နေပြည်တော် ဒိုးနွယ်ရွာဒေသခံ တောင်သူ ၁၅၀ ကျော်က သစ်တောဦးစီးဌာန၏လုပ်ရပ်ကို ကန့်ကွက်လက်မှတ်ထိုး

နေပြည်တော် ဒက္ခိဏသီရိမြို့နယ် ဒိုးနွယ်ရွာသစ်ရှိ စာသင်ကျောင်းတစ်ကျောင်း၊ ဘုန်းတော်ကြီး
ကျောင်းနှင့် အိမ်ခြေ ၂၁၅ လုံးအပါအ၀င် ကုန်းမြေ၊ လယ်မြေ ဧကပေါင်း တစ်ထောင်ကျော်ခန့်တို့
တွင် နှစ်ရှည်လများ အသက်မွေးမှီခိုလုပ်ကိုင် စားသောက်လျက်ရှိကြသော ရွာသူ ရွာသားတို့အား
၎င်းဒေသမှ သုံးရက်အတွင်း ဖယ်ရှားပေးရန် နို့တစ်စာ ထုတ်ပေးသည့် သစ်တောဦးစီးဌာန၏
လုပ်ရပ်အပေါ် ဒေသခံတောင်သူ ၁၅၀ ကျော်တို့က ကန့်ကွက်လက်မှတ်ရေးထိုးကြပြီး ယခု
ဇန်န၀ါရီလ ၂ ရက်နေ့တွင် နိုင်ငံတော်သမ္မတ၊ ပြည်သူ့လွှတ်တော် ဥက္ကဋ္ဌနှင့် လယ်ယာမြေနှင့်
အခြားမြေများသိမ်းဆည်းခံရမှု စုံစမ်းရေးကော်မရှင်တို့သို့ ပေးပို့အသနားခံကြကြောင်း သိရသည်။

ဇန်န၀ါရီ ၁ ရက်နေ့ နေ့လယ်ပိုင်းတွင် ဒေသခံတောင်သူတို့ စုဝေးဆွေးနွေးခဲ့ကြပြီး ကန့်ကွက်
ကြောင်း လက်မှတ်ကို တောင်သူဦးရေ ၁၅၀ ကျော်တို့က ရေးထိုးခဲ့ကြကာ ဇန်န၀ါရီ ၂ ရက်နေ့ တွင်
ပေးပို့ခဲ့ကြခြင်းဖြစ်သည်။

"ဒက္ခိဏသီရိမြို့နယ်ထဲမှ ဘီ(၄)လမ်းနဲ့ စီလမ်းဆုံကနေ ရွှေနံ့သာအထိ ကျယ်ပြန့်တဲ့ ဒိုးနွယ်ရွာသစ်
မှာ လယ်ဧက ၅၀၀၊ ကုန်းမြေ၊ ခြံမြေဧက ၅၀၀ ကျော်ရှိတယ်။ လက်ရှိကျောင်းသား ၉၇ ဦးရှိတဲ့
အနှစ် ၃၀ ကျော် သက်တမ်း ရှိတဲ့ စာသင်ကျောင်းလည်းရှိတယ်။ ဘုန်းကြီး ကျောင်းလည်းရှိတယ်။
ပြီးခဲ့တဲ့ ဒီဇင်ဘာလ ၃၀ နဲ့ ၃၁ ရက်မှာ သစ်တောဦးစီးဌာနက မြို့နယ်ဦးစီးမှူး ဦးဝင်းမြင့်နဲ့ တောအုပ်
ကြီး ဦးစိုးဝင်းတို့ ဒီရွာကို ရောက်လာပြီး နို့တစ်စာပေးသွားတယ်။ ဒီနေရာဟာ ရန်အောင်မြင်ကြိုးဝိုင်း
ဖြစ်လို့ တောင်သူလယ်သမားတွေအားလုံး သုံးရက်အတွင်း ထွက်ပေးရမယ်တဲ့။ ၂၇-၁၂-၂၀၁၂
နေပြည်တော်ကောင်စီ အစည်းအဝေးလမ်းညွှန်ချက်အရဆိုတဲ့ စာလည်းပါတယ်။ အခုလို သစ်တော
ဦးစီးဌာနရဲ့ ထင်သာမြင်သာမှုလည်းမရှိ၊ ညှိနှိုင်းမှုလည်းမရှိတဲ့ လုပ်ရပ်ကို ဒေသခံ တောင်သူတွေက
ကန့်ကွက်လက်မှတ် ရေးထိုးကြတာပါ"ဟု အဆိုပါ ကန့်ကွက် လက်မှတ်ရေးထိုးပွဲကို ဦးဆောင်
စီစဉ်သူ FNI (Facilitators Network With ILO) အဖွဲ့၏ နေပြည်တော်တာဝန်ခံ ဦးကျော်ဆွေ
လတ်က ပြောသည်။

သစ်တောဦးစီးဌာနက ရန်အောင် မြင် ကြိုးဝိုင်းဖြစ်သည်ဟု ပြောဆိုသော အဆိုပါ ဒေသကို ၁၉၉၅/
၉၆ ခုနှစ် ကတည်းကပင် ထိုစဉ်က အလယ်ပိုင်း တိုင်းစစ်ဌာနချုပ်ဗျူဟာမှူး ဗိုလ်ချုပ် မောင်ဘိုက
ကြိုးဝိုင်းအဖြစ်မှ လှန်ပစ် (ပယ်ဖျက်ပစ်)ခဲ့ပြီး ကြံစီမံကိန်းအတွက် ကြံခင်းများစိုက်စေခဲ့ကြောင်း၊
နေပြည်တော်တည်ဆောက်ရေးလုပ်ငန်းများ စတင်ချိန်တွင် အဆိုပါကြံခင်းများကို ဖျက်ခဲ့ခြင်းဖြစ်
ကြောင်း သိရသည်။

"အခုလိုကိစ္စမျိုးဟာ တစ်နိုင်ငံလုံးမှာ ကြုံတွေ့နေရတော့ တစ်နိုင်ငံလုံးမှာရှိတဲ့ တောင်သူတွေဟာ
မိဘလက်ငုတ် လယ်ယာမြေတွေအပေါ် မှီခိုအသက် မွေးနေရတာတွေနဲ့ ကိုယ်နှစ်ရှည်လများ
နေထိုင်လာခဲ့တဲ့ ရွာတွေ၊ အိမ်တွေကို မစွန့်လွှတ်နိုင်ကြောင်း၊ ဒီကိစ္စမျိုးတွေမှာ တစ်နိုင်ငံလုံးမှာရှိတဲ့
လယ်သမားတွေ တစုတစည်းတည်းရှိကြောင်း၊ တစ်သဘောတည်းရှိကြောင်း ပြသတဲ့ကန့်ကွက်မှု
ပါပဲ။ နောက်ပြီး လမ်းမတွေ ပေါ်ထွက် ဆန္ဒပြတာမျိုးမဟုတ်ဘဲ ကိုယ့်အိမ်ဝိုင်းထဲမှာပဲ စုဝေးပြီး
ဆွေးနွေးကြ၊ လက်မှတ်ထိုးကြတာပါ" ဟုလည်း ဦးကျော်ဆွေလတ်က ပြောသည်။

"ဒီရွာမှာ ကျွန်မနေတာ အနှစ် ၄၀ ရှိပါပြီ။ ဒီရွာက အိမ်တွေဆိုရင် အနှစ် ၅၀ ကျော်ရှိနေကြပြီ။ အခု
ဟာက ကြိုတင်အကြောင်းကြားခြင်းလည်းမရှိ၊ ရှင်းလင်းညှိနှိုင်းတာလည်းမရှိဘဲ 'သုံးရက်အတွင်း
ဖယ်ပေးရမယ်။ မဖယ်ပေးရင် တရားစွဲမယ်။ ခင်ဗျားတို့ ထောင် ခြောက်လနဲ့ ငွေဒဏ် ၅,၀၀၀ ကျ
လိမ့်မယ်'ဆိုတဲ့ ခြိမ်းခြောက်တဲ့ပုံစံမျိုးနဲ့လာ ပြောသွားတယ်။ ကျွန်မတို့မှာ ဖယ်ပေးရရင် နေစရာ
လည်းမရှိ၊ လုပ်စားစရာလည်းမရှိနဲ့ ဘယ်လိုရှင်သန်ကြမလဲ။ တကယ်လို့ ဖယ်ပေးရတဲ့ရွာသားအား
လုံး ကို လယ်ယာတွေလည်း အစားပေးမယ်၊ နေစရာလည်းပေးမယ်၊ ထိုက်သင့်တဲ့ လျော်ကြေးတွေ
လည်း ပေးမယ်ဆိုရင် တော့ ဒီကိစ္စကို လက်ခံစဉ်းစားပေးမှာပါ"ဟု လယ်မြေငါးဧကနှင့် ကုန်းမြေ
(ယာ မြေ)ငါးဧကပိုင်ဆိုင်သည့် ဒိုးနွယ်ရွာသစ်သူ ဒေါ်ကြင်ထွေးက ပြောသည်။

အလားတူပင် လယ်မြေ၊ ကုန်းမြေ ၁၂ ဧကရှိသော ရွာသစ်ရွာသား ဦးအောင်ကြင်သန်းကလည်း
"ကျွန်တော် ဒီရွာမှာနေတာ အနှစ် ၃၀ ကျော်ပြီ။ လယ်ယာမြေတွေကို ကျွန်တော့မိဘ တွေဆီက
လက်လွှဲယူပြီး လုပ်ကိုင်စားသောက်ခဲ့တာကို အနှစ် ၃၀ ရှိနေပြီ။ ရွာမှာစာသင်ကျောင်း၊ ဘုန်းကြီး
ကျောင်းနဲ့ ထန်းပင်ကြီးတွေ၊ မန်ကျည်းပင်ကြီးတွေလည်း ရှိနေတယ်။ ကျွန်တော်ဆိုရင် အဲဒီစာသင်
ကျောင်းရဲ့ကျောင်းကော်မတီဝင်ပါ။ ဒီကျောင်းလေးအတွက် ၀န်ကြီးဦးမြင့်လှိုင်(လယ်/ဆည်ဝန်ကြီး)
မဲမရွေးခင်က ဒီကျောင်းပတ်လည်မှာ မြေလာညှိပေးခဲ့တယ်။ ကျောင်း ၀င်တဲ့လမ်းကိုလည်း ဖောက်
ပေးခဲ့တယ်။ ကျောင်းသားကလေးတွေ ပိုးကောင်၊ မွှားကောင် အန္တရာယ်မရှိအောင် လမ်းဘေးက
သစ်ပင်တွေကိုပါ ဘူဒိုဇာနဲ့ ငါးရက် ရှင်းလင်းပေးခဲ့သေးတယ်"ဟု ပြောကြားသည်။

အခြားသော ဒိုးနွယ်ရွာသစ်ရွာသား တို့ကလည်း ယခုကဲ့သို့ ကြိုတင် အကြောင်းကြားခြင်း၊ ရှင်းလင်း
ပြောဆို ခြင်း၊ ဆွေးနွေးညှိနှိုင်းခြင်းမရှိဘဲ နေပြည်တော်ကောင်စီ၏ အစည်းအဝေး ဆုံးဖြတ်ချက်အရ
ဟူသော အသုံးအနှုန်းတစ်ခုတည်းနှင့် ခြိမ်းခြောက်မှုဆန်သော နို့တစ်စာ ထုတ်လာသည့် သစ်တော
ဦးစီးဌာန၏ လုပ်ရပ်အပေါ် ကန့်ကွက်ပါကြောင်း ပါဝင်ဖြေကြားခဲ့ကြသည်။

ပြည်သူ့လွှတ်တော်ဥက္ကဋ္ဌ သူရဦးရွှေမန်းက "မြေပုံနှင့် မြေပြင်မတူညီသည့်အပေါ်၊ နှစ်ရှည်လများ
စာသင် ကျောင်း၊ ဘုန်းကြီးကျောင်းနှင့် အခြေတကျ ရွာတည်နေကြပြီး မြေပုံပေါ်တွင် ကြိုးဝိုင်း၊
တကယ့်မြေပြင်၌ လယ်ယာစိုက်ခင်းနှင့် ကျေးရွာတို့ ကွဲလွဲနေကြသည်ကို ညှိနှိုင်းဆောင်ရွက်ရမည်"
ဟု ပြောကြားခဲ့ဖူးသည်။

ဤအကြောင်းအရာနှင့် ပက်သက်၍ ထင်မြင်ချက်ပေးလိုပါက ...
[email protected] သို့ ပေးပို့နိုင်ပါသည်။


ရာသီဥတုအခြေအနေ - နေပြည်တော်

အကြည့်အများဆုံး - နေပြည်တော်သတင်း