အာရှနှင်းဆီ အထည်ချုပ်စက်ရုံမှ အလုပ်သမားခေါင်းဆောင် ခုနစ်ဦးအား ပိုင်ရှင်က စက်ရုံတွင်းသို့ ၀င်ခွင့်မပြု

အလုပ်ပြန်လည်ခန့်အပ်ရန် တိုင်းခုံသမာဓိက အမိန့်ချမှတ်ထားသော်လည်း အာရှနှင်းဆီ
အထည်ချုပ်စက်ရုံမှ အလုပ်သမားသမဂ္ဂ ခေါင်းဆောင် ခုနစ်ဦးကို စက်ရုံပိုင်ရှင်က စက်ရုံဝင်းအတွင်း
ဝင်ရောက်ခွင့် မပြုခဲ့ကြောင်း အလုပ်သမားသမဂ္ဂခေါင်းဆောင် ဒေါ်သန္တာမိုးက အောက်တိုဘာ
၁၄ ရက်တွင်ပြောသည်။

တိုင်းခုံသမာဓိ၏ ဆုံးဖြတ်ချက်အတိုင်း အောက်တိုဘာ ၉ ရက်တွင် အလုပ်ပြန်လည်
ဝင်ရောက်ခဲ့ရာတွင် စက်ရုံက အလုပ်ရှင်၊ အလုပ်သမားသဘောတူစာချုပ်ကို လက်မှတ်ရေးထိုး
စေခဲ့ပြီး အဆိုပါ လက်မှတ်ကို ရေးထိုးရန် ရက်ရွှေ့ဆိုင်းခဲ့သဖြင့် အောက်တိုဘာ ၁၀ ရက်တွင်
စက်ရုံအတွင်းသို့ ၀င်ရောက်ခွင့် မပြုခဲ့ခြင်းဖြစ်သည်ဟု အလုပ်သမားခေါင်းဆောင်များက ဆိုသည်။

"ကျွန်မတို့ အခုကိစ္စကို အလုပ်သမားဦးစီးဌာနက တာဝန်ရှိသူတွေကို ညှိနှိုင်းဖြေရှင်းပေးဖို့
စာတင်ပြီး တိုင်ကြားထားပါတယ်။ ဥပဒေအရ အီးစီစာချုပ်ချုပ်ရမယ်ဆိုတာ လက်ခံတယ်။ ဒါပေမဲ့
ရက်ပေါင်း ၃၀ အတွင်းချုပ်လို့ရတယ်။ ဒါကြောင့် တချို့ကိစ္စတွေ ညှိနှိုင်းပြီး စာချုပ်ချုပ်ပေးမယ်
ပြောတာကို စက်ရုံဘက်က လက်မခံဘူး။ ကျွန်မတို့ဘက်ကလည်း ချက်ချင်းလက်မှတ်ထိုး
မချုပ်ဆိုခဲ့တဲ့အတွက် နောက်ရက် အလုပ်ဆင်းချိန်ကျတော့ စက်ရုံအတွင်းကို ပေးမ၀င်တော့ဘူး"ဟု
ဒေါ်သန္တာမိုးက ပြောသည်။

အဆိုပါ အလုပ်သမားခေါင်းဆောင်များကို အလုပ်သမားအသစ်အနေဖြင့်သာ ပြန်လည်
ခန့်အပ်ခဲ့ခြင်းကြောင့် မူလက ရရှိထားသည့် လုပ်သက်ကျွမ်းကျင်ကြေးများ မရရှိနိုင်တော့သဖြင့်
စာချုပ်ကို ချက်ချင်းလက်မှတ် မထိုးဘဲ ညှိနှိုင်းခဲ့ခြင်းဟု ၎င်းကဆိုသည်။

အဆိုပါ အငြင်းပွားမှုနှင့် ပတ်သက်၍ မြန်မာတိုင်း(မ်)က အာရှနှင်းဆီအထည်ချုပ်စက်ရုံ
အုပ်ချုပ်ရေးပိုင်းသို့ ဆက်သွယ်မေးမြန်းခဲ့သော်လည်း တာဝန်ယူဖြေကြားပေးမည့်သူ မရှိဟု
ဖုန်းကိုင်ဖြေကြားသူက တုံ့ပြန်ခဲ့သည်။

ထို့ပြင် စက်ရုံမှူးဖြစ်သူ၏ လက်ကိုင်ဖုန်းအား နှစ်ကြိမ်တိုင် ခေါ်ဆိုခဲ့သော်လည်း
လက်ခံဖြေကြားခဲ့ခြင်း မရှိပေ။

"အလုပ်သမား ခုနစ်ဦး ထပ်တိုင်ထားတဲ့ ကိစ္စကို မြို့နယ်ညှိနှိုင်းဖျန်ဖြေရေးက ပြန်စစ်ဆေး
ပေးလိမ့်မယ်။ အလုပ်ရှင်က အလုပ်ပြန်ခန့်ပေမယ့် အလုပ်သမားတွေက အလုပ်ရှင် အလုပ်သမား
သဘောတူ စာချုပ်ချက်ချင်း မထိုးပေးဘူးလို့ သိရတယ်"ဟု အာရှနှင်းဆီအလုပ်သမား
အငြင်းပွားမှုကို ဖြေရှင်းဆုံး ဖြတ်ခဲ့သည့် တိုင်းခုံသမာဓိအဖွဲ့ဝင်၊ တိုင်းအလုပ်သမားညွှန်ကြားမှု
ဦးစီးဌာနမှ ဒုတိယညွှန်ကြားရေးမှူး ဒေါ်လွင်လွင်မြင့်က မြန်မာတိုင်း(မ်)သို့ ပြောသည်။

"ကျွန်မတို့က အရင်အတိုင်း အလုပ်ပြန်ခန့်အပ်ဖို့ အမိန့်ချထားတာပါ။ အလုပ်သမားအသစ်အနေနဲ့
ပြန်ခန့်ဖို့ဆိုပြီး မပါဘူး"ဟု ၎င်းက ပြောသည်။

အာရှနှင်းဆီ အထည်ချုပ်စက်ရုံ အလုပ်ရှင် အလုပ်သမား အငြင်းပွားမှုမှာ အနည်းဆုံး
လုပ်ခကြေးငွေ ကျပ် ၃,၆၀၀ နှုန်းဖြင့် မသတ်မှတ်ခင် ရပ်ပိုင်းခန့်အလို အောက်တိုဘာ ၂၆ ရက်တွင်
အလုပ်သမား ၁၉၆ ဦးအား အလုပ်ရပ်စဲမှု နစ်နာကြေးပေးပြီး အလုပ်ထုတ်ပယ်မှု ပြုလုပ်ခဲ့ရာမှ
စတင်ခဲ့ခြင်း ဖြစ်သည်။

ထို့စဉ်က အလုပ်ပြန်လည်ခန့်အပ်ရန် အလုပ်သမားများက တောင်းဆိုခဲ့ရာတွင် အငြင်းပွားမှုကို
ဖြေရှင်းနေစဉ်အတွင်း သမဂ္ဂခေါင်းဆောင် ခုနစ်ဦးအား ကြားကာလ နစ်နာမှုလျော်ကြေး ရယူစေပြီး
အလုပ်ပြန်လည်ခန့်ထားပေးရန် ခုံသမာဓိက ဆုံးဖြတ်ခဲ့သည်။

ဤအကြောင်းအရာနှင့် ပက်သက်၍ ထင်မြင်ချက်ပေးလိုပါက ...
[email protected] သို့ ပေးပို့နိုင်ပါသည်။


ရာသီဥတုအခြေအနေ - ရန်ကုန်

အကြည့်အများဆုံး - ရန်ကုန်သတင်း