မြန်မာ့ပိုင်နက် ပင်လယ်နှင့် ပင်လယ်ဇုန်များ ဥပဒေကြမ်းတွင် လိုအပ်ချက်များ ရှိနေကြောင်း ပြည်ထောင်စု လွှတ်တော်ကိုယ်စားလှယ် ထောက်ပြ

ဇွန်လ ၁ ရက်နေ့က ကျင်းပသည့် ပြည်ထောင်စုလွှတ်တော်အစည်းအဝေးတွင် မြန်မာ့ပင်လယ်နှင့်
ပင်လယ်ဇုန်များ ဥပဒေကြမ်းနှင့် ပတ်သက်ပြီး မင်းကင်းမဲဆန္ဒနယ်၏ ပြည်သူ့လွှတ်တော်
ကိုယ်စားလှယ် ဦးမောင်မြင့်က လိုအပ်ချက်များ ရှိနေကြောင်း ထောက်ပြဆွေးနွေးခဲ့သည်။

“ဒီဥပဒေကြမ်းကို နိုင်ငံခြားရေးဝန်ကြီးဌာနအနေနဲ့ ပညာရှင်တော်တော်များများနဲ့ ရေးဆွဲထားတာ
ဖြစ်ပေမဲ့ လိုအပ်ချက်က ရှိနေပါသေးတယ်” ဟု ၄င်းက ပြောသည်။

အဆိုပါဥပဒေကြမ်းကို နိုင်ငံခြားရေးဝန်ကြီးဌာနက ပြန်လည်ပြင်ဆင်ကာ လွှတ်တော်သို့
ပေးပို့ထားခြင်းဖြစ်ပြီး အမျိုးသားနှင့် ပြည်သူ့လွှတ်တော်တို့တွင် ဆွေးနွေးခဲ့ကြရာ လွှတ်တော်
နှစ်ရပ်တွင် သဘောထားကွဲလွဲမှုများ ရှိနေသည့်အတွက် ပြည်ထောင်စုလွှတ်တော်တွင်
လွှတ်တော်ကိုယ်စားလှယ် လေးဦးက ဆွေးနွေး ခဲ့ကြခြင်းဖြစ်သည်။

“ဒီဥပဒေကြမ်းကို ရေးဆွဲတဲ့အခါမှာ ပညာရှင်စုံလေ ပိုကောင်းလေပါပဲ၊ တစ်ကယ်တော့ ဒီဥပဒေဟာ
နိုင်ငံအတွက် အင်မတန်အရေးကြီးပါတယ်၊ ဘာကြောင့်အရေးကြီးလဲဆိုတော့ ကျွန်တော်တို့နိုင်ငံမှာ
ကုန်းနယ်နိမိတ်ဆိုတာ အပြီးသတ်ကန့်သတ်ထားပြီးဖြစ်ပါတယ်၊ ရေနယ်နိမတ်ဆိုတာဟာ
ထပ်မံတိုးချဲ့လို့ရတယ်၊ ဒီဥပဒေပြ ဋ္ဌာန်းမှာကို အိမ်နီးချင်း ရေနယ်နိမိတ်ချင်းထိစပ်နေတဲ့ နိုင်ငံတွေက
အင်မတန်သတိကြီးစွာနဲ့ စောင့်ကြည့်နေပါတယ် ” ဟု ဦးမောင်မြင့်က ပြောသည်။

ထို့ကြောင့် ထိုဥပဒေကြမ်းကို နောင်တစ်ချိန်မှ ပြန်လည်ပြင်ဆင်ရမည် ဆိုသည်ထက် ယခုကဲ့သို့
အသစ်ပြဋ္ဌာန်းသည့် အချိန်တွင် ပြည့်စုံသော ဥပဒေတစ်ရပ်ဖြစ်စေရန် ကြိုးစားကြရန်
လိုအပ်ကြောင်းလည်း ၄င်းက ထည့်သွင်း ဆွေးနွေးသည်။

သဘောထားကွဲလွဲကြသည့် ဥပဒေကြမ်းတွင် ပါဝင်သော နိုင်ငံခြားသားပိုင်ရေယာဉ်
မှတ်ပုံတင်ခြင်းကိစ္စ၊ တည်ဆဲဥပဒေအရ ငါးအပါအ၀င် ရေနေသတ္တ၀ါများ၊ အပင်များကို ဖမ်းယူ၊
စုဆောင်း၊ ဆွဲဆောင်ခြင်း၊ မူးမေ့စေခြင်း၊ သေစေခြင်း၊ ငါးဖမ်းလုပ်ငန်း ပြုလုပ်ခြင်း၊
ထိုလုပ်ငန်းများအတွက် အထောက်အကူပြုလုပ်ငန်းများကို ဆောင်ရွက်ခြင်းနှင့်
သဘာဝသယံဇာတများကို ပျက်စီးဆုံးရှုံးနစ်နာစေရန် ပြုလုပ်ခြင်းကိစ္စနှင့် နိုင်ငံတော်၏
ကမ်းလွန်ရေတိမ်ပိုင်းကိစ္စတို့ကို လွှတ်တော်ကိုယ်စားလှယ်များက ဆွေးနွေးခဲ့ကြသည်။

ဥပဒေရေးရာနှင့် အထူးကိစ္စရပ်များ လေ့လာဆန်းစစ်သုံးသပ်ရေးကော်မရှင်အဖွဲ့ဝင် ဦးခင်မောင်ဝင်းက
နိုင်ငံခြားရေးဝန်ကြီးဌာန၊ ရှေ့နေချုပ်ရုံး၊ ပြည်ထောင်စုတရားလွှတ်တော်ချုပ်ရုံးနှင့် ဥပဒေရေးရာနှင့်
အထူးကိစ္စရပ်များ လေ့လာဆန်းစစ်သုံးသပ်ရေးကော်မရှင်မှ ပညာရှင် ခြောက်ဦးတို့ဖြင့် မြန်မာ့ပိုင်နက်
ပင်လယ်နှင့် ပင်လယ်ဇုန်များ ဥပဒေကြမ်းကို ပြင်ဆင်ရေးဆွဲထားသည်ဟု ဆိုသည်။

“ဦးမောင်မြင့် ဆွေးနွေးတဲ့ ဒီဥပဒေအရေးကြီးတယ်ဆိုတာ မှန်ပါတယ်၊ ပညာရှင်နဲ့ တိုင်ပင်သင့်တယ်
ဆိုတာကိုတော့ အမှန်တိုင်းပြောရလို့ရှိရင် တစ်ကယ့်ကို ပြည့်စုံအောင်လုပ်ထားပြီးသား၊
ပြည်ထောင်စုလွှတ်တော်ကို ရောက်လာပြီဆိုကတည်းက ပညာရှင်တွေ အကုန်လုံးပါပြီးသား၊
ကျွန်တော်တို့ ပေါ့ပေါ့ဆဆ၊ လွယ်လွယ်ကူကူ ဆိုပြီး လွှတ်တော်ကိုယ်စားလှယ်တွေလောက်နဲ့
ရေးဆွဲထားတာ မဟုတ်ပါဘူး၊ ပညာရှင်တွေကလည်း အပြန်အလှန်ဆွေးနွေးပြီးမှ
ဒီပေါ်(လွှတ်တော်)ကို ရောက်လာတာပါ” ဟု ၄င်းက မြန်မာတိုင်း(မ်)ကို ပြောသည်။

မြန်မာ့ပိုင်နက်ပင်လယ်နှင့် ပင်လယ်ဇုန်များဥပဒေကြမ်းနှင့် စပ်လျဉ်းပြီး တစ်ပိုဒ်ချင်းစီအလိုက်
အတည်ပြုရန်နှင့် အဆိုတင်သွင်းခြင်း၊ လွှတ်တော်၏ အဆုံးအဖြတ်ရယူခြင်းတို့ကို
ဇွန်လ ၆ ရက်နေ့တွင် ကျင်းပမည့် ပြည် ထောင်စုလွှတ်တော်အစည်းအဝေး၌
ဆောင်ရွက်သွားမည်ဖြစ်သည်။

ဤအကြောင်းအရာနှင့် ပက်သက်၍ ထင်မြင်ချက်ပေးလိုပါက ...
[email protected] သို့ ပေးပို့နိုင်ပါသည်။


ရာသီဥတုအခြေအနေ - နေပြည်တော်

အကြည့်အများဆုံး - နေပြည်တော်သတင်း