ်းကျင့်မှုစတဲ့ စက်ဆုပ်ဖွယ်အဖြစ်မျိုးတွေလည်း
ရှိမှာမဟုတ်တော့ပါဘူး” ဟု အမျိုးသားလွှတ်တော် ကိုယ်စားလှယ် ဒေါက်တာတင်တင်ဝင်းက
ပြောသည်။

ယခုတင်သွင်းသည့် အဆိုသည် ကုသမဂ္ဂ၏ SDG Goals ထောင်စုနှစ်ရည်မှန်းချက် ၁၇ ချက်အနက်
စတုတ္ထအချက်ဖြစ်သော Quality Education နှင့် သက်ဆိုင်သည့်အပြင် ပညာရေးဝန်ကြီးဌာနမှလည်း
ပညာရေးအရည်အသွေး မြင့်မားရေးအတွက် လူ့စွမ်းအားအရင်း အမြစ်ဖွံ့ဖြိုးတိုးတက်ရေးဆိုင်ရာ
ပညာသင်ဆုအစီအစဉ်အဖြစ် သင်ရိုးညွှန်းတန်းနှင့် သင်ရိုးမာတိကာများ မြှင့်တင်ရေးအစီအစဉ်၊
ဘ၀တွက်တာ ကျွမ်းကျင်စရာဘာသာရပ် ထည့်သွင်းသင်ကြားခြင်းနှင့် လူ့အခွင့်အရေးဆိုင်ရာ
သင်ခန်းစာ ထည့်သွင်းသင်ကြားခြင်းဆောင်ရွက်ချက်များကို ဆောင်ရွက်နေသော အချိန်ဖြစ်ကြောင်း
၎င်းက ဆိုသည်။

ယခုအဆိုသည် မျက်မှောက်ခေတ်ကာလနှင့် ဆီလျော်မှုရှိပြီး နိုင်ငံတော်အတွက် လိုအပ်နေသည့်
အချက်များဖြစ်သောကြောင့် ပဲခူးတိုင်းဒေသကြီးအမှတ်(၇)မဲဆန္ဒနယ်၏ အမျိုးသားလွှတ်တော်
ကိုယ်စားလှယ် ဒေါက်တာမြသောင်း ကထောက်ခံခဲ့သည်။

အဆိုနှင့် ပတ်သတ်ပြီးလွှတ်တော်တွင် ဆွေးနွေးရန် လွှတ်တော်ကိုယ်စားလှယ်များက
သဘောတူခဲ့ပြီး ဆွေးနွေးလိုသည့် လွှတ်တော်ကိုယ်စားလှယ်များ ရှိပါက အမျိုးသားလွှတ်တော်၊
ညွှန်ကြားရေးမှူးချုပ်ထံအမည် စာရင်းတင်သွင်းနိုင်ကြောင်း အမျိုးသားလွှတ်တော် ဥက္ကဋ္ဌ
မန်းဝင်းခိုင်သန်းက ကြေညာခဲ့သည်။

ဤအကြောင်းအရာနှင့် ပက်သက်၍ ထင်မြင်ချက်ပေးလိုပါက ...
[email protected] သို့ ပေးပို့နိုင်ပါသည်။


ရာသီဥတုအခြေအနေ - နေပြည်တော်

အကြည့်အများဆုံး - နေပြည်တော်သတင်း