သမဝါယမအသင်းသား လေးသန်းကျော်ကို ကျပ် ၅၄၇ ဘီလျံကျော် ထုတ်ချေး

 စက်မှုလယ်ယာလုပ်ငန်းခွင်တစ်ခုကို ဇွန်လဆန်းပိုင်းက တွေ့ရစဉ်။ ဓာတ်ပုံ - အီးပီအေ စက်မှုလယ်ယာလုပ်ငန်းခွင်တစ်ခုကို ဇွန်လဆန်းပိုင်းက တွေ့ရစဉ်။ ဓာတ်ပုံ - အီးပီအေ

တိုင်းဒေသကြီးနှင့် ပြည်နယ်အသီးသီးရှိ သမဝါယမအသင်းသားပေါင်း လေးသန်းကျော်ကို
အသေးစား အရင်းအနှီးချေးငွေ၊ လယ်ယာသုံးစက်ကိရိယာများ ဝယ်ယူရန်ချေးငွေနှင့် လယ်ယာ
မြေများ အဆင့်မြှင့်တင်ရန် ချေးငွေအဖြစ် စုစုပေါင်း ကျပ် ၅၄၇ဒသမ ၅၇ ဘီလျံကို ယခုလ ၁ ရက်က
နေပြည်တော်တွင် ပြုလုပ်ခဲ့သည့် အပြည်ပြည်ဆိုင်ရာ သမဝါယမနေ့ အခမ်းအနားတွင်
ထုတ်ချေးခဲ့သည်။

အသေးစားအရင်းအနှီးချေးငွေအဖြစ် ကျပ် ၅၂၉ ဒသမ ၅၃ ဘီလျံ၊ လယ်ယာသုံးစက်ကိရိယာမျိုးစုံ
စီးရေ ၂,ဝဝဝ ကျော်အတွက် တန်ဖိုးကျပ် ၉ ဒသမ ၄၅ ဘီလျံနှင့် လယ်ယာမြေများ အဆင့်မြှင့်တင်ရန်
ချေးငွေကျပ် ၈ ဒသမ ၅၉ ဘီလျံဖြစ်သည်ဟု တာဝန်ရှိသူများက ပြောကြားခဲ့သည်။

''ငွေကြေးဝန်ဆောင်မှုလုပ်ငန်းတွေ၊ လယ်ယာနဲ့ သားငါးလုပ်ငန်းတွေ၊ ကုန်စည်နဲ့ ဝန်ဆောင်မှု
ဝယ်ယူခြင်းလုပ်ငန်း၊ ကျန်းမာရေး စောင့်ရှောက်မှုလုပ်ငန်းတွေ၊ အိမ်ရာလုပ်ငန်းတွေ၊
အာမခံလုပ်ငန်း၊ စက်မှုလက်မှုလုပ်ငန်းဆိုင်ရာ ဝန်ဆောင်မှုပေးခြင်းလုပ်ငန်းတွေ
စတဲ့စီးပွားရေးကဏ္ဍတွေမှာ တိုးချဲ့ဆောင်ရွက်နိုင်ဖို့ သမဝါယမ အသင်းအဖွဲ့များက
ပံ့ပိုးပေးလျက်ရှိပါတယ်'' ဟု ဒုတိယသမ္မတ ဦးဟင်နရီဗန်ထီးယူက အဆိုပါ အခမ်းအနားတွင်
ပြောကြားခဲ့သည်။

သမဝါယမကဏ္ဍ ဖွံ့ဖြိုးရေးအတွက် သမဝါယမဦးစီးဌာနက အကောင်အထည်ဖော်လျက်ရှိပြီး
အသင်းသားများ၏ လုပ်ငန်းများလည်း အရှိန်အဟုန်နှင့် တိုးတက်လာခဲ့ကြောင်း စိုက်ပျိုးရေး၊
မွေးမြူရေးနှင့် ဆည်မြောင်းဝန်ကြီးဌာန ပြည်ထောင်စုဝန်ကြီးဒေါက်တာအောင်သူက ပြောကြား
သည်။

''အစိုးရသစ်တက်လာပြီး ၂ဝ၁၆ ခုနှစ်အတွင်းမှာ အရင်ကမလုပ်နိုင်ခဲ့တဲ့ လယ်ယာကဏ္ဍ
သွင်းအားစု ဖြန့်ဖြူးပံ့ပိုးရေးလုပ်ငန်းတွေဆောင်ရွက်နိုင်ခဲ့ပါတယ်'' ဟု ၄င်းက ပြောသည်။

ယခင်အစိုးရလက်ထက်တွင် သမဝါယမအသင်းသားများကို အသေးစားအရင်းအနှီးချေးငွေ
ထုတ်ချေးခြင်းနှင့် လယ်ယာသုံး စက်ကိရိယာများ အရစ်ကျပြန်ဆပ်စနစ်ဖြင့် ဝယ်ယူနိုင်ရန်
ကြားခံဆောင်ရွက်ပေးခြင်းသာ ဆောင်ရွက်ခဲ့သော်လည်း အစိုးရသစ်လက်ထက်တွင်မူ
လယ်ယာမြေပြုပြင်ခြင်းအတွက်ပါ ထုတ်ချေးနိုင်ခြင်း ဖြစ်သည်။

လယ်ယာမြေပြုပြင်ပေးခြင်းလုပ်ငန်းကို၂ဝ၁၆ ခုနှစ်တွင် ဧကတစ်သောင်းခွဲဖော်ထုတ်ပေးရန်
လျာထားခဲ့သော်လည်း အသင်းသားများ၏ လိုအပ်ချက်အရ ဧကသုံးသောင်းခွဲကျော်အထိ
ဆောင်ရွက်ပေးနိုင်ခဲ့သည်။ ယခုနှစ်တွင်လည်း ဧကသုံးသောင်းနီးပါးခန့် ပြုပြင်ပေးနိုင်ရန်
ရည်မှန်းထားကြောင်း ဒေါက်တာအောင်သူက ပြောသည်။

''တစ်နည်းအားဖြင့် လယ်သမားတွေရဲ့ ထုတ်လုပ်မှုကွင်းဆက်ကို သမဝါယမအသင်းသားတွေက
ဝင်ရောက်ကူညီပေးနိုင်တာဟာ အနာဂတ်ကာလ အလားအလာကောင်းများဖြစ်တယ်လို့
ပြောကြားလိုပါတယ်'' ဟု ၄င်းက ပြောသည်။

ပြီးခဲ့သည့်အစိုးရလက်ထက်တွင် သမဝါယမလုပ်ငန်းများ တိုးချဲ့နိုင်ရန် စတင်ဆောင်ရွက်ခဲ့ပြီး
လိုအပ်သော ငွေကြေးအရင်းအနှီးရရှိရန် တရုတ်နိုင်ငံထံမှ ချေးယူခဲ့သည်။ ချေးငွေစုစုပေါင်း
အမေရိကန်ဒေါ် သန်း ၄ဝဝ အတွက်တစ်နှစ်စာ အတိုးနှုန်း လေးရာခိုင်နှုန်းရှိသောကြောင့်
အဆိုပါချေးငွေနှင့် ပတ်သက်ပြီး အမျိုးသားဒီမိုကရေစီအဖွဲ့ချုပ်ပါတီဝင်
လွှတ်တော်ကိုယ်စားလှယ်များက ဝေဖန်ထောက်ပြမှုများ ရှိခဲ့သည်။

လက်ရှိအစိုးရလက်ထက်တွင် သမဝါယမချေးငွေနှင့်ပတ်သက်၍ အာဏရပါတီလွှတ်တော်
ကိုယ်စားလှယ်များက ဝေဖန်ထောက်ပြခြင်းများ မပြုတော့ပေ။ သမဝါယမလုပ်ငန်းသည်
တောင်သူလယ်သမားများအတွက်အကျိုးရှိသောလုပ်ငန်းဖြစ်သည်ဟုလည်းဒေါက်တာ
အောင်သူက ပြောကြားခဲ့သည်။

သမဝါယမချေးငွေနှင့်ပတ်သက်ပြီး အသင်းသားများက ပြန်မဆပ်နိုင်မည်ကို စိုးရိမ်မှုများ
ရှိနေသော်လည်း ယနေ့အထိ ပြန်မဆပ်သော အသင်းသား မရှိသေးကြောင်း သမဝါယမ
ဦးစီးဌာန ညွှန်ကြားရေးမှူး ဦးမျိုးအောင်က ပြောသည်။

''ဒီနေ့အထိ အဲဒီလိုမရှိသေးပါဘူး။ ခြောက်လတစ်ကြိမ် ထုတ်ချေးတယ်။ ပြီးရင်ပြန်သိမ်းတယ်။
ပြီးရင် ပြန်ထုတ်ချေးတယ်။ဒါကြောင့် အဲဒီလိုပြန်မဆပ်လို့ ဆုံးရှုံးနိုင်တဲ့အခြေအနေလည်း
အလွန်နည်းပါတယ်'' ဟု ၄င်းက ပြောသည်။ လက်ရှိတွင် တစ်နိုင်ငံလုံး၌ သမဝါယမ
အသင်းပေါင်း လေးသောင်းကျော်ရှိပြီး အသင်းသားဦးရေ ၄ ဒသမ ၂၅ သန်းခန့်ရှိသည်။

ဤအကြောင်းအရာနှင့် ပက်သက်၍ ထင်မြင်ချက်ပေးလိုပါက ...
comment.myanmar@mmtimes.com သို့ ပေးပို့နိုင်ပါသည်။


ရာသီဥတုအခြေအနေ - နေပြည်တော်

အကြည့်အများဆုံး - နေပြည်တော်သတင်း