စက်ရုံပိတ်သိမ်းမှုအတွက် ခုံသမာဓိထံ တိုင်ကြားထား

လှိုင်သာယာမြို့နယ်ရှိ လဝန်းထက်သာ စက်ရုံအလုပ်သမားများ ဇူလိုင် ၈ ရက်က ဆန္ဒ ဖော်ထုတ်နေစဉ်။ ဇော်ဇော်ထွေး/ မြန်မာတိုင်း(မ်)လှိုင်သာယာမြို့နယ်ရှိ လဝန်းထက်သာ စက်ရုံအလုပ်သမားများ ဇူလိုင် ၈ ရက်က ဆန္ဒ ဖော်ထုတ်နေစဉ်။ ဇော်ဇော်ထွေး/ မြန်မာတိုင်း(မ်)

လှိုင်သာယာမြို့နယ်ရှိ လဝန်းထက်သာ အထည်ချုပ်စက်ရုံ ပိတ်သိမ်းမှုအတွက် အလုပ်သမားများအား
နစ်နာကြေးပေးရန် အလုပ်ရှင်နှင့် အလုပ်သမား နှစ်ဦးနှစ်ဖက် ညှိနှိုင်းမှုမပြေလည်သဖြင့် အလုပ်သမား
ခုံသမာဓိကောင်စီသို့ ဆက်လက်တိုင်ကြားထားသည်ဟု အလုပ်သမားခေါင်းဆောင် မဝင်းဝင်းစိုးက
ပြောသည်။

စက်ရုံပိတ်သိမ်းမှု နစ်နာကြေးပေးခြေရန် အလုပ်သမားကိုယ်စားလှယ်များနှင့်စက်ရုံကိုယ်စားလှယ်များ
ယခုလ ဒုတိယပတ်က မြို့နယ်အဆင့် အလုပ်သမားညှိနှိုင်းဖျန်ဖြေရေးရုံး၌ တွေ့ဆုံဆွေးနွေးခဲ့သော်
လည်း ပြေလည်မှုမရှိသဖြင့် ခုံသမာဓိကောင်စီမှတစ်ဆင့် ဖြေရှင်းပေးရန် တောင်းဆို
ထားခြင်းဖြစ်ကြောင်း ၄င်းကပြောသည်။

''ကျွန်မတို့ဘက်က ဒီလ ၁၁ ရက်နေ့ ပေးဖို့တောင်းဆိုထားတာ အလုပ်ရှင်ဘက်က မပေးတော့
ညှိနှိုင်းရေးက လူကြီးတွေက ဇူလိုင် ၂ဝ ရက်ပေးဖို့ သတ်မှတ်ပေးတယ်။ ဒါကို ကျွန်မတို့က
လိုက်လျောပေမဲ့ အလုပ်ရှင်ဘက်က မလိုက်လျောဘူး။ ၂၈ ရက်နေ့မှ ပေးနိုင်မယ်ပြောတယ်။
ဒါကြောင့် ခုံသမာဓိကိုတင်ဖို့ ကျွန်မတို့ တောင်းဆိုခဲ့တယ်''ဟု မဝင်းဝင်းစိုးက ပြောသည်။

လှိုင်သာယာမြို့နယ် ရွှေလင်ပန်းစက်မှုဇုန်ရှိ ကိုးရီးယားနိုင်ငံသားပိုင် လဝန်းထက်သာ
အထည်ချုပ်စက်ရုံကို ဆက်လက်လုပ်ကိုင်ရန် အလုပ်မရှိဟူသော အကြောင်းပြချက်ဖြင့်
အလုပ်သမားများကို ကြိုတင် အကြောင်းကြားမှုမရှိဘဲ ဇွန်လ ၂၅ ရက်က ပိတ်သိမ်းခဲ့ခြင်းဖြစ်သည်။

ယင်းသို့ စက်ရုံပိတ်သိမ်းမှုအတွက် အလုပ်သမားများက လုပ်ခလစာနှင့်နစ်နာကြေးများရရှိရန်
မြို့နယ်အဆင့် အလုပ်သမားညွှန်ကြားရေးနှင့် ဆက်ဆံရေးဦးစီးဌာနသို့ လေးကြိမ်တိုင်တိုင်
ကြားခဲ့သော်လည်း အလုပ်ရှင်ဘက်က လာရောက်ဖြေရှင်းရန် ပျက်ကွက်ခဲ့သဖြင့် စက်ရုံ
အလုပ်သမား ၈ဝ ကျော်က အလုပ်ပိတ်သိမ်းမှုနစ်နာကြေးပေးရန် ဇူလိုင်လ ၈ ရက်က
လမ်းလျှောက်ဆန္ဒထုတ်ဖော်တောင်းဆိုခဲ့ကြသည်။

''ကျွန်မတို့ အလုပ်သမားနဲ့ပတ်သက်တဲ့ဌာနတွေမှာ အကြိမ်ကြိမ်အကူညီတောင်းပါတယ်။
ဒါပေမဲ့ ဒီကိစ္စအတွက် ဘယ်သူမှမကူညီပေးကြဘူး''ဟု မဝင်းဝင်းစိုးကပြောသည်။

စက်ရုံက အလုပ်ပိတ်သိမ်းမှု နစ်နာကြေးကို သြဂုတ်လ ၁ဝ ရက်တွင် ပေးချေရန်
ကတိပေးပြောကြားခဲ့သော်လည်း နစ်နာကြေးပေးချေမည့် ရက်ကွာဝေးခြင်း၊ ယခင်ကလည်း
ကတိစာချုပ်များကို အကြိမ်ကြိမ်ဖောက်ဖျက်မှုများ ရှိနေခြင်းတို့ကြောင့် အလုပ်သမားများဘက်က
သဘောမတူသည့်အတွက် ယခုနောက်ဆုံး ညှိနှိုင်းမှုအဖြစ် ဇူလိုင်လ ၂၈ ရက်တွင်ပေးချေရန်
သတ်မှတ်ထားကြောင်း အလုပ်ရုံများနှင့်အလုပ်သမားဥပဒေစစ်ဆေးရေးဌာန
ဒုတိယညွှန်ကြားရေးမှူး ဦးချစ်ပေါက ပြောသည်။

မြို့နယ်အလုပ်ရုံများနှင့် အလုပ်သမားဥပဒေစစ်ဆေးရေးဌာန၏ ဆောင်ရွက်ပေးမှုကြောင့်
ခြောက်လပိုင်းအတွက် အလုပ်လုပ်ခဲ့ကြသည့် ၂၅ ရက်စာ လုပ်ခလစာကို ဇူလိုင်လ ၇ ရက်က
စက်ရုံဘက်မှ ပေးချေခဲ့ပြီး စက်ရုံပိတ်သိမ်းမှု နစ်နာကြေးအတွက် ဇူလိုင်လ ၂၈ ရက်တွင်
ပေးချေရန် ကတိပြုထားခြင်းဖြစ်ကြောင်း ၄င်းကပြောသည်။

''အလုပ်ပိတ်သိမ်းမှု လျော်ကြေးကိစ္စတွေက ကျွန်တော်တို့ ဌာနနဲ့ မဆိုင်တော့ဘူး။
အလုပ်သမားဆက်ဆံရေးဌာနနဲ့ဆိုင်သွားတယ်။ သူတို့က ကြားဝင်ညှိနှိုင်းဖြေရှင်းပြီး
ဆောင်ရွက်ပေးရမှာပါ။ အလုပ်သမားဥပဒေအရဆိုရင်တော့ စက်ရုံပိတ်သိမ်းရင်အလုပ်သမားကို
နစ်နာကြေး ပေးကိုပေးရမှာ''ဟု ဦးချစ်ပေါက ပြောသည်။

အဆိုပါ အငြင်းပွားမှုနှင့်ပတ်သက်ပြီး အလုပ်ရှင်ကိုယ်စားလှယ်ဖြစ်သည့် စက်ရုံမန်နေဂျာ
ဒေါ်အိအိဆွေသို့ အကြိမ်ကြိမ် ဆက်သွယ်မေးမြန်းခဲ့သော်လည်း ဇူလိုင် ၁၁ ရက်နေ့အထိ
လက်ခံဖြေကြားခြင်းမရှိခဲ့ပေ။

လဝန်းထက်သာ အထည်ချုပ်စက်ရုံသည် လွန်ခဲ့သည့် တစ်နှစ်ခန့်ကစပြီး အလုပ်သမားများ၏
လုပ်ခလစာများကို ဥပဒေတွင် သတ်မှတ်ပြဋ္ဌာန်းထားသည့် နေ့ရက်များထက်
နောက်ကျပေးချေခဲ့သလို၊ တစ်ပြိုင်နက် လစာပြည့်ပေးချေခြင်းမရှိဘဲ တစ်ဝက်စီခွဲကာ
ပေးချေလေ့ရှိကြောင်း အလုပ်သမားအချို့က ပြောသည်။

အနည်းဆုံး လုပ်ခလစာနှုန်းထား မပြဋ္ဌာန်းမီက အလုပ်သမားများက တစ်လလုပ်အားခ
အများဆုံး တစ်သိန်းခွဲဝန်းကျင်ထိ ရရှိခဲ့သော်လည်း ဥပဒေပြဋ္ဌာန်းပြီးနောက်တွင် အမြင့်ဆုံးလစာ
ကျပ် ၁၁ဝ,ဝဝဝ မှကျပ် ၁၃ဝ,ဝဝဝ ခန့်သာရရှိခဲ့ကြကြောင်း အလုပ်သမားအချို့က ပြောသည်။

''အခုစက်ရုံက ပိတ်တယ်ဆိုတော့ ကျွန်မတို့မှာ ဘာအလုပ်မှမရှိတော့ဘူး။ ငွေလည်းမရှိဘူး။
ဒါကြောင့် နစ်နာကြေးပေးဖို့ တောင်းဆိုနေတာပါ။ အလုပ်သစ်ရှာဖို့ဆိုတာက ချက်ချင်း
မလွယ်ဘူးလေ'' ဟု အဆိုပါ စက်ရုံမှ လုပ်သက်နှစ်နှစ်ရှိ စက်ချုပ်အလုပ်သမား မကဗျာဧပရယ်ဦး
က ပြောသည်။

အလုပ်သမားဥပဒေအရ စက်ရုံအလုပ်ရုံများ ပိတ်သိမ်းမည်ဆိုပါက အလုပ်သမားညွှန်ကြားမှု
ဦးစီးဌာနသို့ ကြိုတင်အကြောင်းကြားရပြီး စက်ရုံပိတ်သိမ်းသည်နှင့်တစ်ပြိုင်နက်
အလုပ်ပိတ်သိမ်းမှု နစ်နာကြေးများကို ချက်ချင်းပေးဆောင်ရကြောင်း၊ ချက်ချင်းပေးခြေနိုင်ခြင်း
မရှိပါက အလုပ်သမားများနှင့် ပြေလည်အောင်ညှိနှိုင်းပြီး သဘောတူစာချုပ် ချုပ်ဆိုရမည်
ဖြစ်ကြောင်း ရန်ကုန်တိုင်းဒေသကြီး အလုပ်သမားဆက်ဆံရေးဦးစီးဌာန
ဒုတိယညွှန်ကြားရေးမှူး ဒေါ်လွင်လွင်မြင့်က ပြောသည်။

လဝန်းထက်သာ အထည်ချုပ်စက်ရုံကို ဇွန်လ ၂၅ ရက် နေ့လယ် ၁၂ နာရီခန့်က
လုပ်ငန်း လည်ပတ်နေဆဲကာလမှာပင် ပိတ်သိမ်းခဲ့ခြင်းဖြစ်ပြီး ယင်းသို့ ပိတ်သိမ်းကြောင်း
အလုပ်သမားမျာကို ခေါ်ယူအသိပေးခဲ့ကာ အလုပ်ဆက်လုပ်ရန် မလိုတော့ဘဲ
အိမ်ပြန်ခိုင်းခဲ့ကြောင်း သိရသည်။

ဤအကြောင်းအရာနှင့် ပက်သက်၍ ထင်မြင်ချက်ပေးလိုပါက ...
[email protected] သို့ ပေးပို့နိုင်ပါသည်။


ရာသီဥတုအခြေအနေ - ရန်ကုန်

အကြည့်အများဆုံး - ရန်ကုန်သတင်း