ပြီးခဲ့သည့်နှစ်တွင် ငွေစက္ကူအတုအဖြစ် ၅,ဝဝဝ ကျပ် တန် ၁,၃၄၃ ရွက်နှင့် ၁ဝ,ဝဝဝ ကျပ်တန် ၉၅၇ ရွက်အပ်နှံ

မြန်မာနိုင်ငံငွေကြေးဈေးကွက်အတွင်း ငွေစက္ကူအတု ကိုင်တွယ်အသုံးပြုမှုများကို တွေ့ရှိသိမ်းဆည်း
အရေးယူလျက်ရှိရာ ပြီးခဲ့သည့် ၂ဝ၁၆-၁၇ ဘဏ္ဍာနှစ်အတွင်း ၅,ဝဝဝ ကျပ်တန် ငွေစက္ကူအတု
၁,၃၄၃ ရွက်နှင့် တစ်သောင်း ကျပ်တန် ငွေစက္ကူအတု ၉၅၇ ရွက်တို့ကို စစ်ဆေးအတည်ပြုနိုင်
ခဲ့ကြောင်း မြန်မာနိုင်ငံတော် ဗဟိုဘဏ် ဒုတိယဥက္ကဋ္ဌ ဦးစိုးမင်းက ပြည်သူ့လွှတ်တော်တွင်
ဇွန် ၁၃ ရက်က ပြောကြားခဲ့သည်။

''ငွေစက္ကူအတုများ ပျံ့နှံ့နေသည်ဟုဖော်ပြခြင်းနှင့်ပတ်သက်ပြီး မြန်မာနိုင်ငံတော်ဗဟိုဘဏ်
မှတ်တမ်းများအရ ငွေစက္ကူအတုအဖြစ် အပ်နှံထားသောပမာဏမှာ လက်ရှိလှည့်လည်သုံးစွဲလျက်
ရှိသော ငွေကြေးရွက်ရေ စုစုပေါင်း ၁,၃၅၃ သန်းနှင့်နှိုင်းယှဉ်ပါက ဝ ဒသမ ဝဝဝ၅၄ ရာခိုင်နှုန်းသာ
ရှိကြောင်းတင်ပြလိုပါတယ်''ဟု ၄င်းကပြောကြားခဲ့ခြင်းဖြစ်သည်။

ငွေစက္ကူအတုများတွေ့ရှိပါက မြန်မာနိုင်ငံရဲတပ်ဖွဲ့သည် ဖြန့်ဝေသူနှင့်ထုတ်လုပ်သည့်စက်များကိုပါ
ဆက်လက်စုံစမ်းဖော်ထုတ် အရေးယူပြီး ငွေစက္ကူအတုများ သယ်ဆောင်၊ ဖြန့်ဖြူး၊ သုံးစွဲမှုမရှိစေရေး
အတွက် ဆောင်ရွက် လျက်ရှိသည်။ တရားရုံးအမိန့်ချမှတ်ပြီးသော ငွေစက္ကူအတုများကို
တရားရုံးပြီးပြတ်ချက်နှင့်အတူ မြန်မာနိုင်ငံတော်ဗဟိုဘဏ်သို့ အပ်နှံရပြီး၊ ထိုငွေစက္ကူအတုများကို
ဗဟိုဘဏ်တွင် အပြီးပြတ်ဖျက်ဆီးရခြင်းဖြစ်ကြောင်း လည်း ဦးစိုးမင်းက ရှင်းလင်း
တင်ပြခဲ့သည်။

နေပြည်တော်ဇမ္ဗူသီရိမြို့နယ်မှ ပြည်သူ့လွှတ်တော်ကိုယ်စားလှယ် ဦးဖြိုးဇေယျာသော်ကမူ
ငွေစက္ကူအတုများကို အတုမှန်းမသိဘဲကိုင်တွယ်သုံးစွဲမိသည့် သာမန်ပြည်သူများသည်
ထိုငွေစက္ကူအတုများ သိမ်းဆည်းခံရခြင်းကြောင့် နစ်နာလျက်ရှိကြောင်း ပြောကြားသည်။
သို့သော် ဦးစိုးမင်းကမူ ဖွဲ့စည်းပုံအခြေခံဥပဒေနှင့် မြန်မာနိုင်ငံတော် ဗဟိုဘဏ်ဥပဒေတို့တွင်
ဗဟိုဘဏ်ကထုတ်လုပ် သည့်ငွေစက္ကူကိုသာ တရားဝင်ကြောင်းသတ်မှတ်ထားသောကြောင့်
တရားမဝင်သောငွေစက္ကူအတုများအတွက် တာဝန်ယူရန်မရှိကြောင်း ပြန်လည်ရှင်းလင်းခဲ့သည်။

အထက်ပါ အကြောင်းအရာနှင့်ပတ်သက်ပြီး ပြည်သူ့လွှတ်တော်ဥက္ကဋ္ဌဦးဝင်းမြင့်ကလည်း
ငွေစက္ကူအတုကိုင်တွယ်သုံးစွဲသူများအတွက် နစ်နာမှုမရှိစေရန် စီစဉ်စေလိုခြင်းသည်
မဖြစ်သင့်ကြောင်း ဝင်ရောက်ရှင်း လင်းပြောကြားသည်။ ထိုကဲ့သို့ ငွေအတုကိုင်တွယ်သုံးစွဲ
သူများအတွက် နစ်နာမှုမရှိစေရန် ဆောင်ရွက်ပေးမည်ဆိုပါက ငွေအတုပြုလုပ်သူများသည်
ပမာဏအများအပြားဖြင့် ကိုင်တွယ်သုံးစွဲလာနိုင်သော အခြေအနေမျိုးရှိလာနိုင်ကြောင်း
ပြောကြားခဲ့သည်။

မြန်မာနိုင်ငံရဲတပ်ဖွဲ့သည် ယခုနှစ်ဇန်နဝါရီလမှ မေလအထိ ငွေစက္ကူအတုများကို နယ်စပ်တွင်
ခုနစ်ကြိမ်၊ ပြည်တွင်းထုတ်လုပ်မှုတွင် ခြောက်ကြိမ် ဖမ်းဆီးနိုင်ခဲ့ကြောင်းလည်း ဦးစိုးမင်း၏
ပြောကြားချက်အရ သိရသည်။

ဤအကြောင်းအရာနှင့် ပက်သက်၍ ထင်မြင်ချက်ပေးလိုပါက ...
[email protected] သို့ ပေးပို့နိုင်ပါသည်။


ရာသီဥတုအခြေအနေ - နေပြည်တော်

အကြည့်အများဆုံး - နေပြည်တော်သတင်း