ကတိမတည်သော ဝန်ကြီးဌာနများရှိနေ

လွှတ်တော်အစည်းအဝေးခန်းမအတွင်းသို့ ပြည်သူ့လွှတ်တော်ဥက္ကဋ္ဌ ဦးဝင်းမြင့် ဝင်ရောက်လာသည်ကို ဇူလိုင်လကုန်ပိုင်းကတွေ့ရစဉ်။ ဓာတ်ပုံ - အီးပီအေလွှတ်တော်အစည်းအဝေးခန်းမအတွင်းသို့ ပြည်သူ့လွှတ်တော်ဥက္ကဋ္ဌ ဦးဝင်းမြင့် ဝင်ရောက်လာသည်ကို ဇူလိုင်လကုန်ပိုင်းကတွေ့ရစဉ်။ ဓာတ်ပုံ - အီးပီအေ

ဝန်ကြီးဌာနအချို့သည် လွှတ်တော်တွင် ကတိပေးထားပြီးဖြစ်သော်လည်း အကြောင်းအမျိုးမျိုးပြကာ
ကတိအတိုင်းဆောင်ရွက်ရန် ငြင်းဆိုမှုများရှိနေကြောင်း ပြည်သူ့လွှတ်တော်၊ အစိုးရ၏အာမခံချက်များ၊
ကတိများနှင့် တာဝန်ခံချက်များ စိစစ်ရေးကော်မတီက ယမန်နေ့တွင် လွှတ်တော်သို့ အစီရင်ခံခဲ့သည်။

''ဝန်ကြီးဌာနအချို့အနေဖြင့် လွှတ်တော်တွင် ကတိအဖြစ် ဖြေဆိုထားပြီးသော်လည်း ၄င်းတို့ဝန်ကြီး
ဌာနနှင့် တိုက်ရိုက်သက်ဆိုင်မှု မရှိဟူသော အကြောင်းပြချက်ဖြင့်လည်းကောင်း၊ သက်ဆိုင်ရာ
ဝန်ကြီးဌာန ကိုယ်စား တက်ရောက်ဖြေဆိုရသည့်အတွက်ဟူသော အကြောင်းပြချက်ဖြင့်လည်း
ကောင်း၊ ဌာနဆိုင်ရာလုပ်ထုံးလုပ်နည်းအရ လုပ်ငန်းများဆောင်ရွက်ရန် ငြင်းဆိုခြင်းများရှိသည်ကို
တွေ့ရပါတယ်''ဟု ကော်မတီ၏ အစီရင်ခံစာက ဆိုသော်လည်း ထိုသို့ ငြင်းဆိုသည့်ဝန်ကြီးဌာနများ၏
အမည်ကိုမူ သီးခြားဖော်ပြထားခြင်း မရှိပေ။

ပဲခူးမြို့အနီးရှိ ကန်တော်ကြီး ရေဝေရေလဲဒေသ ဧရိယာအတွင်းရှိ စီမံကိန်းလုပ်ငန်းများ
ပြန်လည်စိစစ်ရေးနှင့် စပ်လျဉ်းသည့်အဆိုကို ပြီးခဲ့သည့် ဖေဖော်ဝါရီအတွင်းက အတည်ပြုခဲ့သော်
လည်း သက်ဆိုင်ရာဌာနဖြစ်သော သယံဇာတနှင့် သဘာဝပတ်ဝန်းကျင်ထိန်းသိမ်းရေး ဝန်ကြီးဌာနက
ဆောင်ရွက်ခြင်း မရှိသေးကြောင်း အဆိုရှင် ပဲခူးတိုင်းဒေသကြီး သနပ်ပင်မြို့နယ်မှ ပြည်သူ့လွှတ်တော်
ကိုယ်စားလှယ် ဦးမြင့်ဦးက ပြောသည်။

ကျန်းမာရေးနှင့်အားကစားဝန်ကြီးဌာနသည် ကျောက်တန်းမြို့နယ်မှ ပြည်သူ့လွှတ်တော်ကိုယ်စားလှယ်
ဒေါ်အေးမြမြမျိုး၏ မေးခွန်းမှ ကတိ ပေးပြီးဖြစ်သော ၁၆ ခုတင်ဆံ့ တိုက်နယ်ဆေးရုံတည်ဆောက်ခြင်းနှင့်
ပတ်သက်ပြီးလည်း သတ်မှတ်ကာလ ကျော်လွန်လာသည်အထိ လုပ်ငန်းပြီးစီးအောင်
ဆောင်ရွက်နိုင်ခြင်းမရှိဟု ဆိုသည်။

''ခွင့်ပြုဘဏ္ဍာငွေအားလုံးကို ထုတ်ယူသုံးစွဲပြီးဖြစ်သော်လည်း ယနေ့အထိ လုပ်ငန်းပြီးစီးမှုမရှိသည်ကို
တွေ့ရှိခဲ့ရပါသည်''ဟု အစီရင်ခံစာတွင် ဖော်ပြထားသည်။ ကော်မတီက အဆိုပါဒေသသို့
ဇူလိုင် ၁၈ ရက်တွင် သွားရောက်စစ်ဆေးခဲ့ခြင်းဖြစ်သည်။

အဆိုပါကော်မတီသည် လွှတ်တော်အစည်းအဝေး တစ်ကြိမ်အတွင်း ပြည်သူ့လွှတ်တော်
ကိုယ်စားလှယ်များက မေးမြန်းသောမေးခွန်းများ၊ တင်သွင်းသောအဆိုများအနက် သက်ဆိုင်ရာ
ပြည်ထောင်စုအဆင့်ဝန်ကြီးဌာနများက ကတိပြု တာဝန်ယူခဲ့သည့် လုပ်ငန်းများနှင့်ပတ်သက်ပြီး
စီစစ်ကာ လွှတ်တော်သို့ အစီရင်ခံတင်သွင်းရခြင်း ဖြစ်သည်။

ယခုအစီရင်ခံစာသည် ပြီးခဲ့သည် ဇန်နဝါရီ ၃ဝ ရက်မှ မတ် ၁၇ ရက်အထိ ကျင်းပခဲ့သော စတုတ္ထ
ပုံမှန်အစည်းအဝေးအတွင်း ဆောင်ရွက်ခဲ့သည့် ဆောင်ရွက်ချက်များကို အစီရင်ခံခဲ့ခြင်းဖြစ်သည်။
အဆိုပါ အစည်းအဝေးများတွင် ကြယ်ပွင့်ပြမေးခွန်း ၉၂ ခုမေးမြန်းခဲ့ရာတွင် မေးခွန်း ၁၁ ခုသည်
ကတိဖြစ်ခဲ့ပြီး ကြယ်ပွင့်မပြမေးခွန်း ၅၅၆ ခုတွင်လည်း ကတိဖြစ်ခဲ့သည့်မေးခွန်း ၁၄၉
ခုရှိခဲ့ကြောင်း အစီရင်ခံစာက ဆိုသည်။

ဤအကြောင်းအရာနှင့် ပက်သက်၍ ထင်မြင်ချက်ပေးလိုပါက ...
[email protected] သို့ ပေးပို့နိုင်ပါသည်။


ရာသီဥတုအခြေအနေ - နေပြည်တော်

အကြည့်အများဆုံး - နေပြည်တော်သတင်း